Read Tibetan — པོད་སྐད་Tibetan Old Testament 2011 བཀའ་ཁྲིམས་སྐྱར་བཤད་ 24 Bible Online

བཀའ་ཁྲིམས་སྐྱར་བཤད་ 24 - Tibetan — པོད་སྐད་Tibetan Old Testament 2011 bible

བཀའ་ཁྲིམས་སྐྱར་བཤད་ 24

¹མི་ཞིག་གིས་བུད་མེད་ཅིག་དང་ཆང་ས་བརྒྱབས་ཏེ། རྗེས་སུ་ཁོས་མོའི་སྐོར་ལ་གནས་ཚུལ་མ་འདོད་པ་ཞིག་ཧ་གོ་ཞིང། མོ་ལ་སྤངས་རྩིས་བྱེད་པ་ཡིན་ན། བྲལ་ཡིག་ཅིག་བྲིས་ཏེ་དེ་མོ་ལ་སྤྲད་དེ་རང་གི་ནང་ནས་བཏོན་ཐུབ་ཡོང་།

²དེ་རྗེས་བུད་མེད་དེས་མི་གཞན་ཞིག་དང་མཉམ་དུ་ཆང་ས་བརྒྱབ་སྟེ།

³ཁྱོ་ག་དེས་ཀྱང་མོ་ལ་མ་འདོད་པར་བྲལ་ཡིག་ཅིག་བྲིས་ཏེ་མོ་ལ་ནང་ནས་བཏོན་པའམ། ཡང་ན་ཁྱོ་གཉིས་པ་དེ་ཤི་བ་ཡིན་ན།

⁴གང་ལྟར་ཡིན་རུང་ཁྱོ་དང་པོ་དེས་མོ་ལ་ཡང་སྐྱར་ཆང་ས་བརྒྱབ་མི་ཆོག་ཅིང་། མོ་ནི་མི་གཙང་བར་རྩིས་དགོས་པ་ཡིན་ནོ། གལ་ཏེ་མི་དེས་མོ་ལ་ཡང་སྐྱར་ཆང་ས་བརྒྱབ་པ་ཡིན་ན། དེ་ནི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་གཟིགས་སྣང་དུ་མི་གཙང་བའི་རྒྱུ་ཞིག་ཡིན་པས། ཁོང་གིས་ཁྱོད་ཚོར་གནང་རྒྱུ་ཡིན་པའི་ཡུལ་དེར། དེ་ལྟ་བུའི་སྡིག་པ་ཉེན་འཚབ་ཆེ་བ་ཞིག་ནམ་ཡང་མ་བྱེད་ཅིག།

⁵ཉེ་འཆར་ཆང་ས་བརྒྱབ་པའི་མི་ཞིག་དམག་ལ་བཏང་བའམ་མི་མང་གི་ལས་དོན་གང་འདྲ་ཞིག་ཀྱང་བསྐུལ་མི་རུང་སྟེ། ལོ་གཅིག་གི་རིང་ཁོ་ལ་ལས་འགན་ཀུན་ལས་གུ་ཡང་སྤྲད་དེ། རང་གི་ནང་དུ་བཟའ་ཟླ་དང་མཉམ་དུ་གནས་ཏེ་མོ་ལ་དགའ་མགུར་བྱེད་བཅུག་དགོས།

⁶སུ་ཞིག་ལ་བུ་ལོན་སྤྲད་སྐབས། ཁོའི་འབྲུ་འཐག་པའི་རང་འཐག་དེ་གཏའ་མར་མ་ལེན་ཞིག དེ་ལྟར་བྱས་པ་ཡིན་ན་ནང་མི་དེ་ཁོ་ཚོའི་འཚོ་བའི་ཐབས་ཤེས་དེ་འཕྲོག་གི་ཡོད་པ་ཡིན་ནོ།

