Read Tibetan — པོད་སྐད་Tibetan Old Testament 2011 ཁྲིམས་དཔོན 21 Bible Online

ཁྲིམས་དཔོན 21 - Tibetan — པོད་སྐད་Tibetan Old Testament 2011 bible

ཁྲིམས་དཔོན 21

¹ཨིསི་རཱཨེལ་པ་ཚོ་མིཛ་པཱ་རུ་འཛོམས་སྐབས། དེ་ཚོས་གཙོ་བོ་དཀོན་མཆོག་ལ། ང་ཚོ་སུས་ཀྱང་བྷེན་ཡ་མིན་པ་ཚོར་ང་ཚོའི་བུ་མོ་མཉམ་དུ་ཆང་ས་རྒྱབ་བཅུག་གི་མིན་ཞེས་དམ་བཅའ་ནན་པོ་ཞུས་སོ།

²དེར་བརྟེན་ད་ཨིསི་རཱཨེལ་གྱི་མི་མང་ཆོ་བྷེད་ཐེལ་དུ་ཕྱིན་ནས། དེར་ཕྱི་དྲོ་བར་དཀོན་མཆོག་གི་སྤྱན་སྔར་བསྡད་ནས། དེ་ཚོས་སྐད་ཆེན་པོ་དང་ཧ་ཅང་དྲག་པོའི་ཐོག་མྱ་ངན་གྱིས་སོ།

³ཀྱེ་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག། འདི་ལྟར་ཅི་ལ་བྱུང་བ་ཡིན་ནམ། བྷེན་ཡ་མིན་གྱི་སྡེ་རིགས་འདི་བཞིན་ཨིསི་རཱཨེལ་ནས་ཅི་ལ་རླག་གྲབ་ཡོད་པ་རེད་དམ་ཞེས་ཞུས་སོ།

⁴དེར་ཞོག་པ་སྔ་པོ་མི་མང་ཚོས་མཆོད་ཁྲི་ཞིག་བཞེངས་ནས་དེ་ལ་མཐུན་འབྲེལ་དང་སྦྱིན་སྲེག་གི་མཆོད་པ་ཕུལ་ལོ།

⁵དེ་ཚོས་འདིར་ཨིསི་རཱཨེལ་གྱི་སྡེ་རིགས་ཡོངས་ནས་མིཛ་པཱ་རུ་གཙོ་བོ་དཀོན་མཆོག་གི་སྤྱན་སྔར་མ་འཛོམས་མཁན་ཚོགས་ཁག་སུ་ཞིག་ཡོད་དམ་ཞེས་དྲིས་པ་དང་། (དེ་ཚོས་མིཛ་པཱ་རུ་མ་འཛོམས་མཁན་སུ་ཞིག་ཡིན་རུང་སྲོག་ཐོག་གཏོང་རྒྱུའི་མནའ་སྐྱེལ་ཡོད་དོ།)

⁶ཨིསི་རཱཨེལ་གྱི་མི་མང་ཚོ་ལ་སྤུན་བྷེན་ཡ་མིན་པ་ཚོའི་ཆེད་དུ་བློ་ཕམ་བྱུང་ནས་སྨྲས་པ། དེ་རིང་ཨིསི་རཱཨེལ་གྱི་སྡེ་རིགས་ཤིག་རླག་ཡོད་དོ།

⁷བྷེན་ཡ་མིན་གྱི་ཁྱོ་ལྷག་འཕྲོས་བསྡད་པ་ཚོར་ཆུང་མ་སྤྲོད་རྒྱུར་ང་ཚོས་ཅི་བྱེད་དགོས་སམ། ང་ཚོས་ང་ཚོའི་བུ་མོ་དེ་ཚོ་ལ་མི་སྤྲོད་རྒྱུར་གཙོ་བོ་དཀོན་མཆོག་ལ་མནའ་སྐྱེལ་ཡོད་དོ།

⁸དེ་ཚོས་ཨིསི་རཱཨེལ་གྱི་སྡེ་རིགས་ཡོངས་ནས་མིཛ་པཱ་རུ་འཛོམས་དུས་མ་འཛོམས་མཁན་ཚོ་ཡོད་དམ་ཞེས་འདྲི་སྐབས། གྷིལ་ཨད་ཀྱི་ཡ་བྷེཤ་ནས་སུ་ཡང་དེར་འཛོམས་མེད་པ་ཤེས་སོ།

