Read Tibetan — པོད་སྐད་Tibetan Old Testament 2011 ཁྲིམས་དཔོན 3 Bible Online

ཁྲིམས་དཔོན 3 - Tibetan — པོད་སྐད་Tibetan Old Testament 2011 bible

ཁྲིམས་དཔོན 3

¹དེ་ནས་གཙོ་བོ་དཀོན་མཆོག་གིས་ཀ་ནན་དུ་དམག་སར་མི་འགྲོ་མཁན་ཨིསི་རཱཨེལ་པ་ཚོར་བརྟག་དཔྱད་བྱེད་པར་མི་རིགས་འགའ་ཤས་ཡུལ་དེར་འཛོག་གནང་བ་དང་།

²ཁོང་གིས་ཨིསི་རཱཨེལ་གྱི་མི་རབས་སོ་སོར་དང་དམིག་གསལ་གྱི་སྔོན་དུ་དམག་འཐབ་ནམ་ཡང་བྱེད་མི་མྱོང་མཁན་ཚོར་དམག་གི་སྐོར་སློབ་སྟོན་གནང་བའི་ཕྱིར་དེ་ལྟར་མཛད་དོ།

³ཡུལ་དེར་ལྷག་འཕྲོས་ཡོད་པའི་ཕེ་ལེ་ཤེད་པའི་གྲོང་ཁྱེར་ལྔ་ནི་ཀ་ནན་པ་ཚང་མ་དང་སི་དོན་པ་དང་ལེ་བ་ནོན་གྱི་རི་བོ་ནས་རི་བོ་བྷལ་ཧར་མོན་ནས་ཧ་མད་ཀྱི་ལའི་བར་གནས་སྡོད་བྱ་མཁན་ཧི་ཝིི་པ་བཅས་ཡིན་ནོ།

⁴དེ་ཚོ་ཨིསི་རཱཨེལ་པ་ཚོའི་གཙོ་བོ་དཀོན་མཆོག། དེ་ཚོའི་ཕ་མེས་ལ་མོ་ཤེ་བརྒྱུད་ནས་བཀའ་གནང་བ་རྣམས་ལ་ཉན་གྱི་ཡོད་མེད་ཨིསི་རཱཨེལ་པ་ཚོར་བརྟག་དཔྱད་བྱ་མཁན་དུ་འཛོག་གནང་ངོ་།

⁵དེར་བརྟེན་ཨིསི་རཱཨེལ་གྱི་མི་མང་རྣམས་ཀ་ནན་པ་དང་ཧི་ཏི་པ་དང་ཨ་མོར་པ་དང་པེ་རི་ཛི་པ་དང་ཧེ་ཝི་པ་དང་ཡེ་བུ་ཟི་པ་བཅས་ཀྱི་ཁྲོད་དུ་གཞིས་ཆགས་གནས་སོ།

⁶ཁོ་ཚོས་དེ་ཚོ་དང་མཉམ་དུ་ནང་ཁུལ་དུ་ཆང་ས་བརྒྱབ་པ་དང་དེ་ཚོའི་ལྷ་ཚོར་ཡང་མཆོད་དོ༎

⁷ཨིསི་རཱཨེལ་གྱི་མི་མང་ཚོས་གཙོ་བོ་དཀོན་མཆོག་དེ་ཚོའི་དཀོན་མཆོག་ལ་བརྗེད་པ་དང་། བྷལ་དང་ཨ་ཤེ་རཱའི་སྐུ་འདྲ་ལ་མཆོད་ནས་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་སོ།

⁸དེར་བརྟེན་གཙོ་བོ་དཀོན་མཆོག་ཨིསི་རཱཨེལ་པ་ཚོར་ཁྲོ་བར་འགྱུར་བ་དང་མེ་སོ་པོ་ཊ་མི་ཡའི་རྒྱལ་པོ་ཀུ་ཤན་རི་ཤ་དིམ་ལ་དབང་བསྒྱུར་བྱེད་དུ་འཇུག་གནང་བ་དང་། ཁོང་གིས་དེ་ཚོར་ལོ་བརྒྱད་ཀྱི་རིང་རྒྱལ་སྲིད་བསྐྱངས་སོ།

