Read መ/ቅዱስ ትግርኛ, Tigrigna Bible, 1 ኢዮብ 12 Bible Online

ኢዮብ 12 - መ/ቅዱስ ትግርኛ, Tigrigna Bible, 1 bible

ኢዮብ 12

¹ድሕሪዙይ ኢዮብ ከምዙይ ኢሉ መለሰ፦

²“እምበኣር ብሓቂ ንስኻትኩም ኣውራታት ሰባት ኢኹም! ጥበብውን ምሳኻትኩም ክትመውት እያ!

³ግና ኣነውን ከማኻትኩም ኣእምሮ ኣለኒ፤ ካባኻትኩም ዝንእስ ኣይኮንኩን፤ ከምዙይ ዝበለ ነገር ዘይፈልጥከ መን እዩ?

⁴ኣነ መስሓቒ ብፆቱ ኸም ዝኾነ ሰብ ኮይነ ኣለኹ፤ ንእግዚኣብሄር ዝፀዋዕኹዎ፥ ንሱውን ዝመለሰለይ ኣነ እየ፤ ፃድቕን ፍፁምን ዝኾነ ሰብ መላገፂ ኾነ።

⁵ብሓሳብ እቲ ኣብ ምቾት ዝነብር ሰብ፥ መከራ ዝተንዓቐ እዩ፤ ግና እግሩ ኸንደልህፆ ተዳልዩ ኣሎ።

⁶ቤት እቶም ከተርቲ ብደሓን ይነብር ኣሎ፤ እቶም ንእግዚኣብሄር ዘቘጥዑውን፥ ብህድኣት ይነብሩ ኣለዉ፤ እግዚኣብሄር፥ ንዅሉ ኣብ ኢዶም ኣምፂኡሎም እዩ።”

⁷“ግና ንእንስሳት ጠይቕወን እሞ፥ ክምህራኹም እየን፤ ነዕዋፍ ሰማይውን ጠይቕወን፥ ክነግራኹም እየን።

⁸ወይ ከዓ ንምድሪ ጠይቕዋ እሞ ኽትምህረኩም እያ፤ ነቶም ኣብ ባሕሪ ዘለዉ ዓሳታትውን ጠይቕዎም ክነግሩኹም እዮም።

⁹ኢድ እግዚኣብሄር፥ እዙይ ከም ዝገበረ ካብዚኣቶም ዘይፈልጥ መን እዩ?

¹⁰ነፍሲ ዅሎም ህያዋንን፥ እስትንፋስ ኵሉ ወዲ ሰብን ኣብ ኢዱ እያ።

¹¹ከምቲ መልሓስ ንምግቢ ዘስተማቕር፥ እዝኒ ድማ ንቓል ዝፈልዮዶ ኣይኮነን?

¹²ጥበብ ኣብ ሽምግልና፥ ምስትውዓልውን ብነዊሕ ዕድመ ይርከብ።”

¹³“ጥበብን ሓይልን ኣብ እግዚኣብሄር ኣሎ፤ ምኽርን ምስትውዓልን ድማ ናቱ እየን።

¹⁴እንሆ፥ ንሱ የፍርስ፥ መሊሱ ዝነድቕ ከዓ የለን፤ ንሱ ንሰብ ይዓፅዎ፤ ዝኸፍቶውን የለን።

¹⁵እንሆ፥ ንሱ ንማያት ይኽልክሎም፤ ንሳቶምውን ይነፅፉ፤ ከፊቱ እንተ ሰደዶም ድማ፥ ንምድሪ የዕለቕልቑዋ።

¹⁶ሓይልን ጥበብን ናይ እግዚኣብሄር እየን፤ እቲ ዝስሕትን ዘስሕትን ናቱ እዮም።

¹⁷ንሱ ንመማኽርቲ ፍልጠቶም የሕድጎም፤ ንፈረድቲ እውን ሰነፋት ይገብሮም።

¹⁸ናይ ነገስታት እስራት ይፈትሕ፤ ንሕቘኦም ድማ ብመዕጠቒ ይኣስር።

¹⁹ንሱ ንኻህናት ቀንጢጡ ይሰዶም፤ ንሓያላት ድማ ይግልብጦም።

²⁰ንዘረባ እቶም እሙናት የፍርስ፤ ንሽማግለታት ምስትውዓል የሕድጎም።

²¹ኣብ ልዕሊ ኣሕሉቕ ንዕቐት የፍስስ፤ ንሓያላትውን ዕጣቖም የፍትሖም።

²²ንዕሙቕ ነገር ካብ ፀልማት ይቐልዕ፤ ንፅላል ሞትውን ናብ ብርሃን የውፅኦ።

²³ንኣህዛብ ልዕል ልዕል የብሎም፥ መሊሱ ኸዓ የጥፍኦም፤ ንኣህዛብ የብዝሖም፥ መሊሱ ድማ የፍልሶም።

²⁴ነሕሉቕ ኣህዛብ ምድሪ፥ ጥበቦም የሕድጎም፤ መንገዲ ብዘይብሉ ምድረ በዳ ኾለል የብሎም።

²⁵ንሳቶም ብርሃን ስኢኖም ኣብ ፀልማት ሃሰስ ይብሉ፤ ንሱውን ከም ሰካራማት ሰንከልከል ከም ዝብሉ ይገብሮም።”