Read Tibetan — པོད་སྐད་Tibetan Old Testament 2011 ཁྲིམས་དཔོན 8 Bible Online

ཁྲིམས་དཔོན 8 - Tibetan — པོད་སྐད་Tibetan Old Testament 2011 bible

ཁྲིམས་དཔོན 8

¹ཨེཕ་ར་ཡིམ་གྱི་མི་ཚོས་གྷིད་ཨོན་ལ། ཁྱེད་ཀྱིས་མིད་ཡན་པ་ཚོར་འཐབ་པར་ཕེབས་འགྲོ་སྐབས། ང་ཚོར་ཅི་ལ་སྐད་གཏོང་མ་གནང་བ་ཡིན་ནམ། ཁྱེད་ཀྱིས་ང་ཚོར་དེ་ལྟར་ཅི་ལ་མཛད་པ་ཡིན་ནམ་ཞེས་སྐྱོན་བརྗོད་ཤུགས་ཆེ་བྱས་སོ།

²ཁོང་གིས། ཁྱོད་ཚོས་ཇི་ལྟར་གྱིས་པ་དེ་དང་བསྡུར་ན། ངས་གྱིས་ཐུབ་པ་དེ་ཚོ་གང་ཡང་མིན། ཁྱོད་ཚོ་ཨེཕ་ར་ཡིམ་གྱི་མི་ཚོས་བྱ་བ་ཆུང་ཆུང་གྱིས་པ་དེ་ཚོ་ངའི་རིགས་རུས་ཡོངས་ཀྱི་གྱིས་པ་ལས་ལྷག་པ་ཡོད་དོ།

³གང་ལྟར་དཀོན་མཆོག་གི་མཐུ་སྟོབས་ཀྱིས་ཁྱོད་ཚོའི་མིད་ཡན་པའི་དཔོན་པོ་ཨོ་རེབ་དང་ཛིབ་གཉིས་བསད་ཡོད། དེ་དང་བསྡུར་ན་ངས་ཅི་གྱིས་ཡོད་དམ་ཞེས་སྨྲས་པ་དང་། ཁོང་གིས་དེ་ལྟར་སྨྲ་སྐབས་དེ་ཚོའི་ཁྲོ་བ་ཞི་བར་འགྱུར་རོ།

⁴སྐབས་དེར་གྷིད་ཨོན་དང་ཁོང་གི་མི་ ༣༠༠ དེ་ཚོ་གཙང་པོ་ཡོར་དན་དུ་སླེབས་ནས་ཆུ་དེ་རྒལ་ལོ། དེ་ཚོ་ཐང་ཆད་ཡོད་ན་ཡང་མུ་མཐུད་དགྲ་བོའི་རྗེས་དེད་བྱེད་བཞིན་ཡོད་དོ།

⁵དེ་དག་སུ་ཀོད་དུ་འབྱོར་སྐབས་ཁོང་གིས་གྲོང་ཁྱེར་གྱི་སྐྱེ་བོ་རྣམས་ལ་ངའི་མི་ཚོར་བག་ལེབ་ཕྲན་བུའི་གནང་རོགས་གནང་། དེ་ཚོ་ཐང་ཆད་ཡོད་པ་དང་ངས་མིད་ཡན་པའི་རྒྱལ་པོ་རྣམས་ཛེ་བཱ་དང་ཛལ་མུན་ན་གཉིས་ཀྱི་རྗེས་དེད་བྱེད་བཞིན་ཡོད་ཅེས་སྨྲས་སོ།

⁶འོན་ཀྱང་སུ་ཀོད་ཀྱི་འགོ་འཛིན་གྱིས། ང་ཚོས་ཁྱེད་ཀྱི་དམག་མི་ཚོར་ཁ་ཟས་ཅི་ལ་གཏེར་དགོས་སམ། ཁྱེད་ཀྱིས་ཛེ་བཱ་དང་ཛལ་མུན་ན་གཉིས་ལ་ད་དུང་ཡང་བཟུང་མེད་ཅེས་སྨྲས་སོ།

⁷དེར་གྷིད་ཨོན་གྱིས། དེ་ལྟར་ལེགས། གཙོ་བོ་་དཀོན་མཆོག་གིས་ངའི་ལག་ཏུ་ཛེ་བཱ་དང་ཛལ་མུན་ན་གཉིས་གནང་ཚར་བའི་སྐབས་སུ། ཁྱོད་ལ་ཚེར་མ་དང་བྱེ་ཐང་གི་སེར་བའི་ཚེར་མས་བརྡུང་བར་བྱའོ་སྨྲས་སོ།

