Read መ/ቅዱስ ትግርኛ, Tigrigna Bible, 1 ኢዮብ 20 Bible Online

ኢዮብ 20 - መ/ቅዱስ ትግርኛ, Tigrigna Bible, 1 bible

ኢዮብ 20

¹ድሕሪዙይ ሶፋር በዓል ናዕማ ኸምዙይ ኢሉ መለሰ፦

²“ነዙይ ምላሽ ክህበሉ ሓሳባተይ ይድርኸኒ ኣሎ፤ ምናዳ እቲ ኣብ ውሽጠይ ዘሎ ይህውኸኒ ኣሎ።

³እቲ ዘነውረኒ ተግሳፅ ሰሚዐዮ ኣለኹ፤ መንፈስ ምስትውዓለይውን ይምልሰለይ ኣሎ።”

⁴“ካብ ጥንቲ፥ ሰብ ኣብ ምድሪ ኻብ ዝነብር ጀሚሩ፥

⁵ፈኸራ ኽፉኣት ሰባት ሓፂር፥ ሓጐስ እቲ ሕሱም ከዓ ኸም ቕፅበት ዓይኒ፥ ከም ዝኾነዶ ኣይትፈልጥን ኢኻ?

⁶ልዕልናኡ ኽሳዕ ሰማይ እንተ ደየበ፥ ርእሱውን ክሳዕ ደመና እንተ በፅሐ፥

⁷ከም ፋንድያ ንሓዋሩ ይጠፍእ፤ እቶም ዝረአይዎ ‘ኣበይ ኣሎ’ ኽብሉ እዮም።

⁸ከም ሕልሚ ይበርር፤ ንሱውን ኣይርከብን፤ ከም ራእይ ለይቲውን ይጠፍእ።

⁹እቲ ዝረአዮ ዓይኒ መሊሱ ኣይሪኦን እዩ፤ ነቲ ዝነበረሉ ቦታውን መሊሱ ኣይሪኦን እዩ።

¹⁰ደቁ ንድኻታት የቀባጥሩ፤ ኢዱውን ንሃብቱ መሊሱ ይህብ።

¹¹እቲ ሓይሊ ንእስነት ዝኾነ ዓፅሙ፥ ምስኡ ኣብ ሓመድ ይድቅስ።”

¹²“ክፍኣት ንኣፉ ይምቅሮ፤ ኣብ ትሕቲ መልሓሱ ኸዓ ይሓብኦ፤

¹³ካብ ኣፉ ኸይመልቆ ይሕዞ፤ ኣብ ትንሓጉ ኸዓ ይዓቝሮ፤

¹⁴ምግቡ ኣብ ኣምዑቱ ይተሓዋወስ፤ ኣብ ውሽጡ ድማ ኸም ሕንዚ ኣፍዑት ይኾኖ።

¹⁵ነቲ ዝወሓጦ ሃብቲ ኽተፍኦ እዩ፤ እግዚኣብሄር ካብ ከብዱ ኸውፅኦ እዩ።

¹⁶ንሕንዚ ተመን ይጠቡ፤ መልሓስ ተመን ከዓ ይቐትሎ።

¹⁷ንዓይኒ ማይን፥ ነቲ መዓርን ፀባን ዘውሕዝ ሩባታት ኣይሪኦን።

¹⁸ነቲ ፍረ ድኻሙውን እንተይወሓጠ ይመልሶ፤ በቲ ነጊዱ ዘትረፎ ሃብቱ ድማ ደስ ኣይብሎን እዩ።

¹⁹እዙይ ድማ ንድኻታት ስለ ዘጥቅዖምን ስለ ዝሓደጎምን፥ ዘይሰርሖ ገዛውቲውን ስለ ዝወሰደን እዩ።

²⁰ከብዱ ዕረፍቲ ኣይፈለጠንሞ፥ እቲ ዝፈተዎ ነገር ኣየድሓኖን።

²¹ንሱ ኽበልዕ እንተሎ ዝኾነ እኳ ኣየትርፍን ነበረ፤ ስለዙይ ሃብቱ ኣይቐውምን።

²²ምስ ፀገበ ይጭነቕ፤ ኢድ ኵሎም ፅጉማት ከዓ ትረኽቦ።

²³ከብዱ እንተየፅገበ፥ እግዚኣብሄር ጓህሪ ቝጥዓኡ፥ ኣብ ልዕሊኡ ይሰድድ፤ እንትበልዕውን የዝንመሉ።

²⁴ካብ ኣፅዋር ሓፂን እንተ ሃደመኳ፥ ቀስቲ ነሃስ ኽወግኦ እዩ።

²⁵ነቲ ቐስቲ ይስሕቦሞ፥ ካብ ስጋኡ ይወፅእ፤ እቲ ብልጭልጭ ዝብል ብልሑውን፥ ካብ ሓሞቱ ይወፅእ፤ ፍርሓትውን ይወድቆ።

²⁶ንመዝገቡ ፀልማት ተዳልዩሉ ኣሎ፤ ብዘይ መናፍሕ ዝነድድ ሓዊ ክውሕጦ፥ ነቲ ኣብ ድንኳኑ ዝተረፈውን ክበልዖ እዩ።

²⁷ሰማይ ንበደሉ ይቐልዕ፤ ምድሪ ኸዓ ኣንፃሩ ትለዓሎ።

²⁸ጥሪት ቤቱ ፋሕ ክብል፥ በታ መዓልቲ ቝጥዓኡ፥ ከም ወሓዚ ማይ ክሓልፍ እዩ።

²⁹ክፉእ ሰብ ካብ እግዚኣብሄር ዝቕበሎ ዕድል እዙይ እዩ፤ እግዚኣብሄር ዝመደበሉ ርስቲውን እዙይ እዩ።”