Read Tibetan — པོད་སྐད་Tibetan Old Testament 2011 ཁྲིམས་དཔོན 7 Bible Online

ཁྲིམས་དཔོན 7 - Tibetan — པོད་སྐད་Tibetan Old Testament 2011 bible

ཁྲིམས་དཔོན 7

¹ཉིན་ཞིག་ཞོག་པ་སྔ་པོ་གྷིད་ཨོན་དང་ཁོང་གི་མི་རྣམས་སྔ་པོ་ལངས་ནས་ཧ་རོད་ཀྱི་ཆུ་མིག་གི་ཉེ་འགྲམ་དུ་སྒར་བཏབ་བོ། མི་དན་པ་ཚོའི་སྒར་དེ་བཞིན་དེ་ཚོའི་བྱང་ཕྱོགས་ཀྱི་ལུང་གཤོང་རི་བོ་མོ་རཱེ་ལ་ཡོད་དོ།

²གཙོ་བོ་དཀོན་མཆོག་གིས་གྷིད་ཨོན་ལ་བཀའ་གནང་བ། ཁྱོད་ལ་ཡོད་པའི་མི་རྣམས་ནི་མི་ད་ཡན་པའི་ཐོག་རྒྱལ་ཁ་སྤྲོད་རྒྱུར་གྲངས་ཧ་ཅང་མང་བས་དེ་ཚོའི་བསམ་བློར་དེ་དག་རང་ཉིད་ནས་རྒྱལ་ཁ་ཐོབ་པར་གྱིས་པ་ཡིན་བསམ་ནས་ང་ལ་ངོ་སོ་སྤྲོད་པར་མི་བྱེད་དོ།

³མི་མང་ལ་འཇིགས་སྣང་བྱེད་མཁན་ཡོད་ན་ཁྱིམ་དུ་ལོག་སོང་ལ་ང་ཚོ་རི་བོ་གྷིལ་ཨད་དུ་སྡོད་ཀྱི་ཡིན་ཞེས་གསལ་བསྒྲགས་བྱོས་ཤིག་ཅེས་བཀའ་གནང་ངོ་། དེ་བས་ན་མི་ ༢༢,༠༠༠ ཕྱིར་ལོག་པ་དང་མི་ ༡༠,༠༠༠ དེར་བསྡད་དོ།

⁴དེ་ནས་ཡང་གཙོ་བོ་དཀོན་མཆོག་གིས་གྷིད་ཨོན་ལ་བཀའ་གནང་བ། ད་དུང་ཁྱོད་ལ་མི་མང་པོ་འདུག། དེ་ཚོ་ཆུའི་རྩར་འཁྲིད་ཅིག། དེར་ངས་དེ་ཚོ་ཁྱོད་ཀྱི་ཆེད་དུ་དབྱེ་བར་བྱེད་དོ། ངས་མི་ཞིག་ལ་ཁྱོད་མཉམ་དུ་འགྲོ་བར་བྱེད་ཅེས་བརྗོད་པ་ཡིན་ན་ཁོ་ཁྱོད་མཉམ་འགྲོ་བར་འགྱུར། ངས་མི་ཞིག་ཁྱོད་མཉམ་དུ་མ་འགྲོ་ཞེས་བརྗོད་པ་ཡིན་ན་ཁོ་ཁྱོད་དང་མཉམ་དུ་འགྲོ་བར་མི་འགྱུར་རོ།

⁵གྷིད་ཨོན་གྱིས་མི་རྣམས་ཆུའི་རྩར་མར་འཁྲིད་པ་དང་། གཙོ་བོ་དཀོན་མཆོག་གིས་ཁོ་ལ། ཁྱི་ལྟར་ལྕེས་ཆུ་ལྡག་མཁན་རྣམས་དང་པུས་མོ་བཙུགས་ནས་ཆུ་འཐུང་མཁན་རྣམས་དབྱེ་ཞིག་གསུངས་སོ།

