Read Tibetan — པོད་སྐད་Tibetan Old Testament 2011 ཡོ་ཤུ་ཨ 18 Bible Online

ཡོ་ཤུ་ཨ 18 - Tibetan — པོད་སྐད་Tibetan Old Testament 2011 bible

ཡོ་ཤུ་ཨ 18

¹ཁོ་ཚོས་ཡུལ་དེ་དབང་དུ་བསྡུས་པའི་རྗེས་སུ་ཨིསི་རཱཨེལ་གྱི་མི་སྡེ་ཡོངས་རྫོགས་ཤི་ལཱོ་རུ་འཛོམས་ནས། དེར་གཙོ་བོ་དཀོན་མཆོག་གནས་པའི་དབུ་གུར་དམ་པ་དེ་བཞེངས་སོ།

²ཨིསི་རཱཨེལ་པ་ཚོའི་ནང་ནས་སྡེ་རིགས་བདུན་ལ་ད་དུང་ས་སྐལ་ཐོབ་མེད་པས།

³དེར་བརྟེན་ཡོ་ཤུ་ཨས་ཨིསི་རཱཨེལ་པ་རྣམས་ལ། ཁྱོད་ཚོའི་མེས་པོའི་གཙོ་བོ་དཀོན་མཆོག་གིས་ཁྱོད་ཚོ་ལ་གནང་བའི་ཡུལ་དེ་བདག་འཛིན་བྱེད་པར་ག་དུས་བར་ཕར་འགྱང་བྱེད་ཀྱི་ཡིན་ནམ།

⁴ད་སྡེ་རིགས་རེ་རེ་ནས་མི་གསུམ་རེ་འདེམས་བསྐོ་བྱོས་ཤིག ངས་དེ་ཚོ་ས་སྐལ་ཐོབ་པའི་ཡུལ་ཚང་མར་བཏང་རྒྱུ་ཡིན་ནོ། དེ་ཚོ་ཕྱིན་ནས་ཡུལ་དེར་བསྐོར་བ་བརྒྱབ་སྟེ་སོ་སོའི་ས་སྐལ་གྱི་ཚད་བྲིས་ནས་ངའི་རྩར་ཡོང་དགོས་སོ།

⁵དེ་ཚོས་ཡུལ་དེ་ཁག་བདུན་ལ་བགོ་བཤའ་བརྒྱབ་ཏེ། ཡ་ཧུ་དཱའི་ལྷོ་ཕྱོགས་སུ་རང་གི་ས་མཚམས་ཁོངས་སུ་གནས་སྡོད་བྱེད་རྒྱུ་དང་། དེ་བཞིན་ཡོ་སེབ་ཀྱི་ཁྱིམ་ཚང་རྣམས་བྱང་ཕྱོགས་སུ་སོ་སོའི་ས་མཚམས་ནང་དུ་གནས་སྡོད་བྱེད་རྒྱུ་ཡིན་ནོ།

⁶ད་ཁྱོད་ཚོས་ཡུལ་དེ་ཁག་བདུན་ལ་བགོས་པའི་སྐོར་གྱི་གནས་ཚུལ་ཞིབ་ཕྲ་ཞིག་བྲིས་ནས་ངའི་རྩར་འཁྱེར་ཡོང་དགོས། དེ་ནས་ངས་གཙོ་བོ་དཀོན་མཆོག་ང་ཚོའི་དཀོན་མཆོག་གི་སྤྱན་སྔར་ཁྱོད་རང་ཚོའི་ཆེད་དུ་རྒྱན་ཤོག་བླུག་གི་ཡིན།

⁷འོན་ཀྱང་ལེ་ཝི་པ་ཚོར་ཁྱོད་ཚོ་ནང་བཞིན་ས་སྐལ་ཐོབ་མི་ཡོང་། གང་ལགས་ཟེར་ན། ཁོ་ཚོའི་ཐོབ་སྐལ་ནི་བླ་མའི་ཚུལ་དུ་གཙོ་བོ་དཀོན་མཆོག་གི་ཞབས་ཏོག་ཞུ་རྒྱུ་དེ་ཡིན་ནོ། གྷཌ་དང་། རུ་བྷེན་དང་ཤར་མ་ནསེ་སཱེའི་ཕྱེད་ཀའི་སྡེ་རིགས་རྣམས་སྔར་གཙོ་བོ་དཀོན་མཆོག་གི་ཞབས་ཏོག་པ་མོ་ཤེས་གནང་བ་བཞིན། ཡོར་དན་ཤར་ཕྱོགས་ཀྱི་ས་ཁུལ་དེ་ཁོ་ཚོར་ཐོབ་པ་ཡིན་ནོ།

