Read መ/ቅዱስ ትግርኛ, Tigrigna Bible, 1 ኢዮብ 21 Bible Online

ኢዮብ 21 - መ/ቅዱስ ትግርኛ, Tigrigna Bible, 1 bible

ኢዮብ 21

¹ድሕሪዙይ ኢዮብ ከምዙይ ኢሉ መለሰ፦

²እስኪ ሓንሳዕ ቓለይ ስምዑ፤ እዙይውን ምፅንናዕኹም ይኹን።

³ክናገር ሕደጉኒ፤ ምስተናገርኩ ኣባጭዉ።

⁴ብሓቂ ቝዘማ ሓዘነይ ንሰብ ድየ ዝነግሮ? ትዕግስቲ ምስኣንከ ኣይግብአንንዶ?

⁵ናባይ ተመልከቱ፤ ተገረሙውን፤ ኣእዳውኩምውን ኣብ ኣፍኩም ኣንብሩ።

⁶ኣነ ብዝሓሰብኩ ቝፅሪ እጭነቕ፤ ንስጋይውን ፃዕሪ ይሕዞ ኣሎ።

⁷ሓጢኣተኛታት ሰባት ስለ ምንታይ ብህይወት ዝነብሩ? ስለ ምንታይከ ዝኣርጉ? ብሃብቲኸ ስለ ምንታይ ዝብርትዑ?

⁸ዘርኦም ምስኣቶም ፀኒዑ ይነብር፤ ደቆምውን ኣብ ቅድሚ ኣዒንቶም እዮም።

⁹ኣባይቶም ብዘይ ፍርሓት ብህድኣት ይነብር፤ በትሪ እግዚኣብሄርውን የብሎምን።

¹⁰ሽደኖም ይወልድ፤ ዘርኡ ብኸንቱ ኣይድርብዮን፤ ላሕሞምውን እንተየውሃየት ትወልድ።

¹¹ንደቆም ከም መጓሰ የውፍርዎም፤ ቈልዑኦም ይሰራሰሩ።

¹²ብኸበሮን ብኽራርን ይደርፉ፤ ብፋፃ ሻምብቆ ይሕጐሱ።

¹³ንዕድመኣቶምውን ብምቾት የሕልፍዎ፤ ብድንገትውን ናብ ሲኦል ይወርዱ።

¹⁴ግና ንእግዚኣብሄር “ካባና ረሓቕ፤ መንገድኻ ኽንፈልጥ ኣይንደልን ኢና፤

¹⁵ክነምልኮኸ ዅሉ ዝኽእል እግዚኣብሄር መን እዩ? ወይ ናብኡ እንተ ፀለናኸ እንታይ ክንረክብ ኢና” ይብሉ።

¹⁶እንሆ ሃብታቶም ኣብ ኢዶምዶ ኣይኮነን? ግና ምኽሪ ሓጢኣተኛታት ካባይ ዝረሓቐት እያ።

¹⁷መብራህቲ ሓጥኣን ዝጠፍአ፥ መቕሰፍቲ እውን ዝመፆም፥ እግዚኣብሄር ድማ ብቝጥዓኡ መከራ ዝፈደዮም፥

¹⁸ኣብ ቅድሚ ንፋስ ከም ሓሰር፥ ኣውሎ ንፋስውን ከም ዝወስዶ ብቝብቝ ዝኾኑ ኽንደይ ጊዜ እዮም?

¹⁹ንስኻትኩም “እግዚኣብሄር፥ ንበደሎም ንደቆም ይዓቝሮ” ኢልኩም ኢኹም፤ ግና ንሳቶም ምእንቲ ኽፈልጥዎ ንባዕላቶም ይፍደዮም።

²⁰ኣዒንቶም ጥፍኣቶም ይርአያ፤ ቍጥዓ ናይቲ ዅሉ ዝኽእል ኣምላኽ ድማ ይስተዩ።

²¹ዘመን ህይወቶም ምስ ሓለፈ፥ ሰባት ብዛዕባ ደቆም ዝግደሱዶ ይመስለኩም?

²²ኣብቶም ልዕል ልዕል ዝበሉ ንዝፈርድ እግዚኣብሄር፥ ብሓቂ ሰብዶ ፍልጠት ይምህሮ እዩ?

²³ገሊኡ ሰብ ምሉእ ሓይሊ እንተለዎ፥ ህዱእን ሕጉስን እንተሎ ይመውት፤

²⁴ሰብነቱ ምሉእ እንተሎ፥ ኣንጕዕ ኣዕፅምቱውን ልምሉም እንተሎ ይመውት።

²⁵ገሊኡ ሰብ ድማ ዝኾነ ሰናይ እንተይጠዓመ፥ ገና መሪርዎ እንተሎ ይመውት።

²⁶ኣብ ውሽጢ ሓመድ ሓቢሮም ይድቅሱ፤ ሓሰኻ ድማ ይኸድኖም።

²⁷እንሆ፥ ንሓሳባትኩም፥ ነቲ ኣብ ልዕለይ ዝመኸርኩምዎ ክፉእ ምኽሪ ፈሊጠዮ ኣለኹ።

²⁸ንስኻትኩም “ቤት እቲ ዓብዪ ሰብ ኣበይ ኣሎ? እቲ ሓጢኣተኛታት ዝነበርዎ ድንኳንከ ኣበይ ኣሎ?” ትብሉ ኣለኹም።

²⁹ነቶም ሓለፍቲ መንገዲዶ ኣይጠየቕኩምዎምን ኢኹም? ነቲ ንሳቶም ዝሃብዎ ምልክታቶምከ ኣይትፈልጡን ዲኹም?

³⁰እቲ ሓጥእ ንመዓልቲ መዓት ከም ዝሕሎ፥ ንመዓልቲ ቝጥዓውን ከም ዝፀንሕዶ ኣይትፈልጡን ኢኹም?

³¹ንሓጥእ ብዝኸዶ መንገዲ ዝዘልፎ መን እዩ? ነቲ ዝሰርሖኸ ዝምልሰሉ መንዩ?

³²ንእኡ ግና ናብ መቓብር ይወስድዎ፤ ሰባት ድማ ኣብ መቓብሩ ይሕልዉ።

³³ንሱ ድማ መሬት እቲ ለሰ ጥዒምዎ ኣሎ፤ ቅድሚኡውን ቁፅሪ ዘይብሉ ህዝቢ ኸም ዝነበረ፥ ድሕሪኡ ኸዓ ዅሉ ሰብ ክስዕብ እዩ።

³⁴ኵሉ እትምልሱለይ መልሲ ሓሰት እዩሞ፥ ከመይ ጌርኩም ኢኹም ብኸንቱ እተፀናንዑኒ?