Read Tibetan — པོད་སྐད་Tibetan Old Testament 2011 རུད 3 Bible Online

རུད 3 - Tibetan — པོད་སྐད་Tibetan Old Testament 2011 bible

རུད 3

¹ཉིན་ཤས་རྗེས་སུ་ན་ཨོ་མིས་རུད་ལ། ད་ཁྱོད་རང་སྐྱར་དུ་གཞིས་ཚུགས་པའི་ཕྱིར་ངས་ཁྱོད་ལ་བཟའ་ཟླ་ཞིག་ལྟ་རོགས་བྱེད་ཀྱི་ཡིན།

²བྷོ་ཨཛ་ནི་ང་ཚོའི་གཉེན་ཚན་ཡིན་ཞིང་། ཁོའི་ཞིང་ཁར་ལས་ཀ་བྱེད་མཁན་སྐྱེ་དམན་རྣམས་དང་མཉམ་དུ་ཁྱོད་ད་བར་ཞིང་ལས་བྱེད་བཞིན་ཡོད་པས། ད་ངས་གང་བཤད་པ་དེར་ཡག་པོ་ཉོན་ཞིག ཁོས་དོ་དགོང་ནས་ཀྱི་སྙེ་མ་བརྡུང་ནས་བསྡད་ཡོང་།

³དེས་ན་ཁྱོད་རང་གཟུགས་པོ་དང་གོས་སོགས་འཁྲུད་ནས་ལུས་ལ་དྲི་ཞིམ་ལྡན་པའི་སྣུམ་བྱུགས་ཤིང་། དུག་ལོག་ཡག་པོ་གྱོན་ནས་ཁོས་སྙེ་མ་བརྡུང་སར་སོང་ཞིག འོན་ཀྱང་ཁོས་བཟའ་བཏུང་བྱས་མ་ཚར་བར་དུ་ཁྱོད་རང་དེར་སླེབས་ཡོད་པ་ཁོས་མ་ཤེས་པར་བྱོས་ཤིག

⁴ཁོའི་ཉལ་ས་ག་པ་ཡིན་པ་དེ་ཤེས་པར་བྱོས་ཤིག དེ་ནས་ཁོ་གཉིད་ཁུག་ཚར་བའི་རྗེས་སུ་ཁྱོད་རང་ཁོའི་རྐང་པའི་ཕྱོགས་སུ་ཕྱིན་ཏེ་ཁོའི་ཉལ་ཆས་གྱོན་ནས་ཉོལ་ཞིག་དང་། དེ་རྗེས་ཁྱོད་ཀྱིས་གང་བྱེད་དགོས་པ་དེ་ཁོས་ཁྱོད་ལ་བཤད་ཡོང་ཞེས་སྨྲས་སོ།

⁵དེ་ནས་རུད་ཀྱིས། ཁྱེད་ཀྱིས་གང་གསུངས་པ་བཞིན་དུ་ངས་བྱེད་ཀྱི་ཡིན་ཞེས་ཞུས་པ་དང་།

⁶དེ་རྗེས་རུད་ནས་ཀྱི་སྙེ་མ་རྡུང་སར་ཕྱིན་ནས། རང་གི་གྱོས་མོས་སྨྲས་པ་བཞིན་བྱས་སོ།

⁷བྷོ་ཨཛས་བཟའ་བཏུང་བྱས་ཟིན་པའི་རྗེས་ལ་དགའ་སྤྲོའི་ངང་དུ་འབྲུ་སྤུང་བཞག་ཡོད་པའི་ཟུར་ཞིག་ལ་ཕྱིན་ནས་ཉལ་བ་དང་། དེ་ནས་རུད་ག་ལེར་ཕྱིན་ནས་ཁོའི་རྐང་པའི་ཕྱོགས་ཀྱི་ཉལ་ཆས་དེ་ཡར་བཏེགས་ཏེ་དེར་འཛུལ་ནས་ཁུ་སིམ་མེར་ཉལ་བ་དང་།

⁸མཚན་ལ་བྷོ་ཨཛ་གློ་བུར་དུ་གཉིད་སད་དེ་ཨ་ལོག་རྒྱུར་སྐབས་བུད་མེད་གཅིག་དེར་ཉལ་ཡོད་པ་མཐོང་ནས།

⁹ཡ་མཚན་སྐྱེས་ཏེ། ཁྱོད་རང་སུ་ཡིན་ནམ་ཞེས་དྲི་བ་ལེན་པ་དང་། མོས་ལགས་ང་རུད་ཡིན། ཁྱེད་ནི་ང་ཚོའི་གཉེན་ཚན་ཞིག་ཡིན་པས། ང་ལ་ལྟ་སྐྱོང་བྱེད་པའི་ལས་འགན་དེ་ཁྱེད་ལ་བབས་ཡོད། དེ་བས་ན་ཁྱེད་ཀྱིས་ང་ལ་རང་གི་བཟའ་ཟླར་བཞེས་རོགས་གནང་ཞེས་ཞུས་པའི་ལན་དུ།

