Read Tibetan — པོད་སྐད་Tibetan Old Testament 2011 ཁྲིམས་དཔོན 6 Bible Online

ཁྲིམས་དཔོན 6 - Tibetan — པོད་སྐད་Tibetan Old Testament 2011 bible

ཁྲིམས་དཔོན 6

¹སླར་ཡང་ཨིསི་རཱཨེལ་གྱི་མི་མང་ཚོས་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་པར་བརྟེན། ཁོང་གིས་མིད་ཡན་གྱི་མི་མང་ཚོས་ཁོ་ཚོའི་ཐོག་ལོ་བདུན་རིང་དབང་བསྒྱུར་བྱེད་དུ་འཇུག་གནང་ངོ་།

²མིད་ཡན་པ་ཚོ་ནི་ཨིསི་རཱཨེལ་པ་ཚོ་ལས་སྟོབས་ཤུགས་ཆེ་བ་ཡོད་པ་དང་། ཨིསི་རཱཨེལ་གྱི་མི་མང་ཚོ་བྲག་ཕུག་དང་གཞན་རི་གསེབ་ཀྱི་ས་ཆ་བརྟན་ས་ཁག་ཏུ་ཡིབ་བོ།

³ཨིསི་རཱཨེལ་པ་ཚོས་ས་བོན་འདེབས་སྐབས་མིད་ཡན་པ་ཚོ་ཨ་མ་ལེག་པ་རྣམས་དང་། ཤར་ཕྱོགས་ཀྱི་རིགས་བརྒྱུད་ཀྱི་མི་ཚོ་དང་མཉམ་དུ་ཡོང་ནས་ཁོ་ཚོར་འཐབ་ཀྱི་ཡོད་དོ།

⁴དེ་ཚོས་ཡུལ་དུ་སྒར་བརྒྱབ་ནས་ལྷོ་ཕྱོགས་སུ་གྷ་ཛའི་མངའ་ཁུལ་བར་ལོ་ཐོག་མེད་པར་བཟོས་པ་དང་། དེ་ཚོས་ལུག་དང་བ་ཕྱུགས་དང་བོང་བུ་བཅས་ཚང་མ་འཕྲོག་གི་ཡོད་དོ། ཨིསི་རཱཨེལ་པ་ཚོར་འཚོ་བསྟེན་གང་ཡང་མེད་པར་བཞག་གོ

⁵དེ་ཚོ་རང་གི་བ་ཕྱུགས་དང་གུར་བཅས་ཆ་ག་འབུའི་ཚོགས་ལྟ་བུ་ཁྱོན་ཆེ་མཉམ་དུ་ཡོང་བ་དང་། དེ་ཚོ་དང་དེ་ཚོའི་རྔ་མོང་རྣམས་གྲངས་རྩིས་དཀའ་བའི་ཁྱོན་ཆེ་ཡོད་པ་དང་། དེ་ཚོ་ཡོང་ནས་ཡུལ་རྣམས་འཕྲོག་བཅོམ་བྱེད་དོ།

⁶དེ་ཚོའི་ཁྲོད་དུ་ཨིསི་རཱཨེལ་པ་ཚོ་ནི་སྐྱབས་གྲོགས་མེད་པ་ལྟར་འགྱུར་རོ།

⁷དེ་ནས་ཨིསི་རཱཨེལ་པ་ཚོས་མིད་ཡན་པ་ཚོའི་ཐོག་ལ་གཙོ་བོ་དཀོན་མཆོག་ལ་རོགས་རམ་དང་སྐྱབས་འཇུག་ཞུས་པ་དང་།

⁸ཁོང་གིས་དེ་ཚོའི་རྩར་ལུང་སྟོན་པ་ཞིག་བཏང་ནས། ལུང་སྟོན་པ་བརྒྱུད་དེ་ཆོ་ལ་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་འཕྲིན་འདི་ལྟར་གནང་ངོ་། ངས་ཁྱོད་ཚོ་ཨི་ཇིབ་ཀྱི་ཚེ་གཡོག་ནས་ཕྱིར་འདོན་པ་ཡིན་པ་དང་།

