Read Tibetan — པོད་སྐད་Tibetan Old Testament 2011 ཤ་མུ་ཨེལ་དང་པོ། 6 Bible Online

ཤ་མུ་ཨེལ་དང་པོ། 6 - Tibetan — པོད་སྐད་Tibetan Old Testament 2011 bible

ཤ་མུ་ཨེལ་དང་པོ། 6

¹གཙོ་བོ་དཀོན་མཆོག་གི་དམ་བཅའི་སྒྲོམ་དེ་ཕེ་ལེ་ཤེད་དུ་ཟླ་བ་བདུན་བར་དུ་གནས་པའི་རྗེས་སུ།

²ཡུལ་མི་ཚོས་བླ་མ་རྣམས་དང་རྫུ་འཕྲུལ་མཁན་རྣམས་བོས་ཏེ་དེ་དག་ལ། ད་ང་ཚོས་གཙོ་བོ་དཀོན་མཆོག་གི་དམ་བཅའི་སྒྲོམ་དེ་ལ་ག་རེ་བྱེད་ན་དགའམ། གལ་ཏེ་ང་ཚོས་སྒྲོམ་དེ་རང་གནས་སུ་བཏང་བ་ཡིན་ན། དེ་དང་མཉམ་དུ་དངོས་པོ་གང་འདྲ་ཞིག་བཏང་ན་དགའམ་ཞེས་དྲིས་པའི་ལན་དུ།

³དེ་ཚོས་སྨྲས་པ། གལ་ཏེ་ཁྱོད་ཚོས་ཨིསི་རཱཨེལ་གྱི་དཀོན་མཆོག་གི་དམ་བཅའི་སྒྲོམ་དེ་ཕྱིར་ལོག་བྱེད་པ་ཡིན་ན། དེ་དང་མཉམ་དུ་ཁྱོད་ཚོས་སྡིག་སེལ་གྱི་ཆེད་དུ་འབུལ་བ་ཞིག་ངེས་པར་གཏོང་དགོས། འབུལ་བ་མེད་པར་དམ་བཅའི་སྒྲོམ་གཅིག་པུར་གཏོང་མི་ཉན། དེ་ལྟར་བྱས་པའི་སྒོ་ནས་ཁྱོ་ཚོ་ནད་ལས་དྲག་གསོ་རྒྱུ་ཡིན་པ་དང་། ཁོང་གིས་ཁྱོད་ཚོའི་ཐོག་ཏུ་ད་བར་མུ་མཐུད་ཀྱིས་ཉེས་ཆད་གནང་དགོས་དོན་དེའང་ཁྱོད་ཚོས་རྟོགས་པར་འགྱུར་རོ།

⁴དེར་ཡུལ་མི་རྣམས་ཀྱིས། ད་ང་ཚོས་ཁོང་ལ་འབུལ་བ་གང་འདྲ་ཞིག་འབུལ་ན་ལེགས་སམ་ཞེས་དྲིས་པའི་ལན་དུ། དེ་ཚོས། ཕེ་ལེ་ཤེད་པའི་རྒྱལ་པོ་ལྔ་ལ་དམིགས་ཏེ། རྒྱལ་པོ་རེ་རེའི་དོན་དུ་གསེར་ལས་བཟོས་པའི་གཉན་འབུར་གྱི་འདྲ་དཔེ་རེ་དང་། དེ་བཞིན་གསེར་ལས་བཟོས་པའི་བྱི་བའི་འདྲ་དཔེ་རེ་བཟོས་ཏེ་གཏོང་དགོས། ནད་ཡམས་དེ་ནི་ཁྱོད་ཚོ་དང་ཁྱོད་ཚོའི་རྒྱལ་པོ་ལྔའི་ཐོག་ཏུ་ཁྱད་མེད་དུ་ཁྱབ་ཡོད་དོ།