⁷སུ་ཞིག་གིས་རང་རིགས་གཅིག་པའི་ཨིསི་རཱཨེལ་པ་ཞིག་བཙན་འཁྲིད་བྱས་ཏེ་བྲན་གཡོག་ཏུ་བསྐུལ་བའམ་བཙོངས་པ་ཡིན་ན། དེ་ལྟར་བྱེད་མཁན་མི་དེ་གསོད་དགོས་སོ། དེ་ལྟར་བྱས་ཏེ་ཁྱོད་ཚོས་སྲོལ་ངན་པ་དེ་རྣམས་མེད་པར་བྱེད་དགོས་སོ།

⁸ཁྱོད་ཚོ་ལ་ལྤགས་ནད་དྲག་པོ་ཞིག་ཕོག་ཡོད་པ་ཡིན་ན། ལེ་ཝིའི་བླ་མ་རྣམས་ཀྱིས་གང་སྨྲས་པ་ལྟར་བྱོས་ཤིག ངས་ཁོ་ཚོར་སློབ་སྟོན་གང་བྱས་པ་ཚང་མ་ཁྱོད་ཚོས་ཉོན་ཅིག

⁹སྔར་ཁྱོད་ཚོ་ཨི་ཇིབ་ནས་ཐོན་ཡོང་སྐབས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་མིར་ཡམ་ལ་གང་གནང་བ་དེ་དྲན་གསོ་བྱོས་ཤིག

¹⁰ཁྱིམ་མཚེ་ཞིག་ལ་བུ་ལོན་སྤྲད་པ་ཡིན་ན། དེའི་གཏའ་མར་ཁོའི་གྱོན་གོས་ཤིག་ལེན་པར་ཁྱིམ་ནང་དུ་མ་འགྲོ་ཞིག

¹¹ཁང་པའི་ཕྱི་རུ་སྒུག་སྡོད་བྱེད་དེ། ཁོ་རང་གིས་གོས་དེ་འཁྱེར་འོངས་ཏེ་ཁྱོད་ལ་སྤྲད་དགོས།

¹²གལ་ཏེ་མི་དེ་དབུལ་པོ་ཞིག་ཡིན་ན། དེའི་གོས་དེ་ཁྱོད་ཚོས་མཚན་མོའི་རིང་དུ་མ་བཞག་པར།

¹³གོས་དེ་དགོང་མོ་རེ་བཞིན་ཁོས་བེད་སྤྱོད་བྱས་ཏེ་ཉལ་ཐུབ་པའི་ཕྱིར་ཁོ་ལ་ཕྱིར་ལོག་བྱེད་དགོས། དེ་ལྟར་བྱས་ན་ཁོས་བཀའ་དྲིན་རྗེས་དྲན་ཞུ་བ་དང་། གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ཁྱོད་ལ་ཐུགས་མཉེས་པར་འགྱུར།

¹⁴རང་རིགས་གཅིག་པའི་ཨིསི་རཱཨེལ་པའམ་ཁྱོད་ཚོའི་གྲོང་ཁྱེར་ཞིག་ཏུ་གནས་སྡོད་བྱེད་པའི་ཕྱི་རྒྱལ་བའི་གླ་པ་ཉམ་ཐག་ཅིང་དབུལ་པོ་དང་ཉམས་ཆུང་ཡིན་ན་ཁོ་ལ་མགོ་སྐོར་མ་གཏོང་ཞིག

¹⁵ཉིན་ལྟར་ཉི་མ་མ་ནུབ་གོང་དུ་མི་དེ་ལ་ཉིན་རེའི་གླ་ཆ་སྤྲོད་དགོས། གང་ལགས་ཟེར་ན། ཁོ་ལ་དངུལ་དེ་མཁོ་གནད་ཆེ་བས་ཁོས་དེ་ལ་རེ་འདོད་ཆེན་པོ་བྱེད་ནས་སྡོད་ཀྱི་ཡོད། ཁོ་ལ་ཁྱོད་ཀྱི་གླ་ཆ་དེ་མ་སྤྲད་པ་ཡིན་ན། ཁྱོད་ཀྱི་ཐོག་ཏུ་ཁོས་གཙོ་བོ་དཀོན་མཆོག་ལ་སུས་འབོད་བྱེད་ཡོང་། སྡིག་པའི་ཉེས་དམིགས་དེ་ཁྱོད་ཀྱི་ཐོག་ཏུ་ཕོག་པར་འགྱུར།

