Read Tibetan — པོད་སྐད་Tibetan Old Testament 2011 རུད 4 Bible Online

རུད 4 - Tibetan — པོད་སྐད་Tibetan Old Testament 2011 bible

རུད 4

¹བྷོ་ཨཛ་གྲོང་ཁྱེར་གྱི་གཞུང་སྒོའི་འགྲམ་དུ་ཕྱིན་ནས་བསྡད་སྐབས། སྔར་ཁོས་སྨྲས་པའི་ཨེ་ལི་མེ་ལེག་གི་གཉེན་ཚན་ཉེ་པོ་དེའང་དེར་བསླེབས་པས། བྷོ་ཨཛས་ཁོ་དང་ཉེ་བར་ཡོང་ནས་སྡོད་ཅིག་སྨྲས་པ་དང་། ཁོ་འགྲམ་དུ་ཕྱིན་ནས་བསྡད་དོ།

²བྷོ་ཨཛས་གྲོང་ཁྱེར་གྱི་མི་རྒན་པོ་བཅུ་བོས་ནས་དེར་བསྡད་བཅུག་གོ

³དེ་ནས་ཁོས་རང་གི་གཉེན་ཚན་དེ་ལ། ད་ན་ཨོ་མི་མོ་ཨབ་ཡུལ་ནས་ཕྱིར་ལོག་བྱས་ཡོད་ཅིང། མོས་ང་ཚོའི་གཉེན་ཚན་ཨེ་ལི་མེ་ལེག་གི་ས་ཞིང་དེ་ཚོང་བརྩིས་བྱེད་ཀྱི་འདུག་ན།

⁴དེའི་སྐོར་ཁྱོད་ཀྱིས་ཤེས་པ་བྱེད་ན་ཡག་པོ་རེད་ཅེས་བསམ་གྱི་འདུག ས་ཞིང་དེ་ཁྱོད་ལ་དགོས་ན་ད་ལྟ་འདིར་འཛོམས་ཡོད་པའི་རྒན་པོ་རྣམས་ཀྱི་མདུན་དུ་ཁྱོད་ཀྱིས་དེ་ཉོས་ཤིག གལ་སྲིད་མི་དགོས་ན་མི་དགོས་ཞེས་ཁ་གསལ་པོར་ལབ་དགོས། གང་ལ་ཟེར་ན་ས་ཞིང་དེ་ཉོ་ཆོག་པའི་དབང་ཆ་དང་པོ་དེ་ཁྱོད་ལ་ཡོད། དེ་རྗེས་ང་ལ་ཡོད་ཅེས་སྨྲས་པ་དང་། མི་དེས་ས་ཞིང་དེ་ངས་ཉོ་གི་ཡིན་ཞེས་སྨྲས་སོ།

⁵དེ་ནས་བྷོ་ཨཛས། ཁྱོད་ཀྱིས་ན་ཨོ་མིའི་ལག་ནས་ས་ཞིང་དེ་ཉོས་པ་ཡིན་ན། མོ་ཨབ་ཡུལ་ནས་ཡོང་བའི་ཡུག་མོ་རུད་ཀྱང་བཟའ་ཟླར་ལེན་དགོས། དེ་ལྟར་བྱས་ན་ས་ཞིང་དེ་ཨེ་ལི་མེ་ལེག་གི་མི་བརྒྱུད་རང་གི་ལག་ཏུ་གནས་ཀྱི་རེད་ཅེས་སྨྲས་པ་དང་།

⁶མི་དེས་དེ་འདྲ་ཡིན་ན་ངས་ས་ཞིང་ཉོ་ཆོག་པའི་དབང་ཆ་དེ་སྤངས་ཀྱི་ཡིན། གང་ལ་ཟེར་ན་ས་ཞིང་དེར་ངའི་བུ་ཕྲུག་ཚོས་བདག་དབང་བྱེད་ཆོག་ས་མ་རེད། དེ་བས་ན་ས་ཞིང་དེ་ཁྱོད་རང་ཉོས་ཤིག ང་ཉོ་གི་མིན་ཞེས་སྨྲས་སོ།

