Read Tibetan — པོད་སྐད་Tibetan Old Testament 2011 ཁྲིམས་དཔོན 1 Bible Online

ཁྲིམས་དཔོན 1 - Tibetan — པོད་སྐད་Tibetan Old Testament 2011 bible

ཁྲིམས་དཔོན 1

¹ཡོ་ཤུ་ཨ་གྲོངས་པའི་རྗེས་སུ་ཨིསི་རཱཨེལ་གྱི་མི་མང་ཚོས་གཙོ་བོ་དཀོན་མཆོག་ལ། ང་ཚོའི་སྡེ་རིགས་ནས་ཀ་ནན་པ་རྣམས་ལ་འཐབ་པར་སུ་ཞིག་སྔོན་དུ་འགྲོ་དགོས་སམ་ཞེས་བཀའ་འདྲི་ཞུས་པ་དང་།

²ལན་དུ་གཙོ་བོ་དཀོན་མཆོག་གིས་གསུངས་པ། དང་པོར་ཡ་ཧུ་དཱའི་སྡེ་རིགས་འགྲོ་དགོས་སོ། ངས་དེ་ཚོར་ཡུལ་དེ་ལ་དབང་བསྒྱུར་བྱེད་དུ་འཇུག་རྒྱུ་ཡིན།

³ཡ་ཧུ་དཱའི་མི་མང་ཚོས། སིམ་ཨོན་གྱི་མི་མང་ལ་སྨྲས་པ། ང་ཚོ་ལ་ཐོབ་པའི་ས་ཁུལ་དུ་ང་ཚོ་དང་མཉམ་དུ་ཕྱིན་ནས་ཀ་ནན་པ་རྣམས་དང་མཉམ་དུ་འཐབ་པར་བྱའོ། དེ་ནས་ང་ཚོ་ཁྱོད་ཚོར་ཐོབ་པའི་ས་ཁུལ་དུ་ཡང་མཉམ་དུ་འགྲོ་བར་བྱ། དེར་བརྟེན་སིམ་ཨོན་དང་།

⁴ཡ་ཧུ་དཱའི་སྡེ་རིགས་གཉིས་དམག་འཐབ་པར་མཉམ་དུ་ཐོན་ནོ། གཙོ་བོ་དཀོན་མཆོག་གིས་དེ་ཚོ་ལ། ཀ་ནན་པ་དང་པེ་རི་ཛི་པ་ཚོའི་ཐོག་རྒྱོལ་ཁ་གནང་བ་དང་། དེ་ཚོས་བྷེ་ཛེག་ཞེས་པའི་ས་གནས་སུ་སྐྱེ་པ་ ༡༠,༠༠༠ འཕམ་པར་བྱས་སོ།

⁵དེ་ཚོས་ཨ་དྷོ་ནི་བྷེ་ཛེག་ལ་དེར་འཕྲད་ནས་ཁོ་དང་མཉམ་དུ་འཐབ་བོ།

⁶ཁོ་བྲོས་ན་ཡང་དེ་ཚོས་རྗེས་སུ་དེད་ནས་ཁོ་ལ་བཟུང་སྟེ་ཁོའི་རྐང་ལག་གཉིས་ཀྱི་མཐེ་པོ་རྣམས་བཅད་དོ།

⁷ཨ་དོ་ནི་བེ་ཛེག་གིས་སྨྲས་པ། རྒྱལ་པོ་བདུན་ཅུ་རྐང་ལག་གཉིས་ཀྱི་མཐེ་པོ་བཅད་པ་ཚོས་ངའི་རྒྱ་ལྕོག་འོག་ཏུ་ཁ་ལག་ཆག་དུམ་བསྒྲུགས་ནས་བཟའ་བཞིན་ཡོད་དོ། ངས་དེ་ཚོ་ལ་ཇི་ལྟར་གྱིས་པ་ལྟར་དཀོན་མཆོག་གིས་ང་དང་མཉམ་དུ་དེ་བཞིན་གནང་སོང། དེ་ནས་ཁོང་ལ་ཡེ་རུ་ཤ་ལེམ་དུ་འཁྲིད་པ་དང་ཁོང་དེར་གྲོངས་སོ༎

