Tibetan — པོད་སྐད་Tibetan Old Testament 2011 bible online

བཀའ་ཁྲིམས་སྐྱར་བཤད་ 28

¹གལ་ཏེ་ཁྱོད་ཆོས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་བཀའ་ལ་ཉན་པ་དང་། ངས་དེ་རིང་ཁྱོད་ཚོར་སྤྲད་པའི་ཁོང་གི་བཀའ་རྒྱ་ཚང་མ་ཚུལ་བཞིན་སྲུང་བ་ཡིན་ན། ཁོང་གི་ཁྱོད་ཚོར་འཇིག་རྟེན་དུ་མི་རིགས་གཞན་ལས་མངའ་ཐང་ཆེ་བའི་མི་རིགས་ཤིག་ཏུ་བཀོད་པ་གནང་རྒྱུ་དང་།

²གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་བཀའ་ལ་རྩིས་སྲུང་ཞུ་ཞིག་དང་། གཤམ་གསལ་བྱིན་རླབས་ཚང་མ་ཁྱོད་ཚོར་ཐོབ་པར་འགྱུར།

³གཙོ་བོ་དཀོན་མཆོག་གིས་ཁྱོད་ཚོའི་གྲོང་ཁྱེར་ཚོ་དང་ས་ཞིང་རྣམས་ལ་བྱིན་རླབས་གནང་རྒྱུ་ཡིན་པ་དང་།

⁴གཙོ་བོ་དཀོན་མཆོག་གིས་ཁྱོད་ཚོར་བུ་ཕྲུག་མང་པོ་དང་། ལྡང་ངེ་བཞིན་ལོ་ཏོག་མང་པོ་དང་ཕྱུགས་ཟོག་སོགས་མང་པོ་བྱིན་རླབས་གནང་བར་འགྱུར།

⁵གཙོ་བོ་དཀོན་མཆོག་གིས་ཁྱོད་ཚོའི་འབྲུ་དང་དེ་ལས་བཟོས་པའི་ཁ་ཟས་རྣམས་ལ་བྱིན་རླབས་གནང་བར་འགྱུར།

⁶གཙོ་བོ་དཀོན་མཆོག་གིས་ཁྱོད་ཚོའི་ལས་དོན་གང་སྤྱིར་བྱིན་རླབས་གནང་བར་འགྱུར།

⁷དགྲ་བོས་ཁྱོད་ཚོར་འཐབ་འཛིང་བྱེད་སྐབས་གཙོ་བོ་དཀོན་མཆོག་གིས་དེ་ཚོ་འཕམ་བཅུག་པར་གནང་རྒྱུ་ཡིན་པ་། དེ་ཚོས་ཕྱོགས་གཅིག་ནས་འཐབ་འཛིང་བྱས་རུང་། ས་ཕྱོགས་ཀུན་ནས་བྲོས་དགོས་བྱུང་བར་འགྱུར།

⁸གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོའི་ལས་དོན་ཚང་མར་བྱིན་རླབས་གནང་ཞིང་། ཁྱོད་ཚོའི་འབྲུ་མཛོད་ཚང་མ་འབྲུ་ཡིས་བཀང་བར་མཛད་དེ། ཁོང་གིས་གནང་བའི་ཡུལ་དུ་ཁྱོད་ཚོར་བྱིན་རླབས་གནང་བར་འགྱུར།

⁹ཁྱོད་ཚོས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་བཀའ་ལ་ཉན་པ་དང་ཁོང་གི་བཀའ་བསྒོས་གནང་བ་ཚང་མ་སྒྲུབ་པ་ཡིན་ན། སྔར་ཁོང་གིས་ཞལ་བཞེས་གནང་བ་བཞིན་ཁོང་གིས་ཁྱོད་ཚོར་ཉིད་ཀྱི་མི་འབངས་སུ་བཀོད་པ་གནང་རྒྱུ་ཡིན་ནོ།

¹⁰དེ་ནས་གཙོ་བོ་དཀོན་མཆོག་གིས་ཁྱོད་ཚོར་ཉིད་ཀྱི་མི་འབངས་སུ་འདམས་པ་གནང་བ་དེ་འཇིག་རྟེན་གྱི་མི་རིགས་ཚང་མས་མཐོང་སྟེ། ཁོ་ཚོའི་སེམས་ནང་འཇིགས་སྣང་སྐྱེད་པར་འགྱུར།

¹¹ཁྱོད་ཚོའི་ཕ་མེས་རྣམས་ལ་ཞལ་བཞེས་གནང་བའི་ཡུལ་དེར་གཙོ་བོ་དཀོན་མཆོག་གིས་ཁྱོད་ཚོའི་ཕྲུ་གུ་མང་པོ་དང་། ཕྱུགས་ཟོག་མང་པོ་དང་ལོ་ཐོག་ཕོན་ཆེ་གནང་རྒྱུ་ཡིན་ནོ།

