Read Tibetan — པོད་སྐད་Tibetan Old Testament 2011 ཁྲིམས་དཔོན 19 Bible Online

ཁྲིམས་དཔོན 19 - Tibetan — པོད་སྐད་Tibetan Old Testament 2011 bible

ཁྲིམས་དཔོན 19

¹ད་དེའི་སྐབས་སུ་ཨིསི་རཱཨེལ་ལ་རྒྱལ་པོ་མེད་པ་ཡིན་ནོ། ལེ་ཝི་པ་ཞིག་ཨེཕ་ར་ཡིམ་རི་བརྒྱུད་ཀྱི་ཐག་རིང་གྲོང་དུ་གནས་སྡོད་བྱེད་བཞིན་ཡོད་པ་དང་། ཁོས་ཡ་ཧུ་དཱའི་བྷེད་ལེ་ཧེམ་ནས་ཟུར་གྲོགས་མ་ཞིག་བླངས་སོ།

²འོན་ཀྱང་མོ་ཁོ་ལ་ཁྲོས་ནས་བྷེད་ལེ་ཧེམ་དུ་རང་གི་ཕའི་ཁང་པར་ཕྱིན་ནས་དེར་ཟླ་བ་བཞིའི་རིང་བསྡད་དོ།

³དེ་ནས་མི་དེས་མོའི་སར་ཕྱིན་ནས་མོའི་སེམས་བསྒྱུར་ནས་ཁོའི་སར་ཡོང་ཐབས་བྱ་རྒྱུ་ཐག་གཅོད་བྱས་ཏེ། ཁོས་རང་གི་གཡོག་པོ་དང་བོང་བུ་གཉིས་མཉམ་དུ་འཁྲིད་ནས་ཕྱིན་ནོ། མོས་ལེ་ཝི་པ་དེ་ཁྱིམ་དུ་འཁྲིད་ནས་མོའི་ཕས་ཁོ་མཐོང་བ་དང་དགའ་བསུ་ཟབ་རྒྱས་ཞུས་སོ།

⁴ཕ་དེས་ཁོ་ལ་བསྡད་དགོས་པའི་ནན་བསྐུལ་གྱིས་སྐབས། ཁོ་ཉིན་གསུམ་རིང་དེར་བསྡད་དོ། བཟའ་འཚོ་གཉིས་ཁ་ཟས་ཟས་ནས་མཚན་མོ་ཉལ་ལོ།

⁵ཉིན་བཞི་པའི་ཞོག་པར་དེ་དག་སྔ་པོ་གཉིད་སད་པ་དང་ཐོན་རྒྱུར་གྲ་སྒྲིགས་བྱས་སོ། འོན་ཀྱང་བུ་མོ་དེའི་ཕས་ལེ་ཝི་པ་དེ་ལ། ཁ་ཟས་ཕྲན་བུ་ཟ་ཞིག། དེས་ཁྱོད་ལ་ཕན་ཐོག་ཡོང་། ཁྱོད་འགོར་ནས་ཕྱིན་ན་འགྲིགས་ཅེས་སྨྲས་སོ།

⁶དེ་ནས་ཁོ་གཉིས་པོ་མར་བསྡད་ནས་མཉམ་དུ་ཟ་ཞིང་འཐུང་ངོ་། དེ་ནས་བུ་མོའི་ཕ་དེས་ཁོ་ལ་དེ་རིང་དགོང་དག་འདིར་སྡོད་ལ་དགའ་བདེར་སྤྱོད་ཅེས་བསྐུལ་ལོ།

⁷ལེ་ཝི་པ་ཡར་ལངས་ནས་འགྲོ་གྲབ་བྱས་ན་ཡང་ཕ་དེས་ནན་བསྐུལ་བྱས་སྟབས་ཁོ་མཚན་དེ་དེར་བསྡད་དོ།