⁹ངས་ཁྱོད་ཚོ་ཨི་ཇིབ་པ་ཚོ་དང་ཡུལ་འདིར་ཁྱོད་ཚོ་དང་མཉམ་དུ་དམག་འཐབ་བྱ་མཁན་ཚོ་ལས་སྐྱབས་པ་ཡིན་ནོ། ངས་ཁྱོད་ཚོ་ལ་མདུན་བསྐྱོད་བྱ་སྐབས་ཁོ་ཚོ་ཕྱིར་ཕུད་ནས་ཁོ་ཚོའི་ཡུལ་དེ་ཁྱོད་ཚོར་སྤྲད་པ་ཡིན།

¹⁰ངས་ཁྱོད་ཚོར་ང་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན་ཞེས་སྨྲས་ཡོད་དོ། ད་ཆ་ཁྱོད་ཚོ་སྡོད་བཞིན་པའི་ཨ་མོར་པའི་ལྷ་ཚོ་ལ་ཁྱོད་ཚོས་མཆོད་མི་རུང་ཞེས་སྨྲས་ཡོད་དོ། འོན་ཀྱང་ཁྱོད་ཚོས་ངའི་བཀའ་ལ་ཉན་མེད་ཅེས་གསུངས་སོ།

¹¹དེ་ནས་གཙོ་བོ་དཀོན་མཆོག་གི་ཕོ་ཉ་དེ་ཨོཕ་རཱའི་གྲོང་གསེབ་ཏུ་ཕེབས་པ་དང་། ཨ་བྷི་ཨེ་ཛར་གྱི་རིགས་རུས་སྐྱེ་བོ་ཡོ་ཨཱཤེ་ལ་བདག་པའི་བེ་ཤིང་ཞིག་གི་འོག་ཏུ་བཞུགས་སོ། ཁོའི་བུ་གྷིད་ཨོན་གྱིས་ཁོ་པ་མིད་ཡན་པ་ཚོས་མ་མཐོང་བར་གསང་བའི་ཐོག་རྒུན་འབྲུམ་བརྩིར་སར་གྲོ་ཕྲན་བུ་བརྡུངས་བཞིན་ཡོད་དོ།

¹²དེར་གཙོ་བོ་དཀོན་མཆོག་གི་ཕོ་ཉ་དེ་ཁོ་པར་མཐོང་བར་འགྱུར་ནས། བློ་ཁོག་ཅན་དང་སྟོབས་ལྡན་གྱི་སྐྱེ་བོ་ཁྱོད་དང་མཉམ་དུ་གཙོ་བོ་དཀོན་མཆོག་བཞུགས་ཡོད་ཅེས་གསུངས་སོ།

¹³གྷིད་ཨོན་གྱིས་ཁོ་ལ། སྐུ་ཞབས་ལགས། ངས་ཁྱེད་ལ་འདྲི་བ་ཞིག་ཞུ་རྒྱུ་ཡིན་པས། གཙོ་བོ་དཀོན་མཆོག་ང་ཚོ་དང་མཉམ་དུ་ཡོད་པ་ཡིན་ན་ང་ཚོ་ལ་དཀའ་ངལ་འདི་ལྟར་ཅི་ལ་བྱུང་བ་ཡིན་ནམ། ང་ཚོའི་ཕ་མེས་ཚོས་ང་ཚོར་སྨྲས་པའི་གཙོ་བོ་དཀོན་མཆོག་གིས། ངོ་མཚར་ཅན་གྱི་ཕྱག་ལས་མཛད་པ་དང་ཁོང་ཚོ་ཨི་ཇིབ་ནས་འདོན་གནང་བ་རྣམས་ཅི་ཡིན། གཙོ་བོ་དཀོན་མཆོག་གིས་ང་ཚོར་སྤངས་གནང་བ་དང་། ང་ཚོ་མིད་ཡན་པ་ཚོའི་མངའ་འོག་འཇོག་གནང་ཡོད་ཅེས་ཞུས་སོ།