¹²ཉིད་ཀྱིས་མཐོ་རིས་ཀྱི་བང་མཛོད་ནས་ཆར་ཆུ་དུས་སུ་འབེབ་པར་མཛད་དེ། ཁྱོད་ཚོའི་ལས་དོན་ཚང་མར་བྱིན་རླབས་གནང་ཞིང་། ཁྱོད་ཚོས་མི་རིགས་མང་པོར་བུ་ལོན་བཏང་ཡོང་། འོན་ཀྱང་ཁྱོད་ཚོས་གཞན་ལས་གཡར་སྐྱིན་སོགས་བྱེད་མི་དགོས་སོ།

¹³གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོར་མི་རིགས་མང་པོའི་ཁྲོད་དུ་རྗེས་སུ་འབྲངས་མཁན་ཞིག་ཏུ་མ་ཡིན་པར་འོན་ཀྱང་འགོ་དཔོན་རྣམས་བཟོས་གནང་རྒྱུ་ཡིན་ནོ། དེ་རིང་ངས་ཁྱོད་ཚོར་སྤྲད་པའི་ཁོང་གི་བཀའ་རྒྱ་ཚང་མ་ཁྱོད་ཚོས་ཚུལ་བཞིན་སྲུང་བ་ཡིན་ན། ཁྱོད་ཚོ་རྟག་ཏུ་ཡར་རྒྱས་གོང་དུ་འཕེལ་ཞིང་། ལས་དོན་མི་འགྲུབ་པའི་བྱ་བ་གཅིག་ཀྱང་མི་ཡོང་ངོ་།

¹⁴འོན་ཀྱང་དེ་དག་ལ་རྩིས་སྲུང་མ་ཞུས་པར། ལྷ་རྟེན་གཞན་ལ་ནམ་ཡང་མཆོད་འབུལ་དང་གུས་བཀུར་མ་བྱེད་ཅིག།

¹⁵གལ་ཏེ་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་བཀའ་ལ་མ་ཉན་བ་དང་། དེ་རིང་ངས་ཁྱོད་ཚོར་སྤྲད་པའི་ཁོང་གི་བཀའ་དང་ཁྲིམས་རྣམས་ཚུལ་བཞིན་མ་སྲུང་ན་གཤམ་གསལ་དམོད་པ་འདི་དག་ཁྱོད་ཚོའི་ཐོག་ཏུ་ཕོག་པར་འགྱུར།

¹⁶གཙོ་བོ་དཀོན་མཆོག་གིས་ཁྱོད་ཀྱི་གྲོང་ཁྱེར་ཚོ་དང་ས་ཞིང་ཁག་ལ་དམོད་པ་གཏོང་བར་འགྱུར།

¹⁷གཙོ་བོ་དཀོན་མཆོག་གིས་ཁྱོད་ཚོའི་འབྲུའི་ལོ་ཐོག་དང་དེ་ལས་བཟོས་པའི་ཁ་ཟས་སོགས་ལ་དམོད་པ་གཏོང་བར་འགྱུར།

¹⁸ཁྱོད་ཚོར་གཙོ་བོ་དཀོན་མཆོག་གི་དམོད་པ་ཕོག་པའི་རྐྱེན་གྱིས་ཕྱུགས་ཟོག་ར་ལུག་སོགས་དང་། བུ་ཕྲུག་དང་། དེ་བཞིན་ཞིང་གི་ཐོན་སྐྱེད་སོགས་ཀྱང་འཕེལ་བར་མི་འགྱུར་རོ།

¹⁹ཁྱོད་ཚོའི་ལས་དོན་ཀུན་ལ་གཙོ་བོ་དཀོན་མཆོག་གི་དམོད་པ་ཕོག་པར་འགྱུར།

²⁰གལ་ཏེ་ཁྱོད་ཚོས་ལས་ངན་བྱས་པ་དང་གཙོ་བོ་དཀོན་མཆོག་ལ་སྤངས་པ་ཡིན་ན། ཁྱོད་ཚོ་རིང་མིན་ཡོངས་སུ་མ་འཇིག་པའི་བར་དུ་ཁྱོད་ཚོས་བྱས་པའི་ལས་དོན་ཚང་མར་ཁོང་གིས་རྐྱེན་ངན་དང་དུས་ཟིང་དང་དཀའ་ངལ་སོགས་གཏོང་གནང་བར་འགྱུར་རོ།

