Read መ/ቅዱስ ትግርኛ, Tigrigna Bible, 1 ኢዮብ 30 Bible Online

ኢዮብ 30 - መ/ቅዱስ ትግርኛ, Tigrigna Bible, 1 bible

ኢዮብ 30

¹“ሕዚ ግና እቶም ብዕድመ ኻባይ ዝንእሱ፥ ነቦታቶም ምስቶም መጓሰይ ዝሕልዉ ኣኽላባት እኳ፥ ንምንባር ዝነዓቕኩዎም፥ የባጭዉለይ ኣለዉ።

²ምሉእ ሰብ ምዃኖም ጠፊእዎም ነበረ፤ ብርትዐ ኣእዳዎም ንኣይ እንታይ ክጠቕመኒ እዩ?

³ብስእነትን ጥሜትን ዝመንመኑ እዮም፤ ናይ ምፍራስን ምብትታንን ፀልማት ናብ ዘለዎ ምድረ በዳ ይሃድሙ።

⁴ኣብ ጥቓ ቘጥቋጥ ዘሎ፥ ጨው ጨው ዝብል ኣትኽልቲ ይኣርዩ፤ ሱር ታህሶስውን ምግቦም ይገብሩ።

⁵ካብ ሰባት ተፈልዮም ተሰጐጉ፤ ኣብ ልዕሊ ሰራቒ ዋዕ ዋዕ ከም ዝበሃል የድህዩ።

⁶ኣብ በዓትን ኣብ ጕድጓድ ምድርን፥ ኣብ ማእኸል ኣኻውሕን ይነብሩ።

⁷ኣብ ማእኸል ዱር ኮይኖም የእውዩ፤ ኣብ ትሕቲ እሾዅ ይእከቡ።

⁸ደቂ ነውራማትን ሰነፋትን እዮም፤ ተገሪፎም ካብ ሃገር ዝተሰጉ እዮም።”

⁹“ሕዚ ኣነ መድረፊኦምን፥ መመሰሊኦምን ኮንኩ።

¹⁰ንሳቶም ፈንፈኑኒ፤ ካባይ ድማ ረሓቑ፤ ምራቖምውን ኣብ ቅድመይ እንትፍ ምባል ኣይሓፍሩን።

¹¹ንሱ መወርወሪ ቐስተይ ኣላሕሊሑ ኣዋሪዱኒ እዩሞ፥ ንሳቶምውን ኣብ ቅድመይ ልጓሞም ፈትሑ።

¹²ብወገን የማነይ ስድታት ደቂ ተልዓሉኒ፤ ነእጋረይ ይደፍኡወን፤ መንገዲ ጥፍኣቶምውን ኣባይ የልዕሉ ኣለዉ።

¹³ንመንገደይ የበላሽውዎ ኣለዉ፤ ረዳኢ ዘይብሎም ሰባት ንመከራይ የብዝሕዎ።

¹⁴ብገፊሕ ፍራስ ከም ዝመፁ ይመፁኒ፤ ብፍሩስ መካበቢያ ተንከባሊሎም ይኣትዉ።

¹⁵ድንጋፀ ኣብ ልዕለይ ተመለሰትኒ፤ ከም ንፋስ ኮይኖምውን ንኽብረይ የሳጕጉዋ፤ ድሕንነተይውን ከም ደመና ሓለፈ።”

¹⁶“ሕዚ እውን ነፍሰይ ኣብ ውሽጠይ መኸኸት፤ ዘመን መከራ ሓዘትኒ።

¹⁷ኣዕፅምተይ ብለይቲ ብደዌ ይንደል፥ ዝቐራጥመኒ ቓንዛ ኣይዓርፍን እዩ።

¹⁸ካብ ሓይሊ እቲ ብርቱዕ ሕማም ዝተልዓለ ኽዳነይ ተበላሸወኒ፤ ከም ክሳድ ቀምሽውን ሓነቐኒ።

¹⁹ንሱ ናብ ውሽጢ ጭቃ ደርበየኒ፤ ከም ሓመድን ሓሙዅሽትን መሰልኩ።”

²⁰“ኦ ኣምላኽ፥ ናባኻ ተማህለልኩ፤ ንስኻ ግና ኣይመለስካለይን፤ ተሳእኹ፥ ኣይተመልከትካንን።

²¹ተመሊስካ ጨካን ኮንካኒ፤ ብብርቱዕ ኢድካ ኣጨነቕካኒ።

²²ብንፋስ ኣልዓልካኒ ኣብ ልዕሊኡውን ኣቐመጥካኒ፤ ብንፋስ ኣውሎ ኣምከኽካኒ።

²³ናብቲ ዅሎም ህያዋን ዝእከቡሉ ቤት፥ ናብ ሞት ኣሕሊፍካ ኸም እትህበኒ እፈልጥ ኣለኹ።

²⁴ግና ዝወድቕ ሰብዶ ኢዱ ኣይዝርግሕን እዩ? ወይ ጥፍኣት ዝመፆዶ ኣየእውን እዩ?

²⁵ኣነ ነቶም ፀገም ዝረኸቡዶ እበኽየሎም ኣይነበርኩን? ንድኻውን ነፍሰይ ትሓዝነሉዶ ኣይነበረትን?

²⁶እንሆ፥ ሰላም ንምርካብ ተስፋ ገበርኩ፤ ግና መከራ መፀኒ፤ ንብርሃን ብትዕግስቲ ተፀበኹ፤ ግና ፀልማት መፀ።

²⁷ኣምዑተይ ይፈልሕ፥ ግና ኣይዓርፍን፤ ዘመን መከራ መፀትኒ።

²⁸ብዘይ ፀሓይ ብትካዘ ኸድኩ፤ ኣብ ማእኸል ጉባኤውን ደው ኢለ ኣእዌኹ።

²⁹ንወኻሩ ሓወን፥ ንሰገናትውን መሓዛአን ኮንኩ።

³⁰ቈርበተይ ፀለመ፤ ካባይ ተፈልዩውን ርግፍግፍ በለ፤ ኣዕፅምተይ ድማ ኻብ ረስኒ ዝተልዓለ ተቓፀለ።

³¹ስለዙይ መሰንቆይ ንሓዘን፥ እምብልታይውን ንበኸይቲ ቓል ኮነ።”