⁸ཉིན་ལྔ་པའི་ཞོག་པ་སྔ་པོ་ཁོ་འགྲོ་རྩིས་བྱ་སྐབས་བུ་མོ་དེའི་ཕས། ཁ་ཟས་ཕྲན་བུ་ཟ་ཞིག། ཕྱི་དྲོ་བར་སྒུག་ཅིག་ཅེས་བསྐུལ་བས། དེ་བས་ན་སྐྱེ་པ་གཉིས་པོ་ཁ་ཟས་མཉམ་དུ་ཟས་སོ།

⁹མི་དེ་དང་ཁོའི་ཟུར་གྲོགས་མ་དང་གཡོག་པོ་བཅས་ཐོན་གྲབ་བྱ་སྐབས། ཕ་དེས་ད་ས་ཧྲིབ་གྲབ་འདུག་པས། ཁྱོད་དེ་རིང་མཚན་མོ་སྡོད་ཅིག། ད་མགྱོགས་པོ་ནག་ཁུང་ཆག་གྱུར་བས་འདིར་སྡོད་ལ་དགའ་བདེར་སྤྱོད་ཅིག སང་ཞོག་སྔ་པོ་ལངས་ནས་ཁྱིམ་དུ་འགྲོ་ཆོག་གི་རེད་ཅེས་སྨྲས་སོ།

¹⁰འོན་ཀྱང་མི་དེ་སླར་ཡང་དེར་མཚན་གཅིག་མ་བསྡད་པར། ཁོ་དང་ཁོའི་ཟུར་གྲོགས་མ་དང་གཡོག་པོ་དང་སྒ་རྒྱབ་པའི་བོང་བུ་གཉིས་བཅས་རང་གི་ལམ་དུ་ཞུགས་སོ། ཉི་མ་ཡོལ་གྲབ་ཡོད་སྐབས་དེ་ཚོ་ཡེ་བྷུསེ་འམ་ཡེ་རུ་ཤ་ལེམ་གྱི་ཉེ་འགྲམ་དུ་སླེབས་པ་དང་། གཡོག་པོ་དེས་རང་གི་སྦྱིན་བདག་ལ། ད་རིང་ང་ཚོ་མ་འགྲོ་བར་མཚན་མོར་ཡེ་བྷུསེ་པའི་གྲོང་ཁྱེར་དུ་མི་སྡོད་དམ་ཞེས་སྨྲས་སོ།

¹²འོན་ཀྱང་སྦྱིན་བདག་དེས། ང་ཚོ་ཨིསི་རཱཨེལ་གྱི་མི་མང་མེད་པའི་གྲོང་ཁྱེར་དུ་མི་སྡོད། ང་ཚོ་མུ་མཐུ་ཕྱིན་ནས་མཚན་མོར་གྷི་བི་ཨཱའམ་ར་མཱ་རུ་བསྡད་དགོས་ཅེས་སྨྲས་སོ།

¹⁴དེར་དེ་ཚོས་ཡེ་བྷུསེ་རྒལ་ནས་མུ་མཐུད་ཕྱིན་ནོ། དེ་ཚོ་བྷེན་ཡ་མིན་གྱི་སྡེ་རིགས་ཀྱི་མངའ་ཁུལ་གྷི་བི་ཨཱ་རུ་སླེབས་སྐབས་ཉི་མ་རྒས་སོ།

¹⁵མཚན་དེ་དེར་གནས་སྡོད་བྱེད་པའི་ཆེད་དེ་ཚོ་ལམ་བསྒྱུར་ནས་དེར་ཕྱིན་ནོ། དེ་ཚོ་གྲོང་ཁྱེར་ནང་འཛུལ་ནས། སྲང་ལམ་ཞིག་ཏུ་བསྡད་ན་ཡང་སུས་ཀྱང་ཁོ་ཚོ་ལ་མཚན་མོར་གནས་སྡོད་བྱེད་ཕྱིར་ཁྱིམ་དུ་སྐད་མ་བཏང་ངོ་།