¹⁴དེ་ནས་གཙོ་བོ་དཀོན་མཆོག་གིས་ཁོ་ལ། ཁྱོད་ཀྱི་སྟོབས་ཤུགས་ཡོངས་དང་བཅས་སོང་ནས། ཨིསི་རཱཨེལ་པ་ཚོ་མིད་ཡན་པ་ཚོ་ལས་སྐྱོབས་ཤིག ང་རང་ཉིད་ཀྱིས་ཁྱོད་གཏོང་བཞིན་ཡོད་ཅེས་བཀའ་གནང་ངོ་།

¹⁵གྷིད་ཨོན་གྱིས། ངས་ཨིསི་རཱཨེལ་པ་ཚོ་ཇི་ལྟར་སྐྱོབས་ཐུབ་བམ། ངའི་རིགས་རུས་མ་ནསེ་སཱེའི་སྡེ་རིགས་ནང་ནས་སྐྱོ་ཤོས་དེ་ཡིན་པ་དང་། ང་ནི་རང་གི་ཁྱིམ་ཚང་ནང་ནས་ཆུང་ཞིག་ཡིན་ཞེས་ལན་ཞུས་སོ།

¹⁶གཙོ་བོ་དཀོན་མཆོག་གིས། ཁྱོད་ཀྱིས་དེ་ལྟར་བྱེད་ཐུབ་བོ། གང་ལགས་ཟེར་ན། ངས་ཁྱོད་ལ་རོགས་བྱེད་དོ། ཁྱོད་ཀྱིས་མིད་ཡན་པ་དེ་ཚོ་མི་གཅིག་ལ་བྱས་པ་ལྟར་ལས་སླ་པོར་སྣུན་པར་བྱེད་ཅེས་ལན་གནང་ངོ་།

¹⁷གྷིད་ཨོན་གྱིས། ཁྱེད་ང་ལ་ཐུགས་མཉེས་པ་ཡིན་ན། ཁྱེད་གཙོ་བོ་དཀོན་མཆོག་དངོས་ཡིན་པའི་དཔང་པོའི་རྟགས་ཤིག་ང་ལ་གནང་རོགས་གནང་།

¹⁸ངས་ཁྱེད་ལ་ཁ་ཟས་ཀྱི་འབུལ་བ་ཞིག་འཁྱེར་མ་ཡོང་བར་དུ་ཁྱེད་ང་བཞག་ནས་མ་ཕེབས་རོགས་གནང་ཞེས་ཞུས་སོ། ཁོང་གིས། ཁྱོད་ཕྱིར་མ་ཡོང་བར་ང་སྡོད་པར་བྱ་ཞེས་གསུངས་སོ།

¹⁹དེར་བརྟེན་གྷིད་ཨོན་རང་གི་ཁང་པའི་ནང་དུ་ཕྱིན་ནས། ར་ཕྲུག་གཅིག་གི་ཤ་བཙོས་ནས་གྲོ་ཞིབ་ཀི་ལོ་བཅུས་ཆི་མན་མེད་པའི་བག་ལེབ་བཟོས་ཏེ། ཤ་དེ་སློ་མ་ཞིག་གི་ནང་བླུགས་པ་དང་། ཤ་ཁུ་དེ་སྣོད་གཅིག་གི་ནང་བླུགས་ནས། བེ་ཤིང་གི་འོག་ཏུ་གཙོ་བོ་དཀོན་མཆོག་གི་ཕོ་ཉ་ཡོད་སར་འཁྱེར་ཡོང་ནས་ཁོང་ལ་ཕུལ་ལོ།

²⁰ཕོ་ཉ་དེས། ཤ་དང་བག་ལེབ་བྲག་གི་སྟེང་དུ་བཞག་ནས་དེའི་སྟེང་ཤ་ཁུ་དེ་བླུགས་ཅེས་བཀའ་གནང་བ་དང་། གྷིད་ཨོན་གྱིས་དེ་ལྟར་བྱས་སོ།

