Read መ/ቅዱስ ትግርኛ, Tigrigna Bible, 1 ኢዮብ 32 Bible Online

ኢዮብ 32 - መ/ቅዱስ ትግርኛ, Tigrigna Bible, 1 bible

ኢዮብ 32

¹ኢዮብ “ፃድቕ ሰብ እየ” ኢሉ ዝኣምን ስለ ዝነበረ፥ እቶም ሰለስተ ሰብኡት ምላሽ ምሃብ ሓደጉ።

²ሽዑ፥ ወዲ ባርክኤል ካብ ዓሌት ቡዝ ካብ ወገን ራም ዝኾነ ኤሊሁ ብቝጥዓ ነደደ፤ ካብ እግዚኣብሄር ንላዕሊ ኢዮብ ንባዕሉ ኣፅዲቑ ነበረሞ፥ ኣበርቲዑ ዀረየሉ።

³እቶም ሰለስተ ፈተውቱ ግና ምላሽ ስለ ዝሰኣኑሉ፥ ኣብ ኢዮብውን ስለ ዝፈረዱ፥ ኤሊሁ ዀረየሎም።

⁴ንኤሊሁ ብዕድመ ይዓብይዎ ስለ ዝነበሩ ንሳቶም ክዛረቡ እንተለዉ ኤሊሁ እንተይተዛረበ ፀንሐ።

⁵ኤሊሁ፥ ሰለስቲኦም ዝምልስዎ ስኢኖም ምስ ረአየ፥ ተቘጥዐ።

⁶ኤሊሁ ወዲ ባርክኤል ካብ ዓሌት ቡዝ ድማ ኸምዙይ ኢሉ ተዛረበ፦ “ኣነ ብዕድመ ንእሽተይ እየ፤ ንስኻትኩም ግና ዓበይቲ ኢኹም፤ ስለዙይ ከዓ ሓፊረ ኽሳዕ ሕዚ ስቕ በልኩ፤ ሓሳበይውን ኣይገለፅኩልኩምን።

⁷ኣነ፥ እተን መዓልቲታት ይዛረባ፤ ብዝሒ ዓመታት ከዓ ጥበብ የፍልጥ፥ ኢለ ሓሰብኩ።

⁸ግና ኣብ ውሽጢ ሰብ መንፈስ ኣሎ፤ ግና መንፈስ ናይቲ ዅሉ ዝኽእል ኣምላኽ እዩ ምስትውዓል ዝህብ።

⁹ዓበይቲ ጥራሕ ኣይኮኑን ጠቢባን ዝኾኑ፥ ሽማግለታትውን ኣይኮኑን ንቕኑዕ ዘስተውዕሉ።

¹⁰ስለዙይ፥ ኣነውን ‘ፍልጠት ክገልፅስ ስምዑኒ’ እብል ኣለኹ።”

¹¹“እንሆ፥ ንቓልኩም ብትዕግስቲ ተፀበኹ፤ ቃላት ክትሓርዩ እንተለኹምውን፥ ንቑም ነገርኩም ፅን በልኩ።

¹²ከምኡውን ልቢ በልኩ፤ እንሆ ኻባኻትኩም ንኢዮብ ዘረድአ፥ ወይ ንቓሉ መልሲ ዝሃበ የለን።

¹³ኢዮብ ግቡእ መልሲ ኽህቦ ዝኽእል፥ ንስኻትኩም ጥበብ ረኺብና ኣለና፥ እግዚኣብሄር እምበር ሰብ ኣየሸንፎን፥ ከይትብሉ ተጠንቀቑ።

¹⁴ኢዮብ ምሳኻትኩም እምበር ምሳይ ኣይተዛረበን፤ ከምቲ ዘረባኹም ገይረ ኸዓ ኣይምልሰሉን እየ።”

¹⁵“ንሳቶም ደንጊፆም ዘረባ ስኢኖም ኣለዉ፤ እንታይ ከም ዝዛረቡ ኸዓ ጠፊእዎም ኣሎ።

¹⁶ንሳቶም ሓደኳ ኣይተናገሩንሞ፥ ደው ኢሎምውን ኣይመለሱንሞ፥ ኣነ ብትዕግስቲ ኽፅበ ድየ?

¹⁷ኣነውን ብታራይ ክምልስ፥ ሓሳበይ ድማ ኽገልፅ እየ።

¹⁸ቃል መሊኡኒ ኣሎሞ፥ እቲ ኣብ ውሽጠይ ዘሎ መንፈስ ድማ ይደፋፍአኒ ኣሎ።

¹⁹እንሆ ውሽጠይ ከም ሕቱም ወይኒ፥ ብጕዕሽ ወይኒ ኽቕደድ ከም ዝቐረበ ሓርቢ እዩ።

²⁰ቁሩብ ክዛረብ እሞ ኸተንፍስ፥ ከናፍረይ ከፊተ፥ ክምልስ ክጅምር እየ።

²¹ንገፅ ሰብ ግና ኣየዳሉን እየ፤ ንሰብውን ኣየቀባጥርን እየ።

²²ምቅብጣር እኳ ኣይፈቱን እየ፤ ከምኡ እንተ ዝኸውንማ፥ ፈጣሪየይ ቀልጢፉ ካብ ህይወተይ ምፈለየኒ ነይሩ።”