Read Tibetan — པོད་སྐད་Tibetan Old Testament 2011 ཁྲིམས་དཔོན 15 Bible Online

ཁྲིམས་དཔོན 15 - Tibetan — པོད་སྐད་Tibetan Old Testament 2011 bible

ཁྲིམས་དཔོན 15

¹དུས་ཚོད་ཕྲན་བུའི་རྗེས་སུ་བྲོ་རྔ་བའི་དུས་སྐབས་སུ་སམ་སོན་ར་ཕྲུག་གཅིག་འཁྲིད་ནས་རང་གི་ཆུང་མ་འཕྲད་པར་ཕྱིན་པ་དང་། ཁོས་མོའི་ཕ་ལ། ང་ནི་ངའི་ཆུང་མའི་ཁང་མིག་ནང་དུ་འགྲོ་འདོད་འདུག་ཅེས་སྨྲས་སོ། འོན་ཀྱང་ཕས་ཁོ་ལ་འགྲོ་རུ་མ་བཅུག་པར།

²ཁོས་སམ་སོན་ལ། ངའི་བསམ་བློར་ཁྱོད་ཀྱིས་མོ་ལ་དངོས་འབྲེལ་སྡང་པོ་བྱེད་བཞིན་ཡོད་པ་རེད་བསམ་ནས། ངས་མོ་ཁྱོད་ཀྱི་གྲོགས་པོ་ལ་སྤྲད་པ་ཡིན་ནོ། འོན་ཀྱང་མོའི་སྤུན་ཆུང་བ་མོ་ལས་མཛེས་པ་ཡོད་སྟབས་དེའི་ཚབ་ལ་མོ་ལེན་ཆོག་ཅེས་སྨྲས་སོ།

³སམ་སོན་གྱིས། ད་རེས་ངས་ཕེ་ལེ་ཤེད་པ་ཚོར་ཇི་ལྟར་བྱེད་རྒྱུ་ཡིན་པ་དེ་འགན་འཁུར་གྱི་མིན་ཞེས་སྨྲས་སོ།

⁴དེར་བརྟེན་ཁོ་ཕྱིན་ནས་ཝ་མོ་ ༣༠༠ བཟུང་ནས། ཁོས་དེ་ཚོ་གཉིས་ཀྱི་གཞུ་གུ་མཉམ་དུ་བསྡམས་ནས་མདུད་པའི་བར་པད་འབར་བཙུགས་སོ།

⁵དེ་ནས་ཁོས་པད་འབར་ལ་མེ་སྤར་ནས་ཕེ་ལེ་ཤེད་པའི་འབྲུ་ཞིང་གི་སྟེང་ལ་སློད་ནས་བཏང་ངོ་། དེ་ལྟར་ཁོས་སྟོན་ཐོག་རྔས་ཟིན་པ་མ་ཟད་ཞིང་ཁའི་ནང་ཡོད་པའི་སྟོན་ཐོག་དང་། ཁ་སྐྱུར་པོའི་ཚལ་ཞིང་བཅས་པ་ཚང་མ་མེར་བསྲེགས་སོ།

⁶ཕེ་ལེ་ཤེད་པ་ཚོས་དེ་ལྟར་སུས་བྱས་པ་ཡིན་མིན་འདྲི་སྐབས་སུ། སམ་སོན་གྱི་གྱོས་པོ་དེ་ནི་ཏིམ་ནཱ་ནས་ཡིན་པ་སམ་སོན་གྱི་ཆུང་མ་ཁོའི་གྲོགས་པོ་ཞིག་ལ་སྤྲད་པའི་རྐྱེན་གྱིས་དེ་ལྟར་བྱས་པ་ཤེས་སོ། དེར་བརྟེན་ཕེ་ལེ་ཤེད་པ་ཚོ་སོང་ནས་སྐྱེ་དམན་དེ་ལ་མེར་བསྲེགས་ནས་བསད་པ་དང་། མོའི་ཕའི་ཁང་ཁྱིམ་ཡང་མེར་བསྲེགས་སོ།

