Read Tibetan — པོད་སྐད་Tibetan Old Testament 2011 ཤ་མུ་ཨེལ་དང་པོ། 7 Bible Online

ཤ་མུ་ཨེལ་དང་པོ། 7 - Tibetan — པོད་སྐད་Tibetan Old Testament 2011 bible

ཤ་མུ་ཨེལ་དང་པོ། 7

¹དེ་ནས་ཀིར་ཡད་ཡ་རིམ་གྱི་ཡུལ་མི་རྣམས་ཡོང་ནས། གཙོ་བོ་དཀོན་མཆོག་གི་དམ་བཅའི་སྒྲོམ་དེ་རི་ཁུལ་དུ་གནས་སྡོད་བྱེད་མཁན་མིང་ལ་ཨ་བི་ན་དབ་ཅེས་པ་དེའི་ཁང་པར་གདན་དྲངས་ཤིང་། ཁོའི་བུ་ཨེལ་ཨ་ཛར་ཞེས་པ་དེ་བསྔོ་འབུལ་བྱས་ཏེ་སྒྲོམ་གྱི་དོ་དམ་པར་བསྐོ་བཞག་བྱས་སོ༎

²གཙོ་བོ་དཀོན་མཆོག་གི་དམ་བཅའི་སྒྲོམ་དེ་ཀིར་ཡད་ཡ་རིམ་དུ་ལོ་ངོ་ཉི་ཞུ་རིང་དུ་ལུས་པ་དང་། དུས་ཡུན་རིང་པོ་དེའི་རིང་ལ་ཨིསི་རཱཨེལ་མི་མང་ཡོངས་ནས་གཙོ་བོ་དཀོན་མཆོག་ལ་མགོན་སྐྱབས་ཞུས་ཏེ་འབོད་བཀུལ་བྱེད་དོ།

³དེར་ཤ་མུ་ཨེལ་གྱིས་ཨིསི་རཱཨེལ་མི་མང་རྣམས་ལ། གལ་ཏེ་ཁྱོད་ཚོ་སྙིང་ཐག་པ་ནས་གཙོ་བོ་དཀོན་མཆོག་གི་ཕྱོགས་སུ་སེམས་བསྒྱུར་འདོད་བྱེད་ན། ཁྱོད་ཚོས་ཕྱི་མིའི་ལྷ་རྟེན་ཡོངས་དང་། དེ་བཞིན་ལྷ་མོ་ཨསི་ཏཱར་བཅས་པ་རང་གི་ཁྲོད་ནས་ཕྱིར་འདོན་བྱེད་དགོས་པ་དང་། རང་ཉིད་གཙོ་བོ་དཀོན་མཆོག་ལ་བསྔོ་འབུལ་ཞུས་ཏེ། ཁོང་འབའ་ཞིག་ལ་བསྙེན་བཀུར་ཞུ་རྒྱུའི་ཐག་གཅོད་བྱེད་ན། ཁོང་གིས་ཁྱོད་ཚོ་ཕེ་ལེ་ཤེད་པའི་མངའ་འོག་ནས་སྐྱབས་རྒྱུ་ཡིན་ཞེས་སྨྲས་སོ།

⁴དེ་ནས་ཨིསི་རཱཨེང་པ་རྣམས་ཀྱི་བྷལ་དང་ཨསི་ཏཱར་ཏེ་བཅས་ཀྱི་སྐུ་འདྲ་རྣམས་ཕྱིར་འདོན་བྱས་ཏེ། གཙོ་བོ་དཀོན་མཆོག་འབའ་ཞིག་ལ་བསྙེན་བཀུར་ཞུས་སོ།

⁵ཤ་མུ་ཨེལ་གྱིས་ཨིསི་རཱཨེལ་པ་ཐམས་ཅད་མིཛ་པཱ་རུ་འཛོམ་དགོས་པའི་ལན་བཏང་ནས། ད་ས་གནས་དེར་ངས་ཁྱོད་ཚོའི་དོན་དུ་གཙོ་བོ་དཀོན་མཆོག་ལ་སྨོན་ལམ་ཞུ་གི་ཡིན་ཞེས་སྨྲས་པས།

⁶དེ་ཚོ་ཚང་མ་མིཛ་པཱ་རུ་འཛོམས་ནས། ཆུ་བཅུས་ཏེ་གཙོ་བོ་དཀོན་མཆོག་ལ་མཆོད་པར་ཕུལ་ཞིང་དེ་ཉིན་ཁོ་ཚོ་ཉིན་གང་སྨྱུང་གནས་སྲུང་སྟེ། ང་ཚོས་གཙོ་བོ་དཀོན་མཆོག་གི་སྤྱན་སྔར་སྡིག་པ་བྱས་པ་ཡིན་ཞེས་སྨྲས་སོ། (ཤ་མུ་ཨེལ་གྱི་ཨིསི་རཱཨེལ་པ་ཚོའི་རྩོད་རྙོག་རྣམས་མིཛ་པཱ་རུ་ཐག་གཅོད་བྱས་སོ།)

⁷ཕེ་ལེ་ཤེད་པ་ཚོས་ཨིསི་རཱཨེལ་པ་རྣམས་མིཛ་པཱ་རུ་འཛོམས་ཡོད་པའི་གནས་ཚུལ་ཐོས་ནས། ཕེ་ལེ་ཤེད་པའི་རྒྱལ་པོ་ལྔས་རང་གི་མི་རྣམས་འཁྲིད་དེ་དེ་ཚོའི་ཐོག་ཏུ་དམག་དྲངས་པར་ཕྱིན་པས། ཨིསི་རཱཨེལ་པ་ཚོས་གནས་ཚུལ་དེ་ཐོས་ནས་འཇིགས་སྣང་བསྐྱེད་དེ།

