Read Tibetan — པོད་སྐད་Tibetan Old Testament 2011 ཤ་མུ་ཨེལ་དང་པོ། 9 Bible Online

ཤ་མུ་ཨེལ་དང་པོ། 9 - Tibetan — པོད་སྐད་Tibetan Old Testament 2011 bible

ཤ་མུ་ཨེལ་དང་པོ། 9

¹བྷེན་ཡ་མིན་གྱི་སྡེ་རིགས་ལས་ཡིན་པ། མིང་ལ་ཀིཤེ་ཞེས་པ། ལོངས་སྤྱོད་དང་ལྡན་ཞིང་གཟི་བརྗིད་མངའ་ཐང་ཆེ་བའི་མི་ཞིག་ཡོད་པ་ཡིན། ཁོ་ནི་ཨ་བྷི་ཨེལ་གྱི་བུའམ་ཛེ་རོར་གྱི་ཚ་བོ་ཡིན་པ་དང་། ཨ་ཕི་ཡཱའི་རིགས་རུས་ཀྱི་ཁྱིམ་ཚང་བྷེ་ཀོ་རད་གྱི་ཁོངས་སུ་རྟོགས་པའི་མི་ཞིག་ཡིན་ཏེ།

²ཁོ་ལ་བུ་ཞིག་ཡོད་ཅིང་། དེའི་མིང་ལ་ས་ཨུལ་ཟེར་གྱི་ཡོད་པ་ཡིན་ནོ། ཁོ་ནི་ལང་འཚོ་དར་ལ་བབ་པའི་གཞོན་ནུ་བྱད་གཟུགས་ལེགས་པ་ཞིག་ཡོད་པ་ཡིན་པ་མ་ཟད། ཨིསི་རཱཨེལ་ཡོངས་ཀྱི་མི་རྣམས་ནི་ཁོའི་དཔུང་པའི་མཐོ་ཚད་ཙམ་ལས་མེད་ཅིང་། ཡུལ་མི་ཀུན་ལས་ཁོ་ནི་བྱད་གཟུགས་ལེགས་པ་ཞིག་ཡོད་པ་ཡིན་པ་དང།

³ཀིཤེ་ཀྱི་བོང་བུ་འགའ་ཤས་རླག་སྟོར་ཤོར་བས། ཁོས་ས་ཨུལ་ལ་གཡོག་པོའི་ཁོངས་ནས་གཅིག་འཁྲིད་དེ། བོང་བུ་རྣམས་འཚོལ་བར་སོང་ཞིག་ཅེས་སྨྲས་པ་བཞིན།

⁴ཁོ་གཉིས་ཨེཕ་ར་ཡིམ་གྱི་རི་བརྒྱུད་ཁུལ་དང་། ཤ་ལི་ཤཱའི་ཡུལ་གྲུ་ཁག་ཏུ་ཕྱིན་ཀྱང་བོང་བུ་མ་རྙེད་དོ། ད་དུང་ཤ་ལིམ་གྱིས་ཁུལ་བརྒྱུད་དེ་ཕྱིན་མོད། འོན་ཀྱང་དེ་རུའང་བོང་བུ་རྣམས་མ་རྙེད་དོ། དེ་རྗེས་ཁོ་ཚོ་བྷེན་ཡ་མིན་གྱིས་ཁུལ་ཁག་ཏུ་ཕྱིན་ནའང་བོང་བུ་མ་བརྙེད་དོ།

⁵དེ་ནས་ཁོ་ཚོ་ཛུཕ་ཅེས་པའི་ས་གནས་ཤིག་ཏུ་སླེབས་པ་དང་། ས་ཨུལ་གྱིས་རང་གི་གཡོག་པོ་ལ། ད་ང་ཚོ་ནང་ལ་ཕྱིར་ལོག་བྱེད་དགོས། དེ་མིན་ངས་ཕས་བོང་བུའི་སྐོར་ལ་བསམ་བློ་གཏོང་རྒྱུ་བཞག་ནས་ང་ཚོའི་སྐོར་ལ་སེམས་འཁྲལ་བྱེད་ཉེན་ཡོད་ཅེས་སྨྲས་པས།