⁸གྷིད་ཨོན་ཡུལ་པེ་ནུ་ཨེལ་དུ་སླེབས་པ་དང་། དེའི་མི་མང་རྣམས་ལ་ཡང་འབུད་བསྐུལ་འདྲ་མཚུངས་གནང་ན་ཡང་། པེ་ནུ་ཨེལ་གྱི་སྐྱེ་བོ་ཚོས་སུ་ཀོད་ཀྱི་སྐྱེ་བོ་ཚོ་ལྟར་ལན་འདྲ་མཚུངས་ཞུས་སོ།

⁹དེ་བས་ན་ཁོང་གིས་ཁོ་ཚོར་ང་སྐྱོན་མེད་ཁམས་དང་ལོག་ཡོང་རྒྱུ་ཡིན་པས། དེ་སྐབས་ཁྱོད་ཚོའི་གན་དྷོ་ལ་དེ་བཤིགས་པར་བྱའོ་ཞེས་སྨྲས་སོ།

¹⁰ཛེ་བ་དང་ཛལ་མུན་ན་གཉིས་རང་གི་དམག་དཔུང་དང་མཉམ་དུ་ཀར་ཀོར་དུ་ཡོད་པ་དང་། བྱེ་ཐང་གི་སྡེ་རིགས་ཀྱི་དམག་དཔུང་ཡོངས་ཀྱི་གྲངས་ནི་ ༡༥,༠༠༠ ཙམ་ལས་ལྷག་མེད་དོ། དམག་མི་ ༡༢༠,༠༠༠ བསད་ཡོད་དོ།

¹¹གྷིད་ཨོན་བྱེ་ཐང་གི་མཐའི་ལམ་བརྒྱུད་ནོ་བཱ་དང་ཡོག་བྷེ་ཧཱའི་ཤར་ཕྱོགས་སུ་ཕྱིན་ནས་དམག་དཔུང་ཚོར་བློ་བུར་དུ་འཐབ་བོ།

¹²མིད་ཡན་གྱི་རྒྱལ་པོ་ཛེ་བཱ་དང་ཛལ་མུན་ན་གཉིས་བྲོས་ན་ཡང་། ཁོང་གིས་རྗེས་དེད་གནང་ནས་ཁོ་ཚོ་གཉིས་བཟུང་བ་དང་། ཁོ་ཚོའི་དམག་དཔུང་རྣམས་ལ་འཇིགས་སྐྲག་ཡོང་བ་མཛད་དོ།

¹³གྷིད་ཨོན་དམག་གི་རྗེས་སུ་ཧེ་རེསེ་ལ་ནས་ལོག་ཡོང་སྐབས།

¹⁴ཁོང་གིས་སུ་ཀོད་ཀྱི་ན་གཞོན་ཞིག་ལ་བཟུང་ནས་ཁོ་ལ་འདྲི་རྩད་གནང་བ་དང་། ན་གཞོན་དེས་གྷིད་ཨོན་ལ། སུ་ཀོད་དུ་གནས་ཡོད་མི་སྣ་རྣམས་ཀྱི་གྲངས་བདུན་ཅུ་དོན་བདུན་གྱི་མིང་བྲིས་སོ།

¹⁵གྷིད་ཨོན་སུ་ཀོད་ཀྱི་མི་ཚོའི་སར་ཕེབས་ནས། ཁྱོད་ཚོས་ང་ལ་རོགས་བྱ་རྒྱུར་ཁས་ལེན་མ་བྱས་པ་དྲན་གྱི་འདུག་གམ། ཁྱོད་ཚོས་ངས་ཛེ་བཱ་དང་ཛལ་མུན་ན་གཉིས་བཟུང་མེད་སྟབས། ངའི་ཐང་ཆད་པའི་མི་ཚོར་ཁ་ལག་སྤྲད་མི་ཐུབ་ཅེས་སྨྲས་ཡོད། དེ་ལྟར་ཁོ་ཚོ་འདིར་ཡོད་ཅེས་སྨྲས་སོ།

¹⁶དེ་ནས་ཁོང་གིས་སུ་ཀོད་ཀྱི་འགོ་འཛིན་ཚོར་ཚེར་མ་དང་བྱེ་ཐང་གི་སེར་བའི་ཚེར་མས་ཉེས་ཆད་གནང་ངོ་།

