Read መ/ቅዱስ ትግርኛ, Tigrigna Bible, 1 1ይ ዜና 20 Bible Online

1ይ ዜና 20 - መ/ቅዱስ ትግርኛ, Tigrigna Bible, 1 bible

1ይ ዜና 20

¹ ዓመት ምስ ሓለፈ በቲ ነገስታት ንውግእ ዝወፁሉ ጊዜ፥ ኢዮኣብ ሰራዊት ውግእ ሒዙ ንሃገር ደቂ ኣሞን ኣጥፍኣ፤ መፂኡ ኸዓ ንራባት ኸበባ። ዳዊት ግና ኣብ ኢየሩሳሌም ተሪፉ ነበረ። ኢዮኣብ ከዓ ንራባት ወቒኡ ኣፍረሳ።

²እቲ ንጉሶም ሓደ መክሊት [3] ዝምዘን ዘውዲ ወርቂ ነበሮ። እቲ ዘውዲ ኸዓ ኽቡራት ኣዕናቝ ነበርዎ። ዳዊት ድማ ነቲ ዘውዲ ንጉሶም፥ ካብ ርእሲ እቲ ንጉስ ወሲዱ ኣብ ርእሱ ደፍኦ። ክብደቱ ድማ ሓደ መክሊት ወርቂ ዝኣክል ነበረ። ክቡር ዕንቊውን ነበሮ። ኣብ ርእሲ ዳዊት ድማ ደፍእዎ፤ ካብታ ኸተማ ድማ የመና ብዙሕ ምርኮ ወሰደ።

³ነቶም ኣብ ውሽጣ ዝነበሩ ህዝቢ ኣውፂኡ ኸዓ ብመጋዛትን ብመባሮን ብማሕፀታትን ክሰርሑ ኣገደዶም። ኣብ ኵለን ከተማታት ደቂ ኣሞንውን ኸምኡ ገበረ። ዳዊትን ኵሉ ሰራዊቱን ከዓ ናብ ኢየሩሳሌም ተመለሱ።

⁴ድሕሪዙይ ድማ ምስ ፍልስጥኤማውያን ኣብ ጌዝር ውግእ ተልዓለ። ሽዑ ሴቦካይ ኩሳታዊ ነቲ ኻብቶም ጕልቡታት ዝኾኑ ደቂ ራፋይም ዝነበረ ንሲፋይ ቀተሎ።

⁵ መሊሱ ድማ ምስ ፍልስጥኤማውያን ውግእ ተገብረ፤ ኤልያናን ወዲ ያዒር ከዓ ንለሕሚ ሓው ጐልያድ እቲ በዓል ጌት ቀተሎ። ንሱ ዛብያ ዂናቱ ኽንዲ ወንደረሽ ዝተኣለመ ዓለባ ዝጥቕለለሉ ዝኸውን ነበረ።

⁶መሊሱ ኸዓ ኣብ ጌት ውግእ ኮነ። ኣብኡ ሓደ ኣብ ኢደ እግሩ ሸሽዱሽተ፤ ኣብ ኵሉ ኢደ እግሩ ዕስራን ኣርባዕተን ኣፃብዕቲ ዝነበሮ ነዊሕ ሰብኣይ ነበረ። ንሱ ኻብቶም ጕልቡታት ደቂ ራፋይም ዝተወልደ ነበረ።

⁷ንሱ ንህዝቢ እስራኤል ምስ ኣባጨወሎም ድማ፥ ዮናታን ወዲ ሺምዓይ ሓው ዳዊት፥ ቀተሎ።

⁸እዚኣቶም ብኢድ ዳዊትን ብኢድ ሓሻኽሩን ዝተቐተሉ፥ ካብቶም ኣብ ጌት ዝተወለዱ ጕልቡታት ደቂ ራፋይም ነበሩ።