Read መ/ቅዱስ ትግርኛ, Tigrigna Bible, 1 1ይ ዜና 16 Bible Online

1ይ ዜና 16 - መ/ቅዱስ ትግርኛ, Tigrigna Bible, 1 bible

1ይ ዜና 16

¹ነቲ ታቦት እግዚኣብሄር ኣምፂኦም ከዓ፥ ኣብ ማእኸል እቲ ዳዊት ንእኡ ዝተኸሎ ድንኳን ኣንበርዎ። ኣብ ቅድሚ እግዚኣብሄር ድማ ዝቃፀል መስዋእትን መስዋእቲ ምስጋናን ኣቕረቡ።

²ዳዊት ዝቃፀል መስዋእትን መስዋእቲ ምስጋናን ኣዕሪጉ ምስ ወድአ፤ ነቲ ህዝቢ ብስም እግዚኣብሄር ባረኾ።

³ንነፍሲ ወከፍ ሰብ እስራኤል ድማ ንሰብኡትን ነንስትን፥ ሓድሓደ ቕጫን ሓድሓደ ጉማድ ስጋን ሓድሓደ ጎጎ ዘቢብን ዓደሎም።

⁴ዳዊት ንሓድሓደ ኻብቶም ሌዋውያን ድማ ኣብ ቅድሚ ታቦት እግዚኣብሄር ኮይኖም ንእግዚኣብሄር ኣምላኽ እስራኤል ብውዳሴን ብምስጋናን ከገልግሉ ሰርዐ።

⁵ንኣሳፍ ሓለቓ ገበሮ፤ ብድሕሪኡ ድማ ንዘካርያስ ካልኣዩ ገበሮ፤ ንይዒኤልን ሰሚራሞትን ይሒኤልን መቲትያን ኤልያብን በናያስን ዖቤድኤዶምን ይዒኤልን ድማ መሰንቆን በገናን ክቓንዩ መረፆም። ኣሳፍ ከዓ ብፀናፅል ክቓኒ ተመረፀ።

⁶እቶም ክልተ ኻህናት ከዓ በናያስን የሕዚኤልን ኣብ ቅድሚ ታቦት እግዚኣብሄር ኮይኖም ኵልሻዕ መለኸት ይነፍሑ ነበሩ።

⁷ዳዊት ከዓ በታ መዓልቲ እቲኣ ንኣሳፍን ነሕዋቱን ንእግዚኣብሄር ከመስግኑ ሓላፍነት ሃቦም።

⁸ንእግዚኣብሄር ኣመስግንዎ፥ ስሙውን ፀውዑ፤ ግብርታቱ ኣብ ማእኸል ህዝብታት ንገሩ።

⁹ተቐነዩሉ፥ ምስጋና ዘምሩሉ፤ ብዛዕባ ዅሉ ተኣምራቱ ንገሩ።

¹⁰ብቅዱስ ስሙ ኽበሩ፤ ልቢ እቶም ንእግዚኣብሄር ዝደልዩ ይተሓጐስ።

¹¹ንእግዚኣብሄር ድለይዎ ኽትፀንዑውን ኢኹም፤ ኵልሻዕ ገፁ ድለዩ።

¹²ኣቱም ንእኡ ዝተሓረኹም ዘርኢ እስራኤል ባሮቱ፥ ንእኡ ዝተሓረኹም ደቂ ያእቆብ፥ ነቲ ዝገበሮ ዘደንቕ ስራሑን፥ ተኣምራቱን፥ ዝሃቦ ፍርድታቱን ዘክሩ።