⁶གཡོག་པོས་ལན་དུ། གཟིགས་དང་གྲོང་ཁྱེར་འདིའི་ནང་སྐྱེ་ཆེན་དམ་པ་ཞིག་བཞུགས་ཡོད་པ་དང་། ཁོང་གིས་གང་གསུངས་པ་ཐམས་ཅད་སྒྲུབ་ཀྱི་ཡོད་པ་ཡིན་པས། ཚང་མས་ཁོང་ལ་གུས་བཀུར་ཆེན་པོ་ཞུ་གི་ཡོད་དོ། དེ་བས་ན་ང་ཚོ་ཁོང་གི་དྲུང་དུ་བཅར་དགོས། གཅིག་བྱེད་ན་བོང་བུ་གང་དུ་ཡོད་པའི་སྐོར་ཁོང་གིས་ང་ཚོར་གསུངས་པར་ཡང་སྲིད་ཅེས་སྨྲས་སོ།

⁷ས་ཨུལ་གྱིས། ང་ཆོ་ཁོང་གི་དྲུང་དུ་བཅར་ན་ཁོང་ལ་འབུལ་བ་གང་འབུལ་དགོས་སམ། ང་ཚོའི་སྣོད་ཀྱི་ནང་དུ་ཁ་ཟས་ལྷག་མའང་མི་འདུག་པས། ད་ང་ཚོས་ཁོང་ལ་འབུལ་བྱེད་གང་ཡང་མི་འདུག་ཅེས་སྨྲས་སོ།

⁸གཡོག་པོས་ལན་དུ། ང་ལ་དངུལ་ཊམ་ཆུང་དུ་ཞིག་ཡོད། ངས་ཁོང་ལ་དེ་འབུལ་ཆོག། དེ་ནས་ཁོང་གིས་ང་ཚོར་བོང་བུ་ག་རུ་ཡོད་པའི་སྐོར་ལ་གསུངས་པ་ཡོད་ཅེས་སྨྲས་སོ།

⁹དེའི་ལན་དུ་ས་ཨུལ་གྱིས། གྲོས་འཆར་འདི་ཡག་པོ་འདུག། ད་ང་ཚོ་ཁོང་གི་དྲུང་དུ་བཅར་དགོས་ཅེས་སྨྲས་ནས། ཁོ་ཚོ་སྐྱེ་བུ་དམ་པ་དེ་བཞུགས་ཡོད་པའི་གྲོང་ཁྱེར་དུ་ཕྱིན་ནས། ཁོ་ཚོ་རི་ཁར་འཛེགས་ཏེ་གྲོང་ཁྱེར་གྱི་ཕྱོགས་སུ་འགྲོ་བའི་ལམ་དུ་ཆུ་ལེན་མཁན་བུ་མོ་འགའ་ཤས་དང་ཐུག་འཕྲད་བྱུང་སྟེ་དེ་ཚོར། ཞལ་གཟིགས་མཁན་དེ་གྲོང་ཁྱེར་ནང་བཞུགས་འདུག་གམ་ཞེས་འདྲི་རྩད་བྱས་སོ། (དེ་དུས་ལུང་སྟོན་པ་ཞིག་ལ་ཞལ་གཟིགས་མཁན་ཞེས་བརྗོད་སྲོལ་ཡོད་པ་དང། ལས་དོན་ཇི་འདྲ་ཞིག་ཡིན་རུང་། དེའི་སྐོར་ལ་མི་ཚོས་དཀོན་མཆོག་གི་ཐུགས་དགོངས་རྟོགས་དགོས་བྱུང་ན། ང་ཚོ་ཞལ་གཟིགས་མཁན་གྱི་རྩར་འགྲོ་དགོས་ཤེས་བརྗོད་སྲོལ་ཡོད་པ་ཡིན་ནོ།)

¹⁰

¹¹

¹²བུ་མོ་ཚོས་ལན་དུ། ཁོང་བཞུགས་བཞག། ཁོང་ནི་ཁྱོད་ཚོའི་སྔོན་ལ་ཕེབས་པ་ཡིན་པས། ཁྱོད་ཚོ་མགྱོགས་པོར་ཕྱིན་ན་ཁོང་གི་ཕེབས་རྗེས་ཟིན་པ་ཡོད། རི་ཁར་ཡོད་པའི་མཆོད་ཁྲིའི་སྟེང་དུ་མི་མང་གི་དམར་མཆོད་འབུལ་རྒྱུ་ཡིན་པས། ཁོང་གྲོང་དུ་དེ་རིང་ཕེབས་ཡོད། ཁོང་དེར་ཕེབས་ཏེ་དམར་མཆོད་ལ་བྱིན་རླབས་མ་གནང་བར་དུ། སྐུ་མགྲོན་ཚོས་གསོལ་ཚིག་མཆོད་མི་ཡོང་། དེ་བས་ན་ཁྱོད་ཚོ་ད་ལྟ་ཕྱིན་པ་ཡིན་ན། ཁོང་རི་ཁར་གསོལ་ཚིག་མཆོད་པར་མ་ཕེབས་གོང་དུ་ཁྱོད་ཚོས་ཁོང་ལ་མཇལ་བ་ཡོད་ཅེས་སྨྲས་སོ།