²¹ཁྱོད་ཚོས་བདག་འཛིན་བྱེད་རྒྱུའི་ཡུལ་དེར་ཁྱོད་ཚོ་གཅིག་ཀྱང་མ་ལུས་པར་འགྱུར་བའི་ཕྱིར། མུ་མཐུད་དེ་ཁྱོད་ཚོར་ནད་སྣ་ཚོགས་གཏོང་བ་གནང་བར་འགྱུར།

²²གཙོ་བོ་དཀོན་མཆོག་གིས་ཁྱོད་ཚོ་ལ་སྐྲང་འབོས་དང་ཚ་བ་ལ་སོགས་པའི་འགོས་ནད་ཀྱིས་མནར་བཅུག་པ་དང་། ཐེན་པ་དང་རླུང་ཆ་པོ་གཏོང་བ་གནང་སྟེ། ཁྱོད་ཚོའི་སྟོན་ཐོག་ཚང་མ་འཇིག་པར་མཛད་རྒྱུ་ཡིན། ཁྱོད་ཚོ་མ་ཤི་བར་དུ་རྐྱེན་ངན་དང་དཀའ་ངལ་དེ་དག་ཁྱོད་ཚོའི་ཐོག་ཏུ་གནས་རྒྱུ་ཡིན་ནོ།

²³ཆར་ཆུ་མེད་པས་ཁྱོད་ཚོའི་ས་ཞིང་ཚང་མ་ལྕགས་ལྟར་མཁྲེགས་པོར་འགྱུར་རྒྱུ་དང་།

²⁴ཁྱོད་ཚོ་མ་འཇིག་བར་དུ་གཙོ་བོ་དཀོན་མཆོག་གིས་ཆར་ཆུའི་ཚབ་ཏུ་རྡུལ་དང་བྱེ་མས་གང་བའི་རླུང་འཚུབ་དྲག་པོ་གཏོང་བར་འགྱུར།

²⁵ཁྱོད་ཚོའི་དགྲ་བོ་རྣམས་ལ་གཙོ་བོ་དཀོན་མཆོག་གིས་ཁྱོད་ཚོའི་ཐོག་ཏུ་རྒྱལ་ཁ་གནང་ཞིང་། ཁྱོད་ཚོས་དེ་དག་ལ་ཕྱོགས་གཅིག་ནས་འཐབ་འཛིང་བྱས་ཀྱང་། ས་ཕྱོགས་ཀུན་ནས་བྲོས་དགོས་བྱུང་བ་དང་། ཁྱོད་ཚོའི་ཐོག་ཏུ་གནས་ཚུལ་གང་བྱུང་བ་དེ་མཐོང་ནས་ས་གཞིའི་མི་རིགས་ཚང་མ་འཇིག་པར་འགྱུར།

²⁶ཁྱོད་ཚོ་ཤི་བའི་རྗེས་སུ་བྱ་དང་ནགས་ཀྱི་གཅན་གཟན་རྣམས་ཡོང་ནས་ཁྱོད་ཚོའི་རོ་རྣམས་ཟ་བ་དང་། དེ་དག་ལ་དཀྲོག་མཁན་སུའང་ཡོང་བར་མི་འགྱུར།

²⁷སྔར་ཨི་ཇིབ་པ་ཚོ་ལ་གནང་བ་ལྟར་གཙོ་བོ་དཀོན་མཆོག་གིས་ཁྱོད་ཚོ་ལའང་གཉན་འབུར་གྱིས་མནར་བར་མཛད་དེ། ཁྱོད་ཚོའི་གཟུགས་པོར་རྨ་དང་ཤུ་བས་གང་ཞིང་། ཁྱོད་ཚོའི་ལུས་པོར་རྔོ་ནད་ཀྱིས་ཡོངས་སུ་ཁྱབ་སྟེ། ཟ་འཕྲུག་ལངས་མོད། འོན་ཀྱང་ནད་གཞི་དེ་ལས་དྲག་གསོ་བའི་སྨན་ཐབས་གཅིག་ཀྱང་མི་ཐོབ་པ་དང་།

²⁸གཙོ་བོ་དཀོན་མཆོག་གིས་ཁྱོད་ཚོ་སྨྱོ་རུ་བཅུག་པར་མཛད་ཅིང་། མིག་ལོང་བར་མཛད་དེ། སེམས་འཚབ་ཆེན་པོ་སྐྱེད་བཅུག་པར་མཛད་རྒྱུ་དང་།

