Read መ/ቅዱስ ትግርኛ, Tigrigna Bible, 1 ኢዮብ 19 Bible Online

ኢዮብ 19 - መ/ቅዱስ ትግርኛ, Tigrigna Bible, 1 bible

ኢዮብ 19

¹ድሕሪዙይ ኢዮብ ከምዙይ ኢሉ መለሰ፦

²“ክሳዕ መኣዝ ኢኹም ንነፍሰይ እተጕህይዋ? ክሳዕ መኣዝ ኢኹምከ ብቓል እተድቅቑኒ?

³እንሆ፥ ዓሰርተ ሻዕ ፀረፍኩምኒ፤ እትገፍዑንስ እምበርዶ ኣይትሓፍሩን ኢኹም?

⁴ብርግፅ እንተ ተጋገኹኳ፥ እቲ ጌጋይ ምሳይ ይነብር።

⁵ብሓቂ እንተ ተዓበኹምለይ፥ ስለ ውርደተይ ኣብ ልዕለይ እንተ ተኸራኸርኩም፥

⁶ደጊም እግዚኣብሄር ከም ዝገልበጠኒ፥ ብመርበቡውን ከም ዝኸበበኒ ፍለጡ።

⁷እንሆ፥ ተበዲለ ኢለ እንተ ጠራዕኹ፥ ዝምልሰለይ የለን፤ ድምፀይ ዓው ኣቢለ እንተ ኣስማዕኹ፥ ዝፈርደለይ የለን።

⁸ኣነ ኸይሓልፍ ኢሉ ንመንገደይ ዓፅይዎ፤ መተሓላለፍየይውን ብፀልማት ሸፈኖ።

⁹ንሱ ንኽብረይ ቀንጠጦ፤ ንዘውደይውን ካብ ርእሰይ ወሰዶ።

¹⁰በዙይን በቱይን ኣፍረሰኒ፤ ኣነውን ከድኩ፤ ንተስፋይ ከም ኦም ነቐሎ።

¹¹ንቝጥዓኡ ኣብ ልዕለይ ኣንደዶ፤ ከም ፀላኢኡውን ቘፀረኒ።

¹²ሰራዊቱ ብሕብረት መፁ፤ መንገዶምውን ኣብ ልዕለይ ኣዳለዉ፤ ኣብ ዙርያ ድንኳነይ ሰፈሩ።”

¹³“ነሕዋተይ ካባይ ኣርሓቖም፤ እቶም ዝፈልጡኒ ድማ ፈፂሞም ተፈለዩኒ።

¹⁴ኣዝማደይ ሓደጉኒ፤ ፈተውተይውን ረስዑኒ።

¹⁵ቤተሰበይን ኣግራደይን ከም ባዕዲ ቘፀሩኒ፤ ኣብ ኣዒንቶምውን ከም ጋሻ ኮንኩ።

¹⁶ንሓሽከረይ እንተ ፀዋዕክዎ፤ ብኣፈይ እንተ ኣቃባጠርኩሉውን ኣይምልሰለይን።

¹⁷ሰበይተይ ንስትንፋሰይ ፀልአቶ፤ ኣሕዋተይ፥ ደቂ እነይ ንልመናይ ፀልእዎ።

¹⁸ህፃናት እኳ ኣጥቅዑኒ፤ ደው እንተ በልኩ ኸዓ ብኣይ ይዘራረቡ።

¹⁹ኵሎም መማኽርተይ ፈንፈኑኒ፤ እቶም ኣነ ዝፈትዎም ኣብ ልዕለይ ተገልበጡ።

²⁰ቈርበት ምስ ስጋይን ምስ ኣዕፅምተይን ተጣቢቑ፥ ግርፃነይ ጥራሕ ተሪፉኒ።”

²¹“ኣቱም ፈተውተይ፥ ኢድ እግዚኣብሄር ወቒዓትኒ እያ እሞ፥ ደንግፁለይ! ራህርሁለይ!

²²ንምንታይከ ንስኻትኩም ከም እግዚኣብሄር እተሳጕጉኒ? ስለ ምንታይከ ኻብ ስጋይ ዘይትፀግቡ?”

²³“ኣበይሞ ቓለይ ሕዚ እንተ ዝፀሓፍ፥ ኣበይሞ ኣብ መፅሓፍ እንተ ዝሕተም፥

²⁴ኣበይሞ ብሓፂንን ብዓረርን ብነሓስን፥ ኣብ ኰዅሒ ንሓዋሩ እንተ ዝቕረፅ፥

²⁵ግና እቲ ቤዛ ዝኾነኒ፥ ህያው ምዃኑ እፈልጥ ኣለኹ፤ ንሱ ኣብ መወዳእታ ኣብ ልዕሊ ምድሪ ኽቐውም እዩ።

²⁶እዝ ቘርበተይ ምስ ጠፍአውን፥ ሽዑ ካብ ስጋይ ተፈልየ ንእግዚኣብሄር ክሪኦ እየ።

²⁷ኣነ ባዕለይ ክሪኦ እየ፤ ኣዒንተይውን ክጥምታኦ እየን፤ ካባይ ካልእ ኣይኮነን፤ ልበይ ብሃንቀውታ ይጠልመኒ ኣሎ።”

²⁸ንስኻትኩም “ሱር እቲ ነገር ኣብኡ ተረኺቡ እዩሞ፥ ከመይ ጌርና ኽነሳጕጎ እንተ በልኩም፥

²⁹ፍርዲ ኸም ዘሎ ንኽትፈልጡ፥ ቍጥዓ፥ ቅፅዓት ሰይፊ የምፅእ እዩሞ፥ ንሰይፊ ፍርሕዎ።”