Read Tibetan — པོད་སྐད་Tibetan Old Testament 2011 ཡོ་ཤུ་ཨ 2 Bible Online

ཡོ་ཤུ་ཨ 2 - Tibetan — པོད་སྐད་Tibetan Old Testament 2011 bible

ཡོ་ཤུ་ཨ 2

¹དེ་རྗེས་ཡོ་ཤུ་ཨས་ཨ་ཀ་སི་ཡ་ནས་སོ་པ་གཉིས་བཏང་ནས་ཀ་ནན་ཡུལ་དང་ཁྱད་པར་དུ་གྲོང་ཁྱེར་ཡེ་རི་ཀོའི་གནས་སྟངས་གསང་བའི་ཐོག་ནས་རྟོགས་ཞིབ་བྱོས་ཤིག་ཅེས་སྨྲས་པ་དང་། ཁོ་གཉིས་ཕྱིན་ནས་གྲོང་ཁྱེར་དུ་སླེབས་པའི་མཚན་མོ་དེར་སྨད་འཚོང་མ་ར་ཧབ་ཅེས་པའི་ཁང་པར་ཉལོ།

²འོན་ཀྱང་ཡེ་རི་ཀོའི་རྒྱལ་པོས་མཚན་མོ་དེར་ཨིསི་རཱཨེལ་པ་འགའ་ཤས་ཡུལ་དུ་གསང་ཉུལ་བྱེད་ཕྱིར་བསླེབ་པའི་གནས་ཚུལ་ཐོས་ནས།

³རྒྱལ་པོས་ར་ཧབ་ལ། ཁྱོད་ཀྱི་ཁང་པའི་ནང་དུ་ཡོད་པའི་མི་རྣམས་ནི་ང་ཚོའི་ཡུལ་ཚང་མར་གསང་ཉུལ་བྱེད་ཕྱིར་ཡོང་བ་ཡིན་པས། དེ་ཚོ་ཕྱིར་འདོན་དགོས་ཅེས་ལོན་བཏང་ངོ་།

⁴མོས་ལན་དུ། མི་འགའ་ཤས་ངའི་ནང་དུ་བསླེབས་བྱུང་། འོན་ཀྱང་ཁོ་ཚོ་ག་ནས་ཡོང་བ་ཡིན་པ་ངས་ཤེས་མ་བྱུང་། ས་རུབ་མཚམས་སུ་གྲོང་ཁྱེར་རྒྱལ་སྒོ་མ་བརྒྱབ་གོང་དུ་དེ་ཚོ་འདི་ནས་ཐོན་སོང་བས། གང་དུ་ཕྱིན་པ་ཆ་མ་ངེས་སོ། འོན་ཀྱང་ད་ལྟ་མགྱོགས་པོ་བྱེད་ནས་དེ་ཚོའི་རྗེས་སུ་དེད་ཕྱིན་ན་ངེས་པར་དུ་རྗེས་ཟིན་པ་ཡོད་ཅེས་སྨྲས་སོ། (འོན་ཀྱང་ར་ཧབ་ཀྱིས་སོ་ཉུལ་བ་གཉིས་ལ་སྟེང་ཐོག་ཏུ་འཁྲིད་དེ། ཐོག་ཁར་བཏིང་ཡོད་པའི་སོ་མ་ར་ཙའི་གསེབ་ཏུ་སྦས་བཞག་ཡོད་དོ།)

⁷རྒྱལ་པོའི་མི་རྣམས་ཁོ་ཚོའི་རྗེས་སུ་དེད་ཕྱིར་གྲོང་ཁྱེར་ནས་ཐོན་མ་ཐག་ཏུ། གྲོང་ཁྱེར་གྱི་རྒྱལ་སྒོ་དེའང་བརྒྱབ་བོ། དེ་ཚོས་ཨིསི་རཱཨེལ་པའི་སོ་ཉུལ་བ་རྣམས་འཚོལ་བར་ཡོར་དན་གྱི་ལམ་བརྒྱུད་དེ་ཆུ་འགྲམ་གྱི་ས་ཁུལ་བར་ཕྱིན་ནོ།

⁸སོ་ཉུལ་བ་རྣམས་མ་ཉལ་གོང་དུ་ར་ཧབ་ཐོག་ཁར་འཛེགས་ཏེ།

⁹ཁོ་གཉིས་ལ། གཙོ་བོ་དཀོན་མཆོག་གིས་ཡུལ་འདི་ཁྱོད་ཚོར་གནང་ཡོད་པ་དེ་ངས་ཤེས་བྱུང་། ང་ཚོའི་ཡུལ་མི་ཚང་མ་ཁྱོད་རང་ཚོ་ལ་ཞེད་ནས་བསྡད་ཡོད།