¹³

¹⁴དེ་ནས་ས་ཨུལ་དང་ཁོའི་གཡོག་པོ་གཉིས་གྲོང་དུ་ཕྱིན་པ་དང་། སྐབས་དེར་ཤ་མུ་ཨེལ་ནི་མཆོད་འབུལ་བྱེད་སར་འགྲོ་བའི་ལམ་དུ་ཁོ་གཉིས་ཀྱི་ཕྱོགས་སུ་ཚུར་ཡོང་བཞིན་མཐོང་ངོ་།

¹⁵དེའི་ཉི་མ་གཅིག་གི་སྔོན་དུ་གཙོ་བོ་དཀོན་མཆོག་གིས་ཤ་མུ་ཨེལ་ལ།

¹⁶སང་ཉིན་དུས་ཚོད་འདི་ཙམ་ལ་ངས་ཁྱོད་ཡོད་སར་བྷེན་ཡ་མིན་གྱི་སྡེ་རིགས་ལས་ཡིན་པའི་མི་ཞིག་གཏོང་རྒྱུ་ཡིན་པས། ཁྱོད་ཀྱིས་ཁོ་ལ་ངའི་འབངས་ཨིསི་རཱཨེལ་གྱི་རྒྱལ་པོའི་ཚུལ་དུ་བསྔོ་འབུལ་བྱས་ཏེ། ཁོས་དེ་ཚོ་ཕེ་ལེ་ཤེད་པའི་ལག་ནས་སྐྱབས་པར་འགྱུར། ངས་རང་གི་མི་འབངས་ཀྱི་དཀའ་ངལ་མཐོང་ཞིང་། དེ་ཚོའི་ངུ་འབོད་ཀྱང་ཐོས་བྱུང་ཞེས་གསུངས་སོ།

¹⁷ཤ་མུ་ཨེལ་གྱིས་ས་ཨུལ་མཐོང་མ་ཐག་ཏུ། གཙོ་བོ་དཀོན་མཆོག་གིས་ཁོ་ལ་གསུངས་པ། ངས་ཁྱོད་ལ་སྨྲས་པའི་སྐྱེ་བོ་དེ་ནི་འདི་རང་ཡིན། ཁོས་ངའི་འབངས་ལ་སྲིད་སྐྱོང་བྱེད་པར་འགྱུར།

¹⁸དེ་ནས་ས་ཨུལ་གྱིས་རྒྱལ་སྒོའི་འགྲམ་དུ་ཤ་མུ་ཨེལ་ཡོད་སར་ཕྱིན་ཏེ། ཞལ་གཟིགས་མཁན་གྱི་བཞུགས་ས་ག་པར་ཡིན་ནམ། དེ་ང་ལ་སྟོན་རོགས་གནང་ཞེས་ཞུས་སོ།

¹⁹དེའི་ལན་དུ་ཤ་མུ་ཨེལ་གྱིས། ཞལ་གཟིགས་མཁན་དེ་ང་རང་ཡིན། ད་ཁྱོད་གཉིས་མཆོད་འབུལ་བྱེད་སའི་གནས་དེར་ངའི་སྔོན་དུ་སོང་ཞིག དེ་རིང་ཁྱོད་གཉིས་ང་དང་མཉམ་དུ་ཁ་ཟས་ཟ་བར་འགྱུར། སང་ཞོགས་ངས་ཁྱོད་ཀྱི་དྲི་བ་ཚང་མར་ལན་འདེབས་བྱེད་ཀྱི་ཡིན། དེ་རྗེས་ཁྱོད་ཚོ་ཕྱིར་ལོག་འགྲོ་ནའང་ཆོག་པ་ཡོད།

²⁰ཉིན་ཞག་གསུམ་གྱི་སྔོན་དུ་རླག་སྟོར་ཤོར་བའི་བོང་བུ་རྣམས་རྙེད་ཟིན་པ་ཡིན་པས། དེའི་སྐོར་ལ་ཁྱོད་སེམས་འཁྲལ་བྱེད་མི་དགོས། ཨིསི་རཱཨེལ་མི་མང་གིས་ཧ་ཅང་གི་འདོད་པ་བྱེད་པ་དེ་སུ་ཡིན་ནམ། དེ་ནི་ཁྱོད་དང་ཁྱོད་ཀྱི་ཕའི་ཁྱིམ་ཚང་དེ་ཡིན་ནོ་ཞེས་སྨྲས་སོ།

