Read መ/ቅዱስ ትግርኛ, Tigrigna Bible, 1 ኢዮብ 11 Bible Online

ኢዮብ 11 - መ/ቅዱስ ትግርኛ, Tigrigna Bible, 1 bible

ኢዮብ 11

¹ድሕሪዙይ ሶፋር በዓል ናዕማ፥ ከምዙይ ኢሉ መለሰ፦

²“ነዝ ዅሉ ብዝሒ ቓላት እዙይዶ፥ ምላሽ ምሃብ ኣይግብኦን እዩ? ወይ ከዓ ተናጋሪ ሰብዶ፥ ከም ፃድቕ ይቝፀር እዩ?

³ትምክሕትኻኸ ንሰብዶ ስቕ የብሎ እዩ? እንተ ኣላጊፅካስ ዘሕፍረካዶ የለን?

⁴ንስኻ ‘ትምህርተይ ዝተፃረየ እዩ፤ ኣብ ቅድሚ ዓይንኻውን ንፁህ እየ’ ትብል ኣለኻ።

⁵ኣበይሞ እግዚኣብሄር እንተ ዝዛረበካ፤ ኣባኻውን ከንፈሩ እንተ ዝኸፍት!

⁶ኣበይሞ ናይ ጥበብ ምስጢራት፥ ካብቲ ዘሎ ዕፅፊ ምዃኑ እንተ ዝገልፀልካስ፥ እግዚኣብሄር ንሓጢኣትካ፥ ካብ ዝግባእ ኣንኢሱ ኸም ዘኸፍለካ ምፈለጥካ።”

⁷“ንዕሙቕ ነገራት እግዚኣብሄር ክትምርምሮዶ ትኽእል ኢኻ? ንምልኣት እቲ ዅሉ ዝኽእል ኣምላኽከ፥ ክትምርምሮዶ ትኽእል ኢኻ?

⁸ካብ ሰማይ ልዕል ይብል፤ እንታይ ክትገብር ትኽእል? ካብ ሲኦልውን ይዓምቝ፤ እንታይ ክትፈልጥ ትኽእል?

⁹መጠኑ ኻብ ምድሪ ይነውሕ፤ ካብ ባሕሪ እውን ይሰፍሕ።

¹⁰ንሱ እንተ ሓለፈ፥ እንተ ዓፀወን፥ ጉባኤውን እንተ ኣከበ፥ መን ክኽልክሎ ይኽእል?

¹¹ንሱ ነቶም ከንቱ ዝኾኑ ሰባት ይፈልጦም፤ ዓመፅ እናረአየውን ስቕ ኢሉ ኣይምልከትን።

¹²ግናኸ ዓሻ ሰብ ምስትውዓል ካብ ዝመሃር፥ ዒሉ ኣድጊ በረኻ፥ ሰብ ኮይኑ ኽውለድ ይቐልል።

¹³“ኢዮብ፥ ኣብ ቅድሚ ኣምላኽ ልብኻ ኣቕንዕ፤ ኣእዳውካውን ናብኡ ዘርግሕ፤

¹⁴ኣብ ኢድካ ዓመፃ እንተ ሃልዩ፥ ኣርሕቆ፤ ኣብ ቤትካውን ግፍዒ ኣይተንብር።

¹⁵ሽዑ ብሓቂ ብዘይ ሕፍረት ገፅካ ኽተቕንዕ ኢኻ፤ ፅኑዕ ትኸውን እምበር ኣይትፈርሕን ኢኻ።

¹⁶ሽዑ ንመከራኻ ኽትርስዖ ኢኻ፤ ከም ዝሓለፈ ውሕጅ ክትሓስቦ ኢኻ።

¹⁷ህይወትካ ኻብ ቀትሪ በሊፃ ኽትበርህ እያ፤ ፀልማት እኳ እንተ ኾነ፥ ከም ጊሓት ይኸውን።

¹⁸ተስፋ ስለ ዘለካውን ተኣማሚንካ ኽትነብር ኢኻ፤ ኣብ ዙርያኻ ተማዕዱ፥ ብህድኣትውን ክትዓርፍ ኢኻ።

¹⁹ዘፍርሕ ዘይብልካ ኽትድቅስ ኢኻ፤ ብዙሓትውን ልመና ኸቕርቡልካ እዮም።

²⁰ኣዒንቲ ኽፉኣት ግና ኽፅልምታ እየን፤ ዝሃድሙሉውን ይስእኑ፤ ተስፋኦም ድማ ንነፍሶም ምሕላፍ እዩ።”