²⁹ལོང་བ་བཞིན་དུ་ཁྱོད་ཚོ་ཉིན་མོར་སྦར་ཡུལ་བརྒྱབ་སྟེ་འགྲུལ་ནའང་། ཁྱོད་ཚོས་རང་གི་འགྲུལ་ལམ་ཐོབ་མི་ཡོང་། ཁྱོད་ཚོའི་ལས་དོན་གང་སྤྱིར་ལམ་ལྷོངས་མི་ཡོང་བ། གཞན་གྱིས་ཁྱོད་ཚོར་རྒྱུན་དུ་དབང་གནོན་དང་ཇག་བཅོམ་བྱས་ཀྱང་། ཁྱོད་ཚོར་སྐྱབས་མཁན་སུའང་མི་ཡོང་ངོ་།

³⁰ཁྱོད་དང་བུད་མེད་ཅིག་སློང་ཆང་བྱེད་རྒྱུའི་ཐག་གཅོད་བྱས་རུང་། མི་གཞན་གྱིས་དེ་དང་ཆང་ས་བརྒྱབ་པ་དང་། ཁྱོད་ཀྱིས་ཁང་པ་རྒྱག་པ་ཡིན་རུང། དེའི་ནང་དུ་ནམ་ཡང་སྡོད་རྒྱུ་མི་ཐོབ་པ་དང་། ཁྱོད་ཀྱིས་རྒུན་ཚལ་འདེབས་ལས་བྱས་ཀྱང་འབྲས་བུར་ནམ་ཡང་ལོངས་སྤྱོད་རྒྱུ་ཐོབ་མི་ཡོང་།

³¹ཁྱོད་ཚོའི་སེམས་ཅན་རྣམས་ཁྱོད་ཚོའི་མིག་ངོར་བསད་ཀྱང་། ཁྱོད་ཚོས་དེའི་ཤ་དེ་ཟ་རྒྱུ་ཐོབ་མི་ཡོང་། དེ་བཞིན་ཁྱོད་ཚོས་མཐོང་སར་ཁྱོད་ཚོའི་བོང་བུ་རྣམས་གཞན་གྱིས་འཁྲིད་དེ་སླར་ཕྱིར་སློག་མི་བྱེད་དོ། ཁྱོད་ཚོའི་ལུག་ཁྱུ་དགྲ་བོར་སྤྲད་ཀྱང་། ཁྱོད་ལ་རོགས་བྱས་མཁན་སུའང་མི་རྙེད་དོ།

³²ཁྱོད་ཀྱི་མིག་ངོར་ཁྱོད་ཀྱི་བུ་དང་བུ་མོ་རྣམས་ཕྱི་རྒྱལ་བའི་བྲན་འཁོལ་དུ་འཁྲིད་དེ། ཁྱོད་ཚོའི་བུ་ཕྲུག་ཚོ་ནམ་ཕྱིར་ལོག་བྱེད་ཡོང་ངམ་བསམ་ནས་ཁྱོད་ཚོས་ཉིན་ལྟར་དོན་མེད་དུ་མིག་ན་ན་ལྟས་ནས་བསྡད་དགོས་ཡོང་།

³³ཁྱོད་ཚོས་འབད་བརྩོན་ཆེན་པོས་བཏབ་པའི་ལོ་ཏོག་རྣམས་ཕྱི་རྒྱལ་བ་ཚོས་འཁྱེར་ཏེ། དེའི་ཚབ་ཏུ་ཁྱོད་ཚོར་རྒྱུན་དུ་མནར་གཅོད་དང་གདུག་རྩུབ་དྲག་པོ་མྱོང་དགོས་པ་དང་།

³⁴དཀའ་ངལ་དེ་ཚོའི་རྐྱེན་གྱིས་ཁྱོད་ཚོ་སྨྱོ་བར་འགྱུར་རོ།

³⁵གཙོ་བོ་དཀོན་མཆོག་གིས་ཁྱོད་ཚོའི་རྐང་པར་དྲག་དཀའ་ཞིང་ན་གཟུགས་ལྡན་པའི་རྨས་གང་བར་མཛད་དེ། ཁྱོད་ཚོའི་སྤྱི་བོ་ནས་རྐང་མཐིལ་བར་དུ་གཉེན་འབུར་གྱིས་མནར་བར་འགྱུར།

³⁶གཙོ་བོ་དཀོན་མཆོག་གིས་ཁྱོད་ཚོ་དང་ཁྱོད་ཚོའི་རྒྱལ་པོ་ལ་ཕྱི་རྒྱལ་བའི་ཡུལ་ཞིག་ཏུ་འཁྲིད་པ་གནང་རྒྱུ་དང་། ཡུལ་དེར་ཁྱོད་ཚོའམ་ཁྱོད་ཚོའི་མེས་པོ་རྣམས་དེ་སྔ་ནམ་ཡང་བསྡད་མ་མྱོང་ཞིང་། དེར་ཁྱོད་ཚོས་ཤིང་དང་རྡོ་ལས་བཟོས་པའི་ལྷ་རྟེན་རྣམས་ལ་བཀུར་སྟི་བྱེད་པར་འགྱུར།