⁶དེར་རང་གི་ཁ་རུ་ལག་པར་ཆུ་འཁྱེར་ནས་ལྡག་མཁན་མི་གྲངས་ ༣༠༠ ཡོད་པ་དང་། གཞན་རྣམས་ཚང་མས་པུས་མོ་བཙུགས་ནས་ཆུ་འཐུང་ངོ་།

⁷གཙོ་བོ་དཀོན་མཆོག་གིས་གྷིད་ཨོན་ལ། ངས་ཁྱོད་ལ་སྐྱབས་པ་དང་མི་ལྕེས་ཆུ་ལྡག་མཁན་མི་གསུམ་བརྒྱ་དེ་ཚོ་དང་བཅས་པར་མིད་ཡན་པའི་ཐོག་རྒྱལ་ཁ་སྤྲོད་པར་བྱེད་དོ། གཞན་རྣམས་ཁྱིམ་དུ་ལོག་ཅེས་སྨྲོས་ཤིག་ཅེས་བཀའ་གནང་ངོ་།

⁸དེ་བས་ན་གྷིད་ཨོན་གྱིས་མི་ ༣༠༠ ལ་ལམ་རྒྱགས་དང་། དམག་དུང་ཉར་མཁན་དེ་ཚོ་མ་གཏོགས་ཨིསི་རཱཨེལ་པ་གཞན་རྣམས་ཁྱིམ་དུ་བཏང་ངོ་། མིད་ཡན་པ་ཚོའི་སྒར་དེ་ལུང་གཤོང་དུ་ཁོ་ཚོའི་འོག་ཏུ་ཡོད་དོ།

⁹མཚན་མོ་དེར་གཙོ་བོ་དཀོན་མཆོག་གིས་གྷིད་ཨོན་ལ་བཀའ་གནང་བ། ཡར་ལོངས་ལ་སྒར་ལ་འཐབ་ཅིག ངས་ཁྱོད་ལ་དེ་ཚོའི་ཐོག་རྒྱལ་ཁ་བྱིན་ནོ།

¹⁰འོན་ཀྱང་ཁྱོད་འཐབ་པར་འཇིག་ན་ཁྱོད་རང་གི་གཡོག་པོ་པུ་རཱ་མཉམ་དུ་སྒར་རུ་སོང་ཞིག

¹¹དེ་ཚོས་ཇི་བརྗོད་པ་བཞིན་ཁྱོད་ཀྱིས་ཐོས་པར་འགྱུར་བ་དང། དེ་ནས་ཁྱོད་ཀྱིས་འཐབ་རྒྱུར་བློ་ཁོག་རྙེད་པར་འགྱུར་རོ། དེ་བས་ན་གྷིད་ཨོན་དང་གཡོག་པོ་པུ་རཱ་གཉིས་དགྲ་བོའི་སྒར་གྱི་མཐའ་རུ་ཕྱིན་པ་དང་།

¹²དེར་མི་དན་པ་དང་ཨ་མ་ལེག་པ་དང་བྱེ་ཐང་གི་སྡེ་རིགས་རྣམས་ཆ་ག་འབུའི་ཚོགས་ལྟར་ལུང་གཤོང་དུ་ཁྱབ་ཡོད་པ་དང་། དེ་ཚོ་ལ་རྔ་མོང་ནི་རྒྱ་མཚོའི་མཐའི་བྱེ་མ་ལྟར་མང་པོ་ཡོད་དོ།

¹³གྷིད་ཨོན་དེར་འབྱོར་སྐབས་མི་ཞིག་གིས། རང་གི་གྲོགས་པོས་རྨི་ལམ་ཤོད་བཞིན་ཡོད་པ་ཐོས་པ་དང་། ཁོས་ངའི་རྨི་ལམ་ནང་ནས་ཀྱི་བ་ལེབ་གཅིག་ང་ཚོའི་སྒར་ནས་སྒྲིལ་ཡོང་བ་དང་། དེ་གུར་ལ་ཕོག་སོང་། གུར་དེ་འགྱེལ་ནས་ཐང་དུ་ལྷུང་བ་མཐོང་བྱུང་ཞེས་བཤད་དོ།

