Read Tibetan — པོད་སྐད་Tibetan Old Testament 2011 ཁྲིམས་དཔོན 20 Bible Online

ཁྲིམས་དཔོན 20 - Tibetan — པོད་སྐད་Tibetan Old Testament 2011 bible

ཁྲིམས་དཔོན 20

¹དེ་རྗེས་སུ་ཨིསི་རཱཨེལ་གྱི་མི་མང་ཚང་མ་བྱང་ཕྱོགས་དཱན་ནས་ལྷོ་ཕྱོགས་བྷིར་ཤེ་བྷ་བར་དང་། ཤར་ཕྱོགས་སུ་གྷིལ་ཨད་ཀྱི་ཡུལ་ནས་ཐོན་ཡོང་ངོ་། དེ་ཚོ་མིཛ་པཱ་རུ་གཅིག་སྒྲིལ་གྱིས་གཙོ་བོ་དཀོན་མཆོག་གི་སྤྱན་སྔར་འཛོམས་སོ།

²དཀོན་མཆོག་གི་མི་མང་རྣམས་འཛོམས་ས་དེར་ཨིསི་རཱཨེལ་གྱི་སྡེ་རིགས་ཡོངས་ཀྱི་འགོ་འཁྲིད་ཚང་མ་ཡོད་པ་དང་དེར་རྐང་དམག་ ༤༠༠,༠༠༠ ཡང་ཡོད་དོ།

³སྐབས་དེར་བྷེན་ཡ་མིན་གྱི་མི་མང་ཚོས། ཨིསི་རཱཨེལ་པ་གཞན་རྣམས་ནི་མིཛ་པཱ་རུ་འཛོམས་པ་ཐོས་སོ། ཨིསི་རཱཨེལ་པ་ཚོས། ཁྲིམས་འགལ་དེ་ཇི་ལྟར་བྱས་ཡོད་སྐོར་ང་ཚོར་ཤོད་ཅིག་ཅེས་སྨྲས་སོ།

⁴ལེ་ཝི་པས་རང་གི་ཟུར་གྲོགས་མ་བསད་ཡོད་པ་དེས་ལན་དུ། ང་དང་ངའི་ཟུར་གྲོགས་མ་བྷེན་ཡ་མིན་གྱི་མངའ་ཁུལ་གྷི་བི་ཨཱ་རུ་མཚན་མོར་གནས་སྡོད་བྱེད་པར་ཕྱིན་པ་ཡིན།

⁵གྷི་བི་ཨཱའི་མི་མང་ཚོས་ང་ལ་རུབ་རྒྱབ་ཏུ་ཡོང་ནས་མཚན་མོར་ཁང་པའི་མཐའ་བསྐོར་ནས། དེ་ཚོས་ང་ལ་གསོད་པར་འདོད་ནས། དེའི་ཚབ་ཏུ་དེ་ཚོས་ངའི་ཟུར་གྲོགས་མ་ལ་བཙན་གཡེམ་བྱས་ནས་མོ་འཆི་བར་འགྱུར་རོ།

⁶ངས་མོའི་ལུས་པོ་བླངས་ནས་དེ་དུམ་བུ་བཏུབ་ནས་ཨིསི་རཱཨེལ་གྱི་སྡེ་རིགས་བཅུ་གཉིས་ལ་དུམ་བུ་རེ་རེརེ་བཏང་བ་ཡིན་ནོ། མི་མང་ཚོས་ང་ཚོའི་ཁྲོད་དུ་ངན་ལས་དང་མི་ཚང་བའི་ལས་བྱས་བྱུང།

⁷ཁྱོད་ཚོ་ཚང་མ་ཨིསི་རཱཨེལ་པ་ཡིན་པས། ང་ཚོས་དེའི་སྐོར་ལ་ག་རེ་བྱེད་པར་འདོད་དམ་ཞེས་དྲིས་པ་དང་།

