Read Tibetan — པོད་སྐད་Tibetan Old Testament 2011 ཤ་མུ་ཨེལ་དང་པོ། 3 Bible Online

ཤ་མུ་ཨེལ་དང་པོ། 3 - Tibetan — པོད་སྐད་Tibetan Old Testament 2011 bible

ཤ་མུ་ཨེལ་དང་པོ། 3

¹བུ་ཤ་མུ་ཨེལ་ཨེ་ལིའི་མངའ་འོག་ཏུ་གནས་ཏེ་གཙོ་བོ་དཀོན་མཆོག་གི་ཞབས་ཏོག་ཞུས་པའི་དུས་སྐབས་དེ་ལ་གཙོ་བོ་དཀོན་མཆོག་གི་འཕྲིན་དང་ཞལ་གཟིགས་སོགས་ཧ་ཅང་དཀོན་པོ་ཡོད་པ་ཡིན་ནོ།

²སྐབས་དེར་ཨེ་ལི་ནི་མིག་གི་ནུས་པ་ཉམས་ནས་ཕལ་ཆེར་ལོང་བ་ལྟ་བུ་ཆགས་ཡོད་པའི་གནས་ལྟངས་དེར། མཚན་མོ་ཞིག་ལ་ཁོ་རང་སོ་སོའི་ཁང་མིག་ཏུ་ཉལ་ནས་ཡོད་དོ།

³ཤ་མུ་ཨེལ་ནི་དམ་པའི་དམ་བཅའི་སྒྲོམ་བཞག་ཡོད་པའི་མཆོད་ཁང་དམ་པའི་ནང་དུ་ཉལ་ཡོད་པ་ཡིན་ནོ། ནམ་མ་ལངས་གོང་དུ་མཆོད་ཁང་གི་སྒྲོན་མེ་རྣམས་ད་དུང་འབར་བཞིན་ཡོད་སྐབས།

⁴གཙོ་བོ་དཀོན་མཆོག་གིས་ཤ་མུ་ཨེལ་ལ་བོས་པ་གནང་བ་དང་། ཁོས་ཞུ་ལན་དུ། ཀྱེ་ཇོ་བོ་ལགས། ང་འདིར་ཡོད་ཅེས་སྨྲས་ནས།

⁵ཨེ་ལི་ཡཱོད་སར་རྒྱུགས་ཕྱིན་ཏེ། ཁྱེད་ཀྱིས་ང་ལ་གསུང་བཀྱོན་པ་ཡིན་པས། ང་འདིར་བཅར་ཡོད་ཅེས་ཞུས་པ་དང་། འོན་ཀྱང་དེའི་ལན་དུ་ཨེ་ལིས། ངས་ཁྱོད་ལ་བོས་རྒྱུ་མ་བྱུང་། ད་ཕར་ཉལ་བར་སོང་ཞིག་ཅེས་སྨྲས་པ་བཞིན། ཤ་མུ་ཨེལ་རང་གི་ཉལ་སར་ལོག་ཕྱིན་ནོ།

⁶གཙོ་བོ་དཀོན་མཆོག་གིས་སླར་ཡང་ཤ་མུ་ཨེལ་བོས་པ་གནང་རུང་། དེ་ལྟར་གསུང་གླེང་གནང་མཁན་དེ་གཙོ་བོ་དཀོན་མཆོག་ཡིན་པའི་སྐོར་བུ་ཤ་མུ་ཨེལ་གྱིས་མ་ཤེས་སོ། གང་ལགས་ཟེར་ན། དེའི་གོང་དུ་གཙོ་བོ་དཀོན་མཆོག་གིས་ཁོ་ལ་དེ་བཞིན་གསུང་གླེང་གནང་མེད་པས་ཕྱིར་རོ། དེ་བས་ན་ཁོ་ཡར་ལངས་ཏེ་ཨེ་ལིའི་རྩར་ཕྱིན་ནས། ཁྱེད་ཀྱིས་ང་ལ་བོས་པ་གནང་བ་ཡིན་པས། ང་འདིར་བཅར་ཡོད་ཅེས་ཞུས་པ་དང་། འོན་ཀྱང་ཨེ་ལིས་ལན་དུ། ཀྱེ་བུ། ངས་ཁྱོད་ལ་སྐད་བཏང་རྒྱུ་མ་བྱུང་། ཕར་ཉལ་བར་སོང་ཞིག་ཅེས་སྨྲས་སོ།

