Read Tibetan — པོད་སྐད་Tibetan Old Testament 2011 ཁྲིམས་དཔོན 16 Bible Online

ཁྲིམས་དཔོན 16 - Tibetan — པོད་སྐད་Tibetan Old Testament 2011 bible

ཁྲིམས་དཔོན 16

¹ཉིན་ཞིག་སམ་སོན་ཕེ་ལེ་ཤེད་པའི་གྲོང་ཁྱེར་གྷ་ཛར་ཕྱིན་པ་དང་། དེར་སྨད་ཚོང་མ་ཞིག་འཕྲད་ནས་མོ་མཉམ་དུ་ཉལ་བར་ཕྱིན་ནོ།

²གྷ་ཛའི་མི་མང་རྣམས་ནས་སམ་སོན་དེར་ཡོད་པ་ཤེས་པ་དང་། དེ་ཚོས་ས་ཁུལ་དེའི་མཐའ་བསྐོར་ནས་མཚན་གང་གྲོང་ཁྱེར་གྱི་རྒྱལ་སྒོར་ཁོ་ལ་སྒུག་བསྡད་དོ། དེ་ཚོ་མཚན་གང་ཁུ་སིམ་པོར་བསམ་བློ་བཏང་ནས། ང་ཚོས་ནམ་མ་ལངས་བར་དུ་སྒུག་ནས། དེ་ནས་ཁོ་གསོད་ཀྱི་ཡིན་བསམ་ནས་བསྡད་དོ།

³འོན་ཀྱང་སམ་སོན་ཉལ་སར་ནམ་ཕྱེད་བར་བསྡད་པ་དང་། དེ་ནས་ཁོ་ཡར་ལངས་ནས་གྲོང་ཁྱེར་གྱི་རྒྱལ་སྒོ་དེའི་སྒོ་དང་ཀ་བ་དང་སྒོ་ལྕགས་དང་བཅས་པ་ཚང་མ་བཀོག་ནས། དེ་ཚོ་ཚང་མ་རང་གི་དཔུང་པར་འཁུར་ནས་ཧེབ་རོན་གྱི་རི་བོའི་རྩེ་མོའི་བར་འཁྱེར་རོ༎

⁴དེའི་རྗེས་སུ་སམ་སོན་སོ་རེག་གི་ལུང་གཤོང་དུ་གནས་སྡོད་བྱ་མཁན་བུད་མེད་དྷེ་ལི་ལཱ་ཟེར་བར་སེམས་ཤོར་གྱི་ཡོད་དོ།

⁵ཕེ་ལེ་ཤེད་པའི་རྒྱལ་པོ་ལྔ་རྣམས་ནི་མོའི་སར་སོང་ནས་མོ་ལ། སམ་སོན་ལ་བསླུ་འཁྲིད་ཀྱིས་ཁོ་ཧ་ཅང་ཤུགས་ཆེན་པོ་ཇི་ལྟར་བྱུང་བ་ཡིན་པ་དང་། ང་ཚོས་ཁོ་ལ་ཇི་ལྟར་ཕམ་པར་བྱ་ཐུབ་མིན་ཤོད་དུ་འཇུག་ལ། ཁོ་བསྡམས་ནས་གང་ཡང་བྱེད་མ་ཐུབ་པ་བཟོས་ཤིག ང་ཚོ་རེ་རེས་ཁྱོད་ལ་དངུལ་དུམ་བུ་ ༡,༡༠༠ སྤྲོད་རྒྱུ་ཡིན་ཞེས་སྨྲས་སོ།

⁶དེ་བས་ན་དྷེ་ལི་ལཱས་སམ་སོན་ལ། ཁྱོད་ཧ་ཅང་ཤུགས་ཆེན་པོ་བྱུང་བ་དེ་གང་གི་བཟོས་པ་ཡིན་ནམ། གལ་སྲིད་ཁྱོད་བསྡམས་ནས་ནུས་མེད་བཟོ་བར་ཇི་ལྟར་བྱེད་ཐུབ་བམ་ལབ་རོགས་ཤེས་སྨྲས་པ་དང་།

⁷ལན་དུ་སམ་སོན་གྱིས། གལ་སྲིད་དེ་ཚོས་ང་ལ་མ་སྐམ་པའི་གཞུའི་ཐག་པ་གསར་པ་བདུན་གྱིས་བསྡམས་པ་ཡིན་ན་ང་གཞན་ལྟར་ནུས་མེད་དུ་གྱུར་ཞེས་སྨྲས་སོ།

⁸དེ་བས་ན་ཕེ་ལེ་ཤེད་པའི་རྒྱལ་པོ་རྣམས་ཀྱིས་དྷེ་ལི་ལཱར། མ་སྐམ་པའི་གཞུའི་ཐག་པ་གསར་པ་བདུན་སྤྲད་པ་དང་། མོས་སམ་སོན་ལ་བསྡམས་སོ།