⁹དེ་ནས་ཨིསི་རཱཨེལ་པ་ཚོས་གཙོ་བོ་དཀོན་མཆོག་ལ་འབོད་པ་དང་། དེ་ཚོ་ལ་རང་དབང་གཏོང་བའི་ཆེད་ཁོང་གིས་མི་ཞིག་བཏང་གནང་ངོ་། མི་དེ་ནི་ཀ་ལེབ་ཀྱི་གཅུང་པོ་ཀེ་ནཛའི་བུ་ཨོཐ་ནི་ཨེལ་ཡིན་ནོ།

¹⁰གཙོ་བོ་དཀོན་མཆོག་གི་ཐུགས་ཉིད་ཁོང་གི་སྟེང་བབས་པས་ཁོང་ནི་ཨིསི་རཱཨེལ་གྱི་འགོ་འཁྲིད་དུ་འགྱུར་བ་དང་། ཨོཐ་ནི་ཨེལ་གྱིས་དམག་འཐབ་བྱེད་པས་གཙོ་བོ་དཀོན་མཆོག་གིས་ཁོ་ལ་མེ་སོ་པོ་ཊ་མི་ཡའི་རྒྱལ་པོའི་སྟེང་རྒྱལ་ཁ་གནང་ངོ་།

¹¹ཡུལ་དེར་ལོ་བཞི་བཅུའི་རིང་ཞི་བདེ་བྱུང་བ་དང་དེ་ནས་ཨོད་ནི་ཨེལ་གྲོངས་སོ༎

¹²སླར་ཡང་ཨིསི་རཱཨེལ་གྱི་མི་མང་ཚོས་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་པ་དང་། དེའི་རྐྱེན་གྱིས་གཙོ་བོ་དཀོན་མཆོག་གིས་མོ་ཨབ་ཀྱི་རྒྱལ་པོ་ཨེག་ལོན་ནི་ཨིསི་རཱཨེལ་ལས་སྟོབས་ཤུགས་ཆེ་བར་བཟོ་བར་མཛད་དོ།

¹³ཨེག་ལོན་གྱིས་ཨམ་མོན་པ་དང་ཨ་མ་ལེག་པ་ཚོ་དང་མཉམ་དུ་མཐུན་ནས་ཨིསི་རཱཨེལ་པ་ཚོ་ཕམ་པར་བྱས་པ་དང་། ཁ་ཟུར་ཤིང་ཚོའི་གྲོང་ཁྱེར་ཡེ་རི་ཀོ་དབང་བཟུང་བྱས་སོ།

¹⁴ཨིསི་རཱཨེལ་པ་ཚོ་ཨེག་ལོན་གྱི་དབང་འོག་ཏུ་ལོ་བཅོ་བརྒྱད་རིང་སྡོད་དགོས་བྱུང་ངོ་།

¹⁵དེ་ནས་ཨིསི་རཱཨེལ་པ་ཚོས་གཙོ་བོ་དཀོན་མཆོག་ལ་ངུ་འབོད་ཞུས་པས། ཁོང་གིས་དེ་ཚོ་ལ་རང་དབང་འདོན་གནང་མཁན་སྐྱེ་བོ་ཞིག་གཏོང་བར་མཛད་དོ། སྐྱེ་བོ་དེ་ནི་བྷེན་ཡ་མིན་གྱི་སྡེ་རིགས་ཀྱི་གྷེ་རའི་བུ་ལག་གཡོན་མ་ཨེ་ཧུད་ཞུ་བ་དེ་ཡིན་ནོ། ཨིསི་རཱཨེལ་གྱི་མི་མང་ཚོས་མོ་ཨབ་ཀྱི་རྒྱལ་པོ་ཨེག་ལོན་ལ་འབུལ་བ་ཞིག་ཕུལ་བར་ཨེ་ཧུད་ལ་བཏང་ངོ་།