⁷གནའ་དུས་ཨིསི་རཱཨེལ་གྱི་སྲོལ་བཞིན་ས་ཞིང་ཉོ་ཚོང་ངམ་བརྗེ་ལེན་བྱས་པའི་སྐད་ཆ་གཏན་འབེབས་བྱུང་བའི་རྟགས་མཚན་དུ་ས་ཞིང་ཚོང་མཁན་གྱིས་ཉོ་མཁན་དེ་ལ་རང་གི་ལྷམ་ཕུད་ནས་སྟེར་བའི་སྲོལ་ཡོད་པ་རེད།

⁸མི་དེས་བྷོ་ཨཛ་ལ། ས་ཞིང་དེ་ཁྱོད་རང་ཉོས་ཤིག་ཅེས་ཟེར་ནས་རང་གི་ལྷམ་ཕུད་དེ་བྷོ་ཨཛ་ལ་སྟེར་བ་དང་།

⁹བྷོ་ཨཛས། ཁྱེད་རྒན་པོ་རྣམས་དང་གཞན་ཡང་འདིར་འཛོམས་ཡོད་པའི་མི་ཚང་མ་དཔང་དུ་བཙུགས་ཏེ། ངས་དེ་རིང་ནས་བཟུང་ན་ཨོ་མིའི་ལག་ནས་ཨེ་ལི་མེ་ལེག་དང་ཁོའི་བུ་ཀིལ་ཡོན་དང་མཱ་ལོན་གཉིས་ཀྱི་རྒྱུ་ནོར་ལོངས་སྤྱོད་ཀྱི་ཤུལ་དང་བཅས་པ་ཉོ་གི་ཡོད།

¹⁰དེ་ཙམ་མ་ཟད་མཱ་ལོན་གྱི་ཆུང་མ་མོ་ཨབ་པ་རུད་ཀྱང་ངའི་བཟའ་ཟླར་ཉར་གྱི་ཡོད། དེ་ལྟར་བྱས་ན་གཤིན་པོའི་རྒྱུ་ནོར་གང་ཡོད་པ་ཚང་མ་དེའི་ཁྱིམ་ཚང་རང་དུ་གནས་པ་དང་། རང་གི་མི་རྒྱུད་ཀྱང་སོ་སོའི་གྲོང་ཚོའི་ནང་དུ་གནས་ཐུབ་ཡོང་། དེ་བས་ན་དོན་གནད་འདིའི་སྐོར་ལ་ཁྱེད་ཚོ་ཚང་མས་ང་ལ་དཔང་པོ་གནང་དགོས་ཅེས་སྨྲས་པ་དང་།

¹¹རྒན་པོ་རྣམས་ཀྱིས་གཙོས་པས་དེར་འཛོམས་ཡོད་པའི་མི་ཚང་མས། དོན་གནད་དེའི་སྐོར་ང་ཚོས་དཔང་པོ་བྱས་ཆོག ར་ཧེལ་དང་ལེ་ཨ་གཉིས་ཀྱིས་ཡ་ཀོབ་ཀྱི་རིགས་རྒྱུད་སྤེལ་བ་བཞིན་གཙོ་བོ་དཀོན་མཆོག་གིས་ཁྱེད་ཀྱི་བཟའ་ཟླར་ཡང་དེ་བཞིན་འབྱུང་བའི་བྱིན་རླབས་གནང་བར་ཤོག ཨེཕ་རད་ཀྱི་རིགས་རུས་ནང་ནས་ཁྱོད་ནོར་ལོངས་སྤྱོད་དང་ལྡན་ཞིང་བྷེད་ལེ་ཧེམ་དུ་ཁྱེད་ཀྱི་སྙན་གྲགས་ཡོངས་སུ་འཕེལ་བར་ཤོག