⁸ཡ་ཧུ་དཱའི་མི་ཚོས་ཡེ་རུ་ཤ་ལེམ་ལ་འཐབ་ནས་དབང་བཟུང་བྱས་པ་དང། དེ་ཚོས་དེར་ཡོད་པའི་མི་མང་རྣམས་བསད་ནས་གྲོང་ཁྱེར་དེ་མེར་བསྲེགས་སོ།

⁹དེའི་རྗེས་སུ་དེ་ཚོས་རི་ཁུལ་ཀྱི་ཡུལ་དང་རི་གཤམ་རྣམས་དང་། ལྷོའི་ས་གནས་སྐམ་པོ་ཁག་ཏུ་གནས་སྡོད་བྱ་མཁན་ཀ་ནན་པ་ཚོའི་ཐོག་འཐབ་པར་ཕྱིན་ནོ།

¹⁰ཧེབ་རོན་གྲོང་ཁྱེར་དུ་གནས་སྡོད་བྱ་མཁན་ཀ་ནན་པ་ཚོའི་ཐོག་དེ་ཚོས་འཐབ་བོ། དིའི་སྐབས་སུ་ཧེབ་རོན་ལ་ཀིར་ཡད་ཨར་བྷ་ཡང་ཟེར་གྱི་ཡོད། དེར་དེ་ཚོས་ཤེ་ཤ་ཨི་དང་ཨ་ཧི་མན་དང་ཏལ་མ་ཨི་བཅས་ཀྱི་རིགས་རུས་ལ་ཕམ་པར་བྱས་སོ༎

¹¹དེ་ནས་ཡ་ཧུ་དའི་མི་ཚོས་དཱེ་བྷིར་གྲོང་ཁྱེར་ཐོག་ཏུ་འཐབ་བོ། དེ་དུས་དྷེ་བིར་ལ་ཀིར་ཡད་སེ་ཕར་ཟེར་གྱི་ཡོད་དོོ།

¹²དེ་ཚོའི་ནང་ནས་ཀ་ལེབ་ཟེར་བ་ཞིག་གིས། ཀིར་ཡད་སེ་ཕར་དབང་བཟུང་བྱ་མཁན་དེ་ལ་ངའི་བུ་མོ་ཨག་ས་ཆང་ས་བརྒྱབ་ཕྱིར་སྤྲོད་ཀྱི་ཡིན་ཞེས་སྨྲས་སོ།

¹³ཀ་ལེབ་ཀྱི་གཅུང་པོ་ཆུང་བ་ཀེ་ནཛའི་བུ་ཨོཐ་ནི་ཨེལ་གྱིས་གྲོང་ཁྱེར་དབང་བཟུང་བྱས་པའི་རྐྱེན། ཀ་ལེབ་ཀྱིས་རང་གི་བུ་མོ་ཨག་ས་ཁོའི་ཆུང་མར་ཆང་ས་བརྒྱབ་ཕྱིར་སྤྲད་དོ།

¹⁴ཆང་སའི་ཉིན་མོར་དེར་ཨོཐ་ནི་ཨེལ་གྱིས་མོ་ལ། རང་གི་ཕ་ལ་ཞིང་ཀ་ཞིག་ཞུ་དགོས་པའི་འབོད་བསྐུལ་བྱས་པ་དང་། མོ་རང་གི་བོང་བུ་ནས་མར་བབས་ཞིང་། ཀ་ལེབ་ཀྱིས་མོ་ལ་ཅི་དགོས་སམ་ཞེས་དྲིས་པ་དང་།