¹⁴ཁོའི་གྲོགས་པོ་དེའི་ལན་དུ། དེ་ནི་ཨིསི་རཱཨེལ་པ་ཡོ་ཨཱཤེ་ཀྱི་བུ་གྷིད་ཨོན་གྱི་རལ་གྲི་རེད་མ་གཏོགས། དེའི་དོན་གཞན་ཡོང་མི་སྲིད་དོ། དཀོན་མཆོག་གིས་ཁོ་ལ་མིད་ཡན་དང་ང་ཚོའི་དམག་དཔུང་ཐོག་རྒྱལ་ཁ་གནང་ཡོད་ཅེས་སྨྲས་སོ།

¹⁵གྷིད་ཨོན་གྱིས་མི་དེའི་རྨི་ལམ་དང་དེའི་དོན་ཇི་ཡིན་ཐོས་སྐབས། རང་གི་པུས་མོ་བཙུགས་ནས་གཙོ་བོ་དཀོན་མཆོག་ལ་མཆོད་དོ། དེ་ནས་ཁོང་ཨིསི་རཱཨེལ་པའི་སྒར་རུ་སོང་ནས། ད་ཡར་ལོངས་ཤིག། གཙོ་བོ་དཀོན་མཆོག་གིས་ཁྱོད་ཚོར་མིད་ཡན་པ་ཚོའི་དམག་དཔུང་ཐོག་རྒྱལ་ཁ་གནང་བཞིན་འདུག་ཅེས་སྨྲས་སོ།

¹⁶ཁོང་གིས་རང་གི་མི་ ༣༠༠ དེ་དག་ཚོ་གསུམ་དུ་བགོས་ནས། མི་རེར་དམག་དུང་རེ་དང་ནང་དུ་དཔལ་འབར་ཡོད་པའི་རྫ་མ་རེ་སྤྲད་དོ།

¹⁷ཁོས་དེ་ཚོ་ལ་ང་སྒར་གྱི་ཉེ་འགྲམ་སླེབས་སྐབས། ཁྱོད་ཚོ་ང་ལ་ལྟོས་ཤིག། ངས་ཇི་ལྟར་གྱིས་པ་ལྟར་ཁྱོད་ཚོས་བྱོས་ཤིག

¹⁸ང་དང་ངའི་མི་ཚོས་དམག་དུང་འབུད་སྐབས་ཁྱོད་ཚོས་ཀྱང་སྒར་གྱི་མཐའ་འཁོར་དུ་དམག་དུང་འབུད་ཅིག གཙོ་བོ་དཀོན་མཆོག་དང་གྷིད་ཨོན་གྱི་ཆེད་དུ་ཞེས་བརྗོད་ནསསྐད་འབོད་བྱོས་ཤིག་ཅེས་སྨྲས་སོ།

¹⁹གྷིད་ཨོན་དང་ཁོང་གི་མི་ ༡༠༠ ཐམ་པ་དེ་ཚོ་སྒར་གྱི་འགྲམ་ནམ་ཕྱེད་ཀྱི་གོང་ཙམ་དང་སྒོ་སྲུང་བ་བརྗེ་མ་ཐག་ཏུ་སླེབས་པ་དང་། དེ་ཚོས་དམག་དུང་འབུད་པ་དང་རང་གི་འཁྱེར་ཡོང་བའི་རྫ་མ་བཅགས་སོ།