²¹དེ་ནས་གཙོ་བོ་དཀོན་མཆོག་གི་ཕོ་ཉ་དེས། ཁོང་དང་མཉམ་དུ་ཡོད་པའི་ཕྱག་འཁར་གྱི་རྩེ་མོས་ཤ་དང་བག་ལེབ་ལ་རེག་པར་གནང་བ་དང་། བྲག་ནས་མེ་ཐོན་ཏེ་ཤ་དང་བག་ལེབ་འཚིགས་སོ། དེ་ནས་ཕོ་ཉ་དེ་མི་མཐོང་བར་འགྱུར་རོ།

²²དེར་གྷིད་ཨོན་གྱིས། གཙོ་བོ་དཀོན་མཆོག་གི་ཕོ་ཉ་མཇལ་བ་ཡིན་པ་ཤེས་ཏེ་འཇིགས་སྐྲག་ཐོག། བླ་ན་མེད་པའི་གཙོ་བོ་དཀོན་མཆོག་ཁྱེད་ཀྱི་ཕོ་ཉའི་ཞལ་དངོས་སུ་མཇའ་བྱུང་ཞེས་ཞུས་སོ།

²³འོན་ཀྱང་གཙོ་བོ་དཀོན་མཆོག་གིས། ཁོ་ལ་བདེ་བར་སྡོད་ཅིག། མ་འཇིགས་ཤིག། ཁྱོད་འཆི་བར་མི་འགྱུར་ཞེས་བཀའ་གནང་ངོ་།

²⁴གྷིད་ཨོན་གྱིས་གཙོ་བོ་དཀོན་མཆོག་གི་ཆེད་དུ་མཆོད་ཁྲི་ཞིག་བཞེངས་ནས་དེ་ལ། གཙོ་བོ་དཀོན་མཆོག་ཞི་བདེ་ཡིན་ཞེས་པའི་མཚན་བཏགས་སོ། དེ་ནི་དེང་སང་ཡང་ཨོཕ་རཱར་ཡོད་པ་དང་། དེ་ནི་ཨ་བྷི་ཨེ་ཛར་གྱི་རིགས་རུས་ལ་བདག་པ་ཡིན་ནོ།

²⁵མཚན་མོ་དེར་གཙོ་བོ་དཀོན་མཆོག་གིས་གྷིད་ཨོན་ལ་བཀའ་གནང་བ། ཁྱོད་ཀྱི་ཕའི་གླང་གོག་དང་གཞན་གླང་གོག་ལོ་བདུན་ལོན་པ་འཁྲིད་ནས། ཁྱོད་ཀྱི་ཕ་ཡིས་བྷལ་ལ་བཞེངས་པའི་མཆོད་ཁྲི་དེ་བཤིགས་ལ། དེའི་ཉེ་འགྲམ་དུ་ཡོད་པའི་ལྷ་མོ་ཨ་ཤེ་རཱའི་མཚན་མ་དེ་གཅོད་ཅིག

²⁶རི་བོ་དེའི་སྟེང་དུ་ཁྱོད་ཀྱི་དཀོན་མཆོག་གཙོ་བོ་དཀོན་མཆོག་གི་ཆེད་དུ་ལེགས་པར་བསྐྲུན་པའི་མཆོད་ཁྲི་ཞིག་བཞེངས་ཤིག དེ་ནས་ཁྱོད་ཀྱིས་བཅད་པའི་ཨ་ཤེ་རཱའི་མཚན་མ་དེ་མེ་ཤིང་གི་ཚུལ་དུ་མེ་སྤར་ཏེ། གླང་གཉིས་པོ་དེ་ཆ་ཚང་མཆོད་པར་བསྲེགས་ཤིག

²⁷དེར་བརྟེན་གྷིད་ཨོན་གྱིས་རང་གི་གཡོག་པོ་བཅུ་འཁྲིད་ནས་གཙོ་བོ་དཀོན་མཆོག་གིས་ཇི་ལྟར་བཀའ་གནང་བ་ལྟར་གྱིས་སོ། ཁོས་རང་གི་ཁྱིམ་ཚང་དང་གྲོང་ཁྱེར་གྱི་མི་མང་ཚོར་འཇིགས་སྣང་ཡོད་པའི་རྐྱེན་གྱིས་ལས་དེ་ཉིན་མོ་མ་བྱས་པར་མཚན་མོར་བྱས་སོ།