⁸མི་མང་ཚང་མ་མཉམ་དུ་ཡར་ལངས་ནས་སྨྲས་པ། ང་ཚོ་གུར་ནང་སྡོད་མཁན་དང་ཁང་པའི་ནང་སྡོད་མཁན་སུ་ཡང་རང་གནས་སུ་ལོག་པར་མི་བྱའོ།

⁹ང་ཆོས་འདི་ལྟར་བྱ་རྒྱུ་ཡིན། ང་ཚོས་གྷི་བི་ཨཱ་རུ་འཐབ་རྒོལ་བྱ་བར་རྒྱན་རྒྱབ་ནས་མི་འགའ་ཤས་འདམས་པར་བྱའོ།

¹⁰ཨིསི་རཱཨེལ་གྱི་མི་བཅུ་ཆ་གཅིག་གིས། དམག་མིའི་ཁ་ཟས་གྲ་སྒྲིགས་བྱས་པ་དང་། གཞན་ཚོ་ཕྱིན་ནས་གྷི་བི་ཨཱ་རུ་ཨིསི་རཱཨེལ་པ་ཚོར་མི་གཙང་བའི་བྱ་བ་བྱས་པར་ཉེས་ཆད་གཏོང་བར་བྱའོ།

¹¹དེ་འདྲ་སོང་ཅང་ཨིསི་རཱཨེལ་པ་ཚང་མ་གྲོང་ཁྱེར་དེ་ལ་འཐབ་རྒོལ་བྱེད་པའི་ཕྱིར་དམིགས་ཡུལ་གཅིག་གི་ཆེད་དུ་འཛོམས་སོ།

¹²ཨིསི་རཱཨེལ་གྱི་སྡེ་རིགས་ཚོས་བྷེན་ཡ་མིན་གྱི་མངའ་ཁུལ་ཡོངས་སུ་བང་ཆེན་རྣམས་བཏང་ནས་སྨྲས་པ། ཁྱོད་ཚོས་ཁྲིམས་འགལ་གྱིས་པ་དེ་ཅི་ཡིན་ནམ།

¹³ད་ཆ་གྷི་བི་ཨཱ་རུ་ཡོད་པའི་མི་ངན་དེ་ཚོ་ཚང་མ་ང་ཚོར་རྩིས་སྤྲོད་ཅིག ང་ཚོས་དེ་ཚོ་བསད་ནས་ངན་སྤྱོད་འདི་དག་ཨིསི་རཱཨེལ་ནས་མེད་པར་བཟོའོ་ཞེས་སྨྲས་སོ། འོན་ཀྱང་བྷེན་ཡ་མིན་གྱི་མི་མང་ཚོས་ཨིསི་རཱཨེལ་པ་གཞན་ཚོར་དོ་སྣང་མ་བྱས་སོ།

¹⁴བྷེན་ཡ་མིན་གྱི་གྲོང་ཁྱེར་ཚང་མ་ནས་མི་རྣམས་གྷི་བི་ཨཱ་རུ་ཨིསི་རཱཨེལ་གྱི་མི་མང་གཞན་ཚོ་དང་མཉམ་དུ་དམག་འཐབ་བྱེད་པར་ཡོང་ངོ་།

¹⁵ཉིན་དེར་དེ་ཚོའི་གྲོང་ཁྱེར་ནས་དམག་མི་ ༢༦༠༠༠ བོས་པ་དང་། དེ་དང་མཉམ་དུ་གྷི་བི་ཨཱའི་ཡུལ་མི་ཚོས་དམིགས་བསལ་གཡོན་ལག་མི་ ༧༠༠ འདམས་པ་དང་། དེ་ཚོ་ཚང་མས་སྐྲ་རྐང་གཅིག་ལ་མ་ཕྱུགས་པར་འབེན་ལ་འུར་རྡོ་རྒྱབ་ཐུབ་པ་དང་།