¹⁶ཨེ་ཧུད་ཀྱིས་རང་གི་ཆེད་དུ་རལ་གྲི་ཁ་གཉིས་ཀར་རྣོ་ཡོད་མཁན་རིང་ཐུང་སན་ཀྲི་མི་ཀྲར་ལྔ་བཅུ་ཙམ་ཡོད་པ་ཞིག་བཟོས་ནས། ཁོས་དེ་རང་གི་ཞོག་གཡས་པའི་གོས་ཀྱི་འོག་ཏུ་བཏགས་སོ།

¹⁷དེ་ནས་མི་རྒྱགས་པ་ཨེག་ལོན་གྱིས་འབུལ་བ་དེ་འཁྱེར་ནས་སོང་ངོ་།

¹⁸ཨེ་ཧུད་ཀྱིས་འབུལ་བ་དེ་ཕུལ་བ་དང་། ཁོང་གིས་འབུལ་བ་འཁྱེར་ཡོང་མཁན་ཚོར་ཁྱིམ་དུ་ལོག་ཅེས་སྨྲས་སོ།

¹⁹ཨེ་ཧུད་ཁོང་རང་གྷིལ་གཱལ་གྱི་རྡོ་སྤྲོས་རྒྱབ་པའི་ཉེ་འགྲམ་ནས་ཁ་བསྒྱུར་ཏེ་ཨེག་ལོན་གྱི་སར་ཕྱིར་ཕེབས་ནས། མི་དབང་ཆེན་པོ་ངས་ཁྱེད་ལ་གསང་བའི་གཏམ་ཞིག་ཞུ་རྒྱུ་ཡོད། དེ་ནས་རྒྱལ་པོས་རང་གི་ཞབས་ཕྱི་ཚོར་ང་གཅིག་པོར་འཇོག་ཅིག་ཅེས་བཀའ་གནང་བས་དེ་དག་ཚང་མ་ཕྱིར་ཐོན་ནོ།

²⁰དེ་ནས་རྒྱལ་པོ་སྐུ་རྐྱང་རྩེ་ཐོག་གི་ཁོང་གི་གཟིམ་ཁང་བསིལ་པོའི་ནང་བཞུགས་སྐབས་ཨེ་ཧུད་ཁོང་གི་དྲུང་དུ་བཅར་ནས། བདག་ལ་ཁྱེད་ཀྱི་ཆེད་དཀོན་མཆོག་གི་གསུང་འཕྲིན་ཞིག་ཡོད་ཞུས་པ་དང་། རྒྱལ་པོ་ཡར་བཞེངས་སོ།

²¹ཨེ་ཧུད་ཀྱིས་རང་གི་ལག་པ་གཡོན་པས་ཁོང་རང་གི་གཡས་ཕྱོགས་ནས་རལ་གྲི་བཏོན་ནས་རྒྱལ་པོའི་གསོལ་གྲོད་ནང་བཙུགས་སོ།

²²རལ་གྲི་ཡུ་བ་དང་བཅས་པ་ཆ་ཚང་ནང་དུ་འཛུལ་བ་དང་ཚིལ་ལུས་དེ་བཀབ་བོ། ཨེ་ཧུད་ཀྱིས་རལ་གྲི་དེ་རྒྱལ་པོའི་གསོལ་གྲོད་ནས་ཕྱིར་མ་བཏོན་པར་དེ་རྒྱབ་ནས་འཐོན་ནོ།

²³དེ་ནས་ཨེ་ཧུད་ཕྱི་ལོག་ཏུ་ཐོན་ནས། ཁོང་གིས་རྒྱབ་ནས་སྒོ་རྒྱབ་སྟེ་དེ་ལ་སྒོ་ལྕག་རྒྱབ་ནས་ཕྱིར་ཐོན་ནོ།