¹⁵མོས་ལན་དུ། ང་ལ་ཆུ་རྫིང་འགའ་ཤས་གནང་རོགས་གནང་། ཁྱེད་ཀྱིས་གནང་བའི་ལུང་པ་དེ་ས་ཆ་སྐམ་པོའི་ནང་ཡོད་ཅེས་ཞུས་པ་དང་། དེ་བས་ན་ཀ་ལེབ་ཀྱིས་མོ་ལ་ཆུ་མིག་སྟེང་འོག་གཉིས་གནང་ངོ་༎

¹⁶མོ་ཤེའི་གྱོས་པོ་ཀེ་ནི་པའི་རིགས་བརྒྱུད་རྣམས་ཡ་ཧུ་དཱ་པའི་མི་མང་མཉམ་དུ་ཁ་ཟུར་ཤིང་གི་གྲོང་ཁྱེར་ཡེ་རི་ཀོ་ནས་ཡ་ཧུ་དཱའི་ཨ་རད་ཀྱི་གྲོང་ཁྱེར་གྱི་ལྷོ་ཕྱོགས་སུ་ལུང་སྟོང་དེར་ཕྱིན་ནས། དེར་དེ་ཚོ་ཨ་མ་ལེག་པ་ཚོའི་ཁྲོད་དུ་གཞིས་ཆགས་ནས་གནས་སོ།

¹⁷ཡ་ཧུ་དཱའི་མི་མང་ཚོ་སིམ་ཨོན་གྱི་མི་མང་དང་མཉམ་དུ་དེ་ཚོ་མཐུན་མོང་གི་ཕྱིན་ནས་ཛེ་ཕད་གྲོང་ཁྱེར་དུ་གནས་སྡོད་བྱེད་པའི་ཀ་ནན་པ་ཚོ་ལ་ཕམ་པར་བྱས་སོ། དེ་ཚོས་གྲོང་ཁྱེར་དེར་དམོད་པ་རྒྱབ་པ་དང་དེ་སྟོར་ནས་མིང་ཧོར་མཱ་ཞེས་བཏགས་སོ།

¹⁸གཙོ་བོ་དཀོན་མཆོག་གིས་ཡ་ཧུ་དཱ་པའི་མི་མང་ལ་རོགས་གནང་བ་དང་། དེ་ཆོས་རི་བརྒྱུད་ཀྱི་ཡུལ་རྣམས་དབང་བཟུང་བྱས་སོ། འོན་ཀྱང་དེ་ཚོས་གྷ་ཛ་དང་ཨཤ་ཀེ་ལོན། ཡང་ཨེག་རོན་དང་དེའི་མཐའ་འཁོར་གྱི་མངའ་ཁུལ་ཁག་དབང་བཟུང་མ་བྱས་པ་དང་། རྒྱ་མཚོའི་འགྲམ་དུ་གནས་སྡོད་བྱ་མཁན་ཚོ་དང་མཉམ་དུ་ལྕགས་ཀྱི་ཤིང་རྟ་འཁོར་ལོ་ཡོད་སྟབས་ཡ་ཧུ་དཱའི་མི་མང་ཚོས་དེ་ཚོ་ལ་ཕྱིར་འབུད་བྱེད་མ་ཐུབ་བོ།

²⁰མོ་ཤེས་བཀའ་གནང་བ་ལྟར་ཧེབ་རོན་དེ་བཞིན་གྲོང་ཁྱེར་དེ་ནས་ཨ་ནག་གིི་མི་བརྒྱུད་ཀྱི་རིགས་རུས་གསུམ་ཕྱིར་འབུད་བྱ་མཁན་ཀ་ལེབ་ལ་གནང་ངོ་།

²¹འོན་ཀྱང་བྷེན་ཡ་མིན་གྱི་སྡེ་རིགས་ཚོས་ཡེ་རུ་ཤ་ལེམ་དུ་གནས་སྡོད་བྱ་མཁན་ཡེ་བུ་ཟི་པ་རྣམས་ཕྱིར་འབུད་བྱས་མེད་པ་དང་། དེ་ནས་བཟུང་ཡེ་བུ་ཟི་པའི་མི་མང་རྣམས་བྷེན་ཡ་མིན་གྱི་མི་མང་དང་མཉམ་དུ་གནས་སོ༎