¹⁶

¹⁷ཨིསི་རཱཨེལ་གྱི་སྡེ་རིགས་གཞན་ཚོས་སྦྱོངས་དར་སྤྲད་པའི་དམག་མི་ ༤༠༠,༠༠༠ བསྡུས་སོ༎

¹⁸ཨིསི་རཱཨེལ་པ་ཚོར་བེད་ཐེལ་དུ་མཆོད་ཡུལ་ཞིག་ཏུ་སོང་བ་དང་། དེར་དེ་ཚོས་དཀོན་མཆོག་ལ་བྷེན་ཡ་མིན་པ་རྣམས་མཉམ་དུ་འཐབ་པའི་ཕྱིར་སྡེ་རིགས་སུ་ཞིག་སྔོན་དུ་འགྲོ་དགོས་སམ་ཞེས་ཞུས་པས། ལན་དུ་གཙོ་བོ་དཀོན་མཆོག་གིས། ཡ་ཧུ་དཱའི་སྡེ་རིགས་སྔོན་དུ་འགྲོ་དགོས་གསུངས་སོ།

¹⁹དེར་བརྟེན་ཨིསི་རཱཨེལ་པ་ཚོ་སང་ཞོག་ཐོན་ནས་གྷི་བི་ཨཱའི་གྲོང་ཁྱེར་གྱི་ཉེ་འགྲམ་དུ་སྒར་བཏབ་བོ།

²⁰དེ་ཚོ་བྷེན་ཡ་མིན་དང་འཐབ་པར་ཕྱིན་པ་དང་། གྲོང་ཁྱེར་ལ་ཁ་བསྒྱུར་ནས་དམག་མི་རྣམས་གྲ་སྒྲིགས་གྱིས་བཞག་གོ

²¹བྷེན་ཡ་མིན་གྱི་དམག་མི་ཚོ་གྲོང་ཁྱེར་ནས་ཕྱིར་ཐོན་པ་དང་། ཉི་མ་མ་རྒས་སྔོན་དུ། དེ་ཚོས་ཨིསི་རཱཨེལ་པའི་དམག་མི་ ༢༢,༠༠༠ བསད་དོ།

²²དེ་ནས་ཨིསི་རཱཨེལ་པ་ཚོ་མཆོད་ཡུལ་དེར་སོང་ནས། གཙོ་བོ་དཀོན་མཆོག་གི་སྤྱན་སྔར་ཕྱི་དྲོ་བར་མྱན་ངན་བྱས་སོ། དེ་ཚོས་ཁོང་ལ་ང་ཚོས་སླར་ཡང་ང་ཚོའི་སྤུན་བྷེན་ཡ་མིན་པ་ཚོ་དང་དམག་རྒྱབ་པར་འགྲོ་རུང་ངམ་ཞེས་བཀའ་འདྲི་ཞུས་པས། ལན་དུ་གཙོ་བོ་དཀོན་མཆོག་གིས་འགྲོ་དགོས་ཤེས་གསུངས་སོ། དེ་བས་ན་ཨིསི་རཱཨེལ་གྱི་དམག་མི་ཚོའི་སེམས་ཤུགས་འཕར་བ་དང་། ཉིན་སྔོན་མ་ལྟར་དེ་ཚོས་དམག་མི་རྣམས་གྲ་སྒྲིགས་གྱིས་བཞག་གོ

²³

²⁴དེ་ཚོས་བྷེན་ཡ་མིན་གྱི་དམག་མི་ཚོར་འཐབ་རྒོལ་གཉིས་པ་བྱས་སོ།

²⁵ཐེངས་གཉིས་པར་བྷེན་ཡ་མིན་པ་ཚོ་གྷི་བི་ཨཱ་ནས་ཕྱིར་ཐོན་པ་དང་། དེ་ཚོས་ཨིསི་རཱཨེལ་གྱི་དམག་མི་སྦྱོངས་དར་སྤྲད་པ་ ༡༨,༠༠༠ བསད་དོ།

