Read መ/ቅዱስ ትግርኛ, Tigrigna Bible, 1 ኢዮብ 33 Bible Online

ኢዮብ 33 - መ/ቅዱስ ትግርኛ, Tigrigna Bible, 1 bible

ኢዮብ 33

¹“ኦ ኢዮብ፥ ሕዚ ግና ንዘረባይ ስማዕ፤ ንዅሉ ቓለይ ከዓ ፅን ክትብሎ እልምነካ ኣለኹ።

²እንሆ ኣፈይ እኸፍት ኣለኹ። መልሓሰይውን ኣብ ትንሓገይ ትዛረብ ኣላ፤

³ቃለይ ቅንዕና ልበይ የውፅእ፤ ከናፍረይ ከዓ ነቲ ዝፈልጥዎ ብቕንዕና ይናገሩ ኣለዉ።

⁴መንፈስ እግዚኣብሄር እዩ ዝፈጠረኒ፤ እስትንፋስ እቲ ዅሉ ዝኽእል ኣምላኽ እዩ ህይወት ዝሃበኒ።”

⁵“እንተ ኽኢልካስ መልሰለይ፤ ተዳሊኻ ኣብ ቅድመይ ቁም።

⁶እንሆ፥ ኣነ ኣብ ቅድሚ እግዚኣብሄር ከማኻ እየ፤ ኣነውን ካብ መሬት ዝተፈጠርኩ እየ።

⁷ስለዙይ ግርማይ ኣየፍርሐካን፤ ኢደይውን ኣይኸብደካን እዩ።”

⁸“ኣብ እዝነይ ተዛሪብካ ኢኻ፤ ንድምፂ ቓልካውን ሰሚዐዮ ኣለኹ፤ ከምዙይ ድማ በልካ፦

⁹‘ኣነ በደል የብለይን፤ ንፁህ እየ፤ ሓጢኣትውን የብለይን።

¹⁰እንሆ፥ ምኽንያት ኣባይ ረኺቡ፤ ከም ፀላኢኡውን ይሪአኒ ኣሎ።

¹¹ነእጋረይ ኣብ ጕንዲ ኣሰረን፤ ንዅለን መንገድታተይውን ይቋመተን ኣሎ’ ትብል ኣለኻ።”

¹²“እንተ ኾነ እግዚኣብሄር ካብ ሰብ ይበልፅ እዩ እሞ፥ በዙይስ ትኽክል ኣይኮንካን ኢለ እምልሰልካ ኣለኹ።

¹³‘ንዅሉ ቓለይ ኣይምልሰለይን’ እናበልካ፥ ስለ ምንታይ ኢኻ ምስኡ እትከራኸር?

¹⁴ሰብ ደኣ ኣየቕልበሉን እዩ እምበር፥ እግዚኣብሄርስ ብሓደ መንገዲ ወይ ብኻልእ ይዛረብ እዩ።

¹⁵ ሰብ ከቢድ ድቃስ ምስ ወደቖ፥ ኣብ ዓራቱውን ምስ ደቀሰ፥ ኣምላኽ ብሕልምን ብናይ ለይቲ ራእይን ይዛረቦ።

¹⁶ንሰብ ይግስፆ፤ ንሱ ኸዓ ንእዝኒ ሰብ ይኸፍቶ፤ ብተግሳፁውን የደንግፆ።

¹⁷ንሰብ ሓጢኣት ካብ ምግባር ምእንቲ ኽመልሶ፥ ካብ ትዕቢትውን ክስውሮ፥

¹⁸ንነፍሱ ኻብ ጕድጓድ፥ ብሰይፊ እውን ንኸይጠፍእ ንህይወቱ ይሕሉ።

¹⁹ሰብ ኣብታ ምድቃሱ ብስቅያት፥ ኣብ ኵሉ ዓፅሙ ብቓንዛ ይቕፃዕ።

²⁰ሽዑ ህይወቱ ንእንጀራ፥ ነፍሱውን ንጥዑም ምግቢ ትፀልእ።

²¹ስጋኡ ዘይረአ ኽሳዕ ዝኸውን ስጋኡ ይማስን፤ ተሸፊኑ ዝነበረ ኣዕፅምቱ ይግለፅ።

²²ነፍሱ ናብ መቓብር፥ ህይወቱውን ናብ ቀተልቲ ትቐርብ።”

²³“ካብ ኣሽሓት መላእኽቲ ሓደ ማእኸላይ እንተ ዝርከብ፥ ንሰብውን እታ ቕንዕቲ መንገዲ እንተ ዘፍልጦ፤

²⁴ራህሪሁሉውን ‘ቤዛ ተረኺቡሉ እዩ እሞ፥ ናብ መቓብር ካብ ምውራድ ኣድሕኖ’ እንተ ዝብሎ፥

²⁵ሽዑ ስጋኡ ኸም ናይ ህፃን ስጋ ይልምልም፤ ናብ መዓልቲታት ጕብዝናኡ ይምለስ።

²⁶ናብ እግዚኣብሄር ይፅሊ፤ ንሱውን ሞገስ ይህቦ፤ ገፁውን ብሓጐስ የርእዮ፤ ንሰብውን ፅድቁ ይምልሰሉ።

²⁷ሽዑ ንሱ ‘ኣነ በደልኩ፤ ነቲ ቕኑዕውን ኣቐይነንኩ፤ ኣምላኽ ግና ኸም ዝግብአኒ ኣይፈደየንን፤ ንነፍሰይ ናብ መቓብር ከይትወርድ ኣድሒኑዋ እዩ፤ ህይወተይውን ብርሃን ትርኢ ኣላ’ ኢሉ ኣብ ቅድሚ ሰብ ይዝምር።”

²⁹“እግዚኣብሄር ነዝ ዅሉ፥ ክልተ ጊዜ ሰለስተ ጊዜ ምስ ሰብ ይገብሮ።

³⁰እዙይውን ንነፍሱ ኻብ ጕድጓድ ንኽመልስ፥ ብብርሃን ህያዋንውን ንኸብርህ እዩ።”

³¹“ኢዮብ፥ እምበኣር ኣስተውዒልካ ስምዐኒ፤ ስቕ በል እሞ ኣነ ኽዛረብ እየ።

³²እትብሎ እንተ ሃልዩካ ግና መልሰለይ፤ ክትፀድቕ እደሊ እየሞ ተናገር።

³³እንተ ዘይኮነ ነኣይ ፅን ኢልካ ስምዐኒ፤ ኣነ ድማ ጥበብ ክምህረካ እየ።”