⁷དེ་ཚོ་ལ་སམ་སོན་གྱིས། ཁྱོད་ཚོས་དེ་ལྟར་བྱས་རྐྱེན་ངས་དེའི་ལན་མ་འཇལ་བར་ཁ་རོག་མི་སྡོད་རྒྱུའི་དམ་བཅའ་བྱ་རྒྱུ་ཡིན་ཞེས་སྨྲས་སོ།

⁸ཁོས་དེ་དག་ལ་ཉེས་བརྡུངས་དྲག་པོ་བཏང་ནས་དེ་ཚོ་མང་པོ་བསད་དོ། དེ་ནས་ཁོ་སོང་ནས་ཨེ་ཏམ་གྱི་བྲག་ཕུག་ནང་བསྡད་དོ༎

⁹ཕེ་ལེ་ཤེད་པ་ཚོ་ཡོང་ནས་ཡ་ཧུ་དཱར་སྒར་རྒྱབ་ནས་གྲོང་ཁྱེར་ལེ་ཧི་ལ་འཐབ་བོ།

¹⁰ཡ་ཧུ་དཱ་པའི་སྐྱེས་པ་ཚོས་ཁྱོད་ཚོས་ང་ཚོར་འཐབ་རྒོལ་ཅི་ལ་བྱེད་ཀྱི་ཡོད་དམ་ཞེས་དྲིས་སོ། དེ་ཚོས། ང་ཚོ་སམ་སོན་ལ་བཙོན་བཟུང་བྱེད་རྒྱུ་དང་ཁོས་ང་ཚོར་ཇི་ལྟར་གྱིས་པ་ལྟར་ལན་འཇལ་བར་ཡོང་བ་ཡིན་ཞེས་སྨྲས་སོ།

¹¹དེར་བརྟེན་ཡ་ཧུ་དཱ་པའི་སྐྱེས་པ་ ༣,༠༠༠ ཨེ་ཏམ་གྱི་བྲག་ཕུག་ཏུ་ཕྱིན་ནས་སམ་སོན་ལ། ཁྱོད་ཀྱིས་ཕེ་ལེ་ཤེད་པ་ཚོ་ང་ཆོའི་ཆབ་སྲིད་སྐྱོང་མཁན་ཡིན་པ་ཤེས་ཀྱི་མེད་དམ། ཁྱོད་ཀྱིས་ང་ཚོར་ཅི་བྱས་ཡོད་དམ་ཞེས་སྨྲས་སོ། ལན་དུ་ཁོས། དེ་ཚོས་ང་ལ་ཇི་ལྟར་གྱིས་པ་ལྟར་ངས་དེ་ཚོ་ལ་གྱིས་པ་ཡིན་ཞེས་སྨྲས་པ་དང་།

¹²དེ་ཚོས། ང་ཚོས་ཁྱོད་ལ་བསྡམས་ནས་ཁོ་ཚོར་རྩིས་སྤྲོད་བྱེད་པའི་ཆེད་འདིར་ཡོང་བ་ཡིན་ཞེས་སྨྲས་སོ། སམ་སོན་གྱིས། ཁྱོད་ཚོ་རང་ཉིད་ཀྱིས་ང་ལ་མི་གསོད་རྒྱུའི་ཁས་ལེན་བྱོས་ཤིག་ཅེས་སྨྲས་པ་དང་།

¹³དེ་ཚོས་དེ་ལྟར་བྱེད་ཆོག། ང་ཚོས་ཁྱོད་ལ་བསྡམས་ནས་ཁོ་ཚོར་རྩིས་སྤྲོད་བྱ་རྒྱུ་ཡིན་པ་དང་། ང་ཚོས་ཁྱོད་གསོད་རྒྱུ་མིན་ཞེས་སྨྲས་སོ། དེ་ནས་དེ་ཚོས། ཁོ་ལ་ཐག་པ་གསར་པ་གཉིས་ཀྱིས་བསྡམས་ནས་བྲག་ཕུག་ནས་མར་འཁྲིད་ཡོང་ངོ་།