¹⁷ཁོང་གིས་པེ་ནུ་ཨེལ་གྱི་གན་དྷོ་ལ་དེ་བཤིགས་པ་དང་གྲོང་ཁྱེར་དེའི་མི་རྣམས་བསད་དོ།

¹⁸དེ་ནས་གྷིད་ཨོན་གྱིས། ཛེ་བཱ་དང་ཛལ་མུན་ན་གཉིས་ལ། ཁྱོས་ཚོས་ཏ་བྷོར་དུ་མི་བསད་པ་ཚོ་ཇི་ལྟར་ཡོད་དམ་ཞེས་བཀའ་འདྲི་གནང་བ་དང་། དེ་ཚོས། དེ་ཚོ་ཁྱེད་དང་འདྲ་བོ་འདུག། དེ་ཚོ་ཚང་མ་ནི་རྒྱལ་པོའི་བུ་ལྟ་བུ་འདུག་ཅེས་ལན་ཞུས་སོ།

¹⁹གྷིད་ཨོན་གྱིས། དེ་ཚོ་ཚང་མ་ནི་ངའི་སྤུན་དང་ང་རང་གི་ཨ་མ་ལགས་ཀྱི་བུ་འབའཞིག་ཡིན་ནོ། ངས་དམ་བཅའ་བརྟན་པོར་འཇོག་རྒྱུར། གལ་སྲིད་ཁྱོད་ཚོས་ཁོ་ཚོར་བསད་མེད་ན། ངས་ཁྱོད་ཚོར་གསོད་པར་མི་བྱེད་ཅེས་སྨྲས་སོ།

²⁰དེ་ནས་ཁོང་གིས། རང་གི་བུ་རྒན་ཤོས་ཡེ་ཐེར་ལ། ཁོ་གཉིས་གསོད་ཅིག་ཅེས་བཀའ་གནང་ངོ་། འོན་ཀྱང་བུ་དེས་རལ་གྲི་མ་བཏོན་ནོ། ཁོང་ཕྲུ་གུ་ཆུང་ཆུང་ཞིག་སོང་ཙང་བུ་དེ་ལ་ཐེ་ཚོམ་སྐྱེས་སོ།

²¹དེ་ནས་ཛེ་བཱ་དང་ཛལ་མུན་ན་གཉིས་ནས། ཁྱོད་རང་གཉིས་ནས་ང་ཚོར་གསོད་ཅིག སྐྱེས་པའི་ལས་དེ་སྐྱེས་པའི་བྱ་དགོས་ཤེས་སྨྲས་པ་དང་། དེར་བརྟེན་གྷིད་ཨོན་གྱིས་ཁོ་གཉིས་བསད་ནས་རྔ་མོང་ཚོའི་སྐེ་ལ་ཡོད་པའི་རྒྱན་ཆ་རྣམས་བླངས་སོ།

²²དེ་རྗེས་ཨིསི་རཱཨེལ་པ་ཚོས་གྷིད་ཨོན་ལ་ཁྱེད་ང་ཚོའི་རྒྱལ་པོ་གནང་ཞིག ཁྱེད་ཀྱི་རྗེས་སུ་ཁྱེད་ཀྱི་རིགས་བརྒྱུད་ཚོས་ང་ཚོའི་རྒྱལ་པོ་མཛོད་ཅིག ཁྱེད་ཀྱིས་ང་ཚོ་མིད་ཡན་པ་ཚོའི་ལག་ནས་སྐྱབས་པར་མཛད་ཡོད་ཅེས་སྨྲས་སོ།

²³དེའི་ལན་དུ་གྷིད་ཨོན་གྱིས། ང་དང་ངའི་བུ་ཡིས་ཁྱོད་ཚོའི་རྒྱལ་པོ་མི་བྱེད་དོ། གཙོ་བོ་དཀོན་མཆོག་གིས་ཁྱོད་ཚོའི་རྒྱལ་པོ་གནང་ངོ་ཞེས་སྨྲས་སོ།

²⁴དེ་ནས་ཁོང་གིས་མུ་མཐུད་ནས་ངས་ཁྱོད་ཚོར་ཞུ་བ་ཞིག་འབུལ་དུ་འཇུག་རོགས་གནང་། ཁྱོད་ཚོ་རེར་རེས་བཅོམ་པའི་ཨ་ལོང་རྣམས་ང་ལ་བྱིན་རོགས་ཅེས་སྨྲས་སོ། (མིད་ཡན་པ་ཚོ་བྱེད་ཐང་གི་མི་མང་གཞན་ལྟར་གསེར་གྱི་ཨ་ལོང་བདོག་གི་ཡོད་དོ།)

²⁵ལན་དུ་མི་མང་གིས། དེ་ཚོ་ཁྱེད་ལ་འབུལ་རྒྱུར་ང་ཚོ་དགའ་བར་འགྱུར་ཞེས་ཞུས་སོ། དེ་ཚོས་རས་ཤིག་བཏིང་ནས་ཚང་མས་རང་གི་བླངས་པའི་ཨ་ལོང་རྣམས་དེའི་ཁར་བཞག་གོ