²²སྐབས་དེར་ཨེཕ་ར་ཡིམ་དང་མ་ནསེ་སཱེའི་སྡེ་རིགས་ནས་ལུཛ་ཟེར་བའི་གྲོང་ཁྱེར་བྷེ་ཐེལ་ལ་འཐབ་པར་ཕྱིན་ནོ། གཙོ་བོ་དཀོན་མཆོག་གིས་དེ་ཚོ་ལ་རོགས་གནང་ནས། དེ་ཚོས་གྲོང་ཁྱེར་ལ་སོ་པ་བཏང་བ་དང་།

²⁴དེ་ཚོས་མི་ཞིག་གྲོང་ཁྱེར་ནས་ཐོན་ནས་འགྲོ་བཞིན་ཡོད་པ་མཐོང་བ་དང་། ཁོ་ལ། ང་ཚོར་གྲོང་ཁྱེར་ནང་ཇི་ལྟར་འཛུལ་དགོས་ལབ་པ་ཡིན། ང་ཚོས་ཁྱེད་ལ་གནོད་པ་མི་བྱེད་ཅེས་སྨྲས་སོ།

²⁵དེར་བརྟེན་ཁོས་དེ་ཚོ་ལ་བསྟན་པ་དང་། ཨེཕ་ར་ཡིམ་དང་མ་ནསེ་སཱེའི་མི་མང་ཚོས་མི་དེ་དང་དེའི་ནང་མི་མ་གཏོགས་གཞན་གྲོང་ཁྱེར་ནང་ཡོད་པ་ཚང་མ་བསད་དོ།

²⁶རྗེས་སུ་ཁོ་ཧེ་ཏིའི་ཡུལ་དུ་ཕྱིན་པ་དང་དེར་གྲོང་ཁྱེར་ཞིག་བཟོས་ནས་མིང་ལ་ལུཛེ་ཞེས་བཏགས་པ་དང་ད་ལྟ་ཡང་མིང་དེ་རང་གནས་ཡོད་དོ༎

²⁷མ་ནསེ་སཱེའི་སྡེ་རིགས་ཚོས་བྷེད་ཤཱན་དང་ཏ་ནག་དང་ཌོར་དང་ཨིབ་ལཱིམ་དང་མེ་གི་དྷོ་བཅས་ཀྱི་གྲོང་ཁྱེར་དང་། ཉེ་འགྲམ་གྱི་གྲོང་ནང་སྡོད་མཁན་ཚོ་ཕྱིར་འབུད་བྱས་མེད་པ་དང་། དེར་ཀ་ནན་པ་ཚོ་མུ་མཐུད་གནས་སྡོད་བྱས་སོ།

²⁸ཨིསི་རཱཨེལ་པ་ཚོ་སྟོབས་ཤུགས་ཆེ་རུ་འགྲོ་སྐབས་དེ་ཚོས་ཀ་ནན་པ་ཚོ་ལ་ཁོ་ཚོའི་ཆེད་དུ་ལས་ཀ་བྱེད་དུ་འཇུག་པ་དང་། ད་དུང་ཡང་དེ་ཚོ་ཚང་མ་ཕྱིར་འབུད་བྱས་མེད་དོ།

²⁹ཨེཕ་ར་ཡིམ་གྱི་སྡེ་རིགས་ཚོས་གེ་ཟེར་གྱི་གྲོང་ཁྱེར་ནང་གནས་སྡོད་བྱ་མཁན་ཀ་ནན་པ་ཚོ་ཕྱིར་འབུད་བྱས་མེད་པར་བརྟེན། ཀ་ནན་པ་ཚོ་ཁོ་ཚོ་དང་མཉམ་དུ་མུ་མཐུད་གནས་སྡོད་བྱས་སོ།

