Read መ/ቅዱስ ትግርኛ, Tigrigna Bible, 1 ኢዮብ 24 Bible Online

ኢዮብ 24 - መ/ቅዱስ ትግርኛ, Tigrigna Bible, 1 bible

ኢዮብ 24

¹ካብቲ ዅሉ ዝኽእል ኣምላኽ ዘመናት ኣይተሰወሩንሞ፥ እቶም ንእኡ ዝፈልጡ ስለ ምንታይ ነተን ኣዋርሕ ዘይሪኡወን።

²ሰባት ንወሰን ብፃዮም ይደፍእዎ፤ ንመጓሰ ዘሚቶምውን ይጓስይወን።

³ንኣእዱግ ድኻታት ይዅብኵብወን፤ ንብዕራይ መበለትውን ትሕጃ ይሕዝዎ።

⁴ንድኻታት ካብ መንገዲ የወግዱዎም፤ ኵሎም ድኻታት እታ ምድሪ ኸዓ ይሕብኡ።

⁵እንሆ፥ ከም ኣእዱግ በረኻ ምግቢ ኽደልዩ ይወፍሩ፤ ምድረ በዳውን ንደቆም ዝኸውን ምግቢ ይህቦም።

⁶ንሳቶም ኣብ ግራት እኽሎም ይዓፅዱ፤ ኣብ ኣታኽልቲ ወይኒ እቶም ክፉኣት ሰባትውን ይቕርሙ።

⁷ብዘይ ክዳን ጥራሖም ይሓድሩ፤ ብጊዜ ቝሪ ዝኽደንዎ የብሎምን።

⁸በቲ ኻብ እምባታት ዝወርድ ዝናም ይርሕሱ፤ መፀግዒ ስኢኖምውን ኰዅሒ ይሓቝፉ።

⁹ንደኽታም ቈልዓ ካብ ጡብ እኖኡ ይምንጥልዎ፤ ካብ ምስኪናት ትሕጃ ይወስዱ።

¹⁰ብዘይ ክዳን ጥራሖም ይኸዱ፤ ብጥሙያቶምውን እንዳእቲ ይፆሩ።

¹¹ኣብ ውሽጢ ሓፁር እዞም ሰባት እዚኣቶም ዘይቲ ኣውሊዕ ይፀምቁ፤ ወይኒ እውን ይፀምቁ፤ ንሳቶም ግና ይፀምኡ።

¹²ካብ ከተማን ካብ ብገዛ ቤቶምን ይስጐጉ፤ ነፍሲ እቶም ቈልዑውን ንሓገዝ ተእዊ፤ እግዚኣብሄር ግና ስንፍናኦም ኣይምልከትን።

¹³እዚኣቶም ኣብ ልዕሊ ብርሃን ዝዕምፁ እዮም፤ ንጐደናታቱ ዘይፈልጡ፥ ኣብ መንገድታቱውን ኣይፀንዑን።

¹⁴እቲ ቐታሊ ነፍሲ ኣንጊሁ ይትስእ፤ ንድኻን ንውፁዕን ይቐትል፤ ብለይቲ ኸዓ ኸም ሰራቒ እዩ።

¹⁵ዓይኒ ዘማዊ፥ ፅልግልግ ክሳዕ ዝብል ይፅበ፤ “ናይ ዝኾነ ሰብ ዓይኒ ኣይሪአንን” ይብል፤ ገፁውን ይሽፍን።

¹⁶ብፀልማት ናብ ቤት ኵዒቶም ይኣትዉ፤ ብቐትሪ ግና ተዓፅዮም ይውዕሉ፤ ንብርሃን ኣይፈልጥዎን እዮም።

¹⁷ናይ ንጉሆ ብርሃን ንኣኣቶም ከም ድነ ሞት እዩ፤ ድነ ሞት ይፈልጡ እዮምሞ።

¹⁸ንሳቶም ኣብ ቅድሚ ማይ በሪሮም ይሓልፉ፤ ዕድሎምውን ኣብ ምድሪ ዝተረገመት እያ፤ ናብ መንገዲ ኣታኽልቲ ወይኖም ኣይምለሱን።

¹⁹ድርቅን ሃሩርን ንማይ በረድ የጥፍኦ፤ ከምኡውን ሲኦል ነቶም ሓጥኣን ተጥፍኦም።

²⁰ማህፀን ትርስዖ፤ ሓሰኻ ድማ ብሓጎስ ይጠብዎ፤ ዝዝክሮውን የለን፤ ክፍኣትውን ከም ኦም ይስበር።

²¹ነታ ዘይወለደት መኻን ይብድላ፤ ንመበለትውን ፅቡቕ ኣይገብርን።

²²ግና ንሱ ንሓያል ብሓይሉ ይስሕቦ፤ ንሱ እንትለዓል ሰብ ብህይወቱ ኣይእመንን።

²³እግዚኣብሄር ብሰላም ኣንቢርዎም እዩ፤ ብእኡውን ይእመኑ፤ ኣዒንቱ ግና ኣብ ልዕሊ መንገዶም እዩ።

²⁴ንቝሩብ ጊዜ ልዕል ልዕል ይብሉ፤ ይኸዱ ይፅምልዉውን፤ ከምቶም ካልኦት ይእከቡ፤ ከም ርእሲ ሸዊትውን ይቝረፁ።

²⁵ከምዙይ እንተ ዘይኮይኑኸ ሓሳዊ ዝገብረኒ፥ ንዘረባይውን ከንቱ ኽገብሮ ዝኽእል መን እዩ?