Read መ/ቅዱስ ትግርኛ, Tigrigna Bible, 1 ኢዮብ 22 Bible Online

ኢዮብ 22 - መ/ቅዱስ ትግርኛ, Tigrigna Bible, 1 bible

ኢዮብ 22

¹ድሕሪዙይ እቲ ቴማናዊ ኤሊፋዝ ከምዙይ ኢሉ መለሰ፦

²“ብሓቂ ሰብዶ ንእግዚኣብሄር ክጠቕሞ ይኽእል እዩ? እቲ ጥበበኛ ሰብ ንባዕሉ እዩ ዝጠቅም።

³ ነቲ ዅሉ ዝኽእል ኣምላኽከ፥ ፃድቕ ምዃንካዶ ደስ የብሎ እዩ? ንመንገድኻ ፍፁም ብምግባርካኸ ረብሓዶ ኣለዎ እዩ?

⁴ንእኡ ስለ ዝፈራሕኻ ይዘልፈካ ድዩ? ናብ ፍርድኸ ምሳኻዶ ይኣቱ እዩ?

⁵ክፍኣትካኸ ብዙሕዶ ኣይኮነን? ንሓጢኣትካውን መወዳእታ የብሉን።

⁶ካብ ኣሕዋትካ ብኸንቱ ትሕጃ ወሰድካ፤ ክዳን ዕሩቓትውን ቀንጠጥካ።

⁷ንፅሙእ ማይ ኣየስተኻን፥ ንጥሙይውን እንጀራ ኸላእኻ።

⁸ቅልፅሙ ዘበርትዐ ንምድሪ ገዝኣ፥ እቲ ኽቡር ሰብ ከዓ ዝነብረላ ኾነት።

⁹ንመበለታት ጥራሕ ኢደን ሰደድካየን፤ ቀላፅም ደኽታማት ተሰይሩ እዩ።

¹⁰ስለዙይ ንስኻ ብመፃወዲያ ተኸበብካ፤ ድንገተኛ ፍርሓትውን ኣናወፀካ።

¹¹ከይትርኢ ብርሃን ፀልማት ኮነትካ፤ ብዝሒ ማያትውን ኣስጠመካ።”

¹²“እግዚኣብሄር ኣብ ሰማይዶ ልዕል ልዕል ኣይብልን? ከዋኽብቲውን ከመይ ልዕል ልዕል ከም ዝበሉ ተመልከት።

¹³ንስኻ ግና ‘እግዚኣብሄር እንታይ ይፈልጥ? ኣብ ግብ ዝበለ ፀልማት ኮይኑዶ ኽፈርድ ይኽእል እዩ?’

¹⁴ከይርኢ ፀሊም ደመና ጋሪዱዎ እዩ፤ ኣብ ዙርያ ሰማይ ይመላለስ ኢልካ ኢኻ።

¹⁵ብሓቂዶ እቶም ሓጢኣተኛታት ሰባት ብዝኸድዋ፥ ናይ ቀደም መንገዲ ኽትከይድዶ ትደሊ ኣለኻ?

¹⁶ንሳቶም ጊዜኣቶም እንተይበፅሐ ተነጠቑ፤ መሰረቶምውን ከም ፈሳሲ ማይ፥ ፈሰሰ።

¹⁷ንሳቶም ንእግዚኣብሄር ካባና ረሓቕ፤ ነቲ ዅሉ ዝኽእል ድማ ‘እንታይ ክገብረልና ይኽእል?’ በልዎ።

¹⁸ግና ንገዛውቶም ብፅቡቕ ነገር መልኦ፤ ምኽሪ ሓጥኣን ካባይ ዝረሓቐት እያ።”

¹⁹ፃድቃን ክሪኡዎ ኢዮም፤ ደስውን ክብሎም እዩ፤ ንፁሃንውን ብንዕቐት ይስሕቕዎም።

²⁰ብሓቂ ሃብቶም ጠፍአ፤ ንዝተረፈውን ሓዊ በልዖ።

²¹“ሕዚ እውን ምስኡ ተሰማማዕ፤ ሰላምውን ይሃሉኻ፤ ከምዙይ እንተ ጌርካ ፅቡቕ ክትረክብ ኢኻ።

²²ካብ ኣፉውን ሕጉ ተቐበል፤ ንቓሉውን ኣብ ልብኻ ዕቘሮ።

²³ናብቲ ዅሉ ዝኽእል ኣምላኽ እንተ ተመሊስካ፥ እንተ ተዋረድካውን፥ ከምቲ ዝነበርካዮ ኸፅንዐካ እዩ፤ ንሓጢኣትውን ካብ ድንኳንካ እንተ ኣርሒቕካ፤

²⁴ኣቕሓ ወርቂ ኣብ ውሽጢ ሓመድ፥ ንወርቂ ኦፊርውን ናብ ማእኸል ኣእማን ሩባ እንተ ደርበኻ፥

²⁵ሽዑ እቲ ዅሉ ዝኽእል እግዚኣብሄር፥ ወርቅን ዘንፀባርቕ ብሩርን ክኾነልካ እዩ።

²⁶ሽዑ ንስኻ በቲ ዅሉ ዝኽእል ኣምላኽ ደስ ክብለካ እዩ፤ ገፅካውን ናብ እግዚኣብሄር ክተልዕል ኢኻ።

²⁷ናብኡ ክትፅሊ ኢኻ፤ ንሱውን ክሰምዐካ እዩ፤ መብፅዓኻውን ክትህብ ኢኻ።

²⁸ኵሉ ዝሓሰብካዮ ኽሰልጠካ፥ ብርሃንውን ኣብ መንገድኻ ኽበርሀልካ እዩ።

²⁹እንተዋረዱኻ፥ ልዕል ክትብል ኢኻ፤ ንሱ ንትሑት ሰብ የድሕኖ እዩ እሞ።

³⁰ንንፁህ ሰብ የድሕኖ እዩ፤ ብንፅህና ኢድካውን ክትድሕን ኢኻ።”