¹⁴ንሱ እግዚኣብሄር ኣምላኽና እዩ፤ ፍርዱ ንዅላ ምድሪ እዩ።

¹⁵ኪዳኑውን ንውሉድ ወለዶ እዩ፤ ነቲ ንዘለኣለም ዝኣዘዞ ቓል፥

¹⁶ ነቲ ምስ ኣብርሃም ዝኣተዎ ኺዳን፥ ነቲ ንይስሓቅ ዝመሓለሉ ማሕላ ሓሰበ።

¹⁷ንሱ ኣብ ያእቆብ ሕጊ፥ ኣብ እስራኤል ድማ ንዘለኣለም ዝፀንሕ ኪዳን ገይሩ ኣቖሞ።

¹⁸ “ምድሪ ከነዓን ንኣኻትኩም ክህበኩም እየ፤ ግደ ርስትኹም ክትከውን እያ” በለ።

¹⁹ሽዑ ብቝፅሪ ውሑዳት ነበሩ፤ ውሑዳትን ኣብኡውን ስደተኛታትን ነበሩ።

²⁰ካብ ህዝቢ ናብ ህዝቢ፥ ካብ መንግስቲ ናብ ካልእ መንግስቲ ሓለፉ።

²¹ሓደ ሰብ እኳ ኽገፍዖም ኣይፈቐደን፤ ምእንታኣቶም ድማ ንነገስታት ገሰፀ።

²² ንቕቡኣተይ ኣይትንክእዎም፤ ኣብ ነቢያተይ ከዓ ኽፉእ ኣይትግበሩ።

²³ህዝቢ ዓለም ኵልኻትኩም ንእግዚኣብሄር ዘምሩ፤ መዓልቲ መዓልቲ ምድሓኑ ኣብስሩ።

²⁴ንዅለን ሃገራት ክብሩ፥ ኣብ ኵሎም ህዝብታትውን ተኣምራቱ ንገሩ።

²⁵እግዚኣብሄር ዓብዪ፥ ምስጋናኡውን ብዙሕ እዩሞ፥ ልዕሊ ዅሎም ኣማልኽቲ ዝፍራሕ እዩ።

²⁶ኣህዛብ ዝሰግዱሎም ኵሎም ኣማልኽቲ፥ ጣዖታት እዮም፤ እግዚኣብሄር ግና ንሰማያት ፈጠረ።

²⁷ግርማን ክብርን ኣብ ዙርያኡ፥ ስልጣንን ሓጐስን ኣብ መቕደሱ ኣሎ።

²⁸ህዝቢ ዓለም ኵልኻትኩም ንእግዚኣብሄር ሃቡ፤ ክብርን ስልጣንንውን ንእግዚኣብሄር ሃብዎ።

²⁹ንስሙ ዝግባእ ክብሪ ሃብዎ፤ መባእ ሒዝኩም ኣብ ቅድሚኡ እተዉ፤ ንእግዚኣብሄር ኣብ ቅዱስ መቕደሱ ስገዱሉ።

³⁰ኵልኹም ሃገራት፥ ኣብ ቅድሚኡ ኣንቀጥቅጡ፤ ዓለም፥ ኣብ ፅኑዕ ተመስሪታ እያ፤ ኣይትናወፅንውን እያ።

³¹ሰማያት ደስ ይበሎም፤ ምድሪ ኸዓ ትተሓጐስ፤ ኣብ ኣህዛብ ድማ፥ እግዚኣብሄር ነጊሱ ኣሎ ይበሉ።

³²ባሕርን ኣብኣ ዘሎ ፍጥረትን ድምፂ ይሃብ፤ በረኻን ኣብኡ ዘሎ ዅሉን ይተሓጐስ።

³³እግዚኣብሄር ንምድሪ ኽዳንያ ይመፅእ ኣሎ እሞ፥ ኣብ ዱር ዘለዉ ኣእዋም ኣብ ቅድሚኡ ብታሕጓስ ይዘምሩ።

³⁴ እግዚኣብሄር ሰናይ እዩ፤ ምሕረቱ ኸዓ ንዘለኣለም እዩ እሞ፥ ኣመስግንዎ።

³⁵“ንቕዱስ ስምካ ምእንቲ ኽንውድሶ፥ ብምውዳስካውን ምእንቲ ኽንምካሕስ፥ ኣታ ናይ ምድሓንና ኣምላኽ ኣድሕነና፤ ካብ ኣህዛብ ከዓ ኣኻኽበናን ኣናግፈናን” በልዎ።

³⁶ካብ ዘለኣለም ክሳዕ ዘለኣለም፥ ኣምላኽ እስራኤል እግዚኣብሄር ይባረኽ፤ ኵሎም ህዝቢ “ኣሜን ይበሉ፤ ንእግዚኣብሄርውን የመስግኑ።”

³⁷መዓልቲ መዓልቲ ዘድሊ ስራሕ ኣብ ቅድሚ ታቦት ኪዳን እግዚኣብሄር ምእንቲ ኸገልግሉ፥ ዳዊት ንኣሳፍን ንሌዋውያን ኣሕዋቱን ኣብ ቅድሚ ታቦት ኪዳን እግዚኣብሄር ሓደጎም።

³⁸ንዖቤድኤዶምን ነቶም ስሳን ሸሞንተን ኣሕዋቶምንውን ምስኣቶም ሓደጎም። ዖቤድኤዶም ወዲ የዱቱንን ሖሳን ሓለውቲ በሪ ነበሩ።

³⁹ንካህን ሳዶቅን ነቶም ኣሕዋቱ ኻህናትን ከዓ፥ ኣብቲ ናይ ገባዖን በሪኽ ዘሎ መሕደሪ እግዚኣብሄር ከገልግሉ መደቦም።

⁴⁰ከምቲ ዅሉ እግዚኣብሄር ንእስራኤል ዝኣዘዞ ዝተፅሓፈ ሕጊ፥ ኵልሻዕ ጊሓትን ምሸትን ዝቃፀል መስዋእቲ ኸቕርቡ መረፆም።

⁴¹ሄማንን የዱቱንን እቶም ዝተረፉ በብስሞም ዝተፀውዑ ሕሩያትን፥ እግዚኣብሄር ምሕረቱ ንዘለኣለም ስለ ዝኾነ ኸመስግንዎ ምስኣቶም ነበሩ።

⁴²ሄማንን የዱቱንን ብመለኸታትን ብፀናፅልን በቲ ዝተረፈ ናይ ምስጋና መሳርሒ ሙዚቃን ኣድሚቖም ክቓንዩ ዝተመረፁ ነበሩ። ንደቂ የዱቱን ከዓ ሓለውቲ በሪ ገበሮም።

⁴³ኵሉ እቲ ህዝቢ ድማ ነፍሲ ወከፍ ሰብ ነናብ ቤቱ ኸደ፤ ዳዊት ከዓ ንቤቱ ኽባርኽ ተመለሰ።