Read መ/ቅዱስ ትግርኛ, Tigrigna Bible, 1 2ይ ሳሙኤል 22 Bible Online

2ይ ሳሙኤል 22 - መ/ቅዱስ ትግርኛ, Tigrigna Bible, 1 bible

2ይ ሳሙኤል 22

¹ዳዊት ድማ በታ እግዚኣብሄር ንእኡ ኻብ ኢድ ኵሎም ፀላእቱን ካብ ኢድ ሳኦልን ዘድሓነላ መዓልቲ ንእግዚኣብሄር እዝ መዝሙር እዙይ ዘመረ።

²ከምዙይ ከዓ በለ፦ “እግዚኣብሄር ከውሐይን እምባይን መድሓኒየይን እዩ።

³እግዚኣብሄር ሓላዊየይ እዩ፤ ብእኡውን እእመን ኣለኹ። ዋልታይን ቀርኒ ረድኤተይን፥ መፀግዒየይን መሕብኢየይን እዩ። ኦ መድሓኒየይ! ካብ ተግባር ግፍዒ ተድሕነኒ ኢኻ።

⁴ነቲ ኽውደስ ዝግብኦ እግዚኣብሄር እፅውዕ፤ ካብ ፀላእተይ ከዓ ኽድሕን እየ።”

⁵ፃዕሪ ሞት ሓዘኒ፤ ወሓይዝ ዓመፃ ኣፍርሐኒ፤

⁶ፃዕሪ ሲኦል ከበበኒ፤ መፈንጠሪታት ሞት መፀኒ፤

⁷ብጊዜ መከራይ ንእግዚኣብሄር ፀዋዕኹ፤ ናብ ኣምላኸይ ከዓ ኣእወኩ፤ ቃለይ ድማ ኻብ መቕደሱ ሰምዐ፤ ኣውያተይውን ኣብ ቅድሚኡ ኣብ ኣእዛኑ በፅሐ።

