Read መ/ቅዱስ ትግርኛ, Tigrigna Bible, 1 ኢዮብ 31 Bible Online

ኢዮብ 31 - መ/ቅዱስ ትግርኛ, Tigrigna Bible, 1 bible

ኢዮብ 31

¹“ምስ ዓይነይ ቃል ኪዳን ኣተኹ፤ ደጊም ናብ ቆንጆ ኸመይ ኢለ ኽርኢ?

²እቲ ግደ ኣምላኽ ኣብ ላዕሊ እቲ ርስቲ ናይቲ ዅሉ ዝኽእል፥ ካብ ኣርያም እንታይ እዩ?

³ጥፍኣት ንዓመፅቲ፥ ዕንወትውን ንገበርቲ ኽፉእዶ ኣይኮነን?

⁴ንሱስ ንመንገደይዶ ኣይሪኣን እዩ? ንዅለን ስጕምታተይከ ኣይቘፅረንን ድዩ?”

⁵“ኣነ ብሓሰት ዝነብር እንተ ነይረ፥ እግረይውን ንምትላል ጐይዩ እንተ ኾይኑ፥

⁶እግዚኣብሄር ብቕኑዕ ሚዛን ይምዘነኒ፤ ንፁህ ምዃነይ ከዓ ኽፈልጥ እዩ።

⁷ኣካይዳይ ካብ ቅኑዕ መንገዲ እንተ ዘምቢሉ፥ ዓይነይ ዝረአዮ ልበይ ተመንይዎ እንተ ኾይኑ፥ ኣእዳወይውን ብሓጢኣት ረሲሐን እንተ ኾይነን፥

⁸ነቲ ዝዘርኦ ኻልእ ይብልዓዮ፤ ኵሉ ዝበቍልውን ካብ ሱሩ ይበቘስ።”

⁹“ልበይ ናብ ካልእ ሰበይቲ ጐምጅዩ እንተ ኾይኑ፥ ኣብ ደገ ቤት ብፃየይ ተፀናትየ እንተ ኾይነ፥

¹⁰ሰበይተይ ንኻልእ ሰብ ትጥሓን፤ ካልኦት ሰባትውን ምስኣ ይደቅሱ።

¹¹እዝ ነውሪ እዙይ፥ ወንጀል እዩ፤ ፈረድቲ እውን ዝቐፅዑሉ በደል እዩሞ።

¹²እዙይ ክሳዕ ሲኦል ዝበልዕ ሓዊ፥ ንዅሉ በቝለይውን ካብ ሱሩ ዘጥፍእ እዩ።”

¹³“ተባዕታይ ባርያይን ኣንስተይቲ ባርያይን፥ ምሳይ ምስተማጐቱ ምጕቶም ንዒቐ እንተ ኾይነ፥

¹⁴እግዚኣብሄር ክፈርደኒ ምስ ተስአ እንታይ ክገብር እየ? ምስ ተቘፃፀረኒኸ፥ እንታይ ክምልሰሉ እየ?

¹⁵እቲ ንኣይ ኣብ ማህፀን ዝፈጠረ፥ ንእኡስ ዝፈጠሮዶ ኣይኮነን? እቲ ኣብ ውሽጢ ማህፀን ዝሰርሐናስ ሓደዶ ኣይኮነን።”

¹⁶“እቲ ምስኪን ለሚኑኒ ኸሊአዮ እንተ ኾይነ፥ ንዓይኒ መበለትውን ከርተት ኣቢለ እንተ ኾይነ፥

¹⁷ቍራስ እንጀራይ በይነይ እንተ በሊዐ፥ እቲ ደኽታም ድማ ኻብኡ እንተይበልዐ ተሪፉ እንተ ኾይኑ፥

¹⁸እኳ ደኣ ንደኽታም ካብ ንእስነተይ ጀሚረ፥ ከም ኣቦ ኾይነ ኣዕበኽዎ፤ ንመበለት ድማ ኻብ ማህፀን ጀሚረ መራሕኽዋ።

¹⁹ንዕሩቕ ሰኣን ክዳን ክጠፍእ፥ ወይ ንድኻ ብዘይ ክዳን ምዃኑ ምስ ረአኽዎ፥

²⁰ካብ ፀጕሪ ኣባጊዐይ ዝተኣልመ ኽዳን ሂበ እንተ ዘየሚቘዮ፥ ንሱ ኸዓ ብምሉእ ልቡ እንተ ዘይመሪቑኒ”

