Read መ/ቅዱስ ትግርኛ, Tigrigna Bible, 1 ኢዮብ 18 Bible Online

ኢዮብ 18 - መ/ቅዱስ ትግርኛ, Tigrigna Bible, 1 bible

ኢዮብ 18

¹ድሕሪዙይ በልዳዶስ በዓል ሹሓ ኸምዙይ ኢሉ መለሰ፦

²“ኢዮብ፥ ክሳዕ መኣዝ ኢኻ ዘረባኻ ዘይትውድእ? ኣስተብህል እሞ ኽንዛረብ ሕደገና።

³ስለ ምንታይ ከም እንስሳ ተቘፀርና? ስለ ምንታይከ ኣብ ቅድሚ ዓይንኻ ረኸስና?

⁴ቍጥዓ ወሪሱካ ኣሎ፤ ንስኻ እንተ ሞትካኸ ምእንታኻ ምድሪ ኽትባድም ድያ? ወይ ከዓ ኣኻውሕ ካብ ስፍራኦም ክንቀሉ ድዮም?”

⁵“መብራህቲ ሓጢኣተኛ ይጠፍእ፤ ሃልሃልታ ሓዊውን ብልጭ ኣይብልን።

⁶እቲ ኣብ ድንኳኑ ዘሎ ብርሃንውን ክጠፍእ እዩ፤ እቲ ኣብ ልዕሊኡ ዘሎ መብራህቱውን ክጠፍእ እዩ።

⁷ሓይሊ ስጕምቱ ትፀብብ፤ ምኽሩውን ተውድቖ።

⁸እግሩ ብመፃወድያ ትተሓዝ፤ ብልዕሊ መርበብ ይኸይድ።

⁹መፃወድያ ብሸዀናኡ ይሕዞ፤ መፈንጠርውን ይብርትዖ።

¹⁰ኣብ ምድሪ ገመድ፥ ኣብ መንገዱውን ንእኡ መፃወድያ ተሓቢኡሉ ኣሎ።

¹¹ፍርሓት ብዅሉ ወገን ተጨንቖ፤ ብድሕሪኡ ኾይናውን ተባርሮ።

¹²ሓይሉ ብጥሜት ይልሕልሕ፤ መዓትውን ሰንከልከል ክሳዕ ዝብል ተዳልዩሉ ኣሎ።

¹³ኣካላት ሰውነቱ ይጠፍእ፤ ናይ ሞት በዅሪ ወዲ እውን ንኣካላቱ ይበልዖ።

¹⁴ካብቲ ዝኣምኖ ዝነበረ ድንኳኑ ይንቀል፤ ናብቲ ንጉስ ራዕዲውን የፃድፍዎ።

¹⁵ኣብ ውሽጢ ድንኳኑ ዘይሰቡ ይነብሩ፤ ኣብ መንበሪኡውን ዲን ይንስነስ።

¹⁶ብታሕቲ ሰራውሩ ይነቅፅ፤ ብላዕሊውን ጨናፍሩ ይረግፍ።

¹⁷ዝኽሩ ኻብ ምድሪ ይጠፍእ፤ ኣብቲ ሃገርውን ስሙ ኣይዝከርን።

¹⁸ካብ ብርሃን ናብ ፀልማት የፍልስዎ፤ ካብ ዓለምውን የሳጕጉዎ።

¹⁹ኣብ ማእኸል ህዝቡ ዘርእን ትውልድን ኣይሓድግን፤ ኣብ ውሽጢ መንበሪኡውን ዝነብር ሰብ ኣይተርፎን።

²⁰እቶም ቀዳሞት ሰባት ከም ዝደንገፁ፥ ከምኡውን እቶም ዳሕረዎት ሰባት፥ ብዛዕባ ዘመኑ ይድነቑ።

²¹ብሓቂ ቤት ሓጢኣተኛታት ከምኡ እያ፤ ስፍራ እቶም ንእግዚኣብሄር ዘይፈልጡውን እዙይ እዩ።”