²⁶དེ་ནས་ཨིསི་རཱཨེལ་གྱི་མི་མང་ཚང་མ་བྷེད་ཐེལ་དུ་ཕྱིན་ནས། དེ་ཚོ་གཙོ་བོ་དཀོན་མཆོག་གི་སྤྱན་སྔར་བསྡད་ནས་ཕྱི་དྲོ་བར་གང་ཡང་མ་ཟས་པར་མྱ་ངན་བྱས་སོ། དེ་ཚོས་གཙོ་བོ་དཀོན་མཆོག་གི་སྤྱན་སྔར་མཐུན་གྲོགས་ཀྱི་མཆོད་པ་དང་སྦྱིན་སྲེག་གི་མཆོད་པ་སྲེག་ནས་ཕུལ་ལོ།

²⁷དེ་དུས་བྷེད་ཐེལ་དུ་དཀོན་མཆོག་གི་དམ་བཅའི་སྒྲོམ་ཡོད་པ་དང་། ཨ་རོན་གྱི་ཚ་བོ་དང་ཨེ་ལི་ཛར་གྱི་བུ་ཕིན་ཧསི་དེའི་དོ་དམ་པ་ཡིན་ནོ། དེར་མི་མང་གིས་གཙོ་བོ་དཀོན་མཆོག་ལ། ང་ཚོས་སླར་ཡང་ང་ཚོའི་སྤུན་བྷེན་ཡ་མིན་པ་ཚོར་དམག་རྒྱབ་པར་འགྲོ་འམ། ཡང་ན་མི་འགྲོ་བར་ཤོལ་ལམ་ཞེས་བཀའ་འདྲི་ཞུས་པས། ལན་དུ་གཙོ་བོ་དཀོན་མཆོག་གིས། དམག་རྒྱོབ་ཅིག། སང་ཉིན་ངས་ཁྱོད་ཚོར་རྒྱལ་ཁ་བྱིན་ནོ་གསུངས་སོ།

²⁸

²⁹དེར་བརྟེན་ཨིསི་རཱཨེལ་པ་ཚོས་དམག་མི་འགའ་ཤས་གྷི་བི་ཨཱའི་མཐའ་འཁོར་དུ་གབ་ཏུ་བཅུག་གོ

³⁰དེ་ནས་ཉིན་གསུམ་པར་དེ་ཚོས། བྷེན་ཡ་མིན་པ་ཚོའི་ཁ་ཐེབ་ལ་ཐོན་པ་དང་། དམག་སར་དེ་ཚོས་སྔོན་དུ་བྱས་པ་ལྟར་དམག་མི་རྣམས་གྷི་བི་ཨཱ་རུ་ཁ་ལྟས་ནས་གྲ་སྒྲིགས་གཞག་གོ

³¹བྷེན་ཡ་མིན་པ་ཚོ་དམག་འཐབ་བྱེད་པར་ཡོང་བ་དང་གྲོང་ཁྱེར་ནས་ཕྱིརུ་ཐོན་ནས། སྔོན་ལྟར་དེ་ཚོས་བྷེད་ཐེལ་ལམ་གྱི་ས་སྟོང་དང་གྷི་བི་ཨཱའི་ལམ་བཅས་པར་ཨིསི་རཱཨེལ་པ་ཚོར་བསད་འགོ་ཚུགས་སོ། དེ་ཚོས་ཨིསི་རཱཨེལ་པ་གསུམ་བཅུ་བསད་དོ།

³²བྷེན་ཡ་མིན་པ་ཆོས། ང་ཚོས་སྔོན་དུ་བྱས་པ་ལྟར། ཨིསི་རཱཨེལ་པ་ཚོ་ཕམ་པར་བྱས་པ་ཡིན་ཞེས་སྨྲས་སོ། འོན་ཀྱང་ཨིསི་རཱཨེལ་པ་ཚོས་རྒྱབས་ཤིག་རྒྱབ་ནས། དེ་ཚོ་གྲོང་ཁྱེར་གྱི་ཕྱི་ལོག་རྒྱ་ལམ་དུ་འཁྲིད་རྒྱུའི་འཆར་གཞི་བཟོས་ཡོད་པ་དང་།

