Read መ/ቅዱስ ትግርኛ, Tigrigna Bible, 1 ኢዮብ 35 Bible Online

ኢዮብ 35 - መ/ቅዱስ ትግርኛ, Tigrigna Bible, 1 bible

ኢዮብ 35

¹ኤሊሁ መሊሱ ኸምዙይ ኢሉ ተዛረበ፦

²እዙይ ፅድቂ ኸም ዝኾነዶ ትሓስብ ኣለኻ? ወይ ከዓ ኣብ ቅድሚ እግዚኣብሄር “ፃድቕ እየዶ” ትብል ኣለኻ?

³ንስኻ እንታይ ጥቕሚ ኣለካ? “ሓጢኣት ሰሪሐ ኻብ ዝረኽቦ ብዝበለፀ፥ ሓጢኣት እንተ ዘይሰሪሐ እንታይ እረብሕ?” ኢልካ ጠይቕካ ኢኻሞ።

⁴ነዙይስ ኣነ ኽምልሰልካ፤ ኣነ ንኣኻን ምሳኻ ንዘለዉ ብፆትካን ክምልስ እየ።

⁵እስኪ ኣዒንትኻ ናብ ሰማይ ኣቢልካ ጠምት፤ ነቲ ኻባኻ ልዕል ዝበለ ደመናውን ተመልከቶ።

⁶ሓጢኣት እንተ ገበርካ፥ እንታይ ትጐድኦ? በደልካ እንተ በዝሐኸ እንታይ ትገብሮ?

⁷ፃድቕ እንተ ኾንካ እንታይ ትህቦ? ካብ ኢድካ ዝቕበሎኸ እንታይ እዩ?

⁸ ሓጢኣትካ ነዝ ከማኻ ዝበለ ሰብ እዩ ዝጐድእ፤ ፅድቅኻውን ንወዲ ሰብ እዩ ዝጠቕም።

⁹ካብ ብዝሒ ግፍዒ ዝተልዓለ ሰባት የእውዩ፤ ካብ ቅልፅም ሓያላት ዝተልዓለውን ዘናግፍ ንምርካብ ይፅውዑ።

¹⁰ግና ብለይቲ መዝሙር ዝህብ፥ ካብ እንስሳት ምድሪ ብዝበለፀ ዝምህረና፥ ካብ ኣዕዋፍ ሰማይውን ኣብሊፁ ጥበበኛታት ዝገብረና፥ ፈጣሪየይ እግዚኣብሄር ኣበይ እዩ ዝብል የለን።

¹²ኣብኡ ስለ ትዕቢት ክፉኣት ሰባት የእውዩ፤ ንሱ ግና ኣይምልሰሎምን።

¹³ብሓቂ እግዚኣብሄር ንኸንቱ ነገር ኣይሰምዕን፤ እቲ ዅሉ ዝኽእል ኣምላኽ ኣይምልከቶን።

¹⁴ምናዳ “ኣይሪኦን” እንተ በልካ ደኣ ኸመይ ኢሉ ኽሰምዐካ! ፍትሒ ኣብ ቅድሚኡ ኣሎ፤ ንስኻውን ተፀበዮ።

¹⁵እግዚኣብሄር ተቘጢዑ ንሰብ ዘይቐፅዖ፤ ንሓጢኣትውን ሸለል ዝብሎዶ፥ ይመስለካ ኣሎ?

¹⁶ስለዙይውን ኢዮብ ብኸንቱ ኣፉ ይኸፍት፤ ብዘይ ፍልጠት ከዓ ዘረባ የብዝሕ።