Read መ/ቅዱስ ትግርኛ, Tigrigna Bible, 1 ኢዮብ 27 Bible Online

ኢዮብ 27 - መ/ቅዱስ ትግርኛ, Tigrigna Bible, 1 bible

ኢዮብ 27

¹ኢዮብ መሊሱ ብምስላ ኸምዙይ ኢሉ ተዛረበ፦

²“ነቲ ንነፍሰይ ዘምረራ፥ ንፍርደይውን ዘግደፈኒ፥ ኵሉ ዝኽእል እግዚኣብሄር ህያው እዩ።

³እስትንፋሰይ ኣብ ውሽጠይ፥ መንፈስ እግዚኣብሄርውን ኣብ ውሽጢ ኣፍንጫይ ክሳዕ ዘሎ፥

⁴ከናፍረይ ከቶ ኽፍኣት ኣይዛረባን፤ ልሳነይውን ጥበራ ኣይተውፅእን።

⁵ንኣኻትኩም ምፅዳቕ ካባይ ይርሓቕ፤ ክሳዕ ዝመውት ድማ ፍፁምነተይ ካባይ ኣየርሕቕን።

⁶ፅድቀይ ኣፅኒዐ ኽሕሉ እየ፤ ፈፂመውን ኣይሓድጎን እየ፤ ኣብተን መዓልትታተይ ስለ ሓንቲኳ ልበይ ኣይነቕፈንን።

⁷ፀላእየይ ከም ሓጥእ፥ ዝቃወመኒውን ኸም በዳሊ ይኹን።

⁸እግዚኣብሄር ምስ ኣጥፍኦን ንነፍሱ ምስ ፈለያን፥ ተስፋ ግብዝ እንታይ እዩ?

⁹ብሓቂ፥ መከራ ምስ መፆኸ፥ እግዚኣብሄር ኣውያቱ ይሰምዕ ድዩ?

¹⁰ኵሉ ብዝኽእል ኣምላኽከ ይሕጐስ ድዩ? ኵልሻዕኸ ንእግዚኣብሄር ይፅውዕ ድዩ?”

¹¹“ብዛዕባ ኢድ እግዚኣብሄር ኣነ ኽምህረኩም እየ፤ ሓሳባት ናይቲ ዅሉ ዝኽእል እግዚኣብሄር ከዓ ኣነ ኣይሓብአኩምን እየ።

¹²እንሆ ዅልኻትኩም ርኢኹምዎ ኢኹም፤ ስለ ምንታይ ደኣ ኸንቱ ኾንኩም?”

¹³“ኣምላኽ ነቲ ሓጥእ ዝህቦ ዕድል፥ እቲ ግፍዐኛ ኻብቲ ዅሉ ዝኽእል እግዚኣብሄር ዝቕበሎ ርስቲ እዙይ እዩ፦

¹⁴ደቁ እንተ በዝሑ፥ ኣደዳ ሰይፊ ክኾኑ እዮም፤ ዘርኡውን እንጀራ ኣይፀግቡን።

¹⁵እቶም ዝተረፉ ደቁ ኸዓ ብፌራ ይሞቱ፤ መበለታቶምውን ኣይበኽያሎምን።

¹⁶ንብሩር ከም ሓመድ እንተ ኣከቦ፥ ንኽዳውንቱውን ከም ጭቃ እንተ ደለቦ፥

¹⁷ንሱ ይድልብ፤ ግና ፃድቕ እዩ ዝኽደኖ፤ ነቲ ብሩርውን እቶም ንፁሃት ይማቐልዎ።

¹⁸ከም ዓለባ ሳሬት ብቕልጡፍ ቤቱ ይሰርሕ፤ ከም ጐጆ ሓላዋይ ድማ እያ።

¹⁹ብሃብታሙ እንተሎ ይድቅስ፤ ምስኡ ድማ ዝኾነ ነገር ኣይማላእን፤ ዓይኑ ቛሕ የብል፤ ንሱውን የለን።

²⁰ድንጋፀ ኸም ውሕጅ ኮይኑ የርክቦ፤ ንፋስ ኣውሎ ድማ ብለይቲ ይምንጥሎ።

²¹ንፋስ ምብራቕ መንዚዑ ይወስዶ፤ ካብ ቦታኡውን ይነቕሎ፤

²²እግዚኣብሄር ብዘይ ምሕረት ይድርብዮ፤ ንሱ ኻብ ኢዱ ቐልጢፉ ኸምልጥ ይደሊ።

²³ኵሉ ሰብ ብኢዱ የጣቕዐሉ፤ እናፋፀዩ ኸዓ ኻብ ቦታኡ የውፅእዎ።”