¹²གཙོ་བོ་དཀོན་མཆོག་གི་ཐུགས་རྗེས་ཁྱེད་ཀྱི་བཟའ་ཟླ་ན་ཆུང་མ་འདི་ལས་སྐྱེས་པའི་བུ་ཕྲུག་རྣམས་ནི། ཡ་ཧུ་དཱ་དང་ཏ་མཱར་གྱི་བུ་པེ་རེཛའི་ནང་མི་དང་མཚུངས་པ་དགའ་སྐྱིད་ལྡན་པའི་ནང་མི་ཞིག་ཏུ་འགྱུར་བར་ཤོག་ཅེས་སྨོན་འདུན་བྱས་སོ༎

¹³དེ་ནས་བྷོ་ཨཛས་རུད་ལ་རང་གི་ཆུང་མར་བླངས་ཤིང་། གཙོ་བོ་དཀོན་མཆོག་གི་ཐུགས་རྗེས་མོ་མངལ་དང་ལྡན་ནས་བུ་ཞིག་སྐྱེས་སོ།

¹⁴དེ་ནས་བུད་མེད་ཚོས་ན་ཨོ་མི་ལ། གཙོ་བོ་དཀོན་མཆོག་གི་ཐུགས་རྗེས་ཁྱོད་ལ་ཚ་བོ་ཞིག་བྱུང་ཡོད་པས། ད་ཁོང་ལ་བསྟོད་བསྔགས་ཕུལ་ཞིག། རྗེས་སུ་ཁྱོད་ལ་ཚ་བོ་དེས་ལྟ་སྐྱོང་བྱེད་ཡོང་། ཨིསི་རཱཨེལ་གྱི་ཡུལ་ཀུན་ཏུ་ཁོའི་སྙན་གྲགས་འཕེལ་བར་ཤོག

¹⁵ཁྱོད་ཀྱི་མནའ་མས་ཁྱོད་ལ་གཅེས་པོ་བྱེད་ཀྱི་འདུག མོས་ཁྱོད་ལ་བུ་བདུན་ལས་ལྷག་པར་དྲིན་བྱས་པས་མ་ཟད། དེས་ཁྱོད་ལ་ཚ་བོ་ཞིག་ཀྱང་སྟེར་ཡོད། དེས་ཁྱོད་ལ་མི་ཚེ་གསར་པ་ཐོབ་པ་ལྟ་བུའི་སེམས་ལ་དགའ་སྣང་སྦྱིན་པ་དང་། རྗེས་སུ་ཁྱོད་ལོ་རྒས་དུས་དེས་ཁྱོད་ལ་ལྟ་རྟོག་བྱེད་ཡོང་ཞེས་སྨྲས་སོ།

¹⁶དེ་ནས་ན་ཨོ་མིས་ཕྲུ་གུ་དེ་རང་གི་པང་པར་བླངས་ཤིང་དེ་ལ་འཚོ་སྐྱོང་བྱས་སོ།

¹⁷ཁྱིམ་མཚེས་མ་བུད་མེད་ཚོས་ཕྲུ་གུའི་མིང་ཨོ་བེད་ཅེས་བཏགས་ཏེ་མི་ཚང་མས་ན་ཨོ་མི་ལ་བུ་སྐྱེས་བཞག་ཅེས་སྨྲས་པ་དང་། རྗེས་སུ་ཨོ་བེད་ནི་ཡི་ཤེའི་ཕ་དང་། དཱ་བིད་ཀྱི་པོ་པོར་གྱུར་བ་ཡིན་ནོ།

¹⁸པེ་རེཛ་ནས་དཱ་བིད་བར་གྱི་གདུང་རྒྱུད་ནི་གཤམ་གསལ་ལྟར་ཡིན་ནོ། པེ་རེཛ། ཧེཛ་རོན། རམ། ཨམ་མི་ན་དྷབ། ནཱ་ཤོན། སལ་མོན། བྷོ་ཨཛ། ཨོ་བེད། ཡི་ཤེ། དཱ་བིད་བཅས་སོ༎