²¹“ኣብ ቤት ፍርዲ ተሰማዕነት ኣለኒ ኢለ፤ ንደኽታም ገፊዐዮ እንተ ኾይነ፥

²²ቅልፅመይ፥ ካብ መንኰበይ ይፈለ፤ ኢደይውን ኣብቲ ዅርናዕ ይሰበር።

²³ናይ እግዚኣብሄር መዓት ኣደንጊፁኒ እዩሞ፥ ኣብ ቅድሚ ግርማኡውን ክቐውም ኣይከኣልኩን።”

²⁴“ንወርቂ ተስፋ ገይረ፥ ንፅሩይ ወርቂውን ‘መተኣማመንየይ ኢኻ’ ኢለዮ እንተ ኾይነ፥

²⁵ኢደይ ሃብቲ ኣምፂኣትለይ ኢለ፥ ተመኪሐ እንተ ኾይነ፥

²⁶ድምቀት ብርሃን ፀሓይ ሪአ፥ ነቲ ኽቡር ኣካይዳ ወርሒውን ጠሚተ እንተ ኾይነ።

²⁷ልበይ ብስዉር ተታሊሉ፥ ኣፈይውን ንኢደይ ስዒሙ እንተ ኾይኑ፥

²⁸ከምዙይ ምግባር ንልዑል እግዚአብሔር ምኽሓድ እዩሞ፥ እዙይ ከዓ ፈራዶ ዝቐፅዑሉ በደል ምዀነ ነይሩ።”

²⁹“ብጕድኣት ፀላእየይ ደስ ኢሉኒ እንተ ኾይኑ፥ መከራ ምስ ወረዶውን ተሓጕሰ እንተ ኾይነ፥

³⁰ግና ብመርገም ንነፍሱ ብምድላይ፥ መልሓሰይ ሓጢኣት ክሰርሕ ኣይፈቐድኩን።

³¹ኣብ ድንኳነይ ዝነብሩ ሰባት ብስጋ ኸፍቱ፥ ዘይፀገበ መን ይርከብ ኢሎም እንተ ዘይኮይኖም፥

³²ገዛይ ንጋሻ ኽፉት ነበረ፤ መፃእተኛ ኣብ ደገ ኣይሓድርን ነይሩ።”

³³“በደለይ ኣብ ጓጓይ ብምሕባእ፥ ሓጥያተይ ከም ሰብ ሰዊረ እንተ ኾይነ፥

³⁴ካብ ብዝሒ ህዝቢ ዝተልዓለ ፈሪሐ፥ ንዕቐት ኣዝማደይ ኣፍሪሑኒ፥ ስቕ ኢለ ናብ ደገ ዘይወፃእኹ እንተ ኾይነ፥”

³⁵“ኣየ! ዝሰምዐኒ እንተ ዝረክብ! እነሆ ፅሕፈት ኢደይ፥ እቲ ዅሉ ዝኽእል ኣምላኽ መልሲ ይመልሰለይ! እቲ ኸሳስየይ ድማ ኽሱ ፅሒፉ እንተ ዘቕርብ!

³⁶ኣብ ማእገረይ ምፆርክዎ፤ ኣኽሊል ገይረውን ኣብ ርእሰይ ምደፋእኽዎ።

³⁷ኵሉ እቲ ዝገበርክዎ መፍለጥክዎ፤ ከም ሓለቓ ኾይነ ኸዓ ምቐረብክዎ ነይረ።”

³⁸“ግራተይ ብኣይ ኣእውያ እንተ ኾይና፥ ትልምታታ ድማ ብሕብረት በኽዮም እንተ ኾይኖም፥

³⁹ንፍሪኣ ብዘይ ዋጋ በሊዐ፥ ንነፍሲ ዋናታታ ኣሕዚነ እንተ ደኣ ኾይነ፥

⁴⁰ሽዑ ኽንዲ ስርናይ ክርዳድ፥ ክንዲ ስገም ከዓ ሰዓዕ ተብቍለለይ።” ዘረባ ኢዮብ ኣብዙይ ተፈፀመ።