⁸ཡོ་ཤུ་ཨས་ཡུལ་དེར་བརྟག་ཞིབ་བྱེད་པར་འགྲོ་བའི་མི་རྣམས་ལ། ད་ཁྱོད་ཚོ་ཡུལ་དེར་བལྟ་བསྐོར་དང་ཞིབ་དཔྱོད་བྱས་ཏེ་དེའི་སྐོར་གནས་ཚུལ་བྲིས་ནས་ངའི་རྩར་ཕྱིར་ལོག་བྱོས་ཤིག་དང་། ངས་ཤི་ལཱོ་རུ་གཙོ་བོ་དཀོན་མཆོག་གི་སྤྱན་སྔར་ཁྱོད་ཚོའི་ཆེད་དུ་རྒྱན་ཤོག་བླུག་གི་ཡིན་ཞེས་སྨྲས་པ་དང་། དེ་ཚོ་དེ་ནས་ཕྱིན་ནོ།

⁹དེ་ལྟར་མི་མང་རྣམས་ཕྱིན་ནས་ཡུལ་ཡོངས་སུ་བསྐོར་བ་བརྒྱབ་སྟེ་བལྟས་པ་དང་། ཡུལ་དེ་ཇི་ལྟར་ཚོ་ཁག་བདུན་དུ་བགོས་ན་ལེགས་ཟེར་ཡིག་ཐོག་ཏུ་བྲིས་ནས། གྲོང་ཁྱེར་ཡོངས་ཀྱི་ཐོ་ཞིག་བཟོས་ནས་ཤི་ལཱོའི་དམག་སྒར་དུ་ཡོ་ཤུ་ཨའི་རྩར་ཕྱིར་ལོག་བྱས་སོ།

¹⁰ཡོ་ཤུ་ཨས་དེ་ཚོའི་ཆེད་དུ་རྒྱན་ཤོག་བླུག་ནས་གཙོ་བོ་དཀོན་མཆོག་གི་ཐུགས་དགོངས་ཤེས་ནས་ལྷག་འཕྲོས་ལུས་པའི་སྡེ་རིགས་རེ་རེར་ས་ཁུལ་རེ་རེ་ས་སྐལ་དུ་བགོསོ༎

¹¹བྷེན་ཡ་མིན་སྡེ་རིགས་ཀྱི་ཁྱིམ་ཚང་ཚོར་རྒྱན་ཤོག་བབས་པ་ལྟར་ས་སྐལ་བགོས་ཤིང་། དེ་ཚོའི་ཐོབ་སྐལ་གྱི་ས་སྐལ་ནི་ཡ་ཧུ་དཱ་དང་ཡོ་སེབ་ཀྱི་སྡེ་རིགས་ཚོའི་བར་ལ་འཁེལ་བ་ཡིན་ནོ།

¹²དེ་ཚོའི་བྱང་ཕྱོགས་ཀྱི་ས་མཚམས་ནི་ཡོར་དན་ནས་མགོ་ཚུགས་ཏེ་ཡེ་རི་ཀོའི་ཉེ་འགྲམ་ནས་བྱང་ངོས་ནས་ཕྱིན་ཞིང་། ནུབ་ཕྱོགས་རི་བརྒྱུད་ཁག་གི་ཡུལ་དང་བཅས་བྷེ་ཐ་བེན་གྱི་འབྲོག་སྟོང་བར་དུ་བསླེབས་ཡོད་དོ།

¹³དེ་ནས་ལུཛ་ (དེ་ལ་བྷེ་ཐེལ་ཡང་ཟེར་བ་ཡིན་ནོ།) བར་གྱི་ལྷོ་ཕྱོགས་ས་མཚམས་ནས་མར་བབས་ཏེ། བྷེད་ཧོ་རོན་གྱི་ལྷོ་ཕྱོགས་རི་བརྒྱུད་ཁག་ནས་ཨ་ཏ་རོད་ཨད་དར་བར་དུ་བསླེབས་ཡོད་པ་དང་།

¹⁴དེ་ནས་ས་མཚམས་གཞན་ཕྱོགས་སུ་ཕྱིན་ནས། རི་བོ་དེའི་ནུབ་ཕྱོགས་ནས་ལྷོ་ཕྱོགས་སུ་བསྐོར་རོ། དེ་ནི་ཡ་ཧུ་དཱའི་སྡེ་རིགས་ཀྱི་བདག་དབང་དུ་ཡོད་པའི་ཀིར་ཡད་བྷལ་ (དེ་ལ་ཀིར་ཡད་ཡ་རིམ་ཡང་ཟེར) བར་དུ་བསླེབས་ཀྱི་ཡོད་དོ། ནུབ་ཕྱོགས་ཀྱི་ས་མཚམས་ནི་དེ་རང་ཡིན་ནོ།

¹⁵ལྷོ་ཕྱོགས་ཀྱི་ས་མཚམས་ནི་ཀིར་ཡད་ཡ་རིམ་གྱི་མཐའ་ནས་འགོ་ཚུགས་ནས། ནེབ་ཏོའི་ཆུ་མིག་བར་དུ་བསླེབས་ཀྱི་ཡོད་དོ།

