Read Tibetan — པོད་སྐད་Tibetan Old Testament 2011 ཤ་མུ་ཨེལ་དང་པོ། 11 Bible Online

ཤ་མུ་ཨེལ་དང་པོ། 11 - Tibetan — པོད་སྐད་Tibetan Old Testament 2011 bible

ཤ་མུ་ཨེལ་དང་པོ། 11

¹དེ་ནས་ཟླ་བ་གཅིག་ཙམ་གྱི་རྗེས་སུ་ཨམ་མོན་གྱི་རྒྱལ་པོ་ན་ཧཤེ་ཀྱིས་རང་གི་དམག་མི་འཁྲིད་དེ། གྷིལ་ཨད་ས་ཁུལ་གྱི་གྲོང་ཁྱེར་ཡ་བྷེཤ་ཐོག་ཏུ་དམག་འཐབ་བྱས་ཏེ། གྲོང་ཁྱེར་དེ་མཐའ་བསྐོར་བ་དང་། ཡ་བྷེཤ་ཀྱི་མི་ཚོས་ན་ཧཤེ་ལ། ང་ཚོ་དང་འཆིང་ཡིག་བཞག་པ་ཡིན་ན། ང་ཚོས་ཁྱེད་ལ་རང་གི་རྒྱལ་པོར་ངོས་འཛིན་ཞུ་རྒྱུ་ཡིན་ཞེས་སྨྲས་སོ།

²ན་ཧཤེ་ཀྱིས་ལན་དུ། ངའི་བསམ་པའི་དོན་གནད་ཅིག་འགྲུབ་པ་ཡིན་ན། ངས་ཁྱོད་ཚོ་དང་འཆིང་ཡིག་བཞག་རྒྱུ་ཡིན། དེ་གང་ཡིན་ཟེར་ན། ཨིསི་རཱཨེལ་ཡོངས་ལ་ཞབས་འདྲེན་ཆེན་པོ་ཡོང་བའི་ཆེད་དུ་ངས་ཁྱོད་ཚོ་ཚང་མའི་མིག་གཡས་པ་བཏོན་རྒྱུ་ཡིན་ཞེས་སྨྲས་སོ།

³དེ་ནས་ཡ་བྷེཤ་ཀྱི་འགོ་དཔོན་ཚོས། ཨིསི་རཱཨེལ་གྱི་ས་ཕྱོགས་ཀུན་ལ་བང་ཆེན་རྣམས་གཏོང་ཕྱིར་ང་ཚོར་ཉིན་ཞག་བདུན་གྱི་དུས་ཚོད་གནང་དགོས། གལ་ཏེ་ང་ཚོར་རོགས་བྱེད་མཁན་སུའང་མ་བྱུང་ན། ང་ཚོ་ཁྱེད་ཀྱི་དྲུང་དུ་ཡོང་ནས་མགོ་སྒུར་རྒྱུ་ཡིན་ཞེས་ཞུས་སོ།

⁴བང་ཆེན་རྣམས་ས་ཨུལ་ཡོད་སར་གྷི་བི་ཨཱ་རུ་སླེབས་ནས། ཁོ་ཚོར་གནས་ཚུལ་དེ་བཤད་པས། མི་རྣམས་འུ་ཐུག་ཐབས་ཟད་ཀྱིས་ངུ་འབོད་བྱས་སོ།

⁵ས་ཨུལ་ནི་ཞིང་ནས་རང་གི་གླང་རྣམས་འཁྲིད་ནས་ནང་དུ་ལོག་ཡོང་སྐབས། ཁོས་འདྲི་རྩད་བྱས་ཏེ་སྨྲས་པ། གང་བྱུང་བ་ཡིན་ནམ། མི་རྣམས་ག་རེའི་དོན་ལ་ངུ་བ་ཡིན་ནམ། དེ་ཚོས་ཡ་བྷེཤ་ཀྱི་བང་ཆེན་པ་ཚོས་འཁྱེར་ཡོང་བའི་གནས་ཚུལ་དེ་ས་ཨུལ་ལ་བཤད་པ་དང་།

⁶ས་ཨུལ་གྱིས་དེ་ཐོས་མ་ཐག་ཏུ། དཀོན་མཆོག་གི་ཐུགས་ཉིད་དེ་ཁོའི་སྟེང་དུ་བབས་པས་ཁོ་ཤིན་ཏུ་ཁྲོས་ཏེ།

⁷གླང་གཉིས་བསད་ནས་དུམ་བུར་བཏུབ་སྟེ། ཤའི་དུམ་བུ་དེ་དག་བང་ཆེན་ཚོའི་བརྒྱུད་ནས་ཨིསི་རཱཨེལ་གྱི་ཡུལ་ཕྱོགས་ཀུན་ཏུ་བཏང་སྟེ། གཤམ་གསལ་ལྟར་ཟོན་བསྐུལ་བྱས་སོ། མི་སུས་ཀྱང་ཤ་མུ་ཨེལ་དང་ས་ཨུལ་ལ་དམག་སར་རོགས་མ་བྱས་པ་ཡིན་ན། དེ་ཚོའི་གླང་རྣམས་ཀྱང་དེ་བཞིན་དུམ་བུར་བཏུབ་རྒྱུ་ཡིན་ནོ། ད་གཙོ་བོ་དཀོན་མཆོག་གིས་ག་རེ་གནང་ཡོང་ངམ་བསམ་ནས་ཨིསི་རཱཨེལ་པ་རྣམས་འཇིགས་ཏེ། མི་གཅིག་ཀྱང་མ་ལུས་པར་དེར་ཡོང་ནས་འཛོམས་པ་དང་།