²⁰གཞན་ཚོ་གཉིས་ཀྱི་ཀྱང་དེ་ལྟར་གྱིས་པ་དང་། དེ་ཚོ་ཚང་མ་ལག་པ་གཡོན་པར་སྤ་འབར་ཐོག་པ་དང་ལག་གཡས་པར་དམག་དུང་ཐོག་ནས། གཙོ་བོ་དཀོན་མཆོག་དང་གྷིད་ཨོན་གྱི་རལ་གྲིའི་ཆེད་དུ་ཞེས་སྐད་འབོད་བྱས་སོ།

²¹མི་ཚང་མ་སྒར་གྱི་མཐའ་འཁོར་དུ་རང་གི་ས་གནས་སུ་ལངས་པ་དང་། དགྲ་བོའི་དམག་དཔུང་རྣམས་སྨྲེ་ངག་འདོན་བཞིན་བྲོས་སོ།

²²གྷིད་ཨོན་གྱི་མི་རྣམས་ནས་དམག་དུང་འབུད་སྐབས་གཙོ་བོ་དཀོན་མཆོག་གིས། དགྲ་བོའི་དམག་དཔུང་ཚོ་གཅིག་གིས་གཅིག་ལ་རང་གི་རལ་གྲིས་འཐབ་ཏུ་འཇུག་གནང་བ་དང་། དེ་ཚོ་ཛ་རེ་ཐན་དང་བྷེད་ཤི་ཏ་དང་ཏ་བྷད་ཉེ་འགྲམ་དུ་ཡོད་པའི་གྲོང་ཁྱེར་ཧ་བེལ་མེ་ཧོ་ལཱའི་བར་དུ་བྲོས་སོ།

²³དེ་ནས་ནཕ་ཏ་ལི་དང་ཨ་ཤེར་དང་མ་ནསེ་སཱེའི་ཕྱོགས་གཉིས་གྱི་སྡེ་རིགས་ཀྱི་མི་རྣམས་འབོད་ནས། དེ་ཚོས་མིད་ཡན་པ་རྣམས་ཀྱི་རྗེས་དེད་བྱས་སོ།

²⁴གྷིད་ཨོན་གྱིས་ཨེཕ་ར་ཡིམ་གྱི་རི་བརྒྱུད་ལ་མིད་ཡན་པ་མཉམ་དུ་འཐབ་ཏུ་ཤོག་ཅེས་དང་། གཙང་པོ་ཡོར་དན་དང་བྷེད་བྷ་རཱ་བར་གྱི་ཆུ་མིག་རྣམས་དབང་བཟུང་བྱོས་ཤིག་དང་། མིད་ཡན་པ་རྣམས་ལ་ཆུ་དེ་རྒལ་དུ་མ་བཅུག་ཅེས་བརྗོད་རྒྱུར་བང་ཆནེ་བརྫངས་སོ། ཨེཕ་ར་ཡིམ་གྱི་མི་རྣམས་མཉམ་དུ་འབོད་པ་དང་། དེ་ཚོས་གཙང་པོ་ཡོར་དན་དང་བྷེད་བྷ་རཱ་བར་གྱི་ཆུ་རྣམས་དབང་བཟུང་བྱས་སོ།

²⁵དེ་ཚོས་མིད་ཡན་པའི་དཔོན་པོ་ཨོ་རེབ་དང་ཛིབ་གཉིས་བཟུང་བ་དང་། ཨོ་རེབ་ལ་ཨོ་རེབ་ཀྱི་བྲག་སྟེང་དུ་བསད་པ་དང་། ཛིབ་ལ་ཛིབ་ཀྱི་རྒུན་འབྲུམ་བཙིར་སར་བསད་དོ། དེ་ཚོས་མིད་ཡན་པར་མུ་མཐུད་རྗེས་དེད་གྱིས་པ་དང་། ཨོ་རེབ་དང་ཛིབ་གཉིས་ཀྱི་མགོ་དེ་ཡོར་དན་གྱི་ཤར་ཕྱོགས་གྷིད་ཨོན་སྡོད་སར་འཁྱེར་ཡོང་ངོ་༎