¹⁰གང་ལགས་ཟེར་ན། ཁྱོད་ཚོ་ཨི་ཇིབ་ནས་ཐོན་སྐབས་གཙོ་བོ་དཀོན་མཆོག་གིས་ཁྱོད་ཚོའི་མཐོང་སར་རྒྱ་མཚོ་དམར་པོའི་ཆུ་དེ་ཇི་ལྟར་སྐམ་བཅུག་པའི་སྐོར་དང་། གཞན་ཡང་ཡོར་དན་གྱི་ཤར་ཕྱོགས་སུ་ཨ་མོར་པའི་རྒྱལ་པོ་སི་ཧོན་དང་ཨོག་གཉིས་ཇི་ལྟར་བསད་པའི་སྐོར་ལའང་ང་ཚོས་ཐོས་བྱུང་།

¹¹གནས་ཚུལ་དེ་དག་ཐོས་པ་ཙམ་གྱིས་ང་ཚོ་ཁྱོད་ཚོ་ལ་ཞེད་ཅིང་སེམས་ཤུགས་ཆགས་ནས་བསྡད་ཡོད། གང་ལགས་ཟེར་ན། གཅོ་བོ་དཀོན་མཆོག་ཁྱེད་ཀྱི་དཀོན་མཆོག་སྟེང་གི་མཐོ་རིས་དང་འོག་གི་ས་གཞིའི་དཀོན་མཆོག་དེ་ཡིན་པས་ཕྱིར་རོ།

¹²ད་ངས་ཁྱེད་གཉིས་ལ་བཟང་པོ་བྱས་པ་བཞིན་དུ་ཁྱེད་ཚོས་ཀྱང་ངའི་ནང་མི་རྣམས་ལ་བཟང་ལན་འཇལ་གྱི་ཡིན་ཞེས་དམ་བཅའ་བྱེད་དགོས། དེ་ཙམ་མ་ཟད་ངས་ཁྱེད་རྣམས་ལ་བློ་གཏད་བྱེད་ཕྱིར་ཁྱེད་ཚོས་ང་ལ་རྟགས་ཤིག་སྤྲད་དགོས།

¹³ཁྱེད་ཚོས་ངའི་ཕ་མ་གཉིས་ཀྱིས་གཙོས་པས་ངའི་མིང་སྲིང་དང་དེ་ཚོའི་ནང་མི་ཚང་མའི་སྲོག་བསྐྱབ་ཀྱི་ཡིན་ཞེས་པའི་དམ་བཅའ་བྱེད་དགོས་པ་དང་། མི་གཞན་གྱིས་ངེད་རྣམས་བསད་དུ་མ་འཇུག་པའི་ཁས་ལེན་ཡང་བྱེད་དགོས་ཅེས་སྨྲས་པ་རེད།

¹⁴དེའི་ལན་དུ་མི་གཉིས་ཀྱིས་མོ་ལ། གལ་སྲིད་དམ་བཅའ་བྱས་པ་བཞིན་ང་ཚོས་མ་བྱེད་ན་དཀོན་མཅོག་གིས་ང་ཚོའི་སྲོག་བཅད་པར་ཤོག། ང་ཚོས་གང་བྱས་པའི་སྐོར་ཁྱོད་ཀྱིས་མི་གཞན་སུ་ཞིག་ལའང་མ་ལབ་ན། རྗེས་སུ་གཙོ་བོ་དཀོན་མཆོག་གིས་ཡུལ་འདི་ང་ཚོའི་བདག་དབང་དུ་གནང་སྐབས་ང་ཚོས་ཁྱོད་ལ་ངེས་པར་བཟང་ལན་འཇལ་རྒྱུའི་དམ་བཅའ་བྱེད་ཀྱི་ཡིན་ཞེས་སྨྲས་སོ།

¹⁵ར་ཧབ་ཀྱི་ཁང་པ་ནི་གྲོང་ཁྱེར་གྱི་ལྕགས་རིའི་སྟེང་དུ་ཡོད་པས། མོས་སྒེ་ཁུང་ནས་ཐག་པ་ཞིག་བཏང་ནས་མི་དེ་གཉིས་མར་ཕབ་སྟེ།

¹⁶དེ་གཉིས་ལ། ད་ཁྱེད་གཉིས་རི་ཁུལ་ཁག་ཏུ་སོང་ཞིག། དེ་མིན་རྒྱལ་པོའི་མི་རྣམས་ཀྱིས་འཛིན་བཟུང་བྱེད་ཉེན་ཡོད། ས་ཁུལ་དེར་ཉིན་ཞག་གསུམ་རིང་གབ་ནས་སྡོད་ཅིག དེ་རྗེས་ཁོ་ཚོ་ཕྱིར་ལོག་བྱས་པའི་གཞུག་ལ་ཁྱེད་གཉིས་རང་གི་ལམ་དུ་ཕྱིན་ནའང་ཆོག་ཅེས་སྨྲས་སོ།

