Read Tibetan — པོད་སྐད་Tibetan Old Testament 2011 རུད 2 Bible Online

རུད 2 - Tibetan — པོད་སྐད་Tibetan Old Testament 2011 bible

རུད 2

¹ན་ཨོ་མི་ལ་གཉེན་ཚན་བྷོ་ཨཛ་ཞེས་པ་ཞིག་ཡོད་དེ། དེ་ནི་མོའི་ཁྱོ་ག་ཨེ་ལི་མེ་ལེག་གི་མི་ཚང་ནས་ཡིན་པ་དང་། ཁོ་ནི་ཧ་ཅང་ནོར་ལོངས་སྤྱོད་དང་ལྡན་ཞིང་ཤིན་ཏུ་སྙན་གྲགས་ཆེན་པོ་ཞིག་ཡོད་པ་ཡིན་ནོ།

²ཉིན་ཞིག་རུད་ཀྱིས་ན་ཨོ་མི་ལ། ང་ཞིང་ཁར་ཕྱིན་ནས་མི་གཞན་གྱིས་བརྔས་ཟིན་པའི་སྙེ་མ་ལྷག་འཕྲོ་རྣམས་སྒྲུག་པའི་ལས་བྱེད་པར་འགྲོའམ། དེར་ང་ལ་སུ་ཞིག་གིས་ལས་ཀ་བྱེད་བཅུག་པའི་རེ་བ་ཡོད་ཅེས་སྨྲས་པ་དང་། ལན་དུ། ན་ཨོ་མིས་ངའི་བུ་མོ་དེ་ག་རང་ཡོང་ང་ཞེས་སྨྲས་སོ།

³དེ་ནས་རུད་ཞིང་ཁར་སྙེ་མ་རྔ་མཁན་ཚོའི་རྗེས་སུ་ཕྱིན་ནས་དེ་ཚོས་རྔ་འཕྲོ་བཞག་པའི་སྙེ་མ་རྣམས་སྒྲུག་པའི་ལས་བྱས་སོ། ཞིང་ཁ་དེ་བྷོ་ཨཛའི་རེད་བཞག།

⁴རྗེས་སུ་བྷོ་ཨཛ་ཁོ་རང་བྷེད་ལེ་ཧེམ་ནས་སླེབས་ཏེ་རང་གི་ལས་བྱེད་པ་རྣམས་ལ། གཙོ་བོ་དཀོན་མཆོག་ཁྱོད་ཚོ་དང་མཉམ་དུ་གནས་པར་ཤོག་ཅིག་ཅེས་འཚམས་འདྲི་བྱས་པའི་ལན་དུ་ཁོ་ཚོས། གཙོ་བོ་དཀོན་མཆོག་གིས་ཁྱེད་ལའང་བྱིན་གྱིས་རླབས་པར་ཤོག་ཅེས་སྨྲས་པ་དང་།

⁵བྷོ་ཨཛས་ལས་བྱེད་པའི་འགོ་དཔོན་དེ་ལ། བུ་མོ་ན་གཞོན་མ་དེ་སུ་ཡིན་ནམ་ཞེས་དྲིས་པའི་ལན་དུ་ཁོས།

⁶དེ་ནི་ན་ཨོ་མི་དང་མཉམ་དུ་མོ་ཨབ་ཡུལ་ནས་ཡོང་བའི་ཕྱི་རྒྱལ་བའི་བུ་མོ་ཞིག་ཡིན་ཞིང་།

⁷མོས་ང་ལ། སྙེ་མ་རྔ་མཁན་ཚོའི་རྗེས་སུ་ཕྱིན་ནས་སྙེ་མ་སྒྲུག་བཅུག་རོགས་གནང་ཞེས་ཟེར་བས། མོ་ནི་ད་རང་སྔ་པོ་ནས་ཞིང་ལས་བྱས་ཏེ་ད་ལྟ་བསིལ་གྲིབ་ནང་ངལ་གསོ་རྒྱབ་ནས་བསྡད་མ་ཐག་ཏུ་ཡིན་ཞེས་སྨྲས་པ་དང་།

⁸བྷོ་ཨཛས་རུད་ལ། ངས་ཁྱོད་ལ་གྲོས་ཤིག་བསླབ་རྒྱུ་ཡོད། དེ་གང་ཡིན་ཟེར་ན་ཁྱོད་ངའི་ཞིང་ཁ་གཅིག་པུར་ལས་བྱེད་པ་མ་གཏོགས་གཞན་གང་དུའང་འགྲོ་མི་དགོས། དེ་ཙམ་མ་ཟད་ཁྱོད་དེ་ག་རང་སྐྱེ་དམན་ཚོ་དང་མཉམ་དུ་ལས་ཀ་བྱོས་ཤིག