¹⁶དེ་ཚོ་དེར་ཡོད་སྐབས་སུ་མི་རྒས་པོ་ཞིག་ཞིང་དུ་ཉིན་དེའི་ལས་ཀ་ཚར་ནས་དེར་འབྱོར་བ་དང་། ཁོ་ཨེཕ་ར་ཡིམ་གྱི་རི་བརྒྱུད་ཀྱི་ལུང་པ་ནས་ཡིན་ན་ཡང་། སྐབས་དེར་ཁོ་གྷི་བི་ཨཱ་རུ་གནས་སྡོད་བྱེད་བཞིན་ཡོད། དེར་ཁོ་ཡོད་པའི་མི་མང་གཞན་ཚོ་བྷེན་ཡ་མིན་གྱི་སྡེ་རིགས་ཡིན་པ་དང་།

¹⁷མི་རྒས་པོ་དེས་འགྲུལ་པ་ཚོ་གྲོང་ཁྱེར་གྱི་སྲམ་ལམ་དུ་མཐོང་བ་དང་། ཁྱོད་ཚོ་ག་ནས་ཡོང་བ་ཡིན་ནམ། ཁྱོད་ཚོ་གང་དུ་འགྲོ་འཆར་ཡོད་དམ་ཞེས་དྲིས་པ་དང་།

¹⁸ལེ་ཝི་པ་དེས། ང་ཚོ་ཡ་ཧུ་དཱའི་བྷེད་ལེ་ཧེམ་དུ་ཕྱིན་པ་དང་། ད་ཆ་ང་ཚོ་ཨེཕ་ར་ཡིམ་རི་བརྒྱུད་ཀྱི་ལུང་པར་ང་ཚོའི་ཁྱིམ་དུ་འགྲོ་བཞིན་ཡོད། མཚན་འདིར་ང་ཚོར་སྡོད་འཇུག་མཁན་སུ་ཡང་མི་འདུག

¹⁹ང་ཚོར་བོང་བུའི་རྩ་ཆག་དང་། ངའི་ཟུར་གྲོགས་་མ་དང་ངའི་གཡོག་པོ་བཅས་པར་བག་ལེབ་དང་ཆང་དང་དེ་མིན་ང་ཚོའི་དགོས་མཁོ་ཚང་མ་ང་ཚོ་རང་ལ་ཡོད་ཅེས་སྨྲས་སོ།

²⁰མི་རྒས་པོ་དེས། ཁྱོད་ཚོ་ངའི་ཁྱིམ་དུ་ཡོང་ན་ངས་དགའ་བསུ་ཡོད། ངས་ཁྱོད་ཚོར་བལྟ་རྟོགས་བྱ་རྒྱུ་ཡིན། ཁྱོད་ཚོ་མཚན་ལ་སྲམ་ལམ་དུ་སྡོད་མི་དགོས་ཅེས་སྨྲས་སོ།

²¹ཁོས་ཁོ་ཚོ་རང་དང་མཉམ་དུ་ཁྱིམ་དུ་འཁྲིད་པ་དང་བོང་བུར་ཆག་སྟེར་རོ། ཁོས་སྐུ་མགྲོན་ཚོའི་རྐང་པ་ཁྲུས་ནས་ཁ་ལག་ཟས་སོ།

²²དེ་ཚོ་དགའ་བདེར་གནས་བཞིན་པའི་སྐབས་སུ། གློ་བུར་དུ་མི་ངན་པ་འགའ་ཞིག་གིས་ཁང་པ་དེའི་མཐའ་བསྐོར་ནས་སྒོ་བརྡུང་སོ། དེ་ཚོས་མི་རྒས་པོར། ཁྱོད་མཉམ་དུ་ཡོང་བའི་མི་དེ་ཚོ་ཕྱིར་ཁྲིད་ཤོག། ང་ཚོ་ཁོ་མཉམ་དུ་འཁྲིག་སྤྱོད་བྱེད་པར་འདོད་དོ་ཅེས་སྨྲས་སོ།

²³མི་རྒས་པོ་དེ་ཕྱིར་ཐོན་ནས་དེ་ཚོ་ལ། ཐུགས་རྗེ་གཟིགས་ངའི་གྲོགས་པོ་ཚོ། ཐབས་སྡུག་མི་གཙང་བ་དེ་འདྲ་མ་བྱེད་ཅིག མི་འདི་ངའི་མགྲོན་པོ་ཡིན་ནོ།

