Read መ/ቅዱስ ትግርኛ, Tigrigna Bible, 1 ኢዮብ 34 Bible Online

ኢዮብ 34 - መ/ቅዱስ ትግርኛ, Tigrigna Bible, 1 bible

ኢዮብ 34

¹ኤሊሁ ብምቕፃል ከምዙይ ኢሉ ተዛረበ፦

²ኣቱም ጠቢባን፥ እስኪ ዘረባይ ስምዑ፤ ኣቱም ፈላጣትውን፥ ናባይ ኣቕልቡ።

³ከምቲ ትሕናግ ንብልዒ ዘስተማቕሮ፥ እዝኒ ድማ ንዘረባ ይፈልዮ እዩሞ።

⁴ቅኑዕ ዝኾነ ነገር ንምረፅ፤ ኣብ ማእኸልና ፅቡቕ ነገር ንፍለጥ።

⁵ኢዮብ፥ ኣምላኽ ደኣ ፍትሒ ኸልአኒ እምበር፥ ኣነስ ፃድቕ እየ፤

⁶ቅኑዕ እንተለኹ ኸም ሓሳዊ ተቘፀርኩ፤ ዝኾነ እንተይበደልኩ፥ ቍስለይ ዘይሓዊ እዩ ተብሂሉ ኣሎ።

⁷ንላግፂ ኸም ማይ ዝሰቲ፥ ከም ኢዮብ ዝበለ ሰብ ኣበይ ይርከብ?

⁸“ሰብ ፍቓድ እግዚኣብሄር እንተ ተኸተለ፥ ዝኾነ እኳ ኣይጠቕሞን እዩ” ኢሉ እዩ እሞ፥ መሓዛ ገበርቲ ኽፉእን ምስቶም ሓጥኣን ዝሓበረን ሰብ እዩ።

¹⁰ስለዙይ ኣቱም ሰብ ኣእምሮ፥ እስኪ ስምዑኒ፤ ክፍኣት ክገብርስ፥ ካብ እግዚኣብሄር፥ በደልውን ክሰርሕስ ካብቲ ዅሉ ዝኽእል ኣምላኽ ይርሓቕ።

¹¹ ንሰብ ከከም ግብሩ ይፈድዮ፤ ንነፍሲ ወከፍ ከከም ኣካይዳኡ ገይሩ ዓስቢ ይህቦ።

¹²ብርግፅ እግዚኣብሄር ክፉእ ኣይገብርን፤ እቲ ዅሉ ዝኽእል ድማ ፍትሒ ኣየቐይንን እዩ።

¹³ንምድሪ ሓደራ ዝሃቦ መን እዩ? ንዅሉ ዓለምከ ኣብ ልዕሊኡ ዝገበረ መን እዩ?

¹⁴ንሱ ንልቡ ናብ ባዕሉ እንተ ዝምልስ፥ መንፈሱን እስትፋሱን ናብ ባዕሉ እንተ ዝእክብ፥

¹⁵ኵሉ ስጋ ዝለበሰ ሓቢሩ ምጠፍአ፤ ሰብ ከዓ ናብ መሬት ምተመለሰ ነይሩ።

¹⁶ኢዮብ፥ መስተውዐሊ እንተ ዄንካ ነዙይ ስማዕ፤ ናብ ድምፂ ቓለይውን ኣቕልብ።

¹⁷ብሓቂ ፅድቂ ዝፀልእዶ ኽገዝእ ይኽእል እዩ? ነቲ ፃድቕን ሓያልን ዝኾነኸ ንስኻዶ በደለኛ ትገብሮ ኢኻ?

¹⁸ዝኾነ ሰብዶ “ንንጉስ በዳሊ ኢኻ” ነሕሉቕ ከዓ “ክፉኣት ኢኹም” ይብል እዩ?

¹⁹ኵላቶም ስራሕ ኣእዳዉ እዮም እሞ፥ ገፅ ኣሕሉቕ ሪኡ ኣየዳሉን እዩ፤ ንሃብታም ካብ ድኻ ኣብሊፁ ኣይሪኦን እዩ።

²⁰ንሳቶም ከም ቅፅበት ዓይኒ ፍርቂ ለይቲ ይሞቱ፤ እቲ ህዝቢ ተንቀጥቂጡ ይሓልፍ፤ ሓያላትውን፥ ብዘይ ኢድ ይንቀሉ።

²¹ኣዒንቱ ኣብ መንገዲ ሰብ እየንሞ፥ ንዅሉ ስጕምቶም ይሪኦ እዩ።

²²እቶም ገበርቲ ሓጢኣት ዝሕብኡሉ፥ ፀልማት ወይ ድነ ሞት የለን።

²³ሰብ ኣብ ቅድሚ እግዚኣብሄር ንኽፍረድ ክመፅእ ቆፀራ ኽሕዘሉ ኣየድልዮን እዩ።

²⁴ንሓያላት ብዘይ ምርመራ ይሰባብሮም፤ ክንድኣቶም ከዓ ኻልኦት የቕውም።

²⁵ንተግባሮም ይፈልጦ እዩ፤ ንኽደቁውን ብለይቲ ይገለባብጦም።

²⁶ሰባት እናረአዩ ኸም ክፉኣት ይወቕዖም።

²⁷እዙይ ከዓ ንእኡ ኻብ ምኽታል ስለ ዘግለሱ፥ ንዅለን ትእዛዛቱውን ስለ ዝነዓቑ እዩ።

²⁸ንሳቶም ብኽያት ድኻ ናብ እግዚኣብሄር ከም ዝበፅሕ ስለ ዝገበሩ፥ እግዚኣብሄር ከዓ ገዓር ውፁዓት ሰምዐ።

²⁹ክፉእ ምእንቲ ኸይነግስ፥ ንህዝቢ ኸዓ መፃወዲያ ኸይኸውንስ፥ ንህዝቢ ወይ ንሓደ ሰብ ዕረፍቲ እንተ ሃቦ፥ መን እዩ ዝዅንኖ? ገፁ እንተ ሰወረኸ መን እዩ ዝሪኦ?

³¹ኣነ ንእግዚኣብሄር እንተይበደልኩ ቅፅዓት ተቐበልኩ፤

³²ንዘይሪኦ ነገር ንስኻ መሃረኒ፤ በዲለ እንተ ኾይነውን መሊሰ ኣይብድልን ዝብሎ መን እዩ?

³³ብሓቂ ንስኻ ኣቢኻዮ ኢኻሞ፥ ከምቲ እትደልዮ ገይሩዶ ኽፈዲ እዩ? እትመርፅ ንስኻ ኢኻ እምበር ኣነ ኣይኮንኩን፤ ስለዙይ እትፈልጦ ተናገር።

³⁴ኵሎም ዝሰምዑኒ ጥበበኛታት፥ መስተውዓልቲውን ከምዙይ ይብሉኒ፦ “ኢዮብ ብዘይ ፍልጠት እዩ ዝዛረብ፤ ቃላቱ ብዘይ ኣእምሮ እዩ” ኽብሉኒ እዮም።

³⁶ኣብ ቅድሚ ዅልና ድማ ብኢድ የጣቕዕ ኣሎ፤ ኣብ ልዕሊ እግዚኣብሄርውን ቃል የብዝሕ ኣሎሞ፥ ንሱ ኸምቶም ክፉኣት ሰባት እዩ ዝምልስ እሞ፥ ኢዮብ ኣበይሞ ኽሳዕ መወዳእታ እንተ ዝፍተን!