⁹ཁྱོད་དེ་ཚོའི་ལས་ཀ་བྱེད་སར་བསྡད་ནས་ཁོ་ཚོའི་ལས་ཀར་མིག་ལྟོས་བྱོས་ཤིག ཁྱོད་ལ་སུན་པོ་བྱེད་པའམ་གཞན་ཡང་ལུས་ལ་རེག་པ་སོགས་གང་ཡང་བྱེད་མི་ཆོག་ཅེས་ངས་སྐྱེས་པ་ཚོར་བཀའ་བསྒོ་ཡོད། ཁྱོད་རང་ཁ་སྐོམ་ན་དེ་ཚོའི་ཆུ་སྣོད་ནས་ཆུ་འཐུང་ནའང་ཆོག་ཅེས་སྨྲས་པ་དང་།

¹⁰རུད་ཀྱིས་ལུས་ས་ལ་བསྡབས་ནས་ཕྱག་འཚལ་ཞིང་བྷོ་ཨཛ་ལ། ཁྱེད་ཀྱིས་ང་ཕྱི་རྒྱལ་བ་ཞིག་ལ་དེ་ལྟ་བུའི་ཐུགས་འཁུར་བཞེས་ནས་ཐུགས་རྗེ་ཆེན་པོ་གནང་བ་དེ་གང་ཡིན་ནམ། ཞེས་སྨྲས་པའི་ལན་དུ།

¹¹བྷོ་ཨཛས། ཁྱོད་ཀྱིས་རང་གི་བཟའ་ཟླ་ཤི་བའི་རྗེས་སུའང་རང་གི་གྱོས་མོ་ལ་ཞབས་ཞུ་གང་ལེགས་ཞུས་པའི་སྐོར་ངས་ཐོས་བྱུང་། དེ་ཙམ་མ་ཟད་ཁྱོད་ཀྱིས་རང་གི་ཕ་མ་གཉིས་དང་རང་ཡུལ་བཅས་སྤངས་ནས་དེ་སྔ་ནམ་ཡང་ངོ་མ་ཤེས་པའི་རིགས་ཤིག་དང་མཉམ་དུ་གནས་སྡོད་བྱེད་བཞིན་པ་དེའང་ངས་ཤེས་ཀྱི་ཡོད།

¹²དེ་བས་ན་ཁྱོད་ཀྱིས་གང་བྱས་པའི་ལས་ལ་གཙོ་བོ་དཀོན་མཆོག་གིས་བྱིན་རླབས་གནང་བར་ཤོག ཁྱོད་ཀྱིས་སྐྱབས་ཞུས་པའི་ཨིསི་རཱཨེལ་གྱི་གཙོ་བོ་དཀོན་མཆོག་གིས་ཁྱོད་ལ་ཐོབ་འོས་པའི་བྱིན་རླབས་དང་གནང་སྦྱིན་ཚང་མ་གནང་བར་ཤོག་ཅེས་སྨོན་འདུན་ཞུས་སོ།

¹³དེའི་ལན་དུ་རུད་ཀྱིས། ང་ནི་ཁྱེད་ཀྱི་བྲན་མོ་ཞུ་བའི་འོས་བབས་ཀྱང་མེད་དོ། འོན་ཀྱང་ཁྱེད་ཀྱི་ཐུགས་བརྩེ་ཆེན་པོས་གསུང་གླེང་མཛད་ནས་ངའི་སེམས་ལ་ཞི་བདེ་དང་སེམས་གསོ་ཆེན་པོ་ཐོབ་བྱུང་ཞེས་ཞུས་སོ། ཁྱེད་རང་གི་ཐུགས་རྗེ་དེ་ང་ལ་རྒྱུན་དུ་ཐོབ་པར་ཤོག

¹⁴དེ་ནས་ཁ་ཟས་ཟ་བའི་དུས་ལ་བྷོ་ཨཛས་རུད་ལ། ད་ཁ་ཟས་ཟ་ཞིག། རྒུན་ཆང་སྐྱུར་མོ་ལ་སྦང་ནས་ཟ་ཞིག་ཅེས་སྨྲས་པ་དང་། རུད་ཞིང་ལས་པ་རྣམས་དང་མཉམ་དུ་བསྡད་དེ་བྷོ་ཨཛས་མོ་ལ་ཡོས་སྟེར་རོ། མོས་དེ་ཟས་ནས་ཚིམ་པ་ཙམ་མ་ཟད་ལྷག་མ་ཡང་ལུས་སོ།