⁸གཙོ་བོ་དཀོན་མཆོག་གིས་ཤ་མུ་ཨེལ་ལ་ལན་ཐེངས་གསུམ་པར་ཡང་བོས་པ་གནང་བས། ཁོ་ཡར་ལངས་ཏེ་ཨེ་ལིའི་མདུན་དུ་ཕྱིན་ནས་སྨྲས་པ། ཁྱེད་ཀྱིས་ང་ལ་བོས་པ་གནང་བས། ང་འདིར་བཅར་ཡོད། དེ་ནས་ཨེ་ལིའི་སེམས་ལ། བུ་ཤ་མུ་ཨེལ་ལ་གསུང་སྐད་གནང་མཁན་དེ་ནི་གཙོ་བོ་དཀོན་མཆོག་རང་ཉིད་ཡིན་པ་རེད་ཅེས་ཤེས་ནས།

⁹ཁོས་ཤ་མུ་ཨེལ་ལ་སྨྲས་པ། ད་ལྟ་ཁོད་ཉལ་བར་སོང་ཞིག། ཁོང་གིས་སླར་ཡང་གསུང་སྐད་གནང་ན། ཁྱོད་ཀྱིས། ཀྱེ་གཙོ་བོ། ཁྱེད་ཀྱིས་ཞབས་ཏོག་པས་ཉན་ཞིང་ཡོད་པས་བཀའ་གནང་རོགས་གནང་ཞེས་ཞུས་ཤིག དེ་ནས་ཤ་མུ་ཨེལ་ཉལ་བར་ཕྱིན་ནོ།

¹⁰གཙོ་བོ་དཀོན་མཆོག་ཕེབས་ནས་དེར་བཞེངས་ཏེ་སྔར་བཞིན། ཤ་མུ་ཨེལ། ཤ་མུ་ཨེལ་ཞེས་བོས་པ་གནང་ངོ་། ཤ་མུ་ཨེལ་གྱིས་ཞུ་ལན་དུ། ཁྱེད་ཀྱི་ཞབས་ཏོག་པས་ཉན་ཞིང་ཡོད་པས་བཀའ་གནང་རོགས་གནང་ཞེས་སྨྲས་སོ།

¹¹གཙོ་བོ་དཀོན་མཆོག་གིས་ཁོ་ལ། ནམ་ཞིག་ངས་ཨིསི་རཱཨེལ་མི་མང་རྣམས་ཀྱི་དཀྱིལ་དུ་འཇིགས་རུང་ཆེ་བའི་བྱ་བ་ཞིག་བྱེད་རྒྱུ་ཡིན་པ་དང་། བྱ་བ་དེའི་སྐོར་ལ་ཐོས་མཁན་ཚང་མ་ཧོན་ཐོར་བར་འགྱུར།

¹²སྔར་ངས་ཨེ་ལིའི་ནང་མིའི་ཐོག་ཏུ་སྨྲས་པའི་ཟོན་བརྡའི་ཉེན་ཚིག་ཚང་མ་ཉིན་མོ་དེར་མགོ་ནས་འཛུག་བར་སྒྲུབ་པར་བྱེད་རྒྱུ་ཡིན།

¹³ཨེ་ལིའི་བུ་རྣམས་ཀྱིས་ངའི་སྐོར་ལ་ལོག་གཏམ་བཤད་པའི་ཉེས་ལན་དུ། ངས་ཁོའི་ནང་མིའི་ཐོག་ཏུ་དུས་གཏན་གྱི་ཆེད་དུ་ཉེས་ཆད་གཏོང་རྒྱུ་ཡིན་ཞེས་ཁོ་ལ་སྨྲས་ཟིན་པ་ཡིན། དེ་ཚོས་ལས་ངན་གང་བྱེད་བཞིན་པ་དེ་ཨེ་ལིས་ཤེས་ཀྱང་། ཁོས་དེ་ཚོ་ལ་བཀག་འགོག་མ་བྱས་སོ།