²⁸སང་ཤོག་སྔ་པོ་གྲོང་ཁྱེར་གྱི་མི་རྣམས་གཉིད་བསད་སྐབས། བྷལ་དང་ཨ་ཤེ་རཱའི་མཚན་མ་དེ་བཞིན་བཅད་ཡོད་པ་དང་། དེར་བཞེངས་པའི་མཆོད་ཁྲིའི་སྟེང་གླང་གོག་གཉིས་པོ་དེ་བསྲེགས་ཡོད་པ་མཐོང་ངོ་།

²⁹དེ་ཚོ་གཅིག་གིས་གཅིག་ལ་དེ་ལྟར་སུས་བྱེད་པ་རེད་དམ་ཞེས་དྲིས་པས། དེ་ཚོས་འདྲི་རྩད་གྱིས་པས་དེ་ལྟར་ཡོ་ཨཱཤེའི་བུ་གྷིད་ཨོན་གྱི་བྱས་པ་ཧ་གོའོ།

³⁰དེ་བས་ན་དེ་ཚོས་ཡོ་ཨཱཤེ་ལ། ཁྱོད་ཀྱི་བུ་འདིར་འཁྲིད་ཤོག། ང་ཚོས་ཁོ་ལ་གསོད་ཀྱི་ཡིན། ཁོས་བྷལ་གྱི་མཆོད་ཁྲི་བཤིགས་པ་དེའི་ཉེ་འགྲམ་དུ་ཡོད་པའི་ཨ་ཤེའི་རཱའི་མཚན་མ་དེ་བཅད་ཡོད་ཅེས་སྨྲས་སོ།

³¹འོན་ཀྱང་ཡོ་ཨཱཤེ་ཀྱིས། ཁོའི་མདུན་དུ་ཡོད་པ་ཚོར། ཁྱོད་ཀྱི་བྷལ་ལ་རྒྱབ་སྐྱོར་བྱེད་ཀྱི་ཡོད་དམ། ཁྱོད་ཚོས་ཁོ་ལ་སྲུང་སྐྱོབ་བྱེད་ཀྱི་ཡོད་དམ། སྔ་དྲོའི་གོང་དུ་ཁོ་ལ་རྒྱབ་སྐྱོར་བྱ་མཁན་རྣམས་གསོད་པར་འགྱུར། བྷལ་དཀོན་མཆོག་ཡིན་ན་ཁོ་རང་རང་ཉིད་ལ་སྲུང་སྐྱོབ་བྱེད་དུ་བཅུག། བཤིགས་ཡོད་པའི་མཆོད་ཁྲིད་དེ་ཁོང་རང་གི་ཡིན་ནོ་ཞེས་སྨྲས་སོ།

³²དེ་ནས་བཟུང་སྟེ་གྷིད་ཨོན་ལ་ཡེ་རུ་བྷལ་ཞེས་གྲགས་སོ། གང་ལགས་ཟེར་ན། ཡོ་ཨཱཤེ་ཀྱིས་བྷལ་རང་ཉིད་ཀྱིས་རང་ལ་སྲུང་སྐྱོབ་བྱེད་དུ་འཇུག། བཤིགས་པའི་མཆོད་ཁྲིད་དེ་ཁོ་རང་རང་ཉིད་ཀྱི་ཡིན་ནོ་ཞེས་སྨྲས་ཡོད་དོ།

³³དེ་ནས་མིད་ཡན་པ་རྣམས་དང་། ཨ་མ་ལེག་པ་རྣམས་དང་བྱེ་ཐང་གི་སྡེ་རིགས་རྣམས་གཙང་པོ་ཡོར་དན་གྱི་ཁྲོད་དུ་འདུས་པ་དང་། ཡེཛ་རིལ་གྱི་ལུང་གཤོང་དུ་སྒར་བཏབ་བོ།

