Read መ/ቅዱስ ትግርኛ, Tigrigna Bible, 1 ኢዮብ 23 Bible Online

ኢዮብ 23 - መ/ቅዱስ ትግርኛ, Tigrigna Bible, 1 bible

ኢዮብ 23

¹ድሕሪዙይ ኢዮብ ከምዙይ ኢሉ መለሰ፦

²“ሎሚውን ቍዘማይ መሪር እዩ፤ ኢዱ ኣብ ልዕሊ ድምፂ ብኽያተይ ከቢዳ ኣላ።

³ንእኡ ኣበይ ከም ዝረኽቦ ኣበይሞ እንተ ዝፈልጥ! ኣበይሞ ናብቲ ዝተቐመጠሉ ዙፋን እንተ ዝበፅሕ!

⁴ኣብ ቅድሚኡ ነገረይ መፍሰስኩ፤ ንኣፈይውን ብመርትዖ ምመላእኽዎ ነይረ።

⁵ነቲ ዝምልሰለይ ቃል ምፈለጥክዎ፤ እንታይ ከም ዝብለኒ ድማ መስተውዓልኩ ነይረ።

⁶በቲ ዓብዪ ሓይሉዶ ኽማጐተኒ እዩ? እኳ ደኣ ፅን ምበለኒ።

⁷ቅኑዕ ሰብ ምስኡ ኣብኡ ኽማጐት ይኽእል እዩ፤ ኣነውን ካብ ፈራድየይ ንዘለኣለም ክድሕን ነይረ።”

⁸“እንሆ ንቕድሚት ከድኩ፤ ንሱውን የለን፤ ንድሕሪትውን ከድኩ፤ ግና ኣየስተውዕሎን።

⁹ንሱ ናብ ዝሰርሐሉ ናብ ፀጋም እንተ ኸድኩ ኣይምልከቶን፤ ብየማነይ ይስወር፤ ኣይሪኦንውን።

¹⁰ንሱ ግና ኣነ በየነይቲ መንገዲ ኸም ዝኸይድ ይፈልጥ እዩ፤ ምስ ፈተነኒውን ከም ወርቂ ፅሩይ ኮይነ ኽወፅእ እየ።

¹¹ኣእጋረይ ብመንገዱ ፀንዓ፤ መንገዱውን ሓለኹ፤ ካብኡውን ኣየግለስኩን።

¹²ካብ ትእዛዝ ከንፈሩውን ኣይተመለስኩን፤ ካብ ኵሉ ሃብተይ ኣብሊፀ፥ ንቓል ኣፉ ኣብ ልበይ ዓቘርክዎ።”

¹³“ንሱ ግና በይኑ እዩ፤ ንእኡ ዝመስሎ መን እዩ? ነፍሱ ዝፈተወቶውን እዩ ዝገብር።

¹⁴ነቲ ኣባይ ዝተወሰነ ኽፍፅሞ እዩ፤ ከምዙይ ዝበለ ብዙሕ ነገር ምስኡ ኣሎ።

¹⁵ስለዙይ ድማ እየ ኣብ ቅድሚኡ ዝድንግፅ፤ ነዙይ እንትሓስብውን ብእኡ ዝፈርሕ።

¹⁶ኣምላኽ ባዕሉ ንልበይ ኣጃጅይዎ፤ እቲ ዅሉ ዝኽእል ኣምላኽ ኣደንጊፁኒ እዩ።

¹⁷ካብ ፀልማት ዝተልዓለ እቲ ግብ ዝበለ ፀልማት፥ ንገፀይ ካብ ምሽፋኑ ዝተልዓለ ኣይደንገፅኩን።”