Read መ/ቅዱስ ትግርኛ, Tigrigna Bible, 1 ኢዮብ 16 Bible Online

ኢዮብ 16 - መ/ቅዱስ ትግርኛ, Tigrigna Bible, 1 bible

ኢዮብ 16

¹ድሕሪዙይ ኢዮብ ከምዙይ ኢሉ መለሰ፦

²“ኣነ ኸምዙይ ዝበለ ነገር ብዙሕ ጊዜ ሰሚዐ ኣለኹ፤ ንስኻትኩም ኵልኻትኩም፥ ዘይትጠቕሙ መፀናናዕቲ ኢኹም።

³ብሓቂ ንኸንቱ ቓልዶ መወዳእታ ኣለዎ እዩ? ወይ ከዓ ንኽትምልስ ዘለዓዓለካ እንታይ እዩ?

⁴ነፍሰይ ክንዲ ነፍስኹም እንተ ዝኸውን ነይሩ፥ ኣነ ኣብ ልዕሌኹም ቃል መሳኻዕኹ፥ ርእሰይውን ኣብ ልዕሌኹም ምንቕናቕ ምተኽኣለኒ ነይሩ።

⁵ብዘረባ ኣፈይውን መበርታዕኹኹም ነይረ፤ ምፅንናዕ ከንፈረይውን መህድአኩም ነይሩ።”

⁶“ግና ኣነ እንተ ተዛረብኩ፥ ሕማመይ ኣይቕንስን፤ ስቕ እንተ በልኩውን፤ ኣይሓድገንን እዩ።

⁷ሕዝስ ንሓይለይ ኣላሕሊሕዎ፤ ንዅሉ ማሕበረይውን ኣፍሪስዎ።

⁸ምጭምዳደይ ይምስክረለይ ኣሎ፤ ዕብራነይ ተልዒሉኒ፥ ኣብ ገፀይውን ይምስክረለይ ኣሎ።”

⁹“ብቝጥዓኡ ሰላልዐንን ፀልአኒውን፤ ኣስናኑውን ሓርቀመለይ፤ ፀላእየይ ዓይኑ ኣፍጠጠለይ።

¹⁰ንሳቶምውን ኣፎም ከፈቱለይ፤ ኵሎም ተኣኪቦም ከዓ እናላገፁ ገፀይ ፀፍዑኒ።

¹¹እግዚኣብሄር ንኽፉኣት ሰባት ኣሕሊፉ ሃበኒ፤ ኣብ ኢድ ክፉኣት ሰባትውን ደርበየኒ።

¹²ኣነ ሃዲአ ዝነብር ሰብ ነበርኩ፤ ንሱ ግና ሰበረኒ፤ ብኽሳደይ ሒዙ ቐጥቀጠኒ፤ ዕላማኡ ገይሩ ኣቖመኒ።

¹³ሰብ ፍላፃታት ከበቡኒ፤ ንዀላሊተይ ቈራረፆ፤ ንሱውን ኣይራህርሀን፤ ንሓሞተይውን ናብ ምድሪ ኣፍሰሶ።

¹⁴ኣብ ልዕሊ ቝስሊ፥ ቍስሊ ወሰኸኒ፤ ከም ሓያል እናሰገረ ይጐየኒ።”

¹⁵“ኣብ ልዕሊ ቘርበተይ ወጮ ሰፈኹ፤ ቀርነይውን ኣብ ሓመድ ደርበኹ።

¹⁶ ካብ ብኽያት ዝተልዓለ ገፀይ ቀይሐ፤ ኣብ ከበሮ ዓይነይ ፅላል ሞት ኣሎ፤

¹⁷ግና ዓመፃ ኣብ ኢደይ የለን፤ ፀሎተይ ከዓ ንፁህ እዩ።”

¹⁸“ኣቲ ምድሪ፥ ንደመይ ኣይትኸውሊዮ፤ ንኣውያተይውን መዕረፊ ኣይኹን።

¹⁹ሕዚ እውን ምስክረይ ኣብ ሰማይ ኣሎ፤ ዝምስክረለይውን ኣብ ኣርያም እዩ።

²⁰ፀሎተይ ናብ እግዚኣብሄር ይብፃሕ፤ ዓይነይውን ኣብ ቅድሚኡ ንብዓት ተፍስስ።

²¹ከምቲ ወዲ ሰብ ምስ ብፃዩ ዝማጐት፥ ኣበይሞ ሰብ ኣብ ቅድሚ እግዚኣብሄር ምምጓት ከም ከኣለ!”

²²ውሑዳት ዓመታት ምስ ሓለፋ፥ ኣነ ናብቲ ዘይምለሰሉ መንገዲ ክኸይድ እየ።