Read መ/ቅዱስ ትግርኛ, Tigrigna Bible, 1 ዘፍጥረት 49 Bible Online

ዘፍጥረት 49 - መ/ቅዱስ ትግርኛ, Tigrigna Bible, 1 bible

ዘፍጥረት 49

¹ያእቆብ ንደቁ ፀዊዑ፥ “በተን ዳሕረዎት ዘመናት ዘጋጥመኩም ክነግረኩምስ፥ ተኣከቡ” በሎም።

²“ኣቱም ደቂ ያእቆብ፥ ተኣከቡ እሞ ስምዑ። ናብ ኣቦኻትኩም እስራኤል ከዓ ኣድምፁ።”

³“ሮቤል፥ ንስኻ በዅረይ ኢኻ፤ ሓይለይን ቀዳማይ ፅንዓተይን፥ ብኽብረት ብሉፅ፥ ብስልጣን ከዓ ብሉፅ ኢኻ።

⁴ከም ማይ ዘይርጉእ ኢኻ፤ ናብ ምድቃስ ኣቦኻ ደየብካ፤ ዓራት ኣቦኻ ኣርከስካ፤ ስለዙይ ሕልቅና ነኣኻ ኣይኹን።” [48]

⁵“ስምኦንን ሌዊን ኣሕዋት እዮም፤ ኣስይፍቶም ኣፅዋር ዓመፃ እየን፤

⁶ብቝጥዓኦም ሰብ ቀተሉ፤ ብዅራኦምውን ቋንጃ ኣብዑር ቈረፁ፤ ኣብ ምኽሮም ኣይሕወሰኒ፤ ኣብ ኣኼባኦም ከዓ ኣይፀምረኒ።

⁷ኵራኣቶም ብርቱዕ፥ ናህሮም ከዓ ጨካን እዩ እሞ ርጉም ይኹን። ኣብ ያእቆብ ክብትኖም እየ፤ ኣብ እስራኤል ድማ ፋሕ ከብሎም እየ።”

⁸“ይሁዳ፥ ኣሕዋትካ ኸመስግኑኻ እዮም፤ ኢድካ ኣብ ክሳድ ፀላእትኻ ኽትከውን እያ፤ ደቂ ኣቦኻ ኽሰግዱልካ እዮም።

⁹ ኦ ይሁዳ፥ ሽደን ኣንበሳ ኢኻ፤ ወደይ፥ ካብ ግዳይካ ተመለስካ፤ ከም ኣንበሳ ኣድበኻ፤ ከም ኣንስተይቲ ኣንበሳውን ለጥ በልካ፤ ከተስአካ ዝደፍር መን እዩ?

¹⁰እቲ ኽገዝእ ዝግብኦ [49] ክሳዕ ዝመፅእ፥ ኣህዛብውን ክሳዕ ዝግዝእዎ፥ በትሪ መንግስቲ ኻብ ይሁዳ፥ ዘንጊ ገዛኢ ኸዓ ኻብ ማእኸል ኣእጋሩ፥ ኣይሰኣንን እዩ።

¹¹ንኣድጉ ኣብ ጕንዲ ወይኒ፥ ንዒሉኡ ድማ ኣብ ብሉፅ ጨንፈር ወይኒ ኽኣስር እዩ፤ ክዳኑ ብወይኒ፥ ነፀላኡ ኸዓ ብደም ወይኒ ኽሓፅብ እዩ።

¹²ኣዒንቱ ኻብ ወይኒ ኽቐይሓ፥ ኣስናኑ ድማ ኻብ ፀባ ኽፅዕድዋ እየን።”

¹³“ዛብሎን ኣብ ገምገም ባሕሪ ኽነብር እዩ፤ መዕረፍ መራኽብውን ክኸውን እዩ፤ ወሰኑ ኸዓ ኽሳዕ ሲዶና ክኸውን እዩ።”

¹⁴“ይሳኮር፥ ብርቱዕ ዝዓፅሙ ኣድጊ እዩ፤ ኣብ ማእኸል ሰፈር ኣባጊዕ ድማ ይድቅስ።

¹⁵እታ ዘዕርፈላ ቦታ ፅብቕቲ፥ እታ መሬቱ ድማ ልምዕቲ ከም ዝኾነት ምስ ረአየ፥ ንምስካም፥ ማእገሩ ኣትሓተ፤ ፀዓራይ ሓረስታይውን ኮነ።