⁵དེ་བས་ན་ཁྱོད་ཚོས་རང་གི་ཡུལ་དུ་གནོད་འཚེ་བྱེད་པའི་གཉན་འབུར་དང་བྱི་བའི་འདྲ་དཔེ་དེ་དག་ངེས་པར་དུ་བཟོས་ཏེ། ཨིསི་རཱཨེལ་གྱི་དཀོན་མཆོག་ལ་ཆེས་བསྟོད་ཞུ་དགོས། དེ་ལྟར་བྱེད་ན་ཁོང་གིས་ཁྱོད་ཚོ་དང་། ཁྱོད་ཚོའི་ལྷ་རྟེན་རྣམས་དང་། དེ་བཞིན་ཁྱོད་ཚོའི་ཡུལ་དུ་ཉེས་ཆད་གནང་བར་མཚམས་འཇོགས་མཛད་པར་སྲིད་དོ།

⁶སྔར་ཨི་ཇིབ་ཀྱི་རྒྱལ་པོ་དང་ཨི་ཇིབ་པ་ཚོས་རང་གི་སེམས་གཤིས་གྱོང་པོ་བྱས་པ་བཞིན། ཁྱོད་ཚོས་ཀྱང་ག་རེའི་དོན་དུ་དེ་ལྟར་སེམས་གཤིས་གྱོང་པོ་བྱེད་དགོས་སམ། ཁོ་ཆོས་ཨིསི་རཱཨེལ་པ་རྣམས་ཨི་ཇིབ་ནས་ཕྱིར་ཐོན་བྱེད་མ་བཅུག་བར་དུ་དཀོན་མཆོག་གིས་དེ་ཚོར་ཇི་ལྟར་གླེན་པ་མཛད་པ་དེ་ཁྱོད་ཚོས་མ་བརྗེད་ཅིག

⁷ད་ཁྱོད་ཚོས་གླང་འདྲུད་འཁོར་ལོ་གསར་པ་ཞིག་བཟོས་ཏེ། ད་བར་གཉའ་ཤིང་བརྒྱབ་མེད་པའི་བ་གཉིས་འཁྲིད་དེ་དེར་འདོགས་དགོས། དེ་ཚོའི་བེའུ་རྣམས་ནི་བ་རའི་ནང་དུ་ཕྱིར་ལོག་དེད་དགོས།

⁸དེ་རྗེས་གཙོ་བོ་དཀོན་མཆོག་གི་དམ་བཅའི་སྒྲོམ་དེ་ལེན་ནས་གླང་འདྲུད་ཁར་བཞག་སྟེ། ཁྱོད་ཚོས་ཁོང་ལ་སྡིག་སེལ་གྱི་འབུལ་བའི་ཚུལ་དུ་གཏོང་རྒྱུ་ཡིན་པའི་གསེར་ལས་བཟོས་པའི་འདྲ་དཔེ་དེ་དག་སྒམ་ཞིག་གི་ནང་དུ་བླུགས་ཏེ། དམ་བཅའི་སྒྲོམ་གྱི་ལོགས་སུ་བཞག་དགོས། དེ་རྗེས་གླང་འདྲུད་དེ་རང་མོས་བཞིན་དུ་འགྲོར་བཅུག་སྟེ།

⁹དེ་གང་དུ་འགྲོ་སར་ཁྱོད་ཚོས་བལྟ་དགོས། གལ་ཏེ་གླང་འདྲུད་དེ་གྲོང་འཁྱེར་བྷེད་ཤེ་མེཤི་ཀྱི་ཕྱོགས་སུ་ཕྱིན་པ་ཡིན་ན་ང་ཚོའི་ཐོག་ཏུ་བྱུང་བའི་ཉེན་ཚབས་ཆེ་བའི་རྐྱེན་ངན་དེ་བཞིན་ཨིསི་རཱཨེལ་པའི་དཀོན་མཆོག་གིས་བཏང་བ་ཡིན་པར་ཤེས་དགོས་མོད། འོན་ཀྱང་ས་ཕྱོགས་དེར་མ་ཕྱིན་ན་ང་ཚོའི་ཐོག་ཏུ་ནད་ཡམས་དེ་དག་རང་བཞིན་གྱིས་བྱུང་བ་ཞིག་ཡིན་པ་ལས་ཁོང་གིས་བཏང་བ་མ་ཡིན་པར་ང་ཚོས་ཤེས་དགོས་སོ་ཞེས་སྨྲས་སོ།