⁹དམག་མིའི་མིང་ཐོ་གཤེར་སྐབས་སུ་ཡ་བྷེཤ་ནས་སུས་ཀྱང་ལན་འདེབས་མ་བྱས་སོ།

¹⁰དེར་བརྟེན་འདུ་ཚོགས་ཀྱིས་མི་བློ་སྟོབས་ཆེ་ཤོས་ ༡༢,༠༠༠ ལ་བཀའ་བཏང་ནས། སོང་ལ་ཡ་བྷེཤ་རུ་ཡོད་མཁན་ཁྱོ་དང་བུད་མེད་དང་བུ་ཕྲུག་བཅས་པ་ཚང་མ་གསོད་ཅིག་ཅེས་སྨྲས་སོ།

¹¹ཁྱོ་ཚང་མ་དང་བུད་མེད་མོ་གསར་མིན་པ་ཚང་མ་གསོད་ཅེས་སོ།

¹²ཡ་བྷེཤ་རུ་ཡོད་པའི་མི་མང་གི་ཁྲོད་ནས་ན་གཞོན་མ་མོ་གསར་ ༤༠༠ རྙེད་དོ། དེ་བས་ན་དེ་ཚོས་བུ་མོ་དེ་ཚོ་ཀ་ནན་ཡུལ་གྱི་ཤི་ལཱོ་རུ་སྒར་སར་འཁྲིད་ཡོང་ངོ་།

¹³དེ་ནས་འདུ་ཚོགས་ཀྱིས་རིམ་མོན་གྱི་བྲག་ཕུག་ཏུ་ཡོད་པའི་བྷེན་ཡ་མིན་པ་ཆོར་ལོན་བཏང་ནས། དམག་འཐབ་མཚམས་འཇོག་བྱ་རྒྱུའི་ཁས་ལེན་གྱིས་ནས།

¹⁴བྷེན་ཡ་མིན་པ་ཚོ་ལོག་ཡོང་བ་དང་། ཨིསི་རཱཨེལ་པ་གཞན་ཚོས་ཡ་བྷེཤ་ནས་བུ་མོ་མ་བསད་པ་ཚོ་ཁོ་ཚོར་སྤྲད་དོ། འོན་ཀྱང་ཁོ་ཚོ་ལ་ལྡང་བ་མེད་དོ།

¹⁵མི་མང་རྣམས་བྷེན་ཡ་མིན་པ་ཚོར་འགྱོད་སེམས་སྐྱེས་སོ། གང་ལགས་ཟེར་ན། གཙོ་བོ་དཀོན་མཆོག་གིས་ཨིསི་རཱཨེལ་གྱི་སྡེ་རིགས་་ཀྱི་ཆིག་བསྒྲིལ་གནང་ཡོད་པ་དེ་མེད་པར་འགྱུར་རོ།

¹⁶དེར་བརྟེན་དེར་འདུས་པའི་འགོ་འཛིན་ཚོས་སྨྲས་པ། བྷེན་ཡ་མིན་གྱི་སྡེ་རིགས་ལ་བུད་མེད་རྣམས་མེད་པ་དང་། སྐྱེས་པ་ལྷག་ལུས་ཚོ་ལ་ཆུང་མ་སྤྲོད་རྒྱུར་ང་ཚོས་ཅི་བྱེད་དགོས་སམ།

¹⁷ཨིསི་རཱཨེལ་པ་ཚོར་སྡེ་རིགས་བཅུ་གཉིས་ཡོད་པ་ནས་གཅིག་ཀྱང་བརླགས་མི་རུང་། བྷེན་ཡ་མིན་གྱི་སྡེ་རིགས་ཚོ་གསོན་པོར་གནས་ཐུབ་པར་ང་ཚོས་ལམ་ཞིག་འཚོལ་དགོས་སོ།

¹⁸འོན་ཀྱང་དེ་ཚོ་ལ་ང་ཚོའི་བུ་མོ་ཚོ་ཆང་ས་རྒྱབ་ཏུ་འཇུག་མི་རུང་། གང་ལགས་ཟེར་ན། ང་ཚོའི་ནང་ནས་སུ་ཞིག་གིས་བྷེན་ཡ་མིན་པ་ཚོར་ང་ཚོའི་བུ་མོ་དང་ཆང་ས་རྒྱབ་བཅུག་མཁན་ལ་ང་ཚོས་དམོད་པ་རྒྱབ་ཡོད་ཅེས་སྨྲས་སོ།

