Read Ticuna Apocaríchiu 15 Bible Online

Apocaríchiu 15 - Ticuna bible

Apocaríchiu 15

¹Rü ñu̱xũchi ga daxũguxü̃ ga naãnewa rü nüxü̃ chadau ga wüxi ga to ga taxü̃ ga cuèxruü̃ ga namaã iḇaixãchixü̃. Rü nayexma ga 7 ga orearü ngeruü̃gü ga daxũcü̱̃ã̱x ga nüxü̃́ yexmagüxü̃ ga 7 ga poxcuruü̃. Rü yema poxcugu nixĩ ga yagúxü̃ ga norü nú ga Tupana.

²Rü yexgumarüü̃ ta nüxü̃ chadau ga ñoma wüxi ga nanaxtaaétüwaraü̃xü̃ ga woruarüü̃ iy̱auraétücüüxü̃ ga üxüema nawa inachixü̃. Rü yéma tayexmagü ga guxema nüxü̃ rüyexeraxe ga yema ngoxo rü yema ngoxochicünèxã rü yema ngoxoéga rü yema númeru ga yema ngoxoéga ixĩxü̃. Rü yema nanaxtaaétüraü̃xü̃gu tachigü. Rü tüxü̃́ nayexmagü ga tümaãrü paxetaruü̃gü ga arpa ga Tupana tüxna ãxü̃.

³Rü nagu tawiyaegü ga Moĩché ga Tupanaãrü duü̃xü̃ ixĩcüarü wiyae. Rü yexgumarüü̃ ta nagu tawiyaegü ga yema wiyae ga guma Tupana Nane ga pecaduarü ütanücèx yucüarü ixĩxü̃ ga ñaxü̃:“Pa Torü Cori ya Tupana ya Guxü̃ãrü Yexera Poracüx, nataxüchi rü namexẽchi i guxü̃ma i ngẽma cuxüxü̃. Rü cuma rü guxü̃gutáma guxü̃ma i nachiü̃ãnegüarü ãẽ̱xgacü quixĩ. Rü cuma rü aixcüma meãma namaã icucuèx rü taguma quidora.

⁴¿Rü texé tãũtáma cuxü̃ tamuü̃, Pa Corix? ¿Rü texé tãũtáma cuxü̃ ticuèxüü̃? Erü cuma rü cuxicatama nixĩ i üünecü quiĩxü̃. Rü guxü̃ma i nachiü̃ãnecü̱̃ã̱x rü nuã tá naxĩ, rü tá cuxü̃ nicuèxüü̃gü. Yerü marü nüxü̃ nadaugü na quixaixcümaxü̃ i guxü̃ma i ngẽma nüxü̃ quixuxü̃wa rü aixcüma mea cunangugüxü̃ i guxü̃ma i ngẽma chixexü̃ ügüxü̃ rü ngẽma mexü̃ ügüxü̃”, ñanagürü ga yema wiyae.

⁵Rü yemawena ichadawenü rü nüxü̃ chadau ga daxũguxü̃ ga naãnewa na yawãxnaxü̃ ga yema nachica ga üünexü̃ ga Tupanapataarü aixepewa yexmaxü̃ ga ngexta namaã ínanguxü̃güxü̃wa ga guma nuta ga Tupanaãrü mugü nagu ümatücü.

⁶Rü guma Tupanapatawa ínachoxü̃ ga yema 7 ga orearü ngeruü̃gü ga daxũcü̱̃ã̱x ga nüxü̃́ nayexmagüxü̃ ga yema 7 ga poxcuruü̃gü. Rü naxchiru ga mexẽchixü̃maã rü iy̱auracüüxü̃maã nixãxchiru. Rü yema norü goyeremüü̃gü rü uirunaxcèx nixĩ.

⁷Rü ñu̱xũchi wüxi ga yema ãgümücü ga daxũcü̱̃ã̱x ga maxü̃xü̃, rü wüxichigü ga yema 7 ga orearü ngeruü̃güna nanaxã ga wüxi ga copa ga uirunaxcèx ga Tupana ya guxü̃guma maxẽchacüarü nu i ãũcümaxü̃maã ixããcuxü̃.

⁸Rü guma Tupanapata rü namaã naxããcu ga yema caixema ga Tupana ya mexẽchicü rü poracüwa ne ũxü̃. Rü taxucürüwama texé yexma taxücu ñu̱xmata nagú ga yema 7 ga poxcuruü̃ ga yema 7 ga orearü ngeruü̃güaxü̃́ yexmaxü̃.