¹⁴དེ་བས་ན་དེ་ཚོས་བྱས་པའི་སྡིག་པ་ཉེན་ཚབས་ཆེ་བའི་འགྲུབ་འབྲས་དེ་ནི་དམར་མཆོད་འམ་འབུལ་བ་ཇི་འདྲ་ཞིག་གིས་ཀྱང་སེལ་ཐབས་མེད་པ་ཡིན་ནོ། ཞེས་ངས་ཨེ་ལིའི་ནང་མི་རྣམས་ལ་ནན་ཏན་ཆེན་པོས་གསལ་བསྒྲགས་བྱས་པ་ཡིན།

¹⁵དེ་ནས་ཤ་མུ་ཨེལ་ཞོག་པ་བར་དུ་ཉལ་སར་རིལ་ནས་བསྡད་དོ། དེ་རྗེས་སུ་ཁོ་ལངས་ཏེ་གཙོ་བོ་དཀོན་མཆོག་གི་མཆོད་ཁང་གི་གཟིམས་སྒོ་ཕྱེས་ཤིང་། རང་ལ་བྱུང་བའི་ཞལ་གཟིགས་དེའི་སྐོར་ཨེ་ལིའི་མདུན་དུ་བཤད་མ་ནུས་སོ།

¹⁶དེ་ནས་ཨེ་ལིས། ཀྱེ་ངའི་བུ་ཤ་མུ་ཨེལ། ཞེས་བོས་པའི་ལན་དུ། ཤ་མུ་ཨེལ་གྱིས་ལགས་ཇོ་བོ་ང་འདིར་ཡོད་ཅེས་ཞུས་པ་དང་།

¹⁷ཨེ་ལིས་སྨྲས་པ། གཙོ་བོ་དཀོན་མཆོག་གིས་ཁྱོད་ལ་གང་གསུངས་པ་དེ་སྦས་གསང་མེད་པར་ང་ལ་ཤོད་ཅིག གལ་ཏེ་ཁྱོད་ཀྱིས་ང་ལ་སྦས་གསང་བྱེད་དེ་གནས་ཚུལ་ཆ་ཚང་མ་བཤད་ན། དཀོན་མཆོག་གིས་ཁྱོད་ལ་བཀའ་ཆད་དྲག་པོ་གནང་ངེས་པ་ཡིན་ནོ།

¹⁸དེ་ནས་ཤ་མུ་ཨེལ་གྱིས་ཁོ་ལ་སྦས་གསང་མེད་པར་གནས་ཚུལ་ཚང་མ་གསལ་པོར་བཤད་པ་དང་། ཨེ་ལིས། ཁོང་ནི་གཙོ་བོ་དཀོན་མཆོག་ཡིན་པས། གང་ལེགས་པ་ཡིན་པ་དེ་ཁོང་གིས་གནང་བར་འགྱུར་ཞེས་སྨྲས་སོ།

¹⁹ཤ་མུ་ཨེལ་ལོ་ན་ཡར་ལོན་བཞིན་པ་དང་། གཙོ་བོ་དཀོན་མཆོག་ཁོ་དང་མཉམ་དུ་གནས་ཤིང་། ཤ་མུ་ཨེལ་གྱིས་གང་བཤད་ཚད་ཚང་མ་ཁོང་གིས་བདེན་པར་འགྲུབ་པར་མཛད་དོ།

²⁰ཨིསི་རཱཨེལ་ཡུལ་གྱི་མཐའ་མཚམས་གཅིག་ནས་གཞན་བར་ཡུལ་མི་ཚང་མས། ཤ་མུ་ཨེལ་ནི་གཙོ་བོ་དཀོན་མཆོག་གི་ལུང་སྟོན་པ་ངོ་མ་ཞིག་ཡིན་པ་དེ་ཤེས་སོ།

²¹གཙོ་བོ་དཀོན་མཆོག་ནི་ཤི་ལཱོ་རུ་སྔར་ཤ་མུ་ཨེལ་ལ་ཞལ་གཟིགས་གནང་ཞིང་གསུང་གླེང་མཛད་པའི་གནས་དེ་རང་དུ་མུ་མཐུད་ནས་མངོན་པར་མཛད་དོ། ཤ་མུ་ཨེལ་གྱིས་བཤད་པའི་སྐབས་སུ་ཨིསི་རཱཨེལ་པ་ཡོངས་ཀྱི་ཉན་བཞིན་ཡོད་དོ༎