¹⁰ཁོ་ཚོར་མངགས་བྱ་བྱས་པ་བཞིན་ཁོ་ཚོས་བ་གཉིས་འཁྲིད་ཡོང་སྟེ། དེ་དག་གླང་འདྲུད་འཁོར་ལོར་སྒྲགས་ཤིང་། བེའུ་རྣམས་བ་རའི་ནང་དུ་བཀག་ནས་བཞག་གོ

¹¹དེ་རྗེས་དམ་བཅའི་སྒྲོམ་དང་ཆབས་ཅིག་གསེར་ལས་བཟོས་པའི་གཉན་འབུར་དང་། བྱི་བའི་འདྲ་དཔེ་བླུགས་པའི་སྒམ་དེའང་གླང་འདྲུད་ཁར་བཞག་གོ

¹²བ་དེ་གཉིས་ནི་བྷེད་ཤེ་མེཤི་ཀྱི་འགྲོ་སའི་ལམ་དུ་ཕྱིན་ཏེ་གཡས་གཡོན་གང་དུའང་མ་ཕྱོགས་པར་ཐད་ཀར་གྲོང་ཁྱེར་དེའི་ཕྱོགས་སུ་སྐད་བརྒྱབ་བཞིན་ཕྱིན་པ་དང་། ཕེ་ལེ་ཤེད་པའི་རྒྱལ་པོ་ལྔའང་བྷེད་ཤེ་མེཤི་ཀྱི་ས་མཚམས་བར་དུ་བ་དེ་གཉིས་ཀྱི་རྗེས་སུ་ཕྱིན་པ་ཡིན་ནོ།

¹³སྐབས་དེར་བྷེད་ཤེ་མེཤི་གྱི་ཡུལ་མི་རྣམས་ལུང་གཤོང་དུ་གྲོའི་སྟོན་ཐོག་རྔ་བཞིན་ཡོད་པས། ཁོ་ཚོས་བློ་བུར་དུ་ཡར་བལྟས་པས་དམ་བཅའི་སྒྲོམ་དེ་མཐོང་ནས་ཧ་ཅང་དགའ་ཚོར་ཆེན་པོ་བསྐྱེད་དོ།

¹⁴གླང་འདྲུད་དེ་ནི་བྷེད་ཤེ་མེཤི་པ་མིང་ལ་ཡོ་ཤུ་ཨ་ཞེས་པའི་སྐྱེ་བོ་ཞིག་གི་ཞིང་དུ་བསླེབས་ཏེ། བྲག་ཆེན་པོ་ཞིག་གི་ཉེ་འགྲམ་དུ་བསྡད་དོ། དེ་ནས་མི་དེ་ཚོས་གླང་འདྲུད་དེ་བཤག་ནས། བ་དེ་གཉིས་བསད་དེ་གཙོ་བོ་དཀོན་མཆོག་ལ་སྦྱིན་སྲེག་གི་དམར་མཆོད་དུ་ཕུལ་ལོ།

¹⁵ལེ་ཝི་པ་ཚོས་གཙོ་བོ་དཀོན་མཆོག་གི་དམ་བཅའི་སྒྲོམ་དང་གསེར་གྱི་འདྲ་དཔེ་བླུགས་ཡོད་པའི་སྒམ་དེ་གཉིས་ཡར་བཏེགས་ནས་བྲག་ཆེན་པོ་དེའི་ཁར་བཞག་གོ དེ་རྗེས་བྷེད་ཤེ་མེཤི་ཀྱི་ཡུལ་མི་ཚོས་གཙོ་བོ་དཀོན་མཆོག་ལ་སྦྱིན་སྲེག་གི་དམར་མཆོད་དང་དམར་མཆོད་གཞན་རྣམས་ཕུལ་ལོ།

¹⁶ཁོ་ཚོས་གང་བྱས་པ་དེ་ཕེ་ལེ་ཤེད་པའི་རྒྱལ་པོ་ལྔས་བལྟས་ནས། ཉིན་མོ་དེ་རང་ལ་ཁོ་ཚོ་ཨེག་རོན་དུ་ཕྱིར་ལོག་བྱས་སོ།

