Read መ/ቅዱስ ትግርኛ, Tigrigna Bible, 1 ኢዮብ 14 Bible Online

ኢዮብ 14 - መ/ቅዱስ ትግርኛ, Tigrigna Bible, 1 bible

ኢዮብ 14

¹“ኵሉ ኻብ ሰበይቲ ዝውለድ ሰብ፥ ዘመን ህይወቱ ቝሩብ መዓልቲ እዩ፤ መከራውን ዝመልኦ እዩ።

²ከም ዕምበባ ይዕምብብ እሞ ይረግፍ፤ ከም ፅላሎት ይሃድም፤ ኣይፀንዕንውን።

³ኣብ ልዕሊ ኸምዙይ ዝመሰለ ሰብዶ ኣዒንትኻ ትኸፍት ኣለኻ? ክፍረድከ ናብ ቅድሜኻዶ ተቕርበኒ ኣለኻ?

⁴ካብ ርኹስ ነገርከ ንፁህ ከውፅእ ዝኽእልዶ ኣሎ? ሓደ እኳ ዝኽእል የለን።

⁵ዕድመ ሰብ ውሱን እዩ፤ ቍፅሪ ኣዋርሑውን ኣባኻ እዩ፤ ክሓልፋ ዘይኽእል ደረትውን ወሰንካሉ።

⁶ንሱ ኸም በዓል ውዕለት፥ መዓልቱ ኽሳዕ ዝፍፀም ክዓርፍስ፥ ቁሩብ ካብኡ ዘወር በል።”

⁷“ኦም ተስፋ ኣለዎሞ፥ እንተ ተቘርፀ እኳ መሊሱ ይጥጥዕ፤ ውልዶታቱውን ኣይውዳእን።

⁸ሱሩ ኣብ ምድሪ እንተ ኣረገ፥ ጕንዱ ድማ ኣብ መሬት እንተ ሞተ፥

⁹ብጠሊ ማይ ይጥጥዕ፤ ከም ሓድሽ ተኽሊ ኾይኑውን ጨናፍር የውፅእ።

¹⁰ሰብ ግና ይመውትሞ ይጋደም፤ ሰብውን ነፍሱ ይህብ ንሱኸ ኣበይ ኣሎ?”

¹¹“ማይ ካብ ውሽጢ ባሕሪ ይሃልቕ፤ ሩባውን ይንእስን ይደርቕን፤

¹²ሰብ ድማ ደቂሱ ኣይትስእን፤ ሰማያት ክሳዕ ዝሓልፉ ኸቶ ኣይነቅሕን፤ ካብ ድቃሱውን ኣይትስእን።”

¹³“ኣበይሞ ቝጥዓኻ ኽሳዕ ዝሓልፍ፥ እንተትስውረኒ፥ ኣብ መቓብር እንተትሓብአኒ፥ መዓልቲ ቘፀራ እንተትውስነለይ እሞ፥ ብድሕሪኡ እንተትዝክረኒ።

¹⁴ብሓቂ ሰብ ምስ ሞተ፥ ተመሊሱዶ ህያው ይኸውን እዩ? ዘመን ምሕዳሰይ ክሳዕ ዘመፅእ፥ ኵሉ ዘመን ሰልፈይ ብትዕግስቲ ምተፀበኹ ነይረ።

¹⁵ንስኻ ምፀዋዕኻኒ፤ ኣነውን ምመለስኩልካ ነይረ፤ ነቲ ግብሪ ኢድካ ምናፈቕካዮ ኔርካ።

¹⁶ሕዚ ግና ንስጕምተይ ትቘፅሮ ኣለኻ፤ ንሓጢኣተይውን ትከታተሎ ኣለኻ።

¹⁷ምትሕልላፈይ ኣብ ውሽጢ ኸረጢት ተሓቲሙ እዩ፤ ንሓጢኣተይውን ለቢጥካዮ ኣለኻ።”

¹⁸“እምባ እንትወድቕ ይጠፍእ፤ ኰዅሒውን ካብ ቦታኡ ይፈልስ።

¹⁹ከምቲ ማያት ነእማን ዝፍሕቖ፥ ውሕጅውን ንሓመድ ምድሪ ዝጕሕጕሖ፥ ከምኡ ኸዓ ንስኻ ንተስፋ ሰብ ከንቱ ትገብሮ።

²⁰ንስኻ ንሓዋሩ ተሸንፎ፤ ንሱ ድማ ይሓልፍ፤ ንትርኢቱ ትልውጦ፤ ንእኡውን ትሰዶ።

²¹ደቁ እንተ ኸበሩ፤ ኣይፈልጦን፤ እንተ ሓሰሩውን፥ ኣየስተውዕሎን እዩ።

²²ንስጋኡ እቲ ናይ ባዕሉ እዩ ዝስምዖ፤ ነፍሱውን ብዛዕባ ርእሱ ትሓዝን።”