³⁷གཙོ་བོ་དཀོན་མཆོག་གིས་ཁྱོད་ཚོར་ཁ་སྟོར་ནས་གཏོང་བ་གནང་རྒྱུའི་ཡུལ་ཁག་སོ་སོའི་མི་རྣམས་ཀྱིས་ཁྱོད་ཚོའི་གནས་སྟངས་དེ་མཐོང་ནས་ཡ་མཚན་སྐྱེད་ཅིང་། དེ་དག་གིས་ཁྱོད་ཚོར་འཕྱ་དགད་དང་དམའ་འབེབས་བྱེད་པར་འགྱུར་རོ།

³⁸ཁྱོད་ཚོས་ས་བོན་མང་པོ་འདེབས་མོད། འོན་ཀྱང་སྟོན་ཐོག་ཉུང་ངུ་ཞིག་བསྡུ་སྒྲུག་བྱེད་རྒྱུ་ཡིན། གང་ལགས་ཟེར་ན། ཆ་ག་འབུས་སྙེ་མ་རྣམས་ཟ་བར་འགྱུར།

³⁹དེ་བཞིན་ཁྱོད་ཚོས་རྒུན་ཞིང་འདེབས་ལས་བྱས་ཏེ། དེར་གཡོག་བྱེད་ཡག་པོ་བྱས་མོད། འོན་ཀྱང་ཁྱོད་ཚོས་རྒུན་འབྲུམ་བསྡུ་སྒྲུག་བྱེད་མི་ཡོང་། རྒུན་ཆང་འཐུང་རྒྱུ་ཐོབ་མི་ཡོང་། གང་ལགས་ཟེར་ན། རྒུན་ཤིང་ཚང་མ་འབུས་ཟ་བར་འགྱུར་རོ།

⁴⁰ཡུལ་གྱི་ས་ཕྱོགས་ཀུན་ཏུ་ཁ་སྐྱུར་པོའི་ཤིང་རྣམས་སྐྱེས་ཀྱང་། ཁ་སྐྱུར་པོའི་འབྲས་བུ་ཚང་མ་ས་ལ་གཟགས་པས། ཁྱོད་ཚོར་ཁ་སྐྱུར་པོའི་སྣུམ་ཐོབ་པར་མི་འགྱུར་རོ།

⁴¹ཁྱོད་ཚོར་བུ་དང་བུ་མོ་རྣམས་སྐྱེས་མོད། འོན་ཀྱང་དེ་དག་ནི་ཁྱོད་ལས་བཙོན་དུ་འཁྲིད་པར་འགྱུར།

⁴²ཁྱོད་ཚོའི་ཤིང་སྡོང་དང་ལོ་ཐོག་ཚང་མ་འབུས་ཟས་ནས་ཡོངས་སུ་འཇིག་པར་འགྱུར།

⁴³ཁྱོད་ཚོའི་ཡུལ་དུ་གནས་པའི་ཕྱི་རྒྱལ་བ་རྣམས་ཀྱི་དབང་ཆ་ཆེ་རུ་འགྲོ་རྒྱུ་དང་། ཁྱོད་ཚོའི་དབང་ཆ་རིམ་བཞིན་ཉམས་པར་འགྱུར།

⁴⁴ཁྱོད་ཚོར་བུ་ལོན་སྤྲད་པའི་ཕྱིར་ཁོ་ཚོ་ལ་དངུལ་ཡོད་ཀྱང་། ཁོ་ཚོར་བུ་ལོན་སྤྲད་ཕྱིར་ཁྱོད་ཚོ་ལ་རྒྱུ་དངོས་གང་ཡང་ཡོད་པར་མི་འགྱུར་རོ། མཐར་ཁོ་ཚོ་ཁྱོད་ཚོའི་དཔོན་པོར་འགྱུར་ངེས་པ་ཡིན་ནོ།

⁴⁵ཁྱོད་ཚོ་འཇིག་པར་མ་འགྱུར་བའི་བར་དུ་རྐྱེན་ངན་འདི་རྣམས་ཁྱོད་ཚོའི་ཐོག་ཏུ་གནས་རྒྱུ་ཡིན། གང་ལགས་ཟེར་ན། ཁྱོད་ཚོས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་གནང་བའི་ཁྲིམས་ཚང་མ་མ་སྲུང་པས་ཕྱིར་རོ།

