Read መ/ቅዱስ ትግርኛ, Tigrigna Bible, 1 ኢዮብ 13 Bible Online

ኢዮብ 13 - መ/ቅዱስ ትግርኛ, Tigrigna Bible, 1 bible

ኢዮብ 13

¹“እንሆ፥ ነዝ ዅሉ ዓይነይ ረአየት፤ እዝነይውን ሰሚዓ ኣስተውዓለቶ።

²ነቲ ንስኻትኩም እትፈልጥዎ ኣነውን እፈልጦ እየ፤ ካባኻትኩም ድማ ኣይንእስን እየ።

³ግና ነቲ ዅሉ ዝኽእል ኣምላኽ ክነግር እደሊ ኣለኹ፤ ምስ እግዚኣብሄር ክዋቐስ እደሊ ኣለኹ።

⁴ንስኻትኩም ብሓሰት ለበጥቲ ኢኹም፤ ኵልኻትኩም ዘይትጠቕሙ ሓኪማት ኢኹም።

⁵አረ ስቕ ምባል እኳ እንተ እትኽእሉ፤ እዙይ ንኣኻትኩም ከም ጥበብ ምተቘፅረልኩም ነይሩ።

⁶ሕዚ እውን ምጕተይ ስምዑ፤ ንምጕት ከናፍረይውን ኣድምፁ።

⁷ንእግዚኣብሄር ብቓል ዓመፃ ኽትከላኸሉሉ፥ ምእንታኡ ኢልኩምከ ብምትላል ክትዛረቡ ዲኹም?

⁸ንእኡ ኣድልዎ ኽትገብሩሉ ዲኹም? ንእግዚኣብሄር ክትጣበቑሉዶ ትደልዩ ኣለኹም?

⁹ንሱ እንተ ዝምርምረኩም፥ ፅቡቕ ዝኾነልኩምዶ ይመስለኩም ኣሎ? ወይ ከዓ ኸምቲ ንሰብ እተላግፁሉ፥ ንእኡ እተላግፁሉዶ ይመስለኩም?

¹⁰ብስዉር ንገፅ ሰብ ኣድልዎ እንተ ገበርኩም፥ ንሱ ብግልፂ ኽዘልፈኩም እዩ።

¹¹ዕብየቱዶ ኣየፍርሐኩምን እዩ? ግርማኡኸ ኣየውድቐኩምን ድዩ?

¹²ምስላታትኩም ምስላ ሓመድ እዮም፤ ዕርድታትኩምውን ዕርድታት ጭቃ እዮም።”

¹³“ስቕ በሉ፥ ክናገርውን ሕደጉኒ፤ ዝወረደ ይውረደኒ።

¹⁴ስጋይ ብስነይ እሕዝ ኣለኹ፤ ንህይወተይውን ኣብ ኢደይ አንብር ኣለኹ።

¹⁵እንሆ፥ እንተ ቐተለኒ እኳ ንእኡ ብትዕግስቲ ኽፅበ እየ፤ ግና መንገደይ ኣብ ቅድሚኡ ኸፅንዕ እየ።

¹⁶ግብዝ ሰብ ኣብ ቅድሚኡ ደው ክብል ኣይኽእልን እዩ እሞ፤ ንሱ መድሓኒት ክኾነኒ እዩ።

¹⁷ንነገረይ ተጊህኹም ስምዕዎ፤ ንምስክርነተይውን በእዛንኩም ኣዳምፅዎ።

¹⁸እንሆ፥ ንነገረይ ኣዳልየዮ ኣለኹ፤ ፃድቕ ኮይነ ኸም ዝርከብውን እፈልጥ እየ።

¹⁹ምሳይ ዝፋረድ መን እዩ? ሕዚ ኣነ ስቕ እንተ በልኩ ኽመውት እየ።”

²⁰“ኦ ኣምላኽ! እዘን ክልተ ነገራት ጥራሕ ኣይትግበረለይ፤ ሽዑ ኣነ ኻብ ቅድሚ ገፅካ ኣይስወርን እየ፤

²¹ኢድካ ኻባይ ኣርሕቕ፤ ግርማኻውን ኣየደንግፀኒ።

²²ድሕሪዙይ ንስኻ ፀውዐኒ፤ ኣነውን ክምልስ እየ፤ ወይ ኣነ ኽዛረብ፥ ንስኻ መልሰለይ።

²³በደለይን ሓጢኣተይንስ ክንደይ ዝኣክል እዩ? እስኪ በደለይን ሓጢኣተይን ኣፍልጠኒ።”

²⁴“ንምንታይ ንገፅካ ኻባይ እትኽውሎ? ንምንታይከ ኸም ፀላኢኻ እትሪአኒ?

²⁵ንዝረገፈ ቘፅሊዶ ተጨንቕ ኣለኻ? ወይ ከዓ ንዝነቐፀ ሓሰርዶ ተሳጕጎ ኣለኻ?”

²⁶“ዝመረረ ነገር ፅሒፍካለይ ኢኻሞ፥ ሓጢኣት ንእስነተይውን ተውርሰኒ ኣለኻ።

²⁷ ንስኻ ነእጋረይ ብመቝሕ ትኣስረን፤ ንብዘሎ ኣካይዳይውን ትቋመቶ፤ ንኣሰር እግረይ መለለዪ ትገብረሉ ኣለኻ።

²⁸ኣነስ በስቢሱ ከም ዝጠፍእ ነገር፥ ብልዒ ኸም ዘበላሸዎ ኽዳን ኮንኩ።”