⁹མོས་མི་འགའ་ཤས་ཁང་མིག་གཞན་དུ་སྒུག་ནས་བསྡད་བཅུག་ཡོད་དོ། མོས་སམ་སོན་ལ་ཕེ་ལེ་ཤད་པ་ཚོ་ཡོང་གི་འདུག་ཅེས་སྨྲས་སོ། འོན་ཀྱང་ཁོས་གཞུའི་ཐག་པ་དེ་ཚོ་ཐག་པ་མེར་འཚིག་པ་བཞིན་བཅད་དོ། དེ་བས་ན་དེ་ཚོས་ཁོའི་སྟོབས་ཤུགས་ཀྱི་གསང་བ་དེ་ཚོ་རྟོགས་མི་ཐུབ་བོ།

¹⁰དྷེ་ལི་ལཱས་སམ་སོན་ལ། ཁྱོད་ཀྱིས་ང་ལ་གླེན་པ་བཟོས་ནས་ང་ལ་དྲང་པོ་ཤོད་ཀྱི་མི་འདུག ཁྱོད་གང་ཞིག་གིས་ཇི་ལྟར་བསྡམས་ཐུབ་བམ་ང་ལ་ཤོད་རོགས་ཤེས་སྨྲས་པ་དང་།

¹¹ཁོས་ལན་དུ། གལ་སྲིད་དེ་ཚོས་ང་ལ་ཐག་པ་གསར་པ་བེད་སྤྱོད་མ་བྱས་པ་ཞིག་གིས་བསྡམས་པ་ཡིན་ན། ང་གཞན་ལྟར་ནུས་མེད་དུ་གྱུར་ཞེས་སྨྲས་སོ།

¹²དེ་བས་ན་དྷེ་ལི་ལཱ་ཐག་པ་གསར་པ་འགའ་ཤས་བྱུང་བ་དང་དེས་ཁོ་ལ་བསྡམས་སོ། དེ་ནས་མོས། སམ་སོན་ཕེ་ལེ་ཤེད་པ་ཚོ་ཡོང་གི་འདུག་ཅེས་སྐད་རྒྱབ་བོ། མི་ཚོ་ཁང་པ་གཞན་ཞིག་གི་ནང་བསྡད་ཡོད་དོ། འོན་ཀྱང་ཁོས་ལག་ངར་ནས་ཐག་པ་དེ་ཚོ་སྐུད་པ་ལྟར་བཅད་དོ།

¹³དྷེ་ལི་ལཱས་སམ་སོན་ལ། ཁྱོད་ཀྱིས་ད་དུང་ང་ལ་གླེན་པ་བཟོ་བཞིན་ང་ལ་དྲང་པོ་ཤོད་བཞིན་མི་འདུག ཁྱོད་གང་ཞིག་གིས་ཇི་ལྟར་བསྡམས་ཐུབ་བམ་བརྗོད་རོགས་ཤེས་སྨྲས་སོ། ལན་དུ་སམ་སོན་གྱིས། ཁྱོད་ཀྱིས་ངའི་སྐྲའི་རལ་པ་བདུན་པོ་དེ་འཐག་ཁྲིར་བཏགས་ནས། དེ་ཚོ་འཐག་ཕུར་གྱི་དམ་པོ་བཟོས་པ་ཡིན་ན། ང་གཞན་ལྟར་ནུས་མེད་དུ་འགྱུར་ཞེས་སྨྲས་སོ།

¹⁴དྷེ་ལི་ལཱས་ཁོ་གཉིས་ཁུག་བཅུག་ནས། ཁོའི་སྐྲའི་རལ་པ་བདུན་པོ་བླངས་ནས་འཐག་ཁྲིར་བཏགས་ཏེ། དེ་ཚོར་ཕུར་པ་བཙུགས་སོ། སམ་སོན་ལ་ཕེ་ལེ་ཤེད་པ་རྣམས་ཡོང་གི་འདུག་ཅེས་སྐད་རྒྱབ་བོ། འོན་ཀྱང་ཁོ་ཡར་ལངས་ནས་འཐག་ཁྲི་ནས་སྐྲ་འཐེན་ནས་བཀྲོལ་ལོ།

¹⁵མོས་ཁོ་ལ། ཁྱོད་ཀྱི་སེམས་ནང་ང་ལ་བརྩེ་བ་མེད་བཞིན་དུ་ང་ལ་བརྩེ་བ་ཡོད་ཅི་ལ་སྨྲ་བཞིན་ཡོད་པ་དང་། ཁྱོད་ཀྱིས་ང་ལ་ཐེངས་གསུམ་གླེན་པ་བཟོས་ནས། ད་དུང་ཁྱོད་གང་ཞིག་གིས་ཤུགས་ཧ་ཅང་ཆེན་པོ་བཟོ་ཡོད་པ་ལབ་མ་བྱུང་ཞེས་སྨྲས་སོ།

¹⁶མོས་ཁོ་ལ་ཉིན་ལྟར་སྐད་ཆ་འདྲི་བཞིན་བསྡད་ནས། དེའི་སྐོར་མོས་ཁོ་ལ་ཧ་ཅང་སུན་པོ་བཟོས་པར་ཁོ་ཡིད་ཐང་ཆད་པ་དང་།

¹⁷མཐའ་མར་ཁོས་མོ་ལ་དྲང་པོ་བཤད་དོ། ཁོས་སྨྲས་པ། ངའི་སྐྲ་ནམ་ཡང་བཞར་མེད། ང་སྐྱེས་པ་ནས་བཟུང་ང་དཀོན་མཆོག་ལ་ནཛ་རི་པ་ཚུལ་དུ་བསྔོ་བ་ཡིན། ངའི་སྐྲ་བཅད་པ་ཡིན་ན་ངའི་སྟོབས་ཤུགས་རྣམས་ཉམ་པ་དང་ང་གཞན་ལྟར་ནུས་མེད་དུ་འགྱུར་ཞེས་སོ།

¹⁸ཁོས་མོ་ལ་དྲང་པོ་བཤད་པ་དེ་ཤེས་པ་དང་། ཕེ་ལེ་ཤེད་པའི་རྒྱལ་པོ་ཚོར་ལོན་བཏང་ནས། ཡང་སྐྱར་ཐེངས་གཅིག་ཕེབས་རོགས་ཁོས་ང་ལ་དྲང་པོ་བཤད་བྱུང་ཞེས་སྨྲས་སོ། དེ་ཚོས་དངུལ་མཉམ་དུ་འཁྱེར་ཡོང་ངོ་།

¹⁹དྷེ་ལི་ལཱས་སམ་སོན་ལ་རང་གི་དཔང་དུ་གཉིད་ཁུག་འཇུག་པ་དང་། དེ་ནས་མི་ཞིག་སྐད་བཏང་བ་དེས་སམ་སོན་གྱི་སྐྲའི་རལ་པ་བདུན་པོ་བཅད་དོ། དེ་ནས་ཁོའི་སྟོབས་ཤུགས་ཉམས་པ་དང་། མོས་ཁོ་ལ་སྡུག་པོ་བཏང་འགོ་ཚུགས་སོ།

²⁰དེ་ནས་མོས་སམ་སོན་ཕེ་ལེ་ཤེད་པ་ཚོ་ཡོང་བཞིན་འདུག་ཅེས་སྐད་རྒྱབ་བོ། ཁོ་གཉིད་སད་པ་དང་སྔར་རྒྱུན་ལྟར་ངས་བཀྲོལ་ནས་ཐར་བར་བྱེད་བསམ་མོ། ཁོས་གཙོ་བོ་དཀོན་མཆོག་ཁོ་ནས་བྲལ་བ་མ་ཤེས་སོ།

²¹ཕེ་ལེ་ཤེད་པ་ཚོས་ཁོ་ལ་བཟུང་སྟེ་མིག་གཉིས་ཀ་བཏོན་ནས། དེ་ཚོས་ཁོ་གྷ་ཛ་རུ་འཁྲིད་ནས་ལིའི་ཐག་པ་རྒྱབ་ནས་བཙོན་ཁང་དུ་རང་འཐག་བསྐོར་དུ་བཅུག།

²²འོན་ཀྱང་སླར་ཡང་སྐྲ་སྐྱེས་འགོ་ཚུགས་སོ༎

²³ཕེ་ལེ་ཤེད་པའི་རྒྱལ་པོ་རྣམས་དུས་སྟོན་སྲུང་རྒྱུ་དང་། དེ་ཚོས་ལྷ་དྷ་གོན་ལ་མཆོད་པ་རྒྱ་ཆེ་འབུལ་བའི་ཆེད་ལྷན་དུ་འཛོམས་ནས། དེ་ཚོས། ང་ཚོའི་ལྷས་ང་ཚོའི་དགྲ་བོར་སམ་སོན་གྱི་ཐོག་ང་ཚོར་རྒྱལ་ཁ་གནང་བྱུང་ཞེས་མགུར་མ་ལེན་ནོ།

²⁴དེ་ཚོ་དགའ་སྐྱིད་བྱེད་བཞིན་ཡོད་སྐབས་དེ་ཚོས་སམ་སོན་ལ་བོས་ཤིག ཁོས་ང་ཚོར་ཁྲབ་ནས་མགོ་འཁོར་ཞུ་རུ་འཇུག་ཅེས་སྨྲས་སོ། དེ་ཚོས་སམ་སོན་བཙོན་ཁང་ནས་འཁྲིད་ཡོང་ནས། ཁོས་ཁོ་ཚོ་ལ་ཁྲབ་ནས་མགོ་འཁོར་ཞུ་རུ་བཅུག་པ་དང་། ཀ་བའི་བར་དུ་ལངས་སུ་བཅུག་གོ། མི་མང་གིས་ཁོ་མཐོང་སྐབས་རང་གི་ལྷ་ལ་བསྟོད་པ་དང། ང་ཚོའི་ལྷས་ང་ཚོའི་དགྲ་བོས་ང་ཚོའི་ཡུལ་དུ་གཏོར་བཅོམ་བྱས་ཤིང་ང་ཚོའི་མི་མང་པོ་བསད་མཁན་གྱི་ཐོག་ཏུ་ང་ཚོ་ལ་རྒྱལ་ཁ་གནང་བྱུང་ཞེས་མགུར་མ་ལངས་སོ།

²⁶སམ་སོན་གྱིས་ཁོའི་ལག་ནས་འཇུས་ཏེ་ཁྲིད་མཁན་ཕྲུ་གུ་དེ་ལ། ཁང་པ་སྟེགས་པའི་ཀ་བར་ང་ལ་རེག་བཅུག་དང་དེར་སྙེས་འདོད་འདུག་ཅེས་སྨྲས་སོ།

²⁷ཁང་པ་དེ་ནི་སྐྱེས་པ་དང་བུད་མེད་ཀྱིས་གང་ནས་ཡོད་པ་དང་དེར་ཕེ་ལེ་ཤེད་པའི་རྒྱལ་པོ་ལྔའང་ཡོད་པ་དང་། ཁང་པའི་རྩེ་ཐོག་ཏུ་ཁྱོ་དང་བུད་མེད་ ༣,༠༠༠ ཙམ་སམ་སོན་ལ་བལྟ་བཞིན་མགོ་འཁོར་ཞུ་རུ་འཇུག་བཞིན་ཡོད་དོ།

²⁸དེ་ནས་སམ་སོན་གྱིས། ཀུན་དབང་ཅན་གྱི་གཙོ་བོ་དཀོན་མཆོག་ང་ལ་དྲན་རོགས་གནང་། ཕེ་ལེ་ཤེད་པ་ཚོས་ངའི་མིག་གཉིས་བཏོན་པའི་ལན་འཇལ་བའི་ཆེད་དུ་ང་ལ་ཁྱེད་ཀྱིས་ནུས་ཤུགས་ཐེངས་ཅིག་གནང་རོགས་གནང་ཞེས་གསོལ་བ་བཏབ་བོ།

²⁹སམ་སོན་གྱིས་ཁང་པ་དེ་སྟེགས་ཡོད་པའི་དཀྱིལ་གྱི་ཀ་བ་གཉིས་པོ་བཟུང་ནས། ཀ་བ་རེར་ལག་པ་རེར་བཞག་ནས་ཁོས་ཤུགས་ཀྱིས་དེ་གཉིས་ལ་འབི་རྒྱག་རྒྱབ་ནས།

³⁰ང་ཕེ་ལེ་ཤེད་པ་ཚོ་དང་མཉམ་དུ་ཤི་རུ་འཇུག་ཅེས་སྐད་རྒྱབ་བོ། ཁོའི་ཤུགས་གང་ཡོད་ཀྱི་འགུལ་བས་ཁང་པ་དེ་རྒྱལ་པོ་ལྔ་དང་གཞན་ཚང་མའི་ཐོག་འགྱེལ་ལོ། སམ་སོན་གྱིས་ཁོ་གསོན་པོའི་རིང་ལ་བསད་པ་ལས་ལྷག་པ་འཆི་ཁར་མི་མང་པོ་བསད་དོ།

³¹ཁོའི་སྤུན་ཚོ་དང་ནང་མི་གཞན་རྣམས་ཁོའི་རོ་ལེན་དུ་ཡོང་ངོ་། དེ་ཚོས་རོ་དེ་འཁྱེར་ནས་མ་ནོ་ཨ་ཁོའི་ཕའི་དུར་ཁང་ཛོ་རཱ་དང་ཨིཤ་ཏ་ཨོལ་གྱི་དབར་སྦེད་དོ། ཁོས་ལོ་ཉི་ཞུ་རིང་ཨིསི་རཱཨེལ་གྱི་འགོ་འཁྲིད་བྱས་སོ༎