¹⁷ཕེ་ལེ་ཤེད་པ་ཚོས་གཙོ་བོ་དཀོན་མཆོག་ལ་རང་གི་སྡིག་སེལ་གྱི་འབུལ་བའི་ཚུལ་དུ་ཕུལ་བའི་གསེར་ལས་བཟོས་པའི་གཉེན་འབུར་གྱི་འདྲ་དཔེ་ལྔ་ནི། གཤམ་གསལ་གྲོང་ཁྱེར་རེ་རེའི་དོན་དུ་འབུལ་བ་རེ་ཡིན་ནོ། ཨཤ་དྷོད་དང་། གྷ་ཛ། ཨཤ་ཀེ་ལོན། གྷད་དང་། ཨེག་རོན་བཅས་ཡིན་ནོ།

¹⁸དེ་ཙམ་མ་ཟད་ཕེ་ལེ་ཤེད་པའི་རྒྱལ་པོ་ལྔས་སྲིད་སྐྱོང་བྱེད་པའི་གྲོང་ཁྱེར་ལྕགས་རི་དང་ལྡན་པ་དང་། དེ་བཞིན་ལྕགས་རི་མེད་པའི་གྲོང་གསེབ་འཐུད་པའི་གྲོང་ཁྱེར་རེ་རེའི་དོན་དུ། ཁོ་ཚོས་གསེར་ལས་བཟོས་པའི་བྱི་བའི་འདྲ་དཔེ་རེ་རེའང་བཏང་ངོ་། ཁོ་ཚོས་གཙོ་བོ་དཀོན་མཆོག་གི་དམ་བཅའི་སྒྲོམ་བཞག་པའི་བྲག་ཆེན་པོ་དེ་ནི། བྷེད་ཤེ་མེཤི་པ་ཡོ་ཤུ་ཨའི་ཞིང་གི་ནང་དུ་ད་ལྟའང་ཡོད་པ་ཡིན་ཏེ། དེ་ནི་སྔར་གང་བྱུང་བའི་དཔང་པོའི་ཚུལ་དུ་གནས་བཞིན་ཡོད་པ་ཡིན་ནོ།

¹⁹བྷེད་ཤེ་མེསེ་ཀྱི་ཡུལ་མི་ཚོས་དམ་བཅའི་སྒྲོམ་གྱི་ནང་དུ་བལྟས་པས། གཙོ་བོ་དཀོན་མཆོག་གིས་དེ་ཚོའི་ཁོངས་ནས་མི་གྲངས་བདུན་བཅུ་ཐམ་པ་བསད་པ་གནང་ངོ་། དེ་ཚོའི་དཀྱིལ་དུ་དེ་ལྟ་བུའི་མི་མང་སྡེབ་གསོད་བྱུང་བར་བརྟེན་མི་ཚོགས་ཀྱིས་མྱ་ངན་ཆེན་པོ་བྱས་སོ༎

²⁰དེར་བརྟེན་པས་བྷེད་ཤེ་མེཤི་ཀྱི་མི་རྣམས་ཀྱིས་སྨྲས་པ། དམ་པའི་དཀོན་མཆོག་གཙོ་བོ་དཀོན་མཆོག་གི་སྤྱན་སྔར་སུ་ཞིག་གནས་པར་ནུས་སམ། ང་ཚོ་ཁོང་ལས་ཐར་བའི་ཕྱིར་ཁོང་ས་ཕྱོགས་གང་དུ་གཏོང་ན་དགའམ།

²¹དེ་ཚོས་ཀིར་ཡད་ཡ་རིམ་གྱི་མི་རྣམས་ཡོད་སར་བང་ཆེན་རྣམས་བཏང་ནས། ཕེ་ལེ་ཤེད་པ་ཚོས་གཙོ་བོ་དཀོན་མཆོག་གི་དམ་བཅའི་སྒྲོམ་དེ་ཕྱིར་ལོག་བྱས་འདུག་པས། ད་ཁྱོད་ཚོ་ཡོང་ནས་དེ་ཕར་འཁྱེར་ཞིག་ཅེས་སྨྲས་སོ༎