¹⁶ས་མཚམས་དེ་ནི་རི་གཤམ་དུ་ཕྱིན་ནས་རེ་ཕ་ཨིམ་ལུང་གཤོང་གི་བྱང་ཕྱོགས་སུ་ཧིན་ནོམ་ལུང་གཤོང་མཐོང་གི་ཡོད་དོ། མདུན་དུ་ཡོད་པའི་རི་བརྒྱུད་མཐའ་མ་ཚམས་རྒལ་ནས་ཡ་བྷུསེ་པའི་ལྷོ་ཕྱོགས་སུ་ཡོད་པའི་ཧིན་ནོམ་གྱི་ལུང་གཤོང་ནས་མར་ཨེན་རོ་གྷེལ་དུ་བབས་ཡོད་པ་དང་།

¹⁷བྱང་ཕྱོགས་སུ་ཨེན་ཤེ་མེཤི་ཕྱོགས་སུ་ཕྱིན་ནས་ལ་མོ་ཨ་དུམ་མིམ་གྱི་མདུན་དུ་ཡོད་པའི་གྷེ་ལི་ལོད་ལ་ཐོན་ཏེ་རུ་བྷེན་གྱི་བུ་བྷོ་ཧན་གྱི་རྡོའི་ཕྱོགས་སུ་བབས་སོ།

¹⁸དེ་ནས་མུ་མཐུད་ནས་བྷེད་ཨ་རཱ་བའི་བྱང་ཕྱོགས་ཀྱི་ཐུར་རུ་ཕྱིན་ནས་གཤམ་དུ་ཨ་རཱ་བྷ་བར་དུ་བབས་ཀྱི་ཡོད་དོ།

¹⁹ས་མཚམས་དེ་བྷེད་ཧོག་ལཱའི་བྱང་ཕྱོགས་མཐའ་མཚམས་རྒལ་ནས་ཡོར་དན་གྱི་ལྷོ་ངོས་སུ་ཡོད་པའི་འཆི་བའི་རྒྱ་མཚོའི་བྱང་ཕྱོགས་ཀྱི་མཚོ་ཁུག་ཏུ་མཇུག་བསྡུས་ཤིང་། ཡུལ་དེའི་ལྷོ་ཕྱོགས་ཀྱི་ས་མཚམས་ནི་གོང་གསལ་ལྟར་ཡིན་ནོ།

²⁰དེའི་ཤར་ཕྱོགས་ཀྱི་ས་མཚམས་ནི་ཡོར་དན་ཡིན་པ་དང་། བྷེན་ཡ་མིན་སྡེ་རིགས་ཀྱི་ཐོབ་སྐལ་དུ་དབང་བས་ཡུལ་གྱི་ས་མཚམས་ནི་གོང་གསལ་ལྟར་ཡིན་ནོ།

²¹བྷེན་ཡ་མིན་སྡེ་རིགས་ཀྱི་ཁྱིམ་ཚང་ཚོས་བདག་འཛིན་བྱས་པའི་གྲོང་ཁྱེར་རྣམས་ནི། ཡེ་རི་ཀོ་དང་། བྷེད་ཧོག་ལཱ། ཨེ་མེགཀི་རྫིསི།

²²བྷེད་ཨ་ར་བཱ། ཛེ་མ་རེམ། བྷེ་ཐེལ།

²³ཨབ་བཱིམ། པ་རཱ། ཨོཕ་རཱ།

²⁴ཀེ་ཕ་རམ་མོ་ནི། ཨོཕ་ནི། གྷེ་བཱ་བཅས་བསྡོམས་གྲོང་ཁྱེར་བཅུ་གཉིས་དང་། དེ་མཉམ་དུ་མཐའ་འཁོར་གྱི་གྲོང་སེབ་རྣམས་ཀྱང་ཡིན་ནོ།

²⁵དེ་བཞིན་གྷི་བི་ཨོན་དང་། ར་མཱ། བྷི་རོད།

²⁶མིཛ་པཱ། ཀེ་ཕི་རཱ། མོ་ཛཱ།

²⁷རེ་ཀེམ། ཨིར་པཱིལ། ཏ་ར་ལཱ།

²⁸ཛེ་ལ། ཧེ་ལེཕ། ཡེ་བྷུསིའམ། (ཡ་རུ་ཤ་ལེམ) གྷི་བི་ཨཱ་དང་ཀིར་ཡད་ཡ་རིམ་བཅས་བསྡོམས་གྲོང་ཁྱེར་བཅུ་བཞི་དང་། དེ་མཉམ་དུ་མཐའ་འཁོར་གྱི་གྲོང་སེབ་རྣམས་ཀྱང་ཡིན་ནོ། བྷེན་ཡ་མི་སྡེ་རིགས་ཀྱི་ཁྱིམ་ཚང་ཚོས་ས་སྐལ་དུ་དབང་བའི་ཡུལ་ནི་གོང་བཞིན་ཡིན་ནོ༎