¹⁶ཕྲུ་གུས་བྱས་པའི་ཉེས་དམིགས་སུ་ཕ་མ་བསད་མི་རུང་། དེ་བཞིན་ཕ་མས་བྱས་པའི་ཉེས་དམིགས་ཀྱིས་ཕྲུ་གུ་ཚོ་ལ་བསད་མི་རུང་ངོ་། སོ་སོས་བྱས་པའི་ཉེས་དམིགས་སུ་མི་དེ་རང་གསོད་དགོས་པ་ཡིན་ནོ།

¹⁷ཕྱི་རྒྱལ་བའམ་ད་ཕྲུག་ཚོའི་ཐོབ་ཐང་མ་འཕྲོག་ཅིག དེ་བཞིན་ཡུག་མོ་ཞིག་ལ་བུ་ལོན་སྤྲད་སྐབས་མོའི་གྱོན་གོས་སོགས་གཏའ་མར་ལེན་མི་རུང་།

¹⁸ངས་ཁྱོད་ཚོ་བཀའ་བསྒོས་དེ་བཞིན་བྱེད་དགོས་དོན་ནི། སྔར་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོ་ཨི་ཇིབ་ཀྱི་བྲན་འཁོལ་ནས་སྐྱབས་པ་གནང་བ་དེ་ཁྱོད་ཚོས་དྲན་གསོ་བྱེད་ཐུབ་པའི་ཕྱིར་རོ།

¹⁹ཁྱོད་ཚོས་སྟོན་ཐོག་བསྡུ་སྒྲུག་བྱེད་སྐབས། ཞིང་ཁར་སྟོན་ཐོག་བསྡུ་འཕྲོ་ལུས་པ་ཡིན་ན་དེ་ལེན་ཕྱིར་ཞིང་ཁར་མ་འགྲོ་ཞིག དེ་ནི་ཕྱི་རྒྱལ་བ་དང་ད་ཕྲུག་དང་དེ་བཞིན་ཡུགས་ས་མ་ཚོའི་དོན་དུ་བཞག་དགོས། དེ་ལྟར་བྱས་པ་ཡིན་ན་ཁྱོད་ཀྱི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཀྱི་ལས་དོན་ཚང་མར་བྱིན་རླབས་གནང་བར་འགྱུར།

²⁰དེ་བཞིན་ཁྱོད་ཚོས་ཁ་སྐྱུར་པོའི་ ཤིང་འབྲས་བསྡུ་སྒྲུག་བྱས་ཟིན་པའི་རྗེས་སུ་བསྡུ་འཕྲོ་ལུས་པ་རྣམས་སྐྱར་དུ་ལེན་པར་མ་འགྲོ་ཞིག། དེ་ནི་ཕྱི་རྒྱལ་བ་དང་ད་ཕྲུག་དང་ཡུགས་ས་མ་ཚོའི་དོན་དུ་སྤངས་བཞག་དགོས།

²¹རྒུན་འབྲུམ་བསྡུ་སྒྲུག་བྱེད་སྐབས་ཀྱང་བསྡུ་ཐེངས་གཅིག་རང་དུ་གང་བསྡུ་ཐུབ་པ་ལས། སྐྱར་དུ་རྒུན་ཚལ་དུ་རྒུན་འབྲུམ་བསྡུ་བར་མ་འགྲོ་ཞིག། བསྡུ་འཕྲོ་ལུས་པ་དེ་ཕྱི་རྒྱལ་བ་དང་། དྭ་ཕྲུག་དང་། ཡུག་མོ་ཚོའི་དོན་དུ་བཞག་དགོས་པ་ཡིན་ནོ།

²²ངས་ཁྱོད་ཚོར་འདི་བཞིན་བཀའ་བསྒོས་བྱེད་དགོས་དོན་ནི། སྔར་ཁྱོད་ཚོ་ཨི་ཇིབ་ཀྱི་བྲན་འཁོལ་དུ་གནས་པ་དེ་ནམ་ཡང་མ་བརྗེད་པར་བྱེད་པའི་ཕྱིར་རོ༎