¹⁴ལེ་ཧི་དུ་ཁོ་འབྱོར་བ་དང་། ཕེ་ལེ་ཤེད་པ་ཚོ་ཁོའི་ཕྱོགས་སུ་རྒྱུག་ཡོང་ནས་ཁོ་ལ་ཁ་བརྡུང་བཏང་བ་དང་། གློ་བུར་དུ་གཙོ་བོ་དཀོན་མཆོག་གི་མཐུ་སྟོབས་ཀྱིས་ཁོ་ཤུགས་ཆེན་པོར་འགྱུར་ནས། ཁོའི་ལག་ངར་དང་བཅིངས་པའི་ཐག་པ་རྣམས་སྐུད་པ་འཚིག་རོ་ལྟར་བཅད་དོ།

¹⁵དེ་ནས་ཁོ་ལ་ཉིན་ཤས་སྔོན་དུ་ཤི་བའི་བོང་བུའི་འགྲམ་རུས་ཤིག་རྙེད་ནས། ཁོས་སྒུར་ནས་དེ་བླངས་ཏེ་དེས་སྐྱེས་པ་ ༡,༠༠༠ བསད་དོ།

¹⁶དེ་ནས་སམ་སོན་གྱིས་འདི་ལྟར་གཞས་བཏང་ངོ་། བོང་བུ་ཞིག་གི་འགྲམ་རུས་ཀྱིས། ང་ཡིས་སྐྱེས་པ་ ༡,༠༠༠ བསད། བོང་བུ་ཞིག་གི་འགྲམ་རུས་ཀྱིས། ང་ཡིས་དེ་ཚོ་ཕུང་པོར་སྤུངས།

¹⁷དེ་ནས་ཁོས་འགྲམ་རུས་དེ་དབྱུགས་སོ། དེ་ལྟར་བྱུང་ཡུལ་ས་ཁུལ་དེ་ལ་ར་མད་ལེ་ཧི་བཏགས་སོ།

¹⁸དེ་ནས་སམ་སོན་ཤིན་ཏུ་སྐོམ་པས། ཁོས་གཙོ་བོ་དཀོན་མཆོག་ལ་བོས་ཤིང་ཁོང་ལ། ཁྱེད་ཀྱིས་ང་ལ་རྒྱལ་ཁ་ཆེན་པོ་འདི་གནང་བ་དང་། ད་ཆ་ང་སྐོམ་ནས་འཆི་གྲབ་འདུག་པས་ཕེ་ལེ་ཤེད་པ་ཀླ་ཀློ་འདི་རྣམས་ནས་ང་ལ་བཟུང་བར་འདོད་དམ་ཞེས་ཞུས་སོ།

¹⁹དཀོན་མཆོག་གིས་དེར་ལེ་ཧི་དུ་ས་དོང་ཞིག་ཕྱེ་བར་མཛད་པས་དེ་ནས་ཆུ་ཐོན་ནས། སམ་སོན་གྱིས་དེ་ནས་ཆུ་འཐུང་བ་དང་ཧ་ཅང་བསྐོམ་པ་དྲག་ཏུ་ཕྱིན་ནོ། དེ་བས་ན་ཆུ་མིག་དེ་ལ་ཧ་ཀོར་ཞེས་བཏགས་པ་དང་། དེ་དེང་སང་ཡང་ལེ་ཧི་དུ་ཡོད་དོ།

²⁰ལོ་ཉི་ཤུའི་རིང་ཕེ་ལེ་ཤེད་པ་ཚོས་ཡུལ་དེ་དབང་བསྒྱུར་བྱེད་པའི་རིང་ལ་སམ་སོན་གྱིས་ཨིསི་རཱཨེལ་གྱི་འགོ་འཁྲིད་བྱས་སོ༎