¹⁹དེ་ནས་དེ་ཚོས་བསམ་བློར། ཤི་ལཱོ་རུ་ལོ་འཁོར་གྱི་གཙོ་བོ་དཀོན་མཆོག་གི་དུས་སྟོན་སླེབས་རན་ཡོད། (ཤི་ལཱོ་ནི་བེ་ཐེལ་གྱི་བྱང་ཕྱོགས་དང་ལེ་བྷོ་ནཱ་གྱི་ལྷོ་ཕྱོགས་དང་བྷེ་ཐེལ་དང་ཤེ་ཀེམ་དབར་གྱི་རྒྱ་ལམ་གྱི་ཤར་ཕྱོགས་སུ་འཁེལ་གྱི་ཡོད་དོ།)

²⁰དེ་ཚོས་བྷེན་ཡ་མིན་པ་ཚོ་ལ་སྨྲས་པ། སོང་ལ་རྒུན་ཚལ་དུ་ཡིབ་ནས་སྡོད་ཅིག

²¹ཤི་ལཱོའི་བུ་མོ་ཚོ་དུས་སྟོན་སྐབས་སུ་ཁྲབ་པར་ཡོང་སྐབས། ཁྱོད་ཚོ་རྒུན་ཚལ་ནས་ཕྱིར་ཐོན་ཞིག། བུ་མོ་དེ་ཚོའི་ཁྲོད་ནས་ཁྱོད་ཚོ་རེ་རེར་ཆུང་མ་རེར་བཙན་དབང་ཐོག་བླངས་ནས། མོ་ནི་ཁྱོད་དང་མཉམ་དུ་བྷེན་ཡ་མིན་གྱི་མངའ་ཁུལ་དུ་འཁྲིད་ཅིག

²²དེ་ཚོའི་ཕ་ཚོ་དང་སྤུན་ཚོ་ཁྱོད་ཚོའི་སར་ཡོང་ནས་ངོ་རྒོལ་བྱས་པ་ཡིན་ན། དེ་ཚོ་ལ་ཁྱོད་ཚོས་ཐུགས་རྗེ་གཟིགས། དེ་ཚོ་ང་ཚོར་ཉར་འཇུག་རོགས་གནང་། གང་ལགས་ཟེར་ན། དེ་ཚོ་གཡུལ་ས་ནས་ང་ཚོའི་ཆུང་མ་བཟོ་བར་འཁྲིད་མེད། ཁྱོད་ཚོས་དེ་ཚོ་གནང་མེད་སྟབས། ཁྱོད་ཚོར་དམ་བཅའ་དང་འགལ་བའི་ཉེས་པ་མེད་ཅེས་སྨྲས་སོ།

²³བྷེན་ཡ་མིན་པ་ཚོས་དེ་ལྟར་བྱས་སོ། ཤི་ལཱོར་བྲོ་ཁྲབ་པར་ཡོང་མཁན་ནས་དེ་ཚོ་རེ་རེས་ཆུང་མ་རེ་བླངས་ནས་ཕར་འཁྲིད་དོ། དེ་ནས་དེ་ཚོ་རང་་གི་མངའ་ཁུལ་དུ་ཕྱིན་པ་དང་། དེར་རང་གི་གྲོང་ཁྱེར་སྐྱར་བཟོ་བྱས་ནས་བསྡད་དོ།

²⁴དེ་དང་སྐབས་མཚངས་ཨིསི་རཱཨེལ་པ་གཞན་ཚོ་ཡང་ཐོན་དང་། མི་ཚང་མ་རང་གི་སྡེ་རིགས་དང་ཁྱིམ་ཚང་དང་རང་གི་རྒྱུ་དངོས་ཡོད་སར་ཕྱིན་ནོ།

²⁵སྐབས་དེར་ཨིསི་རཱཨེལ་ལ་རྒྱལ་པོ་མེད་པ་ཡིན་པས། མི་ཚང་མས་རང་རང་སོ་སོས་འདོད་པ་ལྟར་བྱེད་དོ༎