¹⁶ዳን ከም ሓደ ኻብ ነገዳት እስራኤል ኮይኑ ንህዝቡ ኽዳኒ እዩ።

¹⁷ዳን ኣብ መንገዲ፥ ከም ተመን፥ ኣብ መተሓላለፊ ድማ ኸም መንደላይ ተመን ክኸውን እዩ፤ ንፈረስ ሸዀናኡ ይነኽሶ፤ ንፈረሰኛ ኸዓ ንድሕሪት ከም ዝወድቕ ይገብሮ።”

¹⁸“ኦ እግዚኣብሄር፥ ንምድሓንካ እፅበ ኣለኹ።”

¹⁹“ንጋድ ዘመትቲ ክዘምቱሉ እዮም፤ ንሱ ግና እግሪ እግሮም ስዒቡ ኸሳጕጎም እዩ።

²⁰እንጀራ ኣሴር ረጒድ እዩ፤ ኣሴር ድማ ንነገስታት ዝበቅዕ ምግቢ ኸቕርብ እዩ።”

²¹“ንፍታሌም፥ ዝተፈትሐት መይዳቝ እዩ፤ ጥዑም ቃልውን ይህብ።” [50]

²²“ዮሴፍ፥ ኣብ ጥቓ ዓይኒ ማይ ዝተተኽለት፥ ጨናፍራ ኣብ መንደቕ ዝድይብ፥ ፈራይት ወይኒ እዩ።

²³ቀስተኛታት ኣናወፅዎ፤ ፍላፃ ወርዊሮም ድማ ሰጐጕዎ።

²⁴ቀስቱ ግና ፀኒዑ ይነብር፤ ቀላፅም ኣእዳዉ ድማ በእዳው እቲ ናይ ያእቆብ ሓያል፥ በቲ ሓላዊን ኰዅሒ እስራኤልን ፀንዐ።

²⁵ንኣኻ ብዝረድአካ ኣምላኽ ኣቦኻ፥ ብዝባርኸካ ዅሉ ምግባር ብዝኽእል ኣምላኽ፥ ኣብ ላዕሊ ኻብ ሰማይ ብዝርከብ ረድኤት፥ ካብ መዓሙቕ ምድሪ ብዝርከብ በረከት፥ ካብ ማህፀንን ካብ ጡብን ብዝርከብ ምርቓ ኽባርኸካ እዩ።

²⁶ካብቲ ኻብ ናይ ጥንቲ እምባታት በረከት፥ ካብ ናይ ዘለኣለም ኰረብታታት ምርቓ፥ ናይ ኣቦኻ በረከት ይበልፅ፤ እዝ ዅሉ ኣብ ልዕሊ ርእሲ ዮሴፍ ይውረድ፤ ኣብ ማእኸል ኣሕዋቱ ሓለቓ ኣብ ዝኾነ ኣብ ልዕሊ ግንባር ዮሴፍ ይዕረፍ።”

²⁷“ብንያም መንጣሊ ተዅላ እዩ፤ ንግሆ ዝመንጠሎ ይበልዕ፤ ምሸት ከዓ ዝማረኾ የካፍል።”

²⁸እዚኣቶም ኵላቶም እቶም ዓሰርተ ኽልተ ነገድ እስራኤል እዮም። እዙይ ከዓ እቲ ኣቦኣቶም ንነፍሲ ወከፎም ከከም ዝግብኦም ክምርቖም እንተሎ ዝተዛረቦ እዩ።

²⁹ሽዑ ያእቆብ ንደቁ፦ “እንሆ፥ ኣነ ናብ ወገናተይ ክእከብ እየ። ኣብታ ግራት ኤፍሮን ኬጢያዊ ዘላ በዓቲ ምስ ኣቦታተይ ቅበሩኒ።

³⁰ ንሳ ኣብ ግራት ማክጴላ፥ ኣብ መንፅር መምሬ ኣብ ምድሪ ከነዓን ዘላ፥ ኣብርሃም ንመቓብር ርስቲ ኽትከውን ኢሉ፥ ካብ ኤፍሮን ኬጢያዊ ምስታ ግራት ዝዓደጋ ድርብ በዓቲ እያ።

³¹ ንኣብርሃምን ንሰበይቱ ሳራን ኣብኣ ቐበርዎም፤ ንይስሓቅን ንርብቃ ሰበይቱንውን ኣብኣ ቐበርዎም፤ ኣነ ድማ ንልያ ኣብኣ ቐበርክዋ።

³²እቲ ግራትን እቲ ኣብኡ ዘሎ በዓትን፥ ካብ ደቂ ኬጢ ዝተዓደገ እዩ” በሎም።

³³ ያእቆብ ንደቁ እዙይ ኣዚዙ ምስ ወድአ፥ ኣእጋሩ ኣከበ፤ ነፍሱ ድማ ወፀት እሞ፥ ናብ ወገናቱ ተፀመረ።