Read መ/ቅዱስ ትግርኛ, Tigrigna Bible, 1 ኢዮብ 36 Bible Online

ኢዮብ 36 - መ/ቅዱስ ትግርኛ, Tigrigna Bible, 1 bible

ኢዮብ 36

¹ኤሊሁ መሊሱ ኸምዙይ በለ፦

²ኢዮብ፥ ገና ስለ እግዚኣብሄር ዝንገር ኣለኒ እሞ፥ ቁሩብ ተፀበየኒ፤ ኣነውን ከፍልጠካ እየ።

³ንፍልጠተይ ካብ ርሑቕ ከምፅኦ እየ፤ ፈጣሪየይውን ፃድቕ እዩ እብል ኣለኹ።

⁴ብሓቂ፥ ዘረባይ ሓሰት ኣይኮነን፤ ብፍልጠትውን ፍፁም ዝኾነ ምሳኻ ኣሎ።

⁵እንሆ፥ እግዚኣብሄር ሓያል እዩ፤ ንሓደ እኳ ኣይንዕቕን እዩ፤ ንሱ ብብርቱዕ ምስትውዓሉ ሓያል እዩ።

⁶ንሱ ንህይወት ሓጥኣን ኣየድሕንን እዩ፤ ንዝተገፍዑ ግና ፍትሒ ይህብ።

⁷ኣዒንቱ ኻብ ፃድቃን ኣየርሕቕን፤ ንዘለኣለምውን ምስ ነገስታት ኣብ ዙፋን የቐምጦም፤ ንሳቶምውን ልዕል ልዕል ይብሉ።

⁸ግና ሰባት ብሰንሰለት እንተ ተኣስሩ፥ ብገመድ ሽግርውን እንተ ተትሓዙ፥

⁹ንሱ ንተግባሮምን፥ ምትሕልላፎምን፥ ነቲ ብትዕቢት ዝገበርዎን የፍልጦም።

¹⁰ተግሳፁ ንኽሰምዑ ኣእዛኖም ይኸፍተሎም፤ ካብ ሓጢኣቶም ክምለሱውን ይእዝዞም።

¹¹እንተ ሰሚዖምዎ እሞ እንተ ተገዝእዎ፥ መዓልትታቶም ብሰናይ፥ ዓመታቶም ድማ ብደስታ ይፍፅሙ።

¹²እንተ ዘይሰምዑ ግና፥ ብሰይፊ ኽጠፍኡ፥ ብዘይ ፍልጠትውን ክሞቱ እዮም።

¹³እቶም ግብዛት ግና ቝጥዓ የብዝሑ፤ እንተ ኣሰሮም እኳ ኣየእውዩን።

¹⁴ነፍሶም ብሸዊታ ትቕሰፍ፤ ህይወቶም ከዓ ኣብ ማእኸል ርኹሳት ትጠፍእ።

¹⁵ንሽጉራት ብሽግሮም ገይሩ የድሕኖም፤ በቲ ጭንቀቶምውን ንእዝኖም ይኸፍቶ።

¹⁶ከምኡ ድማ ንኣኻ ኻብ ኣፍ መከራ ኸናግፈካ፥ ናብቲ ጭንቂ ዘይብሉ ገፊሕ ቦታ ኸውፅአካ፥ ስቡሕ ማእዲውን ከቕርበልካ እዩ።

¹⁷ንስኻ ግና ብፍርዲ በደልቲ ዝተመላእኻ ኢኻ፤ ፍርድን ፍትሕን ሒዘናኻ እኔዋ።

¹⁸ኵራ ናብ ፀርፊ ኸይደፋፍአካ ተጠንቀቕ፤ ብዝሒ ጉቦ ኸዓ ኣየጋጊኻ።

¹⁹ሃብትኻን ኵሉ ምብርታዕ ሓይልኻን፥ ካብ ጭንቂ ኸውፅአካዶ ይኽእል እዩ?

²⁰ነታ ኣህዛብ ካብ ቦታኦም ዝውሰዱላ ለይቲ ኣይትመነያ።

²¹ካብ መከራ ነዙይ መሪፅካ ኢኻሞ፥ ናብ ሓጢኣት ከይትምለስ ተጠንቀቕ።

²²እንሆ፥ እግዚኣብሄር ብሓይሉ ልዕል ዝበለ ነገር ይገብር፤ ከምኡ ገይሩ ዝምህርከ መን ኣሎ?

²³ንኣምላኽ መንገዲ ዝሓበረሉ መን እዩ? “ሓጢኣት ጌርካ” ዝብሎኸ መን እዩ?

²⁴ነቲ ሰባት ዝወደስዎ ስራሑ፥ ንኽተኽብርውን ሕሰብ።

²⁵ኵሎም ሰባት እዮም ዝጥምትዎ፤ ነፍሲ ወከፍ ድማ ኣማዕድዩ ይሪኦ።

²⁶እንሆ እግዚኣብሄር ዓብዪ እዩ፤ ንሕናውን ኣይንፈልጦን፤ ቍፅሪ ዘመኑውን ኣይምርመርን።

²⁷ንነጠብጣብ ማይ ናብ ላዕሊ ይስሕቦ፤ ካብ ግመውን ዝናም የዝንም።

²⁸ደመናት የዝንሙ፤ ኣብ ልዕሊ ሰባትውን ብብዝሒ የንጠብጥቡ።

²⁹ንምዝርጋሕ ደመናን፥ ንነጐድጓድ መሕደሪኡን ዘስተውዕሎ መን እዩ?

³⁰ኣብ ዙርያኡ ብርሃኑ ይዝርግሕ፤ ንመዓሙቝ ባሕሪ እውን ይሽፍኖ።

³¹በዝ ኸምዙይ ኣብ ኣህዛብ ይፈርድ፤ ምግቢ ድማ ኣበርኪቱ ይህቦም።

³²ነእዳዉ ብብርሃን ይስውረን፤ ኣብ ልዕሊ ፀላእቱ ኽድይብ ድማ ይእዝዞ።

³³ድምፂ ነጐድጓድ ምእንታኡ ይናገር፤ በዙይ ድማ እንስሳት መሸምቦባ ኸም ዝቐረበ ይፈልጡ።