¹⁷མི་དེ་གཉིས་ཀྱིས་མོ་ལ། ཁྱོད་ཀྱིས་ང་གཉིས་ལ་དམ་བཅའ་བྱེད་བཅུག་པ་དེ་ལ་ང་ཆོས་ཁས་ལེན་བྱེད་རྒྱུ་ཡིན།

¹⁸རྗེས་སུ་ང་ཚོས་ཡུལ་འདིའི་ནང་དམག་འཐབ་བྱེད་སྐབས་ང་གཉིས་མར་ཕབ་པའི་སྒེ་ཁུང་དེའི་ཁར་ཐག་པ་དམར་པོ་འདི་འདོགས་དགོས་པ་མ་ཟད། ཁྱོད་ཀྱི་ཕ་མ་གཉིས་ཀྱིས་གཙོས་པས་ཁྱོད་ཀྱི་མིང་སྲིང་དང་ཁྱོད་ཀྱི་ཕའི་ནང་མི་ཚང་མ་ཁྱོད་ཀྱི་ཁང་པའི་ནང་དུ་བཀོང་ནས་བཞག་དགོས།

¹⁹ཡང་སྐབས་དེར་ཁང་པའི་ནང་དུ་མ་བསྡད་པར་མི་སུ་ཞིག་ཕྱི་ལོགས་ལ་ཐོན་ནས་ཤི་བ་ཡིན་ན། དེ་ནི་ཤི་མཁན་ཁོ་རང་གི་ནོར་འཁྲུལ་ཡིན་པ་ལས། དེའི་སྲོག་གི་ཉེས་ལན་ང་ཚོའི་ཐོག་ཏུ་མེད་དོ། འོན་ཀྱང་ཁྱོད་དང་མཉམ་དུ་ཁང་པའི་ནང་དུ་གནས་པའི་མི་སུ་ཞིག་ལ་རྨས་སྐྱོན་བྱུང་བ་ཡིན་ན། དེའི་འགན་ལེན་ང་ཚོའི་ཐོག་ཏུ་ཡོད།

²⁰ཡང་གལ་སྲིད་ཁྱོད་ཀྱིས་ང་ཚོའི་ལས་དོན་སྐོར་མི་གཞན་ལ་བཤད་པ་ཡིན་ན། ང་ཚོས་བྱས་པའི་དམ་བཅའ་རྣམས་སྲུང་མ་དགོས་པར་དེ་ལས་ང་ཚོ་ཐར་བ་ཡིན་ཞེས་སྨྲས་པ་དང་།

²¹མོས་དེ་བཞིན་ཁས་ལེན་བྱས་ནས་མི་དེ་གཉིས་བཏང་བ་དང་། དེ་རྗེས་མོས་ཐག་པ་དམར་པོ་ཞིག་སྒེ་ཁུང་དེའི་ཁར་བཏགས་སོ།

²²སོ་ཉུལ་བ་རྣམས་རི་ཁུལ་ཁག་ཏུ་གབ་ནས་བསྡད་པས། རྒྱལ་པོའི་མི་རྣམས་ཀྱིས་ཡུལ་གྱི་གྲོང་སྡེ་ཚང་མར་ཕྱིན་ནས་དེ་གཉིས་ལ་ཉིན་ཞག་གསུམ་རིང་དུ་བཙལ་ཀྱང་མ་རྙེད་པས། མཐར་ཁོ་ཆོ་ཡེ་རི་ཀོ་ལ་ཕྱིར་ལོག་བྱས་སོ།

²³དེ་ནས་སོ་ཉུལ་བ་གཉིས་རི་ཁུལ་ཁག་ནས་མར་བབས་ཤིང་གཙང་པོ་རྒལ་ཏེ་ཡོ་ཤུ་ཨའི་རྩར་ཕྱིན་ནས་གནས་ཚུལ་གང་བྱུང་བའི་སྐོར་ཚང་མ་ཞིབ་པར་བཤོད་དོ།

²⁴ཡུལ་དེའི་མི་མང་ཚང་མ་ང་ཚོ་ལ་ཞེད་ནས་བསྡད་འདུག་པས། གཙོ་བོ་དཀོན་མཆོག་གིས་ཡུལ་དེ་ཆ་ཚང་ང་ཚོའི་བདག་དབང་དུ་གནང་ཡོད་པ་དེ་ང་ཚོས་ངེས་གཏན་ཆེན་པོས་ཤེས་བྱུང་ཞེས་སྨྲས་སོ༎