³³ཨིསི་རཱཨེལ་གྱི་དམག་མི་གཙོ་བོ་ཚོས་ཕྱིར་འཐེན་བྱས་ནས། སླར་ཡང་བྷལ་ཏ་མར་འཛོམས་པ་དང་། གྷི་བི་ཨཱའི་མཐའ་བསྙོད་ནས་བསྡད་ཡོད། མི་རྣམས་གློ་བུར་དུ་ཡིབ་ས་ནས་གྲོང་ཁྱེར་གྱི་མཐའ་འཁོར་གྱི་བྲག་ཡུལ་དུ་ཕྱིར་ཐོན་ནོ།

³⁴ཨིསི་རཱཨེལ་ཡོངས་ནས་དམིགས་བསལ་གྱི་འདམས་པའི་དམག་མི་ ༡༠,༠༠༠ གྷི་བི་ཨཱར་ཕར་རྒོལ་གྱིས་དམག་འཐབ་དྲག་པོ་བྱས་པ་དང་། བྷེན་ཡ་མིན་པ་ཚོས་དེ་ཚོ་མེད་པར་བཟོ་གྲབ་ཡོད་པ་མ་རྟོགས།

³⁵གཙོ་བོ་དཀོན་མཆོག་གིས་ཨིསི་རཱཨེལ་པ་ཚོར་བྷེན་ཡ་མིན་པ་ཚོའི་ཐོག་རྒྱལ་ཁ་གནང་ངོ་། ཉིན་དེར་ཨིསི་རཱཨེལ་པ་ཚོས་དགྲ་བོ་ ༢༥,༡༠༠ བསད་དོ།

³⁶བྷེན་ཡ་མིན་པ་ཚོས་དེ་ཚོ་རང་ཉིད་ཕམ་པ་ཤེས་སོ༎ ཨིསི་རཱཨེལ་གྱི་དམག་མི་གཙོ་བོ་ཚོ་ནི་བྷེན་ཡ་མིན་པ་ཚོ་ནས་ཕྱི་ནུར་རྒྱབ་ཡོད་དོ། གང་ལགས་ཟེར་ན། དེ་ཚོས་གྷི་བི་ཨཱའི་མཐའ་འཁོར་ལ་ཡིབ་ནས་བཞག་པའི་མི་ཚོ་ལ་བློས་འགལ་བྱས་ཡོད་དོ།

³⁷མི་དེ་ཚོས་གྷི་བི་ཨཱའི་ཕྱོགས་སུ་མགྱོགས་པོར་རྒྱུག་པ་དང་། གྲོང་ཁྱེར་ནང་དུ་སོ་སོར་ཕྱིན་ནས་དེར་ཡོད་པ་ཚང་མ་བསད་དོ།

³⁸ཨིསི་རཱཨེལ་གྱི་དམག་མི་གཙོ་བོ་ཚོ་དང་ཡིབ་ནས་སྡོད་མཁན་ཚོའི་དབར་བརྡ་ཞིག་གོ་སྒྲིགས་བྱས་ཡོད་དོ། དེ་ནི་དེ་ཚོས་གྲོང་ཁྱེར་ནས་མེའི་དུ་བ་སྤྲིན་ལྟར་ཐོན་པ་མཐོང་སྐབས།

³⁹དམག་སར་ཡོད་པའི་ཨིསི་རཱཨེལ་པ་ཚོ་ཚུར་ཁ་བསྒྱུར་པ་ཡིན། དེའི་རིང་ལ་བྷེན་ཡ་མིན་པ་ཚོས་ཨིསི་རཱཨེལ་པ་ ༣༠ བསད་ཟིན་ཡོད་དོ། དེ་ཚོས་ང་ཚོས་སྔོན་མ་ལྟར་ཨིསི་རཱཨེལ་པ་ཚོ་ཕམ་པར་བྱས་པ་ཡིན་ཞེས་སྨྲས་སོ།