⁴⁶དེ་ཚོ་ནི་དུས་གཏན་དུ་ཁྱོད་ཚོ་དང་ཁྱོད་ཚོའི་བུ་རྒྱུད་ཚོའི་སྟེང་དུ་གཙོ་བོ་དཀོན་མཆོག་གིས་ཉེས་ཆད་ཀྱི་དཔང་པོའི་ཚུལ་དུ་གནས་རྒྱུ་ཡིན།

⁴⁷གཙོ་བོ་དཀོན་མཆོག་གིས་ཁྱོད་ཚོ་ལ་ཐབས་ལམ་ཀུན་ནས་བྱིན་རླབས་གནང་མོད། འོན་ཀྱང་ཁྱོད་ཚོས་བློ་སེམས་དགའ་པོའི་ངང་ནས་ཁོང་ལ་བཀུར་སྟི་མ་ཞུས་པ་ཡིན་པས།

⁴⁸གཙོ་བོ་དཀོན་མཆོག་གིས་ཁྱོད་ཚོའི་ཐོག་ཏུ་དགྲ་བོ་རྣམས་གཏོང་བ་གནང་རྒྱུ་ཡིན་ཏེ། ཁྱོད་ཚོས་དེ་དག་གི་གཡོག་བྱེད་པར་འགྱུར། ཁྱོད་ཚོ་ནི་བཀྲེས་སྐོམ་དང་། གོས་མེད་གཅེར་བུར་གནས་དགོས་པ་དང་དགོས་མཁོ་དུ་མའི་ནང་དུ་ཚུད་དགོས་རྒྱུ་དང་། ཁྱོད་ཚོ་འཇིག་པར་མ་འགྱུར་བའི་བར་དུ་གཙོ་བོ་དཀོན་མཆོག་གིས་ཁྱོད་ཚོར་མནར་གཅོད་དྲག་པོ་གཏོང་བ་གནང་རྒྱུ་ཡིན།

⁴⁹གཙོ་བོ་དཀོན་མཆོག་གིས་ས་གཞིའི་མཐའ་མཚམས་ཀྱི་ས་གནས་ནས་མི་རིགས་ཤིག་ཁྱོད་ཚོའི་དགྲ་རུ་བསླང་བ་གནང་རྒྱུ་དང་། མི་རིགས་དེའི་སྐད་ནི་ཁྱོད་ཚོས་ཧ་མི་གོ་ཞིང་། བྱ་གླག་ལྟར་དེ་ཚོས་ཁྱོད་ཚོའི་ཐོག་ཏུ་མཐོ་གཤོག་བརྒྱབ་པར་འགྱུར།

⁵⁰དེ་དག་གདུག་རྩུབ་ཆེ་ཞིང་རྒན་གཞོན་སུ་ལ་ཡང་སྙིང་རྗེ་མི་བྱེད་དོ།

⁵¹དེ་དག་གིས་ཁྱོད་ཚོའི་ཕྱུགས་ཟོག་དང་ར་ལུག་དང་སྟོན་ཐོག་ཟས་པས། ཁྱོད་ཚོ་ལྟོགས་པར་ཤི་བར་འགྱུར། དེ་དག་གིས་ཁྱོད་ཚོའི་དོན་དུ་འབྲུ་དང་རྒུན་ཆང་དང་། ཁ་སྐྱུར་པོའི་སྣུམ་དང་། ཕྱུགས་ཟོག་དང་ལུག་ཁྱུ་སོགས་གང་ཡང་མ་བཞག་པས་ཁྱོ་ཚོ་ཤི་བར་འགྱུར།

⁵²གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོར་གནང་བའི་ཡུལ་གྱི་གྲོང་ཁྱེར་ཚང་མར་དེ་ཚོས་འཐབ་འཛིང་བྱས་ཏེ། ཁྱོད་ཚོས་བློས་བཀལ་བའི་ལྕགས་རི་མཐོ་པོ་དང་བརྟན་པོ་རྣམས་ཡོངས་སུ་བཤིགས་པར་འགྱུར།

⁵³དགྲ་བོས་ཁྱོད་ཚོའི་གྲོང་ཁྱེར་རྣམས་མཐའ་བསྐོར་ནས་ཡོང་སྐབས་ཁྱོད་ཚོས་ཁ་ཟས་ལ་རྔམས་ཤིང་འུ་ཐུག་སྟེ། གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོར་གནང་བའི་བུ་ཕྲུག་རྣམས་ཀྱང་ཁྱོད་ཚོས་ཟ་བར་འགྱུར།