¹⁰ཁོས། གཙོ་བོ་དཀོན་མཆོག་གིས་ཁྱོད་ལ་བྱིན་གྱིས་རླབས་པར་ཤོག ཁྱོད་ཀྱིས་རང་གི་གྱོས་མོ་ལ་ཞབས་ཕྱི་གང་ཞུས་པ་ལས་ལྷག་པར་ང་ཚོའི་ཁྱིམ་ཚང་ལ་ཁྱོད་ཀྱིས་ཞེན་འཁུར་ཆེན་པོ་བྱས་ཡོད། ཁྱོད་ཀྱིས་མི་གཞོན་པ་ཕྱུག་པོའམ་དབུལ་པོའི་རྗེས་སུ་མ་ཕྱིན་ནོ།

¹¹དེ་བས་ན་རུད་ཁྱོད་ད་སེམས་ཁྲལ་བྱེད་མི་དགོས། ཁྱོད་ཀྱིས་གང་སྨྲས་པ་བཞིན་ངས་བྱེད་ཀྱི་ཡིན། ཁྱོད་རང་བུད་མེད་སྤྱོད་ལམ་བཟང་པོ་ཞིག་ཡིན་པ་དེ་གྲོང་ཁྱེར་གྱི་མི་ཚང་མས་ཤེས་ཀྱི་ཡོད།

¹²ང་གཉེན་ཚན་ཉེ་པོ་ཞིག་ཡིན་པ་དང་། ཁྱོོད་རང་ལ་ལྟ་སྐྱོང་བྱེད་པའི་ལས་འགན་ངའི་ཐོག་ཏུ་ཡོད་པ་དེའང་བདེན་ནོ། འོན་ཀྱང་ང་ལས་ཉེ་བའི་གཉེན་ཚན་གཞན་ཞིག་ཀྱང་ཡོད།

¹³ད་དོ་དགོང་མཚན་ལ་ཁྱོད་རང་འདི་ག་རང་ལ་སྡོད་ཅིག སང་ཞོག་ངས་ཕྱིན་ནས་མི་དེས་ཁྱོད་ཀྱི་འགན་འཁུར་བྱེད་དང་མི་བྱེད་རྩད་གཅོད་བྱེད་ཀྱི་ཡིན། གལ་སྲིད་ཁོས་འགན་འཁུར་བྱས་ན་གང་ལེགས་ཡིན་པ་དང་། དེ་བཞིན་མ་བྱས་ན་གསོན་པོར་བཞུགས་པའི་གཙོ་བོ་དཀོན་མཆོག་གི་མཚན་ལ་ངས་དམ་བཅའ་བྱེད་ཀྱི་ཡོད་པས། ངས་འགན་ལེན་རྒྱུ་ཡིན། ད་ཁྱོད་རང་སང་ཞོགས་བར་འདི་ག་རང་དུ་ཉོལ་ཞིག་ཅེས་སྨྲས་པ་དང་།

¹⁴རུད་བྷོ་ཨཛའི་རྐང་པའི་འགྲམ་དུ་ཉལ་ནས་བསྡད་དོ། འོན་ཀྱང་མི་སུས་ཀྱང་མ་མཐོང་བའི་ཕྱིར་མོ་ནམ་མ་ལངས་པའི་སྔོོན་དུ་ལངས་ནས་ཕྱིན་ནོ། གང་ལ་ཟེར་ན་མོ་དེར་ཡོང་བའི་སྐོར་མི་སུས་ཀྱང་ཤེས་མི་རུང་ཞེས་བྷོ་ཨཛས་འདོད་གྱི་ཡོད་པའི་ཕྱིར་རོ།

¹⁵དེ་ནས་བྷོ་ཨཛས་རུད་ལ། ཁྱོད་ཀྱིས་གྱོན་པའི་རས་དེ་ས་ལ་མར་བཀྲམ་ཞིག་ཅེས་སྨྲས་ནས་དེར་འབྲུ་ཀི་ལོ་ ༢༠ ཙམ་བླུགས་ནས་མོ་ལ་བཀལ་བ་དང་། མོས་དེ་འཁྱེར་ནས་གྲོང་ཁྱེར་དུ་ལོག་ཕྱིན་ནོ།

¹⁶མོ་ནང་དུ་བསླེབས་པ་དང་གྱོས་མོས་མོ་ལ། བུ་མོ་གང་བྱུང་སོང་ཞེས་དྲིས་པའི་ལན་དུ། དེ་ནས་བྷོ་ཨཛས་མོ་རང་ལ་གང་བྱེད་པ་ཚང་མ་བཤད་དོ།

¹⁷མོས་སྨྲས་པ། བྷོ་ཨཛས་ང་ལ་ལག་པ་སྟོང་པ་མ་འགྲོ་ཤིག་ལབ་བྱུང། དེའི་རྐྱེན་གྱིས་འབྲུ་འདི་ཙམ་བསྐུར་བྱུང་།

¹⁸དེ་ནས་ན་ཨོ་མིས་མོ་ལ། རུད་ཁྱོད་བཟོད་སྒོམ་བྱས་ནས་སྒུག་སྡོད་ཅིག གནས་ཚུལ་འདིའི་ལས་དོན་སྒྲུབ་ཡོང་ངམ་མི་ཡོང་ལྟ་དགོས། གནས་ཚུལ་འདིའི་སྐོར་ཐག་ཆོད་མ་བྱུང་བར་བྷོ་ཨཛ་བློ་བདེའི་ངང་ནམ་ཡང་གནས་ཐུབ་མི་ཡོང་ཞེས་སྨྲས་སོ༎