³⁴གཙོ་བོ་དཀོན་མཆོག་གི་ཐུགས་ཉིད་ཀྱིས་གྷིད་ཨོན་ལ་དབང་བསྒྱུར་གནང་བ་དང་། ཁོང་གིས་ཨ་བྷི་ཨེ་ཛར་གྱི་རིགས་རུས་རྣམས་ཁོང་གི་རྗེས་སུ་འབྲངས་བར་འབོད་པའི་ཕྱིར་དུང་འབོད་དོ།

³⁵ཁོང་གིས་མ་ནསེ་སཱེའི་མངའ་ཁུལ་གཉིས་ཀའི་ས་ཁུལ་ཡོངས་སུ་ཁོང་གི་རྗེས་སུ་འབྲངས་དགོས་པའི་ཕྱིར་བང་ཆེན་བཏང་ངོ་། ཁོང་གིས་ཨ་ཤེར་དང་ཛེ་བུ་ལུན་དང་ནཕ་ཏ་ལིའི་སྡེ་རིགས་རྣམས་ལ་བང་ཆེན་བཏང་བ་དང་། དེ་ཚོ་ཁོང་དང་མཉམ་དུ་འདུས་བའི་ཕྱིར་སླེབས་སོ།

³⁶དེ་ནས་གྷིད་ཨོན་གྱིས་དཀོན་མཆོག་ལ་ཞུས་པ། ཁྱེད་ཀྱིས་ཨིསི་རཱཨེལ་ལ་སྐྱོབ་པའི་ཆེད་ང་ལ་བེད་སྤྱོད་གནང་གི་ཡིན་གསུངས་ཡོད།

³⁷དེ་བས་ན་ཕྲན་ནས་བལ་དེ་ང་ཚོས་བྲོ་བརྡུང་སའི་གཡུལ་སར་འཇོག་གི་ཡིན། ཞོག་པར་ཟིལ་པ་བལ་གཅིག་པོའི་སྟེང་བབས་པ་དང་། དེའི་ཉེ་འཁོར་གྱི་སའི་སྟེང་དུ་མ་བབས་པ་ཡིན་ན། ཁྱེད་ཀྱིས་ཨིསི་རཱཨེལ་ལ་སྐྱོབ་པར་མཛད་རྒྱུར་ང་ལ་བེད་སྤྱོད་གནང་རྒྱུ་ཡིན་པ་དེ་ང་རང་ནས་ཤེས་པར་འགྱུར་རོ་ཞེས་ཞུས་སོ།

³⁸དེ་ལྟར་བྱུང་ངོ་། སང་ཞོག་སྔ་པོ་གྷིད་ཨོན་ཡར་ལངས་ནས་བལ་དེ་བཙིར་བ་དང་ཟིལ་པའི་ཆུ་དེ་ཕོར་པ་ཁེངས་ནས་ཐོན་པར་འགྱུར་རོ།

³⁹དེ་ནས་གྷིད་ཨོན་གྱིས་དཀོན་མཆོག་ལ། ང་ལ་ཐུགས་མ་ཁྲོ་བར་མཛོད་ཅིག། ང་ལ་ད་དུང་ཐེངས་ཅིག་ཞུ་འབུལ་བྱེད་དུ་འཇུག་རོགས་གནང་། ང་ལ་བལ་གྱི་བརྟག་དཔྱད་ད་དུང་ཐེངས་ཅིག་བྱེད་དུ་འཇུག་རོགས་གནང་། ཐེངས་འདིར་བལ་སྐམ་པོ་དང་ཐང་རྣམས་རློན་པ་མཛད་རོགས་གནང་ཞེས་ཞུས་སོ།

⁴⁰མཚན་མོ་དེར་དཀོན་མཆོག་གིས་དེ་ལྟར་མཛད་དོ། སང་ཞོག་བལ་དེ་སྐམ་པོ་དང་ཐང་རྣམས་ཟིལ་པས་རློན་པ་ཆགས་ཡོད་པ་ཡིན་ནོ༎