⁸ས་ཨུལ་གྱིས་དེ་ཚོ་བྷེ་ཛེག་ཅེས་པའི་ས་གནས་སུ་འདུ་ཚོགས་བྱས་ཏེ། ཨིསི་རཱཨེལ་ནས་མི་གྲངས་ ༣༠༠,༠༠༠ དང་། ཡ་ཧུ་དཱ་ནས་ ༣༠,༠༠༠ སླེབས་ཡོད་པ་ཡིན་ནོ།

⁹དེ་ཚོས། ཡ་བྷེཤ་ནས་ཡོང་བའི་བང་ཆེན་རྣམས་ལ་སྨྲས་པ། ཁྱོད་ཚོའི་མི་རྣམས་སང་ཞོག་ཉིན་གུང་སྔོན་དུ་དགྲའི་ལག་ནས་དགྲོལ་བར་བྱེད་རྒྱུ་ཡིན་ཞེས་སྨྲོས་ཤིག ཡ་བྷེཤ་ཀྱི་མི་རྣམས་ཀྱིས་གནས་ཚུལ་དེ་ཐོས་ནས་ཧ་ཅང་དགའ་ཞིང་།

¹⁰ན་ཧཤེ་ལ། སང་ཉིན་ང་ཚོ་ཁྱེད་ཀྱི་དྲུང་དུ་མགོ་སྒུར་རྒྱུ་ཡིན་པས། ང་ཚོའི་ཐོག་ཏུ་ཁྱེད་ཀྱི་ཐུགས་འདོད་གང་ཡོད་གནང་ནའང་ཆོག་ཅེས་ཞུས་པ་དང་།

¹¹དེའི་སང་ཞོག་སྔ་པོར་ས་ཨུལ་གྱིས་རང་གི་མི་རྣམས་སྡེ་ཁག་གསུམ་དུ་བགོས་ནས། ནམ་ལངས་སྐབས་སུ་དགྲ་བོའི་སྒར་གྱི་ཕྱོགས་སུ་རྒྱུགས་ཏེ། ཨམ་མོན་པ་རྣམས་ལ་འཐབ་རྒོལ་བྱས་སོ། ཉིན་གུང་བར་དུ་དེ་ཚོ་ཕལ་ཆེར་སྡེབ་གསོད་བཏང་སྟེ། ལྷག་འཕྲོས་ལུས་པ་རྣམས་རང་རང་སོ་སོ་བྲོས་ནས་ཁ་འཐོར་དུ་ཕྱིན་ནོ།

¹²དེ་ནས་ཨིསི་རཱཨེལ་མི་མང་རྣམས་ཀྱིས་ཤ་མུ་ཨེལ་ལ། སྔར་ས་ཨུལ་ང་ཚོའི་རྒྱལ་པོར་བསྐོ་གཞག་བྱེད་མི་རུང་ཞེས་ཟེར་མཁན་དེ་ཚོ་ད་ལྟ་ག་རུ་ཡོད་དམ། མི་དེ་ཚོ་ང་ཚོའི་ལག་ཏུ་རྩིས་སྤྲོད་ཤིག་དང། ང་ཚོས་དེ་དག་གསོད་རྒྱུ་ཡིན་ཞེས་ཞུས་སོ།

¹³ས་ཨུལ་གྱིས། དེ་རིང་མི་སུ་ཞིག་ཀྱང་གསོད་མི་རུང་། གང་ལགས་ཟེར་ན། དེ་རིང་གི་ཉིན་མོར་གཙོ་བོ་དཀོན་མཆོག་གིས་ཨིསི་རཱཨེལ་ལ་ཐར་དགྲོལ་གནང་བ་ཡིན་ནོ་ཞེས་གསུངས་སོ།

¹⁴དེ་ནས་ཤ་མུ་ཨེལ་གྱིས་དེ་ཚོར་སྨྲས་པ། ད་ང་ཚོ་ཚང་མ་གྷིལ་གཱལ་དུ་ཕྱིན་ནས། ས་ཨུལ་ནི་ང་ཚོའི་རྒྱལ་པོ་ཡིན་ཞེས་ཟེར་ནས་སྐྱར་དུ་ཁྱབ་བསྒྲགས་བྱ་དགོས།

¹⁵དེ་ནས་དེ་ཚོ་ཚང་མ་གྷིལ་གཱལ་དུ་ཕྱིན་ནས། གནས་མཆོག་དམ་པ་དེར་ས་ཨུལ་ནི་ང་ཆོའི་རྒྱལ་པོ་ཡིན་ཞེས་ཁྱབ་བསྒྲགས་བྱས་ནས་མཐུན་འབྲེལ་གྱི་དམར་མཆོད་འབུལ་ནས་ས་ཨུལ་དང་ཨིསི་རཱཨེལ་གྱི་མི་མང་ཚང་མས་དུས་སྐབས་དེར་དགའ་སྟོན་ཆེན་པོ་བྱས་སོ༎