⁸ཤ་མུ་ཨེལ་ལ་ཞུས་པ། ང་ཚོ་ཕེ་ལེ་ཤེད་པའི་ལག་ནས་སྐྱོབ་པའི་ཕྱིར་དུ་ཁྱེད་ཀྱིས་གཙོ་བོ་དཀོན་མཆོག་ང་ཚོའི་དཀོན་མཆོག་ལ་མུ་མཐུད་དེ་སྨོན་ལམ་འདེབས་པ་གནང་རོགས་གནང་།

⁹དེར་ཤ་མུ་ཨེལ་གྱིས་ལུག་གུ་ཆུང་དུ་ཞིག་བསད་དེ། གཙོ་བོ་དཀོན་མཆོག་ལ་སྦྱིན་སྲེག་གི་དམར་མཆོད་དུ་ཆ་ཚང་ཕུལ་ཏེ། ཨིསི་རཱཨེལ་པ་རྣམས་ལ་མགོན་སྐྱབས་གནང་རོགས་གནང་ཞེས་ཁོས་གཙོ་བོ་དཀོན་མཆོག་ལ་སྨོན་ལམ་འདེབས་པས། གཙོ་བོ་དཀོན་མཆོག་གིས་ཁོའི་སྨོན་ལམ་གསན་པ་གནང་ངོ་།

¹⁰ཤ་མུ་ཨེལ་གྱིས་དམར་མཆོད་འབུལ་བཞིན་པའི་སྐབས་སུ། ཕེ་ལེ་ཤེད་པ་རྣམས་དམག་བརྒྱབ་པར་ཡོང་བས། གཙོ་བོ་དཀོན་མཆོག་གིས་དེ་ཚོའི་ཁར་འབྲུག་སྐད་ཤུགས་ཆེན་པོ་ཞིག་ལྡིར་དུ་བཅུག་པ་དང་། ཁོ་ཚོར་སེམས་འཚབས་ཆེན་པོ་བྱུང་སྟེ། དངངས་སྐྲག་བསྐྱེད་དེ་བྲོས་ཕྱིན་ནོ།

¹¹ཨིསི་རཱཨེལ་པ་རྣམས་མིཛ་པཱ་ནས་ཐོན་ཏེ་ཕེ་ལེ་ཤེད་པ་རྣམས་ལ་བྷེད་ཀར་དུ་རྗེས་དེད་བྱས་པ་དང་། དེ་དག་ལམ་དུ་བསད་དོ།

¹²དེ་ནས་ཤ་མུ་ཨེལ་གྱིས་རྡོ་ཞིག་བླངས་ནས། མིཛ་པཱ་དང་ཤེན་གཉིས་ཀྱི་བར་མཚམས་ལ་རྡོ་དེ་བཞག་སྟེ། གཙོ་བོ་དཀོན་མཆོག་གིས་འདི་བར་དུ་ང་ཚོ་ལ་སྐྱབས་གྲོགས་མཛད་པ་ཡིན་ཞེས་བརྗོད་ནས། དེ་ལ་སྐྱབས་གྲོགས་ཀྱི་རྡོ་ཞེས་མིང་བཏགས་སོ།

¹³དེ་བཞིན་ཕེ་ལེ་ཤེད་པ་རྣམས་ཕམ་སྟེ། ཤ་མུ་ཨེལ་གྱི་ཚེ་གང་རིང་ལ་གཙོ་བོ་དཀོན་མཆོག་གིས་ཁོ་ཚོ་སླར་ཡང་ཨིསི་རཱཨེལ་གྱིས་ཁུལ་དུ་བཙན་རྒོལ་བྱེད་མ་བཅུག་གོ

¹⁴སྔར་ཕེ་ལེ་ཤེད་པ་ཚོས་ཨེག་རོན་དང་གྷད་གཉིས་ཀྱི་བར་ལ་ཡོད་པའི་གྲོང་ཁྱེར་བཙན་བཟུང་བྱས་པ་རྣམས་ཨིསི་རཱཨེལ་ལ་ཕྱིར་ལོག་བྱས་པས། དེ་རྗེས་ཨིསི་རཱཨེལ་གྱིས་རང་གི་ས་ཁུལ་ཚང་མ་ཕྱིར་ལོག་ཐོབ་པས། ཨིསི་རཱཨེལ་པ་དང་ཀ་ནན་པ་གཉིས་ཀྱི་བར་ལའང་ཞི་མཐུན་བྱུང་ངོ་།

¹⁵ཤ་མུ་ཨེལ་གྱིས་རང་གི་ཚེ་གང་རིང་དུ་ཨིསི་རཱཨེལ་ལ་སྲིད་སྐྱོང་བྱས་སོ།

¹⁶ལོ་ལྟར་རེ་བཞིན་བྷེ་ཐེལ་དང་གྷིལ་གཱལ་དང་མིཛ་པཱའི་ས་ཁུལ་ཁག་ཏུ་ཕྱིན་ནས། དེ་གའི་མི་མང་གི་རྩོད་རྙོག་རྣམས་ཐག་གཅོད་བྱེད་བཞིན་ཡོད་དོ།

¹⁷དེ་རྗེས་རང་གི་གནས་ཁང་ཡོད་པའི་ས་གནས་ར་མཱ་ཞེས་པ་དེར་ཕྱིར་ལོག་བྱས་ནས་ཁྲིམས་དཔོན་གྱི་ཚུལ་དུ་གནས་ཏེ། དེར་ཁོང་གིས་གཙོ་བོ་དཀོན་མཆོག་ལ་མཆོད་ཁྲི་ཞིག་བཞེངས་སོ༎