¹⁵དེ་རྗེས་མོ་སྙེ་མ་སྒྲུག་པར་ཕྱིན་པ་དང་། བྷོ་ཨཛས་ཞིང་ལས་པ་རྣམས་ལ་སྨྲས་པ། སྙེ་མ་བརྔས་ནས་ཕོན་པོ་སྒྲིལ་ཟིན་པའི་ཁྲོད་དུའང་མོ་ལ་བཀག་བྱ་མ་བྱེད་པར་སྙེ་མ་ལྷག་འཕྲོ་སྒྲུག་ཆུགས་ཤིག དེ་ཙམ་མ་ཟད་ཕོན་པོ་སྒྲིལ་ཟིན་པའི་ཁོངས་ནས་ཀྱང་སྙེ་མ་ཁ་ཤས་བཏོན་ནས་མོ་ལ་དེ་ཚོ་སྒྲུག་ཆུགས་ཤིག

¹⁷དེ་བཞིན་རུད་ཀྱིས་དགོང་དྲོ་བར་སྙེ་མ་ལྷག་འཕྲོ་བསྡུས་ནས་དེ་དག་བརྡུང་པས་འབྲུ་ཀི་ལོ་བཅུ་ཙམ་བྱུང་བ་ཡིན་ནོ།

¹⁸དེ་འཁྱེར་ནས་གྲོང་ཁྱེར་དུ་ཕྱིན་ཏེ་རང་གི་གྱོས་མོ་ལ་བསྟན་ཞིང་ཁ་ཟས་ལྷག་མ་དེའང་མོ་ལ་སྟེར་རོ།

¹⁹དེར་ན་ཨོ་མིས། འབྲུ་འདི་ཙམ་དེ་རིང་ཁྱོད་ཀྱིས་སུའི་ཞིང་དུ་ལས་ཀ་བྱས་ནས་སྒྲུག་པ་ཡིན་ནམ། ཁྱོད་ལ་སྙིང་རྗེ་བྱེད་མཁན་མི་དེ་ལ་དཀོན་མཆོག་གིས་བྱིན་རླབས་གནང་བར་ཤོག་ཅེས་སྨྲས་པ་དང་། རུད་ཀྱིས་མོ་རང་བྷོ་ཨཛའི་ཞིང་ཁར་ལས་ཀ་བྱས་པའི་སྐོར་ན་ཨོ་མི་ལ་བཤད་དོ།

²⁰ན་ཨོ་མིས། གཙོ་བོ་དཀོན་མཆོག་གིས་བྷོ་ཨཛ་ལ་བྱིན་རླབས་གནང་བར་ཤོག ཁོང་ནི་ཤི་གསོན་གཉིས་ཀར་དམ་བཅའ་གནང་བ་དེ་དག་སྒྲུབ་པ་གནང་མཁན་ཞིག་ཡིན་ནོ། མི་དེ་ནི་ང་ཚོར་ལྟ་རྟོག་བྱེད་འོས་པའི་གཉེན་ཚན་ཉེ་པོ་ཞིག་ཡིན་ནོ་ཞེས་སྨྲས་པ་དང་།

²¹རུད་ཀྱིས་སྨྲས་པ། མི་དེས་ང་ལ་སྙེ་མ་བརྔས་མ་ཚར་བར་དུ་ཁོའི་ཞིང་ལས་པ་རྣམས་དང་མཉམ་དུ་སྙེ་མ་སྒྲུག་ནས་སྡོད་ཅིག་ལབ་བྱུང་།

²²ན་ཨོ་མིས་རུད་ལ། འོ་ན་བུ་མོ་ཁྱོད་རང་བྷོ་ཨཛའི་ཞིང་ཁར་ལས་ཀ་བྱེད་མཁན་སྐྱེ་དམན་རྣམས་དང་མཉམ་དུ་ལས་ཀ་བྱོས་ཤིག དེ་མིན་གཞན་གྱི་ཞིང་ཁར་ཕྱིན་ནས་ཁྱོད་ལ་གནོད་འཚེ་གཏོང་ཉེན་ཡོད་ཅེས་སྨྲས་སོ།

²³དེ་བཞིན་གྲོ་དང་ནས་ཀྱི་སྟོན་ཐོག་ཚང་མ་བརྔས་མ་ཚར་བར་དུ་རུད་བྷོ་ཨཛའི་ཞིང་ཁར་ལས་ཀ་བྱས་ཏེ་རང་གི་གྱོས་མོ་དང་མཉམ་དུ་གནས་སོ༎