³⁰ཛེ་བུ་ལུམ་གྱི་སྡེ་རིགས་ཚོས་ཀིཊ་རོན་དང་ནཱ་ཧ་ལཱལ་གྲོང་ཁྱེར་ནང་གནས་སྡོད་བྱ་མཁན་ཚོར་ཕྱིར་འབུད་བྱས་མེད་པར་བརྟེན། ཀ་ནན་པ་ཚོ་ཁོ་ཚོ་དང་མཉམ་དུ་མུ་མཐུད་དེར་གནས་སྡོད་བྱས་པ་དང་། ཁོ་ཚོའི་ཆེད་དུ་བཙན་དབང་ཐོག་ལས་ཀ་བྱེད་དུ་འཇུག་གོ

³¹ཨ་ཤེར་གྱི་སྡེ་རིགས་ཚོས་ཨ་ཀོ་དང་སི་དོན་དང་ཨ་ལབ་དང་ཨཀེ་ཛིབ་བ་དང་ཧེལ་བཱ་དང་ཨ་ཕེག་དང་རེ་ཧོབ་བཅས་ཀྱི་གྲོང་ཁྱེར་ནང་གནས་སྡོད་བྱ་མཁན་མི་མང་ཚོ་ལ་ཕྱིར་འབུད་བྱས་མེད་དོ།

³²ཨ་ཤེར་གྱི་མི་མང་ཚོ་ཡུལ་མི་ཀ་ནན་པ་ཚོ་དང་་མཉམ་དུ་གནས་སྡོད་བྱེད་བཞིན་ཡོད་དོ། གང་ལ་ཟེར་ན། དེ་ཚོས་ཁོ་ཚོ་ཕྱིར་འབུད་བྱས་མེད་དོ།

³³ནཕ་ཏ་ལིའི་སྡེ་རིགས་ཚོས་བྷེད་ཤེ་མེཤི་དང་བྷེ་ཐ་ནད་གྲོང་ཁྱེར་དུ་གནང་སྡོད་བྱ་མཁན་མི་མང་ཚོ་ཕྱིར་འབུད་བྱས་མེད་དོ། ནཕ་ཏ་ལིའི་མི་མང་ཚོ་ཡུལ་མི་ཀ་ནན་པ་ཚོ་དང་མཉམ་དུ་གནས་སྡོད་བྱས་པ་དང་། དེ་ཚོ་ལ་ཁོ་ཚོའི་ཆེད་དུ་བཙན་དབང་གིས་ལས་ཀ་བྱེད་དུ་བཅུག་གོ

³⁴ཨ་མོར་པ་ཚོས་དཱན་གྱི་སྡེ་རིགས་ཀྱི་མི་མང་རྣམས་རི་བརྒྱུད་ཀྱི་གྲོང་ཁྱེར་དུ་དེད་ནས་དེ་ཚོ་ཐང་དུ་ཡོང་མ་བཅུག་གོ

³⁵ཨ་མོར་པ་ཚོ་མུ་མཐུད་ནས་ཨེ་ཡ་ལོན་དང་ཤལ་བིམ་དང་རི་བོ་ཧེ་རེསེ་སུ་གནས་སྡོད་བྱས་ན་ཡང་། ཨེཕ་ར་ཡིམ་དང་མ་ནསེ་སཱེའི་སྡེ་རིགས་ཚོས་དེ་ཚོ་ལ་ཁོ་ཚོའི་དབང་འོག་ཏུ་བཅུག་པ་དང་། ཁོ་ཚོའི་ཆེད་དུ་བཙན་དབང་གི་ལས་ཀ་བྱེད་དུ་བཅུག་གོ

³⁶ཨེ་དྷོ་མི་རྣམས་ཀྱི་ས་མཚམས་ནི་བྱང་སེ་ལ་ནས་ཨག་ར་བྷིམ་གྱི་ལ་་བར་དུ་ཡོད་དོ༎