⁴⁰དེ་ནས་བརྡ་དེ་མཐོང་བ་དང་གྲོང་ཁྱེར་ནས་དུ་བ་སྤྲིན་ལྟར་ཐོན་ནོ། བྷེན་ཡ་མིན་པ་ཚོས་ཕྱི་མིག་བལྟ་སྐབས་གྲོང་ཁྱེར་ཆ་ཚང་མེ་ལྕེས་འབར་བ་བཞིན་མཐོང་ནས་ཧོན་འཐོར་རོ།

⁴¹དེ་ནས་ཨིསི་རཱཨེལ་པ་ཚོ་ཁ་བསྒྱུར་ནས་ཡོང་སྐབས། བྷེན་ཡ་མིན་པ་ཚོ་འཇིགས་སྣང་ནང་ཚུད་དོ། གང་ལགས་ཟེར་ན། དེ་ཚོ་མེད་པ་བཟོ་གྲབ་ཡོད་པ་ཤེས་སོ།

⁴²དེ་ཚོས་ལུང་སྟོང་ཕྱོགས་སུ་བྲོས་ན་ཡང་། དེ་ཚོ་མ་ཐར་རོ། དེ་ཆོ་ཨིསི་རཱཨེལ་གྱི་དམག་མི་གཙོ་བོ་ཚོ་དང་གྲོང་ཁྱེར་ནས་ཕྱིར་ཐོན་ཏེ་ཡོང་མཁན་དབར་ཚུད་ནས་མེད་པར་བྱས་སོ།

⁴³ཨིསི་རཱཨེལ་པ་ཚོས་དགྲ་བོ་རྙི་ནང་བཅུག་པ་དང་། དེ་ཚོས་མཚམས་མ་བཞག་པར་མུ་མཐུད་ནས་གསོད་བཞིན་གྷི་བི་ཨཱའི་ཤར་ཕྱོགས་བར་དུ་རྗེས་དེད་བྱས་སོ།

⁴⁴བྷེན་ཡ་མིན་པའི་དམག་མི་དཔའ་རྩལ་ཆེ་ཤོས་གྲངས་ ༡༨,༠༠༠ བསད་པ་དང་།

⁴⁵གཞན་ཚོ་ཁ་བསྒྱུར་ནས་རིམ་མོན་གྱི་བྲག་གི་ལུང་སྟོང་ཕྱོགས་སུ་བྲོས་སོ། ལམ་དུ་དེ་ཚོས་ ༥,༠༠༠ བསད་དོ། ཨིསི་རཱཨེལ་པ་ཚོས་གཞན་ཚོ་གྷི་དྷོམ་བར་དུ་རྗེས་དེད་བྱས་ནས་ ༢,༠༠༠ བསད་དོ།

⁴⁶ཉིན་དེར་བྷེན་ཡ་མིན་པ་བསྡོམས་ ༢༥,༠༠༠ བསད་པ་རྣམས་ནི་དམག་མི་བློ་སྟོབས་ཅན་འབའ་ཞིག་ཡིན་ནོ།

⁴⁷འོན་ཀྱང་མི་ ༦༠༠ རིམ་མོན་གྱི་བྲག་གི་ལུང་གཤོང་དུ་བྲོས་ཐར་བ་དང་། དེ་ཚོ་ཟླ་བ་བཞིའི་རིང་དེར་བསྡད་དོ།

⁴⁸ཨིསི་རཱཨེལ་པ་ཚོས་བྷེན་ཡ་མིན་པ་ལྷག་འཕྲོས་ཚོའི་ཐོག་ཁ་བསྒྱུར་ནས་ཡོང་སྟེ། སྐྱེས་པ་དང་བུད་མེད་དང་བུ་ཕྲུག་དང་སེམས་ཅན་བཅས་པ་ཚང་མ་བསད་དོ། མངའ་ཁུལ་དེའི་གྲོང་ཁྱེར་ཚང་མ་ཡང་མེར་བསྲེགས་སོ༎