²⁴ཞབས་ཕྱི་ཚོ་ཡོང་བ་དང་། སྒོ་རྒྱབ་ཡོད་པ་མཐོང་ན་ཡང་རྒྱལ་པོ་ནང་དུ་སྐུ་ངལ་གསོད་ཀྱི་ཡོད་རེད་བསམ་མོ།

²⁵དེ་ཚོས་དུས་ཡུན་རིང་པོའི་བར་དུ་སྒུག་ན་ཡང་སྒོ་མ་ཕྱེས་སྟབས་ལྡེ་མིག་བླངས་ནས་སྒོ་ཕྱེ་བ་དང་། དེར་དེ་ཚོས་རྒྱལ་པོ་སྤང་གཅལ་སྟེང་དུ་གྲོངས་ནས་འགྱེལ་ཡོད་པ་རྙེ་དོ།

²⁶དེ་ཚོ་སྒུག་སྡོད་རིང་ལ་ཨེ་ཧུད་ཕྱིར་ཐོན་ཟིན་ནོ། ཁོང་རྡོ་སྤྲོས་རྒྱབ་ས་ནས་ཕྱིན་ཏེ་སེ་ཨི་རཱ་རུ་བྲོས་སོ།

²⁷ཁོང་ཨེཕ་ར་ཡིམ་གྱི་རི་བརྒྱུད་ཀྱི་གྲོང་ཁྱེར་དུ་འབྱོར་སྐབས་དེ་ནས་ཨིསི་རཱཨེལ་གྱི་སྐྱེས་པ་ཚོ་དམག་ལ་སྐད་གཏོང་བའི་ཆེད་ཁོས་དུང་འབུད་པ་དང་། དེ་ནས་དེ་ཚོ་རི་ནས་མར་སྣེ་འཁྲིད་བྱེད་དོ།

²⁸ཁོས་སྨྲས་པ། ངའི་རྗེས་སུ་ཤོག། གཙོ་བོ་དཀོན་མཆོག་གིས་ཁྱོད་ཚོར་ཁྱོད་ཚོའི་དགྲ་བོ་མོ་ཨབ་པ་ཚོ་ལས་རྒྱལ་ཁ་གནང་ཡོད། དེར་བརྟེན་དེ་ཚོ་ཨེ་ཧུད་ཀྱི་རྗེས་སུ་ཕྱིན་པ་དང་། མོ་ཨབ་པ་ཚོ་ཡོར་དན་རྒལ་ནས་འགྲོ་ཡུལ་དེ་བཞིན་དབང་བཟུང་བྱས་ནས་དེ་ཚོས་མི་གཅིག་ཀྱང་དེ་རྒལ་ནས་འགྲོ་མ་བཅུག་གོ

²⁹ཉིན་དེར་དེ་ཚོས་མོ་ཨབ་པའི་དམག་མི་དཔའ་རྩལ་ཅན་ ༡༠,༠༠༠ ཙམ་བསད་པ་དང་དེ་ཚོ་ནས་གཅིག་ཀྱང་བྲོས་མ་ཐར་རོ།

³⁰ཉིན་དེར་ཨིསི་རཱཨེལ་པ་ཚོས་མོ་ཨབ་པ་ཕམ་པར་བྱས་ནས། ཡུལ་དེ་ལོ་བརྒྱད་བཅུའི་རིང་ཞི་བདེར་གནས་སོ༎

³¹དེའི་རྗེས་སུ་ཨ་ནད་ཀྱི་བུ་ཤམ་གར་ཀྱིས་འགོ་འཁྲིད་བྱས་སོ། ཁོས་གླང་ལ་རྡུང་བའི་རྒྱུག་པ་ཞིག་གིས་ཕེ་ལེ་ཤེད་པ་ ༦༠༠ བསད་ནས་ཨིསི་རཱཨེལ་པ་ཚོ་ལ་སྐྱབས་པར་མཛད་དོ༎