⁵⁴ཁྱིམ་ཚང་མཐོ་རིམ་གྱི་སྐྱེ་བོ་ཚུལ་ལྡན་ཞིག་ཡིན་ཀྱང་དགྲ་བོའི་ལག་ཏུ་ཚུད་སྐབས་ཁ་ཟས་གཞན་མེད་པས་ཧ་ཅང་འུ་ཐུག་སྟེ། ཁོས་རང་གི་ཕྲུ་གུ་ཚོ་འགའ་ཤས་ཟ་བ་དང་། རང་གི་སྤུན་ནམ་རང་གི་གཅེས་པའི་ཆུང་མ་དང་ལྷག་འཕྲོས་ལུས་པའི་ཕྲུག་གུ་གཞན་རྣམས་ལའང་ཤ་དེ་ལས་སྤྲད་པར་མི་འགྱུར་ཞིང་།

⁵⁵

⁵⁶ཁྱིམ་ཚང་མཐོ་རིམ་དང་ཕྱུག་པོ་ཡིན་པའི་བུད་མེད་ཚུལ་ལྡན་མ་ཞིག་དེ་སྔ་ནམ་ཡང་རྐང་པས་འགྲུལ་བསྐྱོད་བྱེད་མྱོང་མེད་པ་ཞིག་གིས་ཀྱང་དེ་ལྟར་བྱེད་ཉེན་ཡོད། དགྲ་བོས་མོའི་གྲོང་ཁྱེར་བསྐོར་བཟུང་བྱེད་དུས། མོ་ལ་ཁ་ཟས་མེད་པས་འུ་ཐུག་ནས་རང་གི་ཕྲུ་གུ་གསར་དུ་སྐྱེས་པའི་ཕྲུ་གུ་དང་ཤ་མ་བཅས་པ་གསང་བའི་སྒོ་ནས་ཟའོ། མོས་རང་གིས་གཅེས་པའི་ཁྱོའམ་ཕྲུ་གུ་ཚོ་ལའང་དེ་བགོས་ནས་སྟེར་མི་ཡོང་།

⁵⁷

⁵⁸གལ་ཏེ་ཁྱོད་ཚོས་གསུང་རབ་འདིའི་ནང་བྲིས་ཡོད་པའི་དཀོན་མཆོག་གི་བསླབ་བྱ་ཚང་མ་ཁྱོད་ཚོས་ཚུལ་བཞིན་དུ་མ་སྲུང་བར། ངོ་མཚར་ཆེ་ཞིང་བག་སེམས་ཞུ་འོས་པའི་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་མཚན་ལ་རྩིས་གུས་མ་ཞུས་པ་ཡིན་ན།

⁵⁹ཁོང་གིས་ཁྱོད་ཚོ་དང་ཁྱོད་ཆོའི་རིགས་རྒྱུད་རྣམས་ལ་ནམ་ཡང་དྲག་མི་གསོ་བའི་ནད་གཞི་དང་བཀག་འགོག་བྱེད་མི་ཐུབ་པའི་ནད་ཡམས་དྲག་པོ་རྣམས་གཏོང་བ་གནང་རྒྱུ་ཡིན།

⁶⁰སྔར་ཁྱོད་ཚོས་ཨི་ཇིབ་དུ་མྱོང་དགོས་བྱུང་བའི་ནད་རིམས་དྲག་པོ་རྣམས་སླར་ཡང་ཁོང་གིས་ཁྱོད་ཚོའི་ཐོག་ཏུ་གཏོང་བ་གནང་རྒྱུ་ཡིན་པས། ཁྱོད་ཚོ་དེ་ལས་ནམ་ཡང་དྲག་གསོ་བར་མི་འགྱུར།

⁶¹གཙོ་བོ་དཀོན་མཆོག་གི་ཁྲིམས་དང་བཀའ་སློབ་རྣམས་ཡོད་པའི་གསུང་རབ་འདིའི་ནང་དུ་བྲིས་མེད་པའི་ནད་རིགས་དང་ནད་ཡམས་གདུག་པ་ཅན་རྣམས་ཁོང་གིས་བཏང་བ་གནང་སྟེ། ཁྱོད་ཚོ་ཡོངས་སུ་འཇིག་པར་འགྱུར།

⁶²ཁྱོད་ཚོས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་བཀའ་ལ་བརྩི་སྲུང་མ་ཞུས་པར་བརྟེན། ཁྱོད་ཚོའི་ཁ་གྲངས་ནི་ནམ་མཁའི་སྐར་ཚོགས་བཞིན་དུ་གྲངས་ལས་འདས་པ་ཞིག་ཡོད་རུང་། ཉུང་ངུ་ཞིག་ལས་གསོན་པོར་ལུས་པར་མི་འགྱུར་རོ།