²¹དེའི་ལན་དུ་ས་ཨུལ་གྱིས། ང་ནི་ཨིསི་རཱཨེལ་གྱི་སྡེ་རིགས་ཆུང་ཤོས་བྷེན་ཡ་མིན་གྱི་ཁོངས་ནས་ཡིན་པ་དང་། སྡེ་རིགས་དེའི་ཁོངས་ནས་ངའི་ཁྱིམ་ཚང་ནི་ཀུན་ལས་ཕལ་པ་ཞིག་ཡིན་པས། ཁྱེད་ཀྱིས་ང་ལ་ག་རེའི་དོན་དུ་བཀའ་མོལ་དེ་འདྲ་གནང་ངམ་ཞེས་སྨྲས་སོ།

²²དེ་ནས་ཤ་མུ་ཨེལ་གྱིས་ས་ཨུལ་དང་ཁོའི་གཡོག་པོ་ཚོགས་ཁང་དུ་འཁྲིད་ཅིང་། སྐུ་མགྲོན་སུམ་ཅུ་ཙམ་གྱི་གྲལ་མགོར་བཞག་སྟེ།

²³མ་བྱན་ལ་སྨྲས་པ། ངས་ཁྱོད་ལ་ཟུར་དུ་བཞག་དགོས་ཅེས་སྨྲས་པའི་ཤ་དེ་ཚུར་འཁྱེར་ཤོག

²⁴དེ་རྗེས་མ་བྱན་གྱིས་ཤ་ཕུད་རྐང་ཤ་ལེགས་ཤོས་དེ་ས་ཨུལ་གྱི་མདུན་དུ་བཞག་པ་དང་། ཤ་མུ་ཨེལ་གྱིས། ད་ལྟོས་ཤིག། ཁྱོད་ཀྱི་དོན་དུ་ལོགས་སུ་བཞག་པའི་ཤ་ནི་འདི་ཡིན་ཏེ། དེ་ལེན་ནས་ཟ་ཞིག། ངས་འགྲོན་འབོད་བྱེད་པའིི་སྐུ་མགྲོན་རྣམས་དང་མཉམ་དུ་དུས་ཚོས་འདིར་ཟ་བའི་ཕྱིར་ངས་ཁྱོད་རང་གི་དོན་དུ་ལོགས་སུ་བཞག་པ་ཡིན་ནོ་ཞེས་སྨྲས་སོ། ས་ཨུལ་གྱིས་དེ་ཉིན་ཤ་མུ་ཨེལ་དང་མཉམ་དུ་ཁ་ཟས་བཟས་སོ།

²⁵དེ་རྗེས་ཁོ་ཚོ་མཆོད་འབུལ་བྱེད་སའི་གནས་དེ་ནས་གྲོང་དུ་མར་བབ་སྟེ། དེ་ཚོས་ས་ཨུལ་གྱི་དོན་དུ་ཁང་པའི་ཐོག་ཁར་ཉལ་ས་བཟོས་ནས།

²⁶ཁོང་དེ་རུ་ཉལ་ལོ༎ ནམ་ལངས་སྐབས་སུ་ཁང་པའི་ཐོག་ཁར་ཤ་མུ་ཨེལ་གྱིས་ས་ཨུལ་ལ། ད་ཡར་ལངས་ནས་ཁྱོད་འགྲོ་ནའང་ཆོག་ཅེས་སྨྲས་པས། ས་ཨུལ་ཡར་ལངས་ཤིང་། ཤ་མུ་ཨེལ་དང་མཉམ་དུ་ལམ་ལ་ཕྱིན་ནོ།

²⁷དེ་གཉིས་གྲོང་ཁྱེར་གྱི་མཐའ་མཚམས་ལ་སླེབས་སྐབས། ཤ་མུ་ཨེལ་གྱིས་ས་ཨུལ་ལ་སྨྲས་པ། ཁྱོད་ཀྱི་གཡོག་པོ་དེ་ང་གཉིས་ཀྱི་སྔོན་ལ་འགྲོ་དགོས་ཅེས་སྨྲོས་ཤིག གཡོག་པོ་དེ་ཕྱིན་ནོ། དེ་རྗེས་ཤ་མུ་ཨེལ་གྱིས་ས་ཨུལ་ལ་ཁྱོད་རང་འདིར་ཡུན་ཙམ་ཞིག་སྡོད་དང་། ངས་ཁྱོད་ལ་གཙོ་བོ་དཀོན་མཆོག་གི་བཀའ་ཞིག་བཤད་པར་བྱའོ་ཞེས་སྨྲས་སོ༎