⁸ምድሪ ተናወፀትን ኣንቀጥቀጠትን፤ መሰረታት ሰማይ ተናወፁ፤ እግዚኣብሄር ስለ ዝተቘጥዐ ኸዓ ኣንቀጥቀጠ፤

⁹ካብ ቍጥዓኡ ትኪ ወፀ፤ ካብ ኣፉ ድማ ዝባላዕ ሓዊ ነደደ፤ ፍሕሚውን ካብኡ በርሀ።

¹⁰ንሰማያት ትሕት ትሕት ኣቢሉ ወረደ፤ ኣብ ትሕቲ ኣእጋሩውን ጣቓ ነበረ።

¹¹ኣብ ልዕሊ ኪሩቤል ተቐሚጡ በረረ፤ በኽናፍ ንፋስ ከዓ ተርኣየ።

¹²መሰወሪኡ ፀልማት፥ ማይ ዝተፅዓነ ኸቢድ ደመና ኸዓ ኸበቦ።

¹³ካብ ነፀብራቕ ገፁ ዝተልዓለ፥ ፍሕሚ ነደደ።

¹⁴እግዚኣብሄር ካብ ሰማይ ኣንጐድጐደ፤ እቲ ልዑልውን ቃሉ ሃበ።

¹⁵ፍላፃታት ወርዊሩ ንፀላእቱ በተኖም፤ መባርቕቱ ለኣኸ ሃወኾምውን።

¹⁶ካብ ተግሳፅ እግዚኣብሄር፥ ካብ መንፈስ እስትንፋስ መዓቱ ዝተልዓለ፥ መዓሙቝ ባሕሪ ተርኣየ፤ መሰረታት ዓለምውን ተቐልዑ።

¹⁷ካብ ኣርያም ሰዲዱ ወሰደኒ፤ ካብ ብዙሕ ማያትውን ኣውፅአኒ።

¹⁸ካብቶም ካባይ ዝሕይሉ ፀላእተይ፥ ካብቶም ዝፀልኡኒ ብርቱዓት ፀላእተይ ኣናገፈኒ።

¹⁹ብመዓልቲ መከራይ መፁኒ፤ ግና እግዚኣብሄር ደገፍ ኮነኒ።

²⁰ናብ ገፊሕ ኣውፅአኒ፤ ፈትዩኒ እዩሞ ኣድሓነኒ።

²¹እግዚኣብሄር ከም ፅድቀይ ይፈድየኒ፤ ከም ንፅህና ኣእዳወይውን ይምልሰለይ።

²²መንገዲ እግዚኣብሄር ሓልየ እየሞ፥ ኣብ ኣምላኸይውን ኣይዓመፅኩን።

²³ኵሉ ፍርድታቱ ኣብ ቅድመይ እዩ እሞ፤ ካብ ስርዓቱውን ኣይረሓቕኩን እሞ።

²⁴ኣብ ቅድሚኡ ቅኑዕ ነበርኩ፤ ካብ በደልውን ንርእሰይ ዓቀብኩ፤

²⁵ስለዙይ እግዚኣብሄር ከም ቅንዕናይን፥ ከም ንፅህና ኢደይን፥ ኣብ ቅድሚ ዓይኑ ፈደየኒ።

²⁶ምስ ፃድቅ፥ ፃድቅ ኴንካ ትርከብ፤ ምስ ቅኑዕ፥ ቅኑዕ ኾይንካ ትርከብ፤

²⁷ምስ ንፁህ፥ ንፁህ ኾይንካ ትርከብ፤ ምስ ጠዋይ፥ ጠዋይ ኴንካ ትርከብ።

²⁸ንስኻ ንዝተጠቕዑ ህዝቢ ተድሕን ኢኻሞ፤ ንዓይኒ ዕቡያት ግና ተዋርዶ።

²⁹ኦ ጐይታ፥ ንስኻ መብራህተይ ኢኻ፤ እግዚኣብሄር ንፀልማተይ የብርሆ።

³⁰ብናትካ ሓይሊ ኣብ ልዕሊ ጭፍራ እጐዪ እየሞ፤ ብኣምላኸይውን ንዕርዲ እዘሎ።

³¹መንገዲ ኣምላኽይ ፍፁም እዩ፤ ቃል እግዚኣብሄር ተፈቲኑ ዝፀረየ እዩ፤ ንሱ ነቶም ኣብኡ ዝዕቈቡ ዅሎም፥ ዋልታኦም እዩ።

³²ብዘይ እግዚኣብሄር፥ ኣምላኽ መን እዩ? ብዘይ ኣምላኽናኸ፥ ኰዅሒ መን እዩ?

³³ሓይሊ ዘዕጥቐኒ እግዚኣብሄር እዩ፤ ንመንገደይውን የቕንዖ።

³⁴ንሱ ነእጋረይ ከም እግሪ እራብ ኣደልደለን፤ ኣብ እምባታት ከዓ ዘቑመኒ እግዚኣብሄር እዩ።

³⁵ነእዳወይ ውግእ፥ ንቐላፅመይ ከዓ ቐስቲ ነሃስ ምግታር መሃረን።

³⁶ዋልታ ምድሓንካ ሃብካኒ፤ ተግሳፅካውን ኣዕበየኒ።

³⁷ስጓመይ ብትሕተይ ኣስፋሕኻ፤ ኣእጋረይውን ኣየንደልሃፃን።

³⁸ንፀላእተይ ኣሳጐጕኩዎም፥ ኣጥፋእኹዎምውን፤ ክሳዕ ዝውድኦም ከዓ ኣይተመለስኩን።

³⁹ከም ዘይትስኡ ገይረ ፈፂመ ወዳእኹዎም፤ ተስዒሮም ኣብ ትሕቲ እግረይውን ወደቑ።

⁴⁰ንውግእ ሓይሊ ኣዕጠቕካኒ፤ ኣብ ልዕለይ ንዝቖሙ ፀላእተይ፥ ኣብ ትሕተይ ኣግዛእኻዮም።

⁴¹ዝባን ፀላእተይ ሃብካኒ፤ ነቶም ዝፀልኡኒ ኸዓ ኣጥፋእኹዎም።

⁴²ኣእወዩ፤ ዝረድኦም ግና ኣይነበረን፤ ናብ እግዚኣብሄር ኣእወዩ፤ ንሱ ግና ኣይሰምዖምን።

⁴³ከም ሓመድ ምድሪ ጠሓንኩዎም፤ ከም ጭቃ መንገዲ ረገፅኩዎም፤

⁴⁴ካብ ክርክር ህዝቢ ተድሕነኒ፤ ርእሲ ኣህዛብ ጌርካ ትሸመኒ፤ ዘይፈልጦ ህዝቢ እውን ይግዝአኒ።

⁴⁵ደቂ ባዕዲ ይግዝኡኒ፤ ብእዝኒ ሰሚዖም ይእዘዙኒ።

⁴⁶እቶም ደቂ ጓና እናጠፍኡ ይኸዱ፤ ካብቲ ዝተዓፀዉሉ እናንቀጥቀጡ ይወፁ።

⁴⁷እግዚኣብሄር ህያው እዩ፤ እቲ ሓላዊየይውን ይባረኽ፤ እቲ እምባ ምድሓነይ ዝኾነ ኣምላኽ ልዕል ልዕል ይበል።

⁴⁸ንሱ ሕነይ ዝፈድየለይ ኣምላኽ እዩ፤ ነህዛብ ኣብ ትሕተይ የግዝኦም፤

⁴⁹ካብ ፀላእተይ ዘውፅአኒውን ንሱ እዩ፤ ኣብ ልዕለይ ካብ ዝተልዓሉ ፀላእተይ ልዕል ልዕል ተብለኒ፤ ካብ ገፋዕቲውን ተናግፈኒ ኢኻ።

⁵⁰ስለዙይ ኦ ጐይታ! ኣብ ማእኸል ኣህዛብ አመስግነካ፤ ንስምካውን እዝምር ኣለኹ።

⁵¹ንመድሓኒት ንጉስ ዓባይ ዝገብራ ንሱ እዩ፤ ምሕረቱውን ንዝቐብኦ ዳዊትን ንዘርኡን፥ ንዘለኣለም ይገብር።