⁶³གཙོ་བོ་དཀོན་མཆོག་གིས་ཁྱོད་ཚོ་ཡར་རྒྱས་གོང་དུ་སྤེལ་ཞིང་། ཁྱོད་ཚོའི་གྲངས་འབོར་འཕེལ་རྒྱས་སུ་གཏོང་བ་གནང་སྐབས་ཐུགས་དགྱེས་ཆེན་པོ་གནང་བ་བཞིན། ཁྱོད་ཚོ་ལ་ཚར་གཅོད་གཏོང་བ་གནང་སྐབས་ཀྱང་། དེ་བཞིན་ཐུགས་དགྱེས་གནང་རྒྱུ་ཡིན་པ་དང་། ཁྱོད་ཚོས་བདག་འཛིན་བྱེད་རྒྱུ་ཡིན་པའི་ཡུལ་དེ་ནས་ཁོང་གིས་ཁྱོད་ཚོ་རྩ་བ་ནས་བཀོག་པ་རའགྱུར།

⁶⁴གཙོ་བོ་དཀོན་མཆོག་གིས་ཁྱོད་ཚོ་ས་གཞིའི་མཐའ་འཚམས་གཅིག་ནས་གཞན་བར་མི་རིགས་ཚང་མའི་དཀྱིལ་དུ་ཁ་གཏོར་བ་གནང་ཞིང་། དེར་ཁྱོད་ཚོའམ་ཁྱོད་ཚོའི་ཕ་མེས་རྣམས་ཀྱིས་དེ་སྔ་ནམ་ཡང་མ་མཆོད་པའི་ཤིང་དང་རྡོ་ལས་བཟོས་པའི་ལྷ་རྟེན་རྣམས་ལ་མཆོད་པར་འགྱུར།

⁶⁵ས་གནས་གང་དུ་ཕྱིན་རུང་ཁྱོད་ཚོར་ཞི་བདེ་མི་ཐོབ་ཅིང་། སོ་སོའི་ཡིན་བསམ་པའི་ས་གནས་རང་བདག་གཅིག་ཀྱང་མེད་པ་དང་། གཙོ་བོ་དཀོན་མཆོག་གིས་སེམས་ཁྲལ་དང་། རེ་ཟད་ཡིད་མུགས་སོགས་ཀྱིས་ཁྱོད་ཚོ་མནར་བར་མཛད་དོ།

⁶⁶དུས་རྟག་ཏུ་ཁྱོད་ཚོའི་སྲོག་དེ་ཉེན་ཁའི་ནང་དུ་གནས་པ་དང་། ཁྱོད་ཚོ་ཉིན་མཚན་མེད་པར་དངངས་སྐྲག་ཆེན་པོའི་ངང་དུ་བསྡད་དགོས་པ་དང་། སེམས་ནང་འཆི་བའི་འཇིགས་སྣང་ཡང་ཡང་སྐྱེད་པར་འགྱུར།

⁶⁷ཁྱོད་ཚོས་དངོས་པོ་ཇི་འདྲ་ཞིག་མཐོང་ཀྱང་། དེས་ཁྱོད་ཚོའི་སེམས་ནང་འཇིགས་སྣང་སྐྱེད་ཅིང་། སྔ་དྲོ་རེ་བཞིན་དགོང་དྲོ་ནམ་འོངས་བསམ་པ་དང་། དེ་བཞིན་དགོང་དྲོ་རེ་བཞིན་སྔ་དྲོ་ནམ་ཤར་ཡོང་ཞེས་བསམ་པར་འགྱུར།

⁶⁸གཙོ་བོ་དཀོན་མཆོག་གིས་ཁྱོད་ཚོ་སླར་ཡང་ཨི་ཇིབ་དུ་ཕྱིར་ལོག་འགྲོ་དགོས་མི་ཡོང་ཞེས་གསུངས་ཀྱང་། ཁོང་གིས་གྲུ་གཟིང་ཐོག་ཏུ་ཁྱོད་ཚོ་ཡང་སྐྱར་ཡུལ་དེར་ཕྱིར་ལོག་བརྫང་པ་གནང་ཞིང་། དེར་ཁྱོད་ཚོ་རང་གིས་རང་ལ་དགྲ་བོའི་བྲན་འཁོལ་དུ་འཚོང་ཐབས་བྱེད་མོད། འོན་ཀྱང་སུས་ཀྱང་ཁྱོད་ཚོ་ཉོ་འདོད་མི་བྱེད་དོ༎

Read Tibetan — པོད་སྐད་Tibetan Old Testament 2011 བཀའ་ཁྲིམས་སྐྱར་བཤད་ 28 Bible Online

བཀའ་ཁྲིམས་སྐྱར་བཤད་ 28 - Tibetan — པོད་སྐད་Tibetan Old Testament 2011 bible

བཀའ་ཁྲིམས་སྐྱར་བཤད་ 28