Read መ/ቅዱስ ትግርኛ, Tigrigna Bible, 1 ኢዮብ 10 Bible Online

ኢዮብ 10 - መ/ቅዱስ ትግርኛ, Tigrigna Bible, 1 bible

ኢዮብ 10

¹“ነፍሰይ ንህይወተይ ሰልከየታ፤ ስለዙይ ጥርዓነይ ብቝዘማ ኸስምዕ እየ፤ ብምረት ነፍሰይ ድማ ኽዛረብ እየ።

²ንእግዚኣብሄር ከምዙይ ክብሎ እየ፤ ኣይትፍረደኒ፤ ብምንታይ ትዅንነኒ ኸም ዘለኻ ንገረኒ።

³ክተጨንቕን፥ ንስራሕ ኢድካኸ ክትንዕቕን፥ ንምኽሪ ኽፉኣት ሰባት ክተብርህስ፥ ብኣኻ ፅቡቕ ድዩ?

⁴ዓይንኻ ኸም ዓይኒ ሰብ ድዩ? ወይ ከም ኣረኣእያ ሰብ ዲኻ እትርኢ?

⁵መዓልቲታትካ ኸም መዓልቲታት ሰብ ድየን? ዓመታትካኸ ኸም ዓመታት ወዲ ሰብ ድየን?

⁶ስለ ምንታይ ደኣ ሓጢኣተይ እትምርምር? ብበደለይ ከዓ እትከታተለኒ ዘለኻ?

⁷ኣብ ልዕሊ እዙይውን በዳሊ ኸም ዘይኮንኩ፥ ንስኻ ትፈልጥ ኢኻ፤ ካብ ኢድካ ዘናግፍ ከም ዘየለውን ንስኻ ትፈልጥ ኢኻ።”

⁸“ኣእዳውካ ቐረፃኒ፤ ሰርሓኒውን፤ ሕዚ ግና ኽተጥፍአኒ ትደሊ ኣለኻ።

⁹ከም ጭቃ ኸም ዝለወስካኒ ዘክር፤ ሕዚ ደኣ ስለ ምንታይ፥ ናብ ሓመድ ክትመልሰኒ ትደሊ ኣለኻ?

¹⁰ከም ፀባዶ ኣየፍሰስካንን? ከም ርግኦስ ኣየርጋእኻንን ዲኻ?

¹¹ቈርበትን ስጋን ኸደንካኒ፤ ብዓፅምን ጅማትን ኣገጣጠምካኒ።

¹²ህይወት ሃብካኒ፤ ሕያዋይነትካ ድማ ኣርአኻኒ፤ ምክንኻንካ ንመንፈሰይ ሓለዎ።

¹³ነዞም ነገራት እዚኣቶም ኣብ ውሽጢ ልብኻ ሓባእኻ፤ ሓሳብካ እዙይ ከም ዝነበረ ፈሊጠ ኣለኹ።

¹⁴ሓጢኣት እንተ ገበርኩ ንስኻ ትምልከተኒ፤ ካብ ሓጢኣተይውን ንፁህ ኣይትገብረንን።

¹⁵ሓጥእ እንተ ኾንኩ ወይለይ! ፃድቕ እንተ ኾንኩውን ርእሰይ ከቕንዕ ኣይክእልን፤ ውርደት ተመላእኹ፤ መከራይውን እርኢ ኣለኹ።

¹⁶ርእሰይ ልዕል እንተ ዘብል ድማ፥ ከም ኣንበሳ ምሃደንካኒ፤ መሊስካ ኣብ ልዕለይ ነቲ ዘደንቕ ሓይልኻ መርአኻ።

¹⁷ኣብ ልዕለይ ሓደስቲ መሰኻኽር መቖምካለይ፥ ንቝጥዓኻ ኣብ ልዕለይ መብዛሕኻዮ፤ ጭፍራ ኣብ ልዕሊ ጭፍራ ምወሰኽካለይ።”

¹⁸“ንምንታይ ደኣ ኻብ ማህፀን ኣውፃእኻኒ? ኣበይሞ ዓይኒ እንተይረአየኒ ሞይተ እንተ ዝኸውን!

¹⁹ከም ዘይነበረ ምኾንኩ፤ ካብ ማህፀንውን ናብ መቓብር ምተወሰድኩ ነይረ።

²⁰መዓልቲታት ህይወተይ ውሑዳትዶ ኣይኮናን?

²¹ስለዙይ ናብታ ዘይምለሰላ ቦታ ቕድሚ ምኻደይ፥ ናብ ምድሪ ፀልማትን ፅላል ሞትን፥

²²ከም ፀልማት ናብ ዝፀልመተት፥ ስርዓት ናብ ዘይብላ ናብ ፅላል ሞት፥ ብርሃና ከም ፀልማት ናብ ዝኾነ ምድሪ እንተይከድኩ፥ ቍሩብ ምእንቲ ደስ ክብለኒ ሕደገኒ።”