²⁶གྷིད་ཨོན་ལ་གསེར་གྱི་ཨ་ལོང་བྱུང་བ་རྣམས་ཀྱི་ལྗིད་ཚད་ཀི་ལོ་ཉི་ཤུ་ཙམ་ཡོད་པ་དང་། དེའི་ནང་ལ་རྒྱན་ཆ་དང་སྐེ་རྒྱན་དང་མིད་ཡན་པའི་རྒྱལ་པོས་གྱོན་པའི་རས་མུ་མན་དང་རྔ་མོང་ཚོའི་སྐྱེའི་མཐའ་འཁོར་ལ་ཡོད་པའི་ཉག་ཐག་བཅས་པ་འཚུད་མེད་དོ།

²⁷གྷིད་ཨོན་གྱིས་གསེར་དེ་ཚོ་ལས་སྐུ་འདྲ་ཞིག་བཟོས་ནས་རང་གི་གྲོང་ཁྱེར་ཨོཕ་རཱེའི་ནང་བཞག་གོ ཨིསི་རཱཨེལ་པ་ཚང་མས་དཀོན་མཆོག་སྤངས་ནས་སྐུ་འདྲ་དེ་ལ་མཆོད་པར་དེར་སོང་ངོ་། དེ་ནི་གྷིད་ཨོན་དང་ཁོང་གིས་ཁྱིམ་ཚང་གི་ཆེད་དུ་རྙི་ཞིག་ཏུ་འགྱུར་བ་ཡིན་ནོ།

²⁸དེ་ལྟར་ཨིསི་རཱཨེལ་པ་ཚོས་མི་ད་ཡིན་པ་ཚོ་ཕམ་པར་བྱས་པ་དང་། དེ་ཚོ་ནི་ཉན་ཁ་མེད་པར་འགྱུར་རོ། ཡུལ་དེ་བཞིན་གྷིད་ཨོན་མ་གྲོངས་བར་ལོ་བཞི་བཅུའི་རིང་ཞི་བདེར་གནས་སོ༎

²⁹གྷིད་ཨོན་རང་གི་ཁྱིམ་དུ་ཕེབས་ནས་དེར་བཞུགས་སོ།

³⁰ཁོང་ལ་བུ་བདུན་བཅུ་ཡོད་དོ། གང་ལགས་ཟེར་ན། ཁོང་ལ་ཆུང་མ་མང་པོ་ཡོད་པའི་ཕྱིར་རོ།

³¹ཁོང་ལ་ཤེ་ཀེམ་དུ་ཟུར་གྲོགས་མ་ཞིག་ཡོད་པ་དང་། དེ་ལ་བུ་ཞིག་སྐྱེས་པ་དང་དེའི་མིང་ལ་ཨ་བྷི་མེ་ལེག་ཅེས་བཏགས་སོ།

³²ཡོ་ཨཱཤེ་ཀྱི་བུ་གྷིད་ཨོན་ནི་དགུང་ལོ་མཐོ་པོར་གྲོངས་པ་དང་། ཨ་བྷི་ཨེ་ཛར་ཀྱི་རིགས་རུས་ཀྱི་གྲོང་ཁྱེར་ཨོཕ་རཱའི་རང་གི་ཡབ་ཡོ་ཨཱཤེ་ཀྱི་སྤུར་ཁང་དུ་སྦས་སོ།

³³གྷིད་ཨོན་གྲོངས་པའི་རྗེས་ལ་སླར་ཡང་ཨིསི་རཱཨེལ་པའི་མི་མང་རྣམས་དཀོན་མཆོག་ལ་དམ་ཚིག་མི་གཙང་བར་འགྱུར་བ་དང་བྷལ་རྣམས་ལ་མཆོད་དོ། དེ་ཚོས་བྷལ་བྷ་རིད་ལ་དེ་ཚོའི་ལྷ་སྐུ་བཟོས་སོ།

³⁴དེ་ཚོ་རང་ཉིད་ཀྱི་དཀོན་མཆོག་གཙོ་བོ་དཀོན་མཆོག་དེ་ཚོའི་མཐའ་འཁོར་ཡོངས་སུ་དགྲ་བོ་རྣམས་ལས་སྐྱོབ་མཁན་དེའི་ཞབས་ཏོག་མ་ཞུས་སོ།

³⁵གྷིད་ཨོན་གྱི་ཨིསི་རཱཨེལ་པའི་ཆེད་དུ་བྱེད་པའི་བཟང་པོའི་བྱ་བ་རྣམས་ལ་དེ་ཚོས་ཁོང་གི་ཁྱིམ་ཚང་གི་ཕྱོགས་སུ་སྐུ་དྲིན་མི་དྲན་ནོ༎