Read መ/ቅዱስ ትግርኛ, Tigrigna Bible, 1 ኢዮብ 28 Bible Online

ኢዮብ 28 - መ/ቅዱስ ትግርኛ, Tigrigna Bible, 1 bible

ኢዮብ 28

¹“ብሓቂ ብሩር፥ ዝወፀሉ፥ ወርቂውን ዝፈሰሉ ቦታ ኣሎ።

²ሓፂን ካብ ምድሪ፥ ይውሰድ፤ ነሃስ ድማ ኻብ እምኒ መኺኹ እዩ ዝወፅእ።

³ሰብ ንፀልማት ወሰን ይገብረሉ፤ ንናይ ኣእማን ፀልማትን ናይ ፅላሎት ሞትን፥ ክሳዕ መወዳእታ ይመራመሮ።

⁴ካብቲ ሰብ ዝነብረሉ ርሒቆም መውረዲ ይዅዕቱ፤ ኣብ እግሪ ሰብውን ተረስዑ፤ ካብ ሰብውን ርሒቖም እናተንጠልጠሉ ነነው ይብሉ።

⁵እንጀራ ካብ ውሽጢ ምድሪ ይወፅእ፤ መዓሙቓ ኸዓ ኸም ብሓዊ ይገላበጥ።

⁶እቲ ኣእማና ኸዓ ሰፈር ሰንፔር እዩ፤ ድኹም ወርቂ ኸዓ ኣብኡ ይርከብ።

⁷ነታ መንገዲ፥ ሊሎ ኣይፈልጦን፤ ዓይኒ ንስሪውን ኣይረአየታን።

⁸ውሉድ ዕቡያት ኣይረገፅዋን፤ ሽደን ኣንበሳውን ኣይሓለፋን።”

⁹“ሰብ ናብ እምኒ ቡላድ ኢዱ ይዝርግሕ፤ ንእምባታት ከዓ ኻብ መሰረቶም ነቒሉ ይግልብጦም።

¹⁰ኣብ ውሽጢ ኣኻውሕ ነዃላት ይነድል፤ ዓይኑውን ንዅሉ ዕንቍ ትርኢ።

¹¹እቲ ፈሳሲ ኸየንጠብጥብ ይሓትሞ፤ ነቲ ተሰዊሩ ዝነበረ ድማ ናብ ብርሃን የውፅእዎ።”

¹²“ግና ጥበብ ኣበይ እያ እትርከብ? ምስትውዓልከ ኣበይ እዩ ቦታኣ?

¹³መንገዳ ዝፈልጥ ሰብ የለን፤ ኣብ ምድሪ ህያዋን እኳ ኣይትርከብን እያ።

¹⁴ቃላይ ‘ንሳ ምሳይ የላን’ ይብል፤ ባሕሪ እውን ‘ኣብ ውሽጠይ የላን’ ይብል።

¹⁵ብፅሩይ ወርቂ ኣይትዕደግን እያ፤ ብሩርውን ስለ ዋጋኣ ኣይምዘንን እዩ።

¹⁶ብወርቂ ኦፊርን፥ ብኽቡር ዕንቍን ብሰንፔርን ኣይትግመትን እያ።

¹⁷ወርቅን ብርጭቆን ኣይወዳደርዋን፤ በቕሓ ፅሩይ ወርቂውን ኣይትልወጥን።

¹⁸ብዛዕባ ዕንቍን ኣልማዝን እኳ ኣይንገርን፤ ዋጋ ጥበብ ካብ ቀይሕ ዕንቊ ይበልፅ።

¹⁹ናይ ኢትዮጵያ ቶጳዝዮን እኳ ኣይመዓራረያን፤ ብፅሩይ ወርቂውን ኣይትግመትን።”

²⁰“አረ ጥበብ ካበይ እያ እትመፅእ? ቦታ ምስትውዓልከ ኣበይ ኣሎ?

²¹ካብ ዓይኒ ዅሎም ህያዋን ሕብእቲ እያ፤ ካብ ኣዕዋፍ ሰማይውን ክውልቲ እያ።

²²ሞትን ጥፍኣትን፥ ‘በእዛንና ጥራሕ ወሬኣ ሰሚዕና’ ይብሉ።”

²³“ንወሰናት ምድሪ ዝቋመቶ፥ ንዅሉ ኣብ ትሕቲ ሰማይ ዘሎ ዝሪኦ ንሱ ስለ ዝኾነ፥ መንገዲ ጥበብ ዘስተውዕል እግዚኣብሄር እዩ፤ ንቦታኣ ዝፈልጥ ንሱ እዩ።

²⁵ንሱ ንንፋስ፥ ሚዛን ምስ ገበረሉ፤ ንባሕሪ ኸዓ ብመስፈሪ ምስ ሰፈሮ፥

²⁶ንዝናም ስርዓት፥ ንበርቂ ነጐድጓድውን መንገዲ ምስ መደበሉ፥

²⁷ሽዑ ረአያ፤ ገለፃውን፤ ኣዳለዋ፥ መሊሱውን መርመራ።”

²⁸ “ንሰብ ድማ ኸምዙይ በሎ፦ ንእግዚኣብሄር ምፍራሕ ጥበብ እዩ፤ ካብ ሓጢኣት ምርሓቕ ከዓ ምስትውዓል እዩ።”