Read መ/ቅዱስ ትግርኛ, Tigrigna Bible, 1 ኢዮብ 17 Bible Online

ኢዮብ 17 - መ/ቅዱስ ትግርኛ, Tigrigna Bible, 1 bible

ኢዮብ 17

¹መንፈሰይ ደኸመ፤ ዘመነይ ሃለቐ፤ መቓብርውን ተዳልዩለይ ኣሎ።

²መላገፅቲ ምሳይ ኣለዉ፤ ኣዒንተይ ድማ ኣብ ምምራሮም ይሓድራ ኣለዋ።

³ሕዚ ኸዓ፥ ንስኻ ዕርቡን ኴንካ ተውሓሰኒ፤ እንተ ዘይኮይኑ ምሳይ ኣግንዕ ዝወቅዕ መን እዩ?

⁴ልቦም ከየስተውዕል ከልኪልካዮ ኢኻ፤ ስለዙይ ድማ ልዕል ልዕል ኣይተብሎምን።

⁵ብፆቱ ንምዝመዛ ኣሕሊፉ ዝህብ ሰብ፥ ኣዒንቲ ደቁ ይፅልምታ።

⁶ኣብ ማእኸል ህዝብታት መመሰሊ ገበረኒ፤ ኣብ ገፁ ፂቕ ከም ዝብሉሉ ሰብ ኮንኩ።

⁷ኣዒንተይ ብሓዘን ፈዘዛ፤ ኵሎም ኣካላተይ ከም ፅላሎት ኮኑ።

⁸እቶም ቅኑዓት ሰባት በዙይ ክግረሙ እዮም፤ እቲ ንፁህውን ኣብ ልዕሊ እቲ ኽፉእ ሰብ ክናደድ እዩ።

⁹እቲ ፃድቕ ኣብ መንገዱ ኽፀንዕ፥ እቲ ኣእዳዉ ንፁህ ዝኾነ ድማ፥ ሓይሊ እናወሰኸ ክኸይድ እዩ።

¹⁰አረ ዅልኻትኩም ንዑ ናባይ ተመለሱ፤ ካባኻትኩም ሓደ ለባም እኳ ኣይረክብን እየ።

¹¹“ዘመነይ ሓሊፉ፤ ሓሳበይን መሳርሒ ልበይን ተቛረፀ።

¹²ንለይቲ ናብ መዓልቲ ይልውጥዎ፤ እቲ ብርሃን ናብ ፀልማት ዝቐረበ ይመስሎም።

¹³እቲ ዝፅበዮ ቤተይ ሲኦል እንተ ኾነ፥ መንፀፈይ ኣብ ፀልማት እንተ ኣንፀፍኩ፥

¹⁴ንመቓብር ‘ኣቦይ ኢኻ’ ንሓሰኻውን ‘እኖይ ወይ ሓፍተይ ኢኺ’ እንተ በልኩ፥

¹⁵ተስፋይ ደኣ ኣበይ ኣሎ? ንተስፋይ ክሪኣ ዝኽእልከ መንዩ?

¹⁶ምሳይዶ ናብ መቓብር ክትወርድ እያ? እታ ተስፋኸ ምሳይዶ ናብ ሓመድ ክትወርድ እያ?”