²⁴འདིར་ཁོའི་ཟུར་གྲོགས་་མ་དང་། ངའི་བུ་མོ་མོ་གསར་མ་ཡང་ཡོད། ངས་དེ་ཚོ་ད་ལྟ་འཁྲིད་ཡོང་ལ། ཁྱོད་ཚོས་རྩིས ལེན་ནས། དེ་གཉིས་ལ་ཁྱོད་ཚོའི་འདོད་པ་ལྟར་བྱོས་ཤིག འོན་ཀྱང་མི་འདི་ལ་ཐབས་སྡུག་གི་ལན་ངན་དེ་འདྲ་མ་བྱེད་ཅིག་ཅེས་སྨྲས་སོ།

²⁵མི་དེ་ཆོས་ཁོ་ལ་མ་ཉན་སྟབས། ལེ་ཝི་པ་དེས་ཟུར་གྲོགས་་མ་དེ་འཁྲིད་ནས་དེ་ཚོའི་མདུན་དུ་ཕྱི་ལོག་ཏུ་བཞག་གོ དེ་ཚོས་མོ་ལ་མཚན་གང་ལོག་གཡེམ་བྱས་པ་དང་ཚིག་རྩུབ་སྨྲས་ནས་ཞོག་པ་བར་མཚམས་མ་བཞག་གོ

²⁶ཐོ་རང་བུད་མེད་དེ་ཡོང་བ་དང་། རང་གི་ཁྱོ་ཡོད་སའི་མི་རྒས་པོ་དེའི་ཁང་པའི་སྒོ་རུ་འགྱེལ་བ་དང་། ནམ་མ་ལངས་བར་མོ་དེར་ལུས་སོ།

²⁷ཞོག་པ་མོའི་ཁྱོ་དེ་ཡར་ལངས་པ་དང་། ཁོ་ལམ་དུ་འགྲོ་རྒྱུར་སྒོ་ཕྱེས་བ་དང་། ཁོའི་ཟུར་གྲོགས་མ་དེ་ཁང་པའི་མདུན་དུ་རང་གི་ལག་པ་སྒོ་ལ་བརྙབས་ཅིང་འགྱེལ་ཡོད་པ་ཁོས་མཐོང་ངོ་།

²⁸ཁོས་ཡར་ལོངས་ཤིག་ང་ཚོ་འགྲོ་ཞེས་སྨྲས་སོ། འོན་ཀྱང་ལན་གང་ཡང་མ་ཟེར་རོ། དེར་བརྟེན་ཁོས་མོའི་ལུས་པོ་དེ་བོང་བུའི་ཐོག་བཀལ་ནས་རང་གི་ཁྱིམ་གྱི་ལམ་དུ་ཐོན་ནོ།

²⁹ཁོ་ཁྱིམ་དུ་འབྱོར་བ་དང་ནང་དུ་ཕྱིན་ནས་གྲི་ཞིག་བླངས་ཏེ། ཁོས་རང་གི་ཟུར་གྲོགས་་མའི་ལུས་པོ་དེ་དུམ་བུ་བཅུ་གཉིས་སུ་བཏུབ་ནས། ཨིསི་རཱཨེལ་གྱི་སྡེ་རིགས་བཅུ་གཉིས་ལ་དུམ་བུ་རེ་རེ་བཏང་ངོ་།

³⁰ཚང་མས་དེ་མཐོང་བ་དང་ང་ཚོས་དེ་ལྟར་རྩ་བ་ནས་ཐོས་མྱོང་མེད། ཨིསི་རཱཨེལ་པ་རྣམས་ཨི་ཇིབ་ནས་ཐོན་པ་ནས་བཟུང་ད་བར་དེ་ལྟར་རྩ་བ་ནས་བྱུང་མྱོང་མེད་དོ། དེའི་སྐོར་ང་ཚོས་ག་རེ་ཡིན་ན་གཅིག་བྱེད་དགོས། ག་རེ་བྱེད་